ءتىلشىمىز ما ينيڭ
ءۇرىمجى ەكونوميكالىق، تەحنيكالىق اشۋ رايونىنا ورنالاسقان (توۋتۇنحى رايونى) شينجياڭ جۇمساق بولشەك باقشاسىنا باراتىن بولساڭىز، چۋاڭكى كوفەحاناسى، چۋاڭكى جاتاقحاناسى سياقتىلاردىڭ تولىق سەپتەلگەندىگىن كورەسىز، باقشا رايونى كىدا شۇنفي، حۇڭليان، عارىش ينفورماتسياسى، بەيدوۋ تيانحۇي سياقتى اۆتونوميالى رايونىمىزداعى ءبىر توپ ءتۇيىندى جۇمساق بولشەك كاسىپورىندارىن ءساتتى ەنگىزىپ، جىبەك جولى ەكونوميكالىق بەلدەۋى وزەكتى رايونىنىڭ «بەس ۇلكەن ورتالىعى» قۇرىلىسىن ارقاۋ ەتىپ، جۇمساق بولشەك پەن ينفورماتسيا كاسىپتەرىن شوعىرلاندىرۋداعى، شارۋاشىلىق قۇرۋداعى، جاڭالىق اشۋداعى ارنايىلاندىرىلعان جۇمساق بولشەك باقشاسىن كۇش سالا قۇردى.
قازىرگى تاڭدا، جىبەك جولى ەكونوميكالىق بەلدەۋىنىڭ وزەكتى رايونى بولعان شينجياڭ ينفورماتسيالاندىرۋ قۇرىلىسىن قۇلشىنا ىلگەرىلەتىپ، ءىرى ساندى مالىمەتتى ارقاۋ ەتە ەكونوميكانىڭ جوعارى ساپالى دامۋىنا جەتەكشىلىك ەتىپ، ءبىر - بىرىمەن بايلانىسقان «سيفرلى جىبەك جولىن» قۇرىپ، جىبەك جولى ەكونوميكالىق بەلدەۋىنىڭ وزەكتى رايونىن قۇرۋدى «سيفىرلى» ەنەرگيامەن قامدادى.
ۇلكەن ساندى مالىمەت شينجياڭنىڭ «زەردەلى داۋىرگە» اياق باسۋىن ىلگەرىلەتتى
«ەگەر قارامايلى قالاسىنىڭ الىس ارالىقتى ەمدەۋ بويىنشا قىزمەت كورسەتۋ تەحنيكاسى بولماسا، مەن سول جىلدارى ەمدەلۋگە 60 مىڭ يۋانعا تاياۋ كوپ اقشا جۇمساۋشى ەدىم، ۇلكەن ساندى مالىمەتتىڭ بىزگە قولايلىلىق تۋدىرعاندىعىنا العىس ايتامىن». 8 - ايدىڭ 8 - كۇنى شاعانتوعاي اۋدانى قارابۋرا اۋىلى جالعىزاعاش قىستاعىنىڭ تۇرعىنى گۇلنار ءوز ءۇيىنىڭ شارۋالار شاتتىعى ساياجايىندا قازاقتىڭ اسەم ۇلتتىق بيىنە باسىپ، ساياحاتشىلاردى قارسى الدى.
2015 - جىلى 10 - ايدىڭ 22 - كۇنى توسىن تۋىلعان قاتىناس شىرعالاڭىندا گۇلناردىڭ اياعى كوپ جەردەن سىنادى. جاراقاتى اۋىر بولعاندىقتان شاعانتوعاي اۋداندىق حالىق شيپاحاناسى قارامايلى قالالىق سەنترلى شيپاحانانىڭ سۇيەك اۋرۋلار بولىمىمەن بايلانىس جاسايدى. قارامايلى قالاسىنىڭ الىس ارالىقتى ەمدەۋ تۇعىرى ارقىلى قارامايلى قالالىق سەنترلى شيپاحانانىڭ سۇيەك اۋرۋلارى ءبولىمىنىڭ ماماندارى گۇلناردىڭ CT كەسكىنى سياقتى تەكسەرۋ ماتەريالدارىن تاپتىشتەي كورىپ، كەمەلدى وپەراتسيا جوباسىن جاسايدى. وپەراتسيادان كەيىن گۇلناردىڭ سول جاق اياعى قالپىنا كەلدى. الىس ارالىقتى ەمدەۋ تۇعىرىنىڭ كومەگىنە سۇيەنگەن گۇلنار ەمدەۋ اقىسىن ۇنەمدەۋمەن بىرگە، ەڭ تاماشا ەمدەلۋدەن يگىلىكتەندى.
