پويەز شينجياڭ ساياحاتىن جەبەدى
ءتىلشىمىز لۋ فىڭباۋ 9 - ايدىڭ 5 - كۇنى ۇرىمجىدەن حابارلايدى. «پويەزگە وتىرىپ ساياحاتتاۋ وتە قولايلى بولدى، شينجياڭنىڭ كوركەم كورىنىسىن، وزگەشە ۇلتتىق سالت - ساناسىن كورۋدى وسى جولعى ساپارىمدا قاتتى اڭسادىم»، - دەدى 9 - ايدىڭ 5 - كۇنى تۇڭعىش رەت شينجياڭعا كەلگەن بەيجيڭدىق ساياحاتشى حى ليشيا.سول كۇنى سانشيدىڭ داتۇڭ قالاسىنان شينجياڭنىڭ بەيتۇن قالاسىنا جول تارتقان Y401 ارناۋلى ساياحات پويەزى 767 ساياحاتشىنى الىپ ءۇرىمجى وڭتۇستىك ۆوكزالىنا كەلىپ توقتادى، بۇل بيىل شينجياڭعا كەلگەن 100 - ارناۋلى ساياحات پويەزى.
وسى پويەزدەگى ساياحاتشىلار سانشي، حىبەي، بەيجيڭ قاتارلى جەرلەردەن كەلگەن، پويەزدىڭ جالپى ساپارى 14 كۇن، باتىس تەرىستىكتەگى 5 ولكەنى باسىپ وتەدى، ساياحاتشىلار قاناس، بوعدا سياقتى كوپتەگەن كورىنىس وڭىرلەرىن تاماشالايدى.8 - ايدان بەرى ەلىمىزدىڭ جەر - جەرىندەگى ارناۋلى ساياحات پويەزدەرى شوعىرلى كەلىپ، شينجياڭنىڭ وڭتۇستىك، سولتۇستىڭ، ورتا بولىكتەرىندەگى جەلىلەردى تولىق قامتىپ، ءبىر جەلىدە كوپ ءتۇرلى ساياحاتتاۋدى جۇزەگە اسىردى. ارناۋلى ساياحات پويەزدەرى كوپتەگەن ساياحاتشىلاردى اكەلىپ، شينجياڭنىڭ ساياحات بازارىنىڭ ۇزدىكسىز جاندانۋىنا تىڭ قوزعاۋشى كۇش سيلادى.
جۇڭگو تەمىر جول ءۇرىمجى مەكەمەسى توبى شەكتى سەرىكتەستىگى جولاۋشى تاسىمال باسقارماسى جاۋاپتىسىنىڭ تانستىرۋىنشا، سوڭعى جىلدارى شينجياڭنىڭ تەمىر جول تاراۋلارى ىشكى ولكەلەردەگى تەمىر جول تاراۋلارىمەن توپتار ارا سەلبەستىكتى كۇشەيتىپ، «شينجياڭعا ەنگىزۋ» قىزمەتىن بەلسەنە ىلگەرىلەتتى. بيىل جىل باسىنان بەرى، شينجياڭ «ساياحات + شينجياڭعا باعىتتامالى كومەكتەسۋ + قاتىناس» جاڭا ۇلگسىن قالىپتاستىرىپ، ساياحاتشىلاردىڭ تاماشالاۋ ورەسىن جوعارىلاتىپ، ارناۋلى ساياحات پويەزىنىڭ ماركا ىقپالىن كەڭەيتىپ، ىشكى ولكەلەرمەن شينجياڭداعى ءار ۇلت بۇقاراسىنىڭ ارالاسۋىن، ىشتەسۋىن، توعىسۋىن تەرەڭدەتتى. قازىر «جيڭحىحاۋ»، «لۇڭتايحاۋ»، «ىبوحاۋ» سياقتى ارناۋلى ساياحات پويەزدەرى قاتىناۋ جەلىسىن ساپالىلاندىرىپ، ساياحات مازمۇنىن بايىتىپ، توقتايتىن ايالدامالاردى كوبەيتتى، مۇندا تۇندە ساپار شەگىپ، كۇندىز سەيىلدەۋ ۇلگىسى ساياحاتشىلار اراسىندا القاۋعا يە بولدى، «لۇڭتايحاۋ» سياقتى ارناۋلى ساياحات پويەزى ۇدايى قاتىنايتىن بولدى. تەمىر جول ساياحات ارناۋلى پويەزىنىڭ قاتىناۋى اۆتونوميالى رايوننىڭ ساياحات كاسىبىن ۇزدىكسىز جانداندىرۋداعى ماڭىزدى جەبەۋشىگە اينالدى.
ۇعىسۋعا قاراعاندا، «شينجياڭعا ەنگىزۋ» 2015 - جىلدان باستاپ اتقارىلعان ەكەن، سول جىلى شينجياڭعا جالپى 102 ارناۋلى ساياحات پويەزى قاتىناسا، 2016 - جىلى 153كە، 2017 - جىلعا كەلگەندە 176عا جەتىپتى، پويەزگە وتىرىپ ساياحاتتاۋ ىشكى ولكەلەردەگى ساياحاتشىلاردىڭ شينجياڭعا كەلىپ ساياحاتتاۋىنداعى جاڭا فورماعا اينالدى.
