لي كىچياڭ باس ءۋازىر حۇڭسىنعا قۇتتىقتاۋ تەلەگرامماسىن جولدادى
شينحۋا اگەنتتىگىنىڭ 8 - ايدىڭ 15 - كۇنى بەيجيڭنەن بەرگەن حابارى. ج ك پ ورتالىق كوميتەتىنىڭ باس شۋجيى شي جينپيڭ كامبودجا حالىق پارتياسىنىڭ ءتوراعاسى حۇڭسىنعا قۇتتىقتاۋ تەلەگرامماسىن جولداپ، ونىڭ باسشىلىعىنداعى كامبودجا حالىق پارتياسىنىڭ 6 - كەزەكتى پارلامەنت سايلاۋىندا جەڭىسكە جەتكەنىن قۇتتىقتادى.
شي جينپيڭ قۇتتىقتاۋ تەلەگرامماسىندا بىلاي دەدى: سوڭعى جىلداردا باس ءۋازىر حۇڭسىن باستاعان كامبودجا پاتشالىق ۇكىمەتىنىڭ دۇرىس باسشىلىعىندا كامبودجانىڭ ساياسيىنىڭ ورنىقتى بولعانىن، ەكونوميكاسىنىڭ تەز دامىعانىن، حالىقاراداعى مارتەبەسىنىڭ ۇزدىكسىز وسكەنىن، ءار سالا قۇرىلىستارىندا قۋانارلىق جەتىستىكتەرگە قول جەتكىزگەنىن قۋانا كورىپ وتىرمىز، ءبىز مۇنى جوعارى باعالايمىز. ءبىز كامبودجا حالىق پارتياسىنىڭ كامبودجا حالقىن ۇزدىكسىز ىنتىماقتاستىرىپ، باستاپ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرىپ، ەكونوميكانىڭ دامۋىن جەبەپ، حالىق تۇرمىسىن ۇزدىكسىز جاقسارتىپ، ۇلتتار ىنتىماعىن ىلگەرىلەتىپ، كامبودجا ەلىنىڭ گۇلدەنۋى مەن حالقىنىڭ باقىتتى بولۋىنا، ءوڭىردىڭ ورنىقتىلىعى مەن دامۋىنا جاڭا ءارى ءتىپتى زور ۇلەس قوساتىندىعىنا سەنەمىز. جۇڭگو كوممۋنيستىك پارتياسى كامبودجا حالىق پارتياسىمەن دوستىق سەلبەستىك قاتىناسقا بارىنشا ءمان بەرەدى، ەكى پارتيا قارىم - قاتىناسىنىڭ ەكى ەل قاتىناسىنا ساياسي جەتەكشىلىگىن كۇشەيتىپ، پارتيانى جونگە سالۋ، مەملەكەتتى جونگە سالۋ تاجىريبەلەرى جاعىندا اۋىس - كۇيىس جاساۋدى كۇشەيتىپ، جۇڭگو مەن كامبودجانىڭ جالپى بەتتىك ستراتەگيالىق سەلبەستىك سەرىكتەستىك قاتىناسىنىڭ ۇزدىكسىز العا دامۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى بىرگە ىلگەرىلەتىپ، ەكى ەل مەن ەكى ەل حالىقتارىن باقىتقا كەنەلتىپ، ءوڭىر مەن دۇنيە ءجۇزىنىڭ گۇلدەنىپ، العا باسۋىن جەبەۋدى قالايدى.
سول كۇنى مەملەكەتتىك كەڭەستىڭ زۇڭليى لي كىچياڭ دا تەلەگرامما جولداپ كامبودجانىڭ باس ءۋازىرى حۇڭسىندى قۇتتىقتادى. لي كىچياڭ قۇتتىقتاۋ تەلەگرامماسىندا بىلاي دەدى: جۇڭگو مەن كامبودجا جاقسى كورشى، ابزال سەرىكتەر. جۇڭگو كامبودجانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن بۇرىنعىداي قولدايدى، ەلدەرىڭىزدىڭ ورنىقتىلىقتى قورعاۋىن، دامۋدى جەدەلدەتۋىن، حالىق تۇرمىسىن جاقسارتۋىن قولدايدى. ءبىز كامبودجامەن بىرگە جۇڭگو مەن كامبودجانىڭ ديپلوماتيالىق قاتىناس ورناتقاندىعىنىڭ 60 جىلدىعىن وراي ەتىپ، ەكى ەلدىڭ جالپى بەتتىك ستراتەگيالىق سەلبەستىك سەرىكتەستىك قاتىناسىنىڭ تىڭ ساتىعا كوتەرىلۋىن ىلگەرىلەتىپ، ستراتەگيالىق مانگە يە تاعدىرلاس ورتاق تۇلعانى بىرگە قۇرۋدى قالايمىز.