ۇعىسۋعا قاراعاندا، كەزەكتە قارامايلى قالاسىنداعى بارلىق ەمدەۋ قۇرىلىمدارى سيفرلانۋدى جۇزەگە اسىرعان، قارامايلى قالالىق سەنترلى شيپاحانا تاعى جوعارىدا بەيجيڭ 301 شيپاحانا سياقتى ەل ءىشى - سىرتىنداعى ايگىلى شيپاحانالارمەن، تومەندە قارامايلى وڭىرىندەگى جانە توڭىرەگىندەگى وڭىرلەردىڭ ۋنيۆەرسال شيپاحانالارىمەن تۇيىندەر بويىنشا الىس ارالىقتى بىرىگىپ دياگنوز قويۋ، الىس ارالىقتان وپەراتسياعا جەتەكشىلىك ەتۋ جانە الىس ارالىقتان ءبولىم، كەڭسەلەردى اماناتتاۋ سياقتى قىزمەت كورسەتۋدى ورىستەتكەن.
قارامايلى قالاسىنىڭ بۇلت ەسەپتەۋ كاسىپ باقشاسىندا ۇلكەن ساندى مالىمەت قۇرىلىسى اناعۇرلىم تەزدەپ، ەل ءىشى - سىرتىنداعى نەشە ونداعان وزىق ينفورماتسيالانعان كاسىپورىندار وسى اراعا ىرگە تەپتى، حۋاۋي بۇلت ساندى مالىمەت ورتالىعى، اۆتونوميالى رايوننىڭ ماڭىزدى ساندى مالىمەتتەرىنىڭ وزگە جەرلەردە تۋىلعان اپاتتاردى كوشىرىپ ساقتاۋ ورتالىعى سياقتىلار باقشا رايونىندا قۇرىلىپ ءارى ىسكە قوسىلىپ، مىعىم ۇلكەن ساندى مالىمەت تورتكىل تىزبەگىن قۇرادى. كولەمى مەن قۋاتى باتىس سولتۇستىكتە ءبىرىنشى ورىنعا، بۇكىل ەلدە الدىڭعى قاتارعا ءوتىپ، جىبەك جولى ەكونوميكالىق بەلدەۋى بويىنداعى ەلدەر مەن وڭىرلەرگە بۇلت قىزمەت وتەيتىن قابىلەت ازىرلەدى.
2017 - جىلى شينجياڭ جۇمساق بولشەك باقشاسى رايونىنىڭ ءونىم قۇنى كولەمى ءبىر ميلليارد 367 ميلليون يۋانعا جەتتى، سالىعى 100 ميلليون يۋاندىق ءىرى وتكەلدەن ءوتتى. شينجياڭ جۇمساق بولشەك باقشاسى ورتالىق قالاداعى، اۋەلى بۇكىل شينجياڭداعى جۇمساق بولشەك ينفورماتسياسى كاسىبىنىڭ وزەكتى باقشا رايونىنا، ۇلكەن ساندى مالىمەت كاسىبىندەگى جاڭالىق اشۋعا قىزمەت كورسەتۋ ورتالىعىنا، ينفورماتسيا كاسىبىنىڭ حالىقارالىق اۋىس - كۇيىس سەلبەستىك تەرەزەسىنە اينالىپ، جىبەك جولى ەكونوميكالىق بەلدەۋى وزەكتى رايونىنىڭ «بەس ۇلكەن ورتالىعى» قۇرىلىسىن پارمەندى تەحنيكالىق تىرەكپەن قامدادى.
«جىبەك جولى ەكونوميكالىق بەلدەۋىنىڭ وزەكتى رايونى قۇرىلىسى ارقىلى شينجياڭ ۇلكەن ساندى مالىمەتتىڭ نەگىزدىك قۇرىلعىلارىن قۇلشىنا كەمەلدەندىرىپ، ۇلكەن ساندى مالىمەت كاسىپورىندارىن ىرگە تەبۋگە، زورايۋعا توپتاپ جانە ونى قولداپ، ۇلكەن ساندى مالىمەتتەردىڭ قولدانىلمالى قىزمەت وتەۋ قابىلەتىن ۇزدىكسىز جوعارىلاتىپ، ينفورماتسيالانۋ اۋقىمىندا جاڭا دامۋعا ۇمتىلىس جاسادى»، - دەدى اۆتونوميالى رايوندىق ەكونوميكا - ينفورماتسيالاندىرۋ كوميتەتى پارتيا باسشىلىق گرۋپپاسىنىڭ شۋجيى حۋ كايجياڭ.
