ءتىلشى لۋ فىڭباۋ
تالدىرماش بولعانىمەن قايسار، نازىك كورىنگەنىمەن قاجىرلى. مىنە بۇل جاڭ شياۋشيانىڭ وزگەلەرگە قالدىراتىن العاشقى اسەرى.
8 - ايدىڭ 21 - كۇنى ءۇرىمجى ۆوكزالىنا بارعانىمدا، بەلەت ساتۋ اۋماعىندا جاڭ شياۋشيانىڭ قاربالاس جۇمىس ىستەپ جۇرگەنىن كوردىم. 2008 - جىلى شينجياڭ تەمىر جول جۇيەسىنە قىزمەتكە قابىلدانعاننان قازىرگە دەيىن، قاربالاستىق ونىڭ قىزمەتتەگى، تۇرمىستاعى داعدىسىنا اينالعان، ول قاشان كورسەڭ ۇيرەنۋدىڭ، بەلەت ساتۋدىڭ، جولاۋشىلارعا قىزمەت ەتۋدىڭ قاربالاستىعىندا جۇرەدى...
2008 - جىلى 4 - ايدا جاڭ شياۋشيا مەكتەپ بىتىرگەننەن كەيىن ءۇرىمجى ۆوكزالىنا قىزمەتكە ورنالاسىپ، جولاۋشى تاسىمال سەحىنىڭ جولاۋشى تاسىمال قىزمەتكەرىنە اينالادى.
كوپشىلىكتىڭ كاسىپتىك بىلىمدەرگە قانىق بولۋى ءۇشىن، جولاۋشى تاسىمال سەحىندا ءار كۇنى جۇمىس باستاۋدان ىلگەرى سۇراۋ قوياتىن سالت بار. العاش قىزمەتكە شىققان كەزدە جاڭ شياۋشيا قويىلعان سۇراۋعا ءار جولى جاۋاپ بەرە الماي قالادى. ۇستازداردىڭ كىدىرمەي جاۋاپ قايتارعانىن كورىپ، مەن ونان ارى قۇلشىنۋعا ءتيىسپىن دەپ ىشتەي بەكيدى.
ءار كۇنى جۇمىستان تۇسكەننەن كەيىن، جاڭ شياۋشيا سول كۇنگى كاسىپتىك جاڭا بىلىمدەردى تۇگەلدەي جازىپ الىپ، جاتتايدى. وسىلايشا، ول تەز ارادا بان - گرۋپپاداعى كاسىپتىك ۇيرەنۋدىڭ شەبەرىنە اينالادى.
2009 - جىلى جاڭ شياۋشيا شينجياڭ تەمىر جول جۇيەسى بويىنشا وتكىزىلگەن زەيىن سىناۋ جارىسىنا قاتىناسۋعا كورسەتىلەدى، ءبىراق الدىڭعى قاتارعا كىرە المايدى. ول: سودان باستاپ بارىنشا قۇلشىنىپ، كەلەسى جولى، ءسوزسىز، جاقسى ناتيجەگە قول جەتكىزەمىن دەگەن بەكىمگە كەلدىم، - دەيدى.
2009 - جىلى جاڭ شياۋشيا بەلەت ساتۋ بولىمىنەن بەلەت ساتۋ جۇمىسىن ۇيرەنەدى. بەلەت ساتقان العاشقى كۇنى ءبىر جولاۋشى كەلىپ بەلەتىن قايتارادى، ول بەلەت قايتارۋ جۇمىسىنا قانىق بولماعاندىقتان، الگى جولاۋشىنى باسقا تەرەزەگە باستاپ اپارادى. «الگى جولاۋشىنىڭ ماعان قاراعان كوزقاراسى ماڭگى ەسىمنەن كەتپەيدى، ۇيالعاندا كىرەرگە تەسىك تابا الماي قالعان ەدىم»، - دەيدى جاڭ شياۋشيا.
