وڭتۇستىك شينجياڭنىڭ ساياحات كاسىبىنىڭ «جالپى ءوڭىر ساياحاتىنا» قاراي تيپىنىڭ وزگەرىپ، دارەجەسىنىڭ ءوسۋىن ىلگەرىلەتەدى
8 - ايدىڭ 20 - كۇنى كەشكى ساعات 23 مولشەرىندە، شينجياڭنىڭ ءىشى - سىرتىنان كەلگەن ساياحاتشىلار تۇڭعىش Y966 رەتكى وڭتۇستىك شينجياڭ ساياحات ارناۋلى پويەزىنە وتىرىپ وڭتۇستىك شينجياڭداعى 10 كۇندىك ساپارىن باستادى. سۋرەتتى ءتىلشىمىز زوۋ ي تۇسىرگەن
ءتىلشىمىز لۋ فىڭباۋ 8 - ايدىڭ 21 - كۇنى ۇرىمجىدەن حابارلايدى. باعراش كولىندە قايىقپەن سەيىلدەپ، قۋبا تۇزدەگى توراڭعى ورمانىنان ءوتىپ، ۇستىرتتەگى كولگە الىستان كوز جىبەرىپ، قاشقار كونە قالاسىن ارالاپ، حوتاننىڭ كەشكى بازارىنان ءدام تاتادى... 8 - ايدىڭ 20 - كۇنى ساعات 23تەن 10 مينۋت وتكەندە، «پويەزبەن شينجياڭدى ساياحاتتاۋ − جىبەك جولىن بويلاي باتىس بولەكتى ساياحاتتاپ، وڭتۇستىك شينجياڭمەن قاۋىشۋ» اتتى تۇڭعىش Y966 رەتكى ساياحات ارناۋلى پويەزى ءۇرىمجى ۆوكزالىنان جولعا شىقتى. 10 كۇندىك ساپاردا 351 ساياحاتشى بايىنعولين، اقسۋ، قاشقار، حوتان سياقتى جەرلەردەگى 20 كورىنىس تۇيىندەرىن ساياحاتتاپ، مادەنيەتتەن، كوركەم كورىنىستەردەن ءلاززات الىپ، ءدامدى تاعامداردان اۋىز تيەدى. وسى ارناۋلى پويەزدىڭ قاتىناۋى «پويەزبەن شينجياڭدى ساياحاتتاۋ» ساياحات ءونىمىنىڭ ءتىپتى بايي ءتۇسىپ، شينجياڭنىڭ ساياحات ەكونوميكاسىنىڭ دامۋىنا تىڭ ومىرشەڭدىك كۇش قوسقانىن كورسەتتى.
«سولتۇستىك شينجياڭدى ساياحاتتاپ ەندى كەلگەن ەدىم، بۇگىن پويەزگە وتىرىپ وڭتۇستىك شينجياڭعا بارامىن، شينجياڭدى ءبىر ارالاپ شىقپاقشىمىن». پويەزگە شىعىسىمەن، 70 جاستاعى شي - اندىق ساياحاتشى ياڭ جيەيۇن وزىمەن بىرگە ساياحاتتاپ جۇرگەن كونە دوسىمەن اڭگىمەلەسىپ كەتتى.
ءۇرىمجى تەمىر جول حالىقارالىق ساياحات قوعامى شەكتى جاۋاپكەرلىك سەرىكتەستىگىنىڭ ورىنباسار باس ديرەكتورى حۋاڭ تيڭفىن بىلاي دەپ تانىستىردى: وسى جولى شىعارىلعان مادەنيەت ساياحات ارناۋلى پويەزى − شينجياڭ تەمىر جول تاراۋىنىڭ ساياحاتتىڭ قامداۋ جاعىنداعى قۇرىلىمدىق رەفورماسىن ىلگەرىلەتىپ، «پويەزبەن شينجياڭدى ساياحاتتاۋ» ايگىلى ماركا قۇرىلىسىن تەرەڭدەتىپ، ساياحات قاتىناسىنىڭ ساپالىلانۋىن جەدەل ىلگەرىلەتىپ، وڭتۇستىك شينجياڭنىڭ ساياحات ەكونوميكاسىنىڭ كاسىپ سالالانا دامۋىن جەبەۋدەگى تاعى ءبىر ناقتى امالياتى. ساياحاتتىڭ جالپى بارىسىندا شينجياڭنىڭ وزگەشە تابيعات كورىنىستەرى، ۇلتتىق سالت - سانا، عۇرىپ - ادەتتەرى، مايەكتى مادەنيەتى، ءدامى ءتىل ۇيىرەتىن وزگەشە تاعامدار ورگانيكالىق تۇردە ۇشتاستىرىلىپ، ۇقساماعان ساياحاتشىلاردىڭ قاجەتىن مۇمكىندىكتىڭ بارىنشا قاناعاتتاندىرادى. ىشكى ولكەلەردەن كەلگەن ساياحاتشىلار وڭتۇستىك شينجياڭنىڭ وسى مادەنيەت ساياحاتىنا توتەنشە قىزىعادى، قازىر بەيجيڭ، تيانجين قاتارلى جەرلەردەگى ساياحات قوعامى بىزبەن حابارلاسىپ وتىر.