ۇلكەن ساندى مالىمەت شەكارا اتتاعان ەلەكتروندى ساۋدانىڭ كاسىپ تىزبەگىن ۇزدىكسىز كەمەلدەندىرۋىنە تىرەك بولدى
حۋبەيدىڭ شايى، شاندۇڭنىڭ ەلەكتروندى اسپابى، شينجياڭنىڭ كيىم - كەشەگى... ورتا ازيا بازارىندا جۇڭگو شينجياڭىنىڭ ۇرىمجىسىنەن كەلگەن يەلينماۋ شەكارا اتتاعان ەلەكتروندى ساۋدا تۇعىرى جەرگىلىكتى تۇرعىندارىنىڭ جەلىدە زات سالىپ الاتىن نەگىزگى سايىتىنىڭ بىرىنە اينالدى.
يەلينماۋ شەكارا اتتاعان ەلەكتروندى ساۋدا تۇعىرىن قۇرۋشى پىڭ حايياڭ 19 جاسىندا سىچۋاننان قازاقستانعا كەلىپ وقىعان، وقۋ تاۋىسقاننان كەيىن ول قىرعىزستاندا 5 جىل قىزمەت ىستەيدى. شەتەلدەگى بىرنەشە جىلدا ول جۇڭگونىڭ ونىمدەرىن شەتەل بازارىنا ەكسپورتتاۋدى ويلايدى.
2007 - جىلى پىڭ حايياڭ الاتاۋ ساعاسىندا سىرتقى ساۋدامەن شۇعىلدانا باستايدى، 2014 - جىلى شەكارا اتتاعان ەلەكتروندى ساۋدا ىستەرىمەن ارالاسىپ، جەلىدە 15 ەلگە باعىتتالعان يەلينماۋ شەكارا اتتاعان ەلەكتروندى ساۋدا تۇعىرىن اشادى.
پىڭ حايياڭ بىلاي دەدى: كاسىپورىن شينجياڭنىڭ جىبەك جولى ەكونوميكالىق بەلدەۋى وزەكتى رايونىن قۇرۋ ماڭىزدى ورايىنا سۇيەنىپ، شەكارا اتتاعان ەلەكتروندى ساۋدا تۇعىرىن اشتى، قازىر ەكسپورتتىق جەتكىزۋشى 7000نان استام كاسىپورىن تىركەۋگە الىندى، ونىمدەر كيىم - كەشەك، قۇرىلىس ماتەريالدارى، شاعىن ماشينا جانە ەلەكتر جابدىقتارى سياقتى سالالارعا سايادى، بىلتىر جەلىدەگى ساۋدا سوماسى 50 ميلليون دوللاردان اسىپ، جىلدىق ارتۋ قارقىنى %30 شاماسىندا بولدى. جۇڭگو - ەۆروپا كەزەكشى پويەزىنىڭ قاتىناۋىنداي ءتيىمدى شارت - جاعدايعا سۇيەنگەن كاسىپورىن تاعى ورتا ازياداعى ءار ەلدىڭ ساپالى اۋىل شارۋاشىلىق ونىمدەرىن، قولونەر بۇيىمدارىن ەل ىشىنە ساتىپ، ساۋدانىڭ ىركىلىسسىزدىگىن جۇزەگە اسىردى.
جىبەك جولى ەكونوميكالىق بەلدەۋى وزەكتى رايونى قۇرىلىسىنىڭ ىلگەرىلەتىلۋىنە ىلەسە، شينجياڭنىڭ توڭىرەكتەگى ەلدەرمەن بارىس - كەلىسى كۇن سايىن جيىلەدى. «ساندى مالىمەت جىبەك جولىن» بويلاي، ءتىپتى دە كوپتەگەن «شينجياڭ جاساعان» ونىمدەر «ءبىر بەلدەۋ، ءبىر جول» بويىنداعى ەلدەر مەن وڭىرلەردەگى حالىقتىڭ تۇرمىسىنا ەندى، ال وسى جول بويىنداعى «يمپورت ەتىلگەن تاۋارلاردا» شينجياڭدىقتاردىڭ كۇندەلىكتى تۇرمىسىن بايىتتى. مىنە وسىنداي يمپورت، ەكسپورت بارىسىندا ۇلكەن ساندى مالىمەتتەر ءىش پەن سىرتتى بايلانىستىراتىن «سيفرلى» كوپىر سالدى.
