ءتىلشىمىز حي حۇڭۋي
«ءبىز مەيىر بوقشاسىن تاراتۋدى الەۋمەتتىك يگىلىك بىرىككەن ساۋىعى دەپ بىلەمىز، الەۋمەتتىك يگىلىك ىستەرىمەن اينالىسۋ − باقىتتان ءلاززات الۋدىڭ ورايى، بۇل ورايدان ءتىپتى كوپ ادامدى يگىلىكتەندىرۋ كەرەك». 8 - ايدىڭ 20 - كۇنى 2018 - جىلعى «ي» قورىنىڭ بىرلەسىپ اپاتتان قۇتقارۋ شينجياڭ الەۋمەتتىك يگىلىك سەرىكتەرى قىزمەت ماجىلىسىندە «ي» قورى بىرلەسىپ اپاتتان قۇتقارۋ شينجياڭ ءوڭىرىنىڭ سايكەستىرۋشىسى ياڭ جۇن شينجياڭنىڭ جەر - جەرىنەن كەلگەن الەۋمەتتىك يگىلىك توپتارىنىڭ جاۋاپتىلارىنا وسىنى ايتتى.
بيىل 49 جاستاعى ياڭ جۇن ۇكىمەتتىڭ قورشاعان ورتانى قورعاۋ تاراۋىندا 20 نەشە جىل تەحنيكالىق قىزمەت ىستەگەن، كەيىن دالالىق سپورت كاسىبىنە ات سالىستى ءارى 2004 - جىلى شينجياڭ شىڭشىلدار قۇتقارۋ اترەتىن قۇردى. سول كەزدەن باستاپ ياڭ جۇن الەۋمەتتىك يگىلىك ىستەرىمەن ارالاسىپ، ەرىكتى قيمىلمەن اينالىستى، قازىرگە دەيىن 10 نەشە جىل بولدى. «تەحنيكالىق ۇلگى، ينتەرنەتتىك وي جانە دالالىق سپورت تاجىريبەسى، ۇكىمەت قىزمەتكەرى جانە كاسىپورىن قۇرۋشىسى سىندى كەشىرمەلەرىم مەنىڭ كەيىن الەۋمەتتىك يگىلىك جۇمىستارىمەن اينالىسۋىما تۇرعى جانە نەگىز ازىرلەدى»، - دەيدى ياڭ جۇن.
7 - ايدىڭ 31 - كۇنى قۇمىل قالاسى يجوۋ رايونى تاسبالىق اۋىلىنىڭ بەلگىلى وڭىرىندە ءاپ - ساتتە ەرەكشە قاتتى نوسەر جاۋىپ، تاسقىن كەلدى. بۇدان حابار تاپقان سوڭ، ياڭ جۇن تاباندا ەرىكتىلەردى ۇيىمداستىرىپ قۇمىلعا جىبەردى، اپاتتان قۇتقارۋ ماتەريالدارى سول كۇنى اۆتوموبيلگە تيەلدى، 3 كۇن ىشىندە قۇنى 184 مىڭ يۋان تۇراتىن بالالاردىڭ مەيىر بوقشاسى، ۇيقى قاپشىعى، مينەرالدى سۋ سياقتى ماتەريالدار دايىندالدى ءارى اپاتقا ۇشىراعان بۇقارانىڭ قولىنا تيگىزىلدى، 100دەن استام ەرىكتى قاتىناستى. «اپاتتان قۇتقارۋ ارەكەتى تەز جۇرگىزىلەدى، ەرىكتىلەر دە ەرەكشە ىنتالى، جارىسا ەرىكتى قىزمەت كورسەتتى»، - دەيدى ياڭ جۇن.
ەرىكتى بولۋدان باستاپ، ياڭ جۇن ۇلكەندى - كىشىلى ءتۇرلى قۇتقارۋ قيمىلدارىنا قاتىناستى. سىچۋاننىڭ يا - انىنداعى جەر سىلكىنىسىندەگى، يۇنناننىڭ لۋديانىنداعى جەر سىلكىنىسىندەگى قۇتقارۋ، ۇيىمداستىرۋ قىزمەتىنە قاتىناستى، كەرياداعى جەر سىلكىنىسى، گۇماداعى جەر سىلكىنىسى، جىڭداعى جەر سىلكىنىسى سياقتىلاردا تالاي رەت بىرلەسكەن قۇتقارۋ ارەكەتىن ۇيىمداستىردى.
ياڭ جۇن قىرۋار ۋاقىتتى الەۋمەتتىك يگىلىك ەرىكتى قيمىلىنا جۇمسادى، 2 جىلدان بەرى عانا ءار ايدا ياڭ جۇن «ي» قورىنان سايكەستىرۋشىلەرگە بەرىلەتىن 1500 يۋاندىق كومەك قاراجاتتى الىپ، ءوزىنىڭ قۇنىن ىسكە اسىرعانداي بولدى. «مەن الەۋمەتتىك يگىلىك ەرىكتى قيمىلىن ايرىقشا جاقسى كورەمىن، مەنشە، ەرىكتى الەۋمەتتىك يگىلىك جۇمىستارىمەن اينالىسقاندا عانا، ءوزىڭنىڭ ەڭ ۇلكەن قۇنىڭدى ساۋلەلەندىرە الاسىڭ»، - دەيدى ول.