وڭتۇستىك شينجياڭنىڭ مادەنيەت ساياحات ارناۋلى پويەزى 10 - ايدىڭ ورتاسىنا دەيىن قاتىنايدى، شامامەن 10 كۇن اينالاسىندا ءبىر رەت قاتىناپ تۇرادى، سوڭعى كەزدەگى پويەز سانىن كوبەيتۋ - كوبەيتپەۋ ساياحاتشىلار سانىنا قاراي ۇيعارىلادى. ۇعىسۋعا قاراعاندا، 7 - ايدا بايىنعولين وبلىسىنىڭ «100 پويەز، 10 مىڭ ادام» كولەمدى ساياحات ارناۋلى پويەزىنىڭ قاتىناۋى نەگىزىندە، شينجياڭنىڭ تەمىر جول تاراۋى جەر - جەرمەن سەلبەستىكتى اناعۇرلىم كەڭەيتىپ، اقسۋ، قاشقار، حوتان سياقتى جەرلەرمەن ساياحات بايلىعىن بىرگە اشىپ، ساياحات ارناۋلى پويەزىن كولەمدى تۇردە قاتىناتۋ ءتاسىلىن تۇڭعىش رەت قولدانىپ، وڭتۇستىك شينجياڭداعى 4 جەرمەن بىرلەسىپ، مادەنيەت ساياحات ارناۋلى پويەزىن قاتىناتقان، ساياحات ءوڭىرى اناعۇرلىم كەڭىپ، سەيىل - سەرۋەن قۇراتىن كورىنىس تۇيىندەرى اناعۇرلىم كوبەيدى، وڭتۇستىك شينجياڭنىڭ ساياحات كاسبىنىڭ «جالپى ءوڭىر ساياحاتىنا» قاراي تيپىنىڭ وزگەرىپ دارەجەسىنىڭ ءوسۋىن، ساپاسىنىڭ جوعارىلاپ، ونىمدىلىگىنىڭ ارتۋىن جەدەلدەتتى.
جۇڭگو تەمىر جول ءۇرىمجى مەكەمەسى توبى شەكتى سەرىكتەستىگى جولاۋشى تاسىمال تاراۋىنىڭ قاتىستى جاۋاپتىسى بىلاي دەپ تانىستىردى: بيىل جىل باسىنان بەرى، بۇكىل شينجياڭنىڭ جەر - جەرى تەمىر جول باس سەرىكتەستىگىنىڭ «شينجياڭعا باستاپ اكەلۋ» جالپى جوباسىمەن توعىسىپ، جەرگىلىكتى ورىنداردىڭ ساياحات بازارىن بىرلەسىپ اشتى، 8 - ايدىڭ 16 - كۇنىنە دەيىن، شينجياڭعا كىرگەن 83 ساياحات ارناۋلى پويەزىن تۇتاستىرىپ، ىشكى ولكەلەردەن 58 مىڭ 476 ساياحاتشىنى قابىلدادى. سونىمەن قاتار «پويەزبەن شينجياڭدى ساياحاتتاۋ» ايگىلى ماركالى ساياحات ارناۋلى پويەزىنىڭ ساياحات جەلىسى ونان ارى مولايدى، سولتۇستىك شينجياڭدى اينالىپ ساياحاتتاۋ، حيكىمەتتى وتتى الاپ، دۇنحۋاڭدا باس قوسۋ، وڭتۇستىك شينجياڭدى ساياحاتتاۋ، سونداي - اق وڭتۇستىك شينجياڭ مادەنيەت ساياحات ارناۋلى پويەزى سياقتى ۇلاسپالى ساياحات ونىمدەرىن شىعاردى، ونىمدەردىڭ مازمۇنى ونان ارى اشالانا ءتۇستى، ارناۋلى پويەزدىڭ سوڭعى بەكەتتەرى ۇرىمجىدەن وڭتۇستىك، سولتۇستىك شينجياڭداردىڭ جەر - جەرىنە كەڭەيىپ، ءاربىر كورىنىستىك وڭىردەگى ساياحاتشىلاردىڭ ارتۋىن ىلگەرىلەتۋ رولى كورنەكتى بولدى.