ۇلكەن ساندى مالىمەتتىڭ تىرەگىندە، شينجياڭنىڭ شەكارا اتتاعان ەلەكتروندى ساۋدا كاسىپورىندارى تاۋارلاردى «ىشكە» جەتكىزۋ، «سىرتقا» شىعارۋدان سىرت، تاعى كاسىپ تىزبەگىن ۇزدىكسىز كەمەلدەندىردى.
2016 - جىلى جىبەك جولى ەكونوميكالىق بەلدەۋى وزەكتى رايونىنىڭ وڭىرلىك باسىمدىعى مەن بازار كومەسكى كۇشىنە سۇيەنگەن رايونىمىز جاڭا ورايدى مىقتى يگەرىپ، شينجياڭنىڭ ەلەكتروندى وتكەل تۇعىرىن قۇردى. تۇعىردىڭ قۇرىلۋى سىرتقى ساۋداعا ساياتىن ەلەكتروندى ساۋدا الەۋمەتتىك قىزمەت وتەۋىن كەڭەيتتى، ەلەكتروندى ساۋدا زات اينالىمى جۇيەسىن كەمەلدەندىردى، ەلەكتروندى ۇكىمەت ىستەرى مەن ەلەكتروندى ساۋدا ىستەرىنىڭ ورگانيكالىق ۇشتاسۋىن جۇزەگە اسىردى.
قازىرگى تاڭدا، شينجياڭنىڭ ەلەكتروندى ساۋدا وتكەلى زات اينالىمى بىرلەسپە تورى، بۇلت ەسەپتەۋ جانە ۇلكەن ساندى مالىمەت سياقتى تەحنيكالاردى قولدانۋدى تىرەك ەتىپ، «وتكەل ۇكىمەت ىستەرى قىزمەت وتەۋىن، شەكارا اتتاعان ەلەكتروندى ساۋدا ىستەرى ۋنيۆەرسال قىزمەت وتەۋىن، وتكەل كاسىپورىندارى ۋنيۆەرسال قىزمەت وتەۋىن، وتكەل زات اينالىمى قىزمەت وتەۋىن» ءبىر تۇلعالاندىرعان جالپىلىق قىزمەت وتەۋ تۇعىرىن قۇردى.
ازيا - ەۆروپا ينفورماتسيا جوعارى قارقىندى تاس جول قۇرىلىسى ۇزدىكسىز ىلگەرىلەتىلدى
6 - ايدىڭ 15 - كۇنى جياڭسۋلىق 8 ساياحاتشى ءوز كولىكتەرىمەن مايتاۋ - كۇشار تاس جولى ارقىلى تيانشانعا بارادى، جاڭبىردان جول تاعانى بۇلىنگەندىگى سەبەپتى قيىنشىلىق قىسپاعىندا قالعان ولاردىڭ اراسىنداعى ءبىر ساياحاتشى «بەيدوۋ تيانحۇي 6S» قولمەن مەڭگەرىلەتىن تۇتىنۋشى اسپاپپەن وتباسىنداعىلارمەن حابارلاسىپ، سوڭىندا قاتەردەن امان - ەسەن قۇتىلادى.
«سيگنال جوق نەمەسە سيگنال ناشار جەرلەردە بەيدوۋدىڭ ىركىلىسسىز اڭگىمەلەسۋ تۇعىرىنا سۇيەنىپ، ينفورماتسيانى بەلگىلەنگەن قول تەلەفونعا جولداپ، بەيدوۋ تەرمينالى مەن قول تەلەفون ينفورماتسياسىنىڭ ءوزارا بايلانىسىن جۇزەگە اسىرۋعا بولادى». 8 - ايدىڭ 10 - كۇنى شينجياڭ بەيدوۋ تيانحۇي زات اينالىمى بىرلەسپە تورى عىلىم - تەحنيكا شەكتى سەرىكتەستىگىنىڭ ورىنباسار باس مەڭگەرۋشىسى حاڭ يۇيحۋا سويلەي ءجۇرىپ، تىلشىگە بەيدوۋ قولمەن مەڭگەرىلەتىن تەرمينالىن كورسەتتى. بۇل سەرىكتەستىك شينجياڭدا العاشقى بەيدوۋ ايىرىپ ءبىر جاقتى ەتۋ جۇمىسى ارناۋلى تۇعىرىن قۇردى، ول اسپان مەن جەردى ءبىر تۇلعاندىرعان ساندى مالىمەتتى جيناۋدى، تاراتۋدى، ءبىر جاقتى ەتۋدى جانە كاسىپ باسقارۋدى شوعىرلى بىرىكتىرىپ، تۇتاس شينجياڭدى قامتىعان جالپىلىق ينتەرنەتتىك قىزمەت كورسەتۋ جۇيەسىن ورناتىپ، سايكەستى بەيدوۋ قىسقا مالىمەتىنەن پايدالانۋشىلارعا دەر كەزىندە ورىن، ۋاقىت قىزمەتى، شۇعىل جاعدايلارعا توتەپ بەرۋ بويىنشا حابارلاسۋ قىزمەتىن وتەدى.