كاسىپكە قانىق بولۋ ءۇشىن كوبىرەك ۇيرەندىم، قىزمەتتەستەرىمنەن ۇيرەندىم، كىتاپ وقىپ ۇيرەندىم... ءتۇرلى كىتاپتار مەن ماتەريالدار جاڭ شياۋشيانىڭ جاتاعىندا ءۇيىلىپ جاتىر.
3 جىل تالىقپاي ۇيرەنۋدىڭ ارقاسىندا، 2012 - جىلى جاڭ شياۋشيا 2 - رەت ۆوكزال اتىنان شينجياڭداعى تەمىر جول جۇيەسى بويىنشا ۇيىمداستىرىلعان جولاۋشى تاسىمال جۇيەسىنىڭ تەحنيكالىق باسەكە جارىسىنا قاتىناسىپ، 2 - بولۋداي تاماشا ناتيجەگە قول جەتكىزەدى، سونداي - اق بۇكىل ەلىمىزدەگى تەمىر جول جولاۋشى تاسىمال جۇيەسى بويىنشا وتكىزىلگەن كاسىپتىك شەبەرلىك جارىسىنا قاتىناسۋعا كورسەتىلەدى.
سول جىلى جاڭ شياۋشيا بۇكىل ەلىمىزدىڭ تەمىر جول جولاۋشى تاسىمال كاسىپتىك جارىسىندا بەلەت ساتۋشىلار گرۋپپاسى بويىنشا 12 - ورىندى يەلەپ، جاقسى ناتيجەگە قول جەتكىزەدى، مىنە بۇل سوڭعى جىلداردان بەرى شينجياڭ تەمىر جول تاراۋىنىڭ وسى سالاداعى جارىستا قول جەتكىزگەن ەڭ جاقسى ناتيجەسى. وعان دا جۇڭگو تەمىر جول باس سەرىكتەستىگى جاعىنان «تۇتاس جەلى تىڭ جورىعىنىڭ اتويشىسى» اتاعى بەرىلەدى.
2013 - جىلى جاڭ شياۋشيا شينجياڭ تەمىر جول جولاۋشى تاسىمال جۇيەسىنىڭ جىلدىق ونەر جارىسىنا قاتىناسىپ، بەلەت ساتۋ گرۋپپاسى بويىنشا 1 - بولۋداي جاقسى ناتيجەگە قول جەتكىزەدى.
قازىر جاڭ شياۋشيا باس تەكسەرۋ بولىمىندە ىستەيدى، قايتارىلعان، وزگەرتىلگەن بەلەتتەردى جانە ءىس جۇزىندە كىرۋ، شىعۋ جاعدايىن تەكسەرەدى، بۇل اسا مۇقياتتىلىقتى قاجەت ەتەتىن ورىن، كەي كۇندەرى تەك قايتارىلعان بەلەتتىڭ وزىنەن 3000 نەشەسىن تەكسەرەدى. جۇمىس ۋاعىندا بىتپەي قالسا، ۇستەمەلەپ ىستەپ بىتىرەدى، وتىرىپ شارشاسا، ءبىراز ۋاقىت تۇرەگەلىپ بوي جازىپ الادى، تۇسكى تاماقتى قىزمەتتەستەرىنە الدىرىپ، جۇمىسىن كەڭسەدە تاماق جەي وتىرىپ جالعاستىرادى. ماسەلەلەردى بايقاپ، ولقىلىقتاردى تولىقتىرىپ وتىرادى، جولاۋشىلارعا ءبىر تيىن كەم قايتارىلعان بولسا دا ونى تەكسەرىپ انىقتاپ، دەر كەزىندە تولىقتاپ بەرەدى. «جاس كەزىمدە كوبىرەك جاپا شەگىپ، كوبىرەك ۇيرەنۋىم كەرەك، سوندا عانا جاستىق كوكتەمىم بوسقا وتپەگەن بولادى»، - دەيدى جاڭ شياۋشيا.