2012 - جىلى 6 - ايدىڭ 30 - كۇنى كۇنەس، حىجيڭ اۋداندارىنىڭ شەكاراسىندا 6.6 بال جەر سىلكىندى، ياڭ جۇن «ي» قورى قۇتقارۋ وداعى − شينجياڭ قۇتقارۋ اترەتىنىڭ باستىعى رەتىندە تىزگىن ۇشىمەن توپتى باستاپ اپات بولعان وڭىرگە جەتىپ، «ي» قورىنىڭ 300 مەيىر بوقشاسىن اپات بولعان وڭىردەگى بالالارعا جەتكىزدى.
وسى ارەكەتتىڭ الدىندا، شينجياڭنىڭ بۇقارالىق الەۋمەتتىك يگىلىك ۇيىمدارى كوبىندە شاعىن توپ، شاعىن كولەمدە الەۋمەتتىك يگىلىك قيمىلدارىن بىتىراڭقى ورىستەتەتىن. ياڭ جۇن: كۇنەستەگى جەر سىلكىنىسىندەگى قۇتقارۋدا حالىقتىق ۇيىمدار مەن ۇكىمەت تاراۋلارىنىڭ، قۇتقارۋ مەن اپاتتان قۇتقارۋدىڭ، جەكەلىك مەديالار مەن نەگىزگى اقپارات قۇرالدارىنىڭ سەلبەستىگىن تۇڭعىش رەت جۇزەگە اسىرىپ، بىرلەسكەن ارەكەتتىڭ الەۋمەتتىك يگىلىك جاڭا ۇلگىسىن اشتىق.
2012 - جىلدان باستاپ، «ي» قورى ءار جىلى شينجياڭدا مەيىر بوقشاسىن تاراتىپ، كەدەي وڭىرلەردەگى بالالاردىڭ ىزعارلى قىستان وتۋىنە كومەكتەستى. قازىر «ي» قورى شينجياڭداعى قاتىناسقان توبى، ەرىكتىسى ەڭ كوپ، تارالۋى ەڭ كەڭ، ىقپالى ەڭ زور الەۋمەتتىك يگىلىك قيمىلى ۇيىمىنا اينالىپ وتىر، 6 جىلدا جالپى 30 مىڭنان استام مەيىر بوقشاسىن تاراتتى، ياڭ جۇننىڭ جەبەۋىندە الەۋمەتتىك يگىلىك قوسىنىنا كىرۋشىلەردىڭ قاتارى بارعان سايىن مولايا ءتۇستى.
نۇريام مامەت − كۇشار اۋدانى «شينجياڭ جاستار مەن ورەندەر دامۋ قور قوعامى ءبىر وتباسىنىڭ ادامدارى الەۋمەتتىك يگىلىك قورىنىڭ» جاۋاپتىسى. 2014 - جىلى 4 - ايدا توپ قۇرىلعان سوڭ قولعا العان تۇڭعىش الەۋمەتتىك يگىلىك نىسانى − مەيىر بوقشاسى نىسانى بولدى. نۇريام بىلاي دەدى: ءبىرىنشى رەت 100 مەيىر بوقشاسىن تاراتۋدى دەربەس ورىندادىق، بۇل جاڭا قۇرىلعان ەرىكتىلەر توبى ءۇشىن سەنىم مەن تابىس سەزىمىن ءبىلدىردى. مەيىر بوقشاسىنان باستاپ، ءبىزدىڭ الەۋمەتتىك يگىلىك نىساندارىمىز بارعان سايىن كوبەيىپ، تاجىريبەمىز بارعان سايىن مولايا ءتۇستى، ءاربىر قادامدا ياڭ جۇن مۇعالىمنىڭ ىجداعاتتى كومەگىنە يە بولىپ وتىردىق.
ياڭ جۇن بىلاي دەدى: مەن جانە توپتىڭ بىرگە قۇلشىنۋىندا، ءتىپتى، كوپ بۇقارالىق الەۋمەتتىك يگىلىك ۇيىمدارىنىڭ جەرگىلىكتى ەرەكشە الەۋمەتتىك يگىلىك نىساندارىن دامىتۋىنا كومەكتەسىپ، شينجياڭدىق ەرەكشەلىككە يە الەۋمەتتىك يگىلىك ايگىلى ماركاسى مەن مادەنيەتىن قالىپتاستىرۋدى ءۇمىت ەتەمىن. بۇل − ەرەكشە تابىس سەزىمىن سيلايتىن ءىس.