كەزەكتە رايونىمىز جىبەك جولى ەكونوميكالىق بەلدەۋىنىڭ ازيا - ەۆروپا ينفورماتسيا جوعارى قارقىندى تاس جول قۇرىلىسىن ۇزدىكسىز ىلگەرىلەتىپ، حالىقارانى باعىتتاي وتىرىپ، بۇلت ەسەپتەۋدى سىرتقا شىعارۋ قىزمەت وتەۋىن ورىستەتۋىنە پارمەندى حابارلاسۋ تىرەگىن ازىرلەپ، ينفورماتسيا، حابارلاسۋ نەگىزدىك قۇرىلعى قۇرىلىسىندا جاڭا ىلگەرىلەۋشىلىككە قول جەتكىزىپ، حالىقارالىق وپتيكالىق كابەل قۇرىلىسىن ۇزدىكسىز تەزدەتتى. جۇڭگو تەلەگراف شينجياڭ بولىمشە سەرىكتەستىگى، جۇڭگو ليانتۇڭ شينجياڭ بولىمشە سەرىكتەستىگى جەكە - جەكە قاشقار جاساندى سەرىك جەر بەتى پۋنكتىن قۇردى، ولاردىڭ سيگنالى ورتا ازيا، ورتا شىعىس، ەۆروپا جانە افريكا سياقتى جەرلەردى شارپىدى.
2017 - جىلى رايونىمىز توڭىرەكتەگى ەلدەرمەن شەكارا اتتاعان وپتيكالىق كابەل جۇيەسىن ورناتىپ ءارى كەمەلدەندىرىپ، جىبەك جولى ەكونوميكالىق بەلدەۋىنىڭ باتىستى، وڭتۇستىكتى، سولتۇستىكتى بەتكە العان حالىقارالىق ءىرى وتكەلدىك شەكارا اتتاۋ جاعدايىن قالىپتاستىردى.
«شينجياڭ ۇيعۇر اۆتونوميالى رايونىنىڭ حالىق شارۋاشىلىعى مەن قوعامدىق دامۋدى ينفورماتسيالاندىرۋداعى <13 - بەسجىلدىق> جوباسىندا» مىنالار العا قويىلدى: 2020 - جىلعا جەتكەندە ازيا - ەۆروپا ينفورماتسيا جوعارى قارقىندى تاس جول نەگىزدىك قۇرىلعى قۇرىلىسىندا كەلەلى ىلگەرىلەۋشىلىككە قول جەتكىزىلەدى، ءۇرىمجىنىڭ وڭىرلىك سيپاتتى حالىقارالىق حابارلاسۋ - بايلانىس مەكەمەسى مەن حالىقارالىق ينتەرنەت ءتۇيىنىنىڭ ورنى بارىنشا كوتەرىلەدى، شينجياڭ مەملەكەت ينتەرنەتىنىڭ باتىسقا باعىتتالعان ءىرى وتكەلىنىڭ ماڭىزدى تورابىنا اينالادى. شينجياڭنىڭ «تيانشان يۇنگۋ» جوسپارى ۇزدىكسىز ىلگەرىلەتىلىپ، بۇلت ەسەپتەۋ ساندى مالىمەت ورتالىعى كولەمىنىڭ توپتاسۋ اسەرى كورنەكتىلەنىپ، جىبەك جولى ەكونوميكالىق بەلدەۋى وزەكتى رايونىنىڭ «بەس ۇلكەن ورتالىعىنا» سايكەستىرۋ جانە تىرەك بولۋ قىزمەتىن وتەيدى.
