ەكى ەلدىڭ مەملەكەت باسشىسى جۇڭگو مەن ۆەنەسۋەلانىڭ جاپپاي ستراتەگيالىق سەرىكتەستىك قاتىناسىنىڭ جاڭا بەلەسكە كوتەرىلۋىنە جەتەكشىلىك ەتۋگە ءبىر اۋىزدان كەلىستى
شينحۋا اگەنتتىگىنىڭ 9 - ايدىڭ 14 - كۇنى بەيجيڭنەن بەرگەن حابارى (ءتىلشى سۇن ي). مەملەكەت ءتوراعاسى شي جينپيڭ 9 - ايدىڭ 14 - كۇنى حالىق سارايىندا ۆەنەسۋەلانىڭ زۇڭتۇڭى مادۋرومەن كەڭەس وتكىزدى.
شي جينپيڭ مادۋرونىڭ جۇڭگوعا 10 - مارتە ساپارلاي كەلگەندىگىن قارسى الىپ، مادۋرونىڭ جۇڭگو - ۆەنەسۋەلا قارىم - قاتىناسىن دامىتۋعا باسا ءمان بەرىپ، جۇڭگو - ۆەنەسۋەلا سەلبەستىگىنە تاباندى قولداۋ كورسەتكەندىگىن القادى. شي جينپيڭ مىنالاردى اتاپ كورسەتتى: جۇڭگو قاشاندا جۇڭگو - ۆەنەسۋەلا قارىم - قاتىناسىن ستراتەگيالىق دەڭگەي مەن ۇزاق بولاشاق تۇرعىسىنان باعالاپ جانە دامىتىپ كەلەدى. قازىرگى دۇنيەدە ورنىقسىزدىق، تۇراقسىزدىق كوبەيۋدە. جاڭا جاعداي، جاڭا سايىستارعا سايكەس، جۇڭگو مەن ۆەنەسۋەلا دوستىق پەن ءوزارا سەنىمدى جۇمىلا نىعايتىپ، ءوزارا پايدالى سەلبەستىكتى جاڭاشىلدىقپەن ىلگەرىلەتىپ، بىرگە دامۋدى ۇزدىكسىز جەبەپ، جۇڭگو مەن ۆەنەسۋەلانىڭ جاپپاي ستراتەگيالىق سەرىكتەستىك قاتىناسىنىڭ جاڭا بەلەسكە كوتەرىلۋىنە جەتەكشىلىك ەتىپ، ەكى ەلدەگى حالىقتاردى ءتىپتى ويداعىداي يگىلىككە كەنەلتۋى كەرەك.
شي جينپيڭ مىنالاردى باسا دارىپتەدى: ەكى جاق ساياسي ءوزارا سەنىمدى بەكەمدەپ، جوعارى دەڭگەيلى بارىس - كەلىستىڭ تەبىنىن ساقتاپ، جۇڭگو - ۆەنەسۋەلا دوستىعىن ەكى ەلدەگى ءار سالانىڭ ساياسي ورتاق تانىمىنا اينالدىرۋ كەرەك. جۇڭگو جاق ۆەنەسۋەلانىڭ جۇڭگونىڭ وزەكتى مۇددەسى مەن كوڭىل بولگەن ماڭىزدى ماسەلەلەرىندە جۇڭگو جاققا تۇسىنىستىك ءبىلدىرىپ، قولداۋ كورسەتكەنىن القايدى، ۆەنەسۋەلا ۇكىمەتىنىڭ مەملەكەتتىڭ ورنىقتىلىعى مەن دامۋىن ىسكە اسىرۋ جولىنداعى قۇلشىنىستارىنا باياعىداي قولداۋ كورسەتەدى، ۆەنەسۋەلانىڭ ءوز ەلىنىڭ جاعدايىنا ۇيلەسەتىن دامۋ جولىن قاراستىرۋىنا قولداۋ كورسەتەدى، ۆەنەسۋەلا جاقپەن ەل باسقارۋ جونىندەگى تاجىريبەلەردىڭ اۋىسۋىن كۇشەيتۋدى قالايدى. ەكى جاق سىندارلى سەلبەستىكتى ساپالىلاندىرىپ جانە جاڭالاپ، «ءبىر بەلدەۋ، ءبىر جولدى» بىرگە قۇرۋ ەسكەرتپە حاتىنا قول قويىلۋىن ۇتىمدى وراي ەتىپ، ەكى جاق كەلىسكەن سەلبەستىك ورتاق تانىمدارىن جەدەل ۇشتاستىرىپ جانە ىلگەرىلەي تياناقتاندىرىپ، ۆەنەسۋەلا جاقتىڭ دەربەس دامۋ قابىلەتىن جوعارىلاتىپ، ەكى ەل سەلبەستىگىنىڭ باياندى دامۋىن ىلگەرىلەتۋى كەرەك. ەكى جاق جۇرت تىلەگىنىڭ توعىسۋىن بەلسەنە جەبەپ، گۋمانيتارلىق سالاداعى اۋىس - كۇيىس پەن سەلبەستىكتى جانە جەرگىلىكتى اۋىس - كۇيىستى كەڭەيتىپ، ەكى ەل دوستىعىنىڭ قوعامدىق نەگىزىن نىعايتۋى كەرەك. ەكى جاق كوپ جاقتى سايكەستىك پەن ۇيلەستىكتى كۇشەيتىپ، ۇزدىكسىز تۇردە ب م ۇ سياقتى حالىقارالىق جانە وڭىرلىك ۇيىمدار اياسىندا ءتىل تابىسۋدى كۇشەيتىپ، عالامدىق باسقارۋ جۇيەسى رەفورماسى مەن قۇرىلىسىنا بىرگە ات سالىسىپ، وركەندەپ كەلە جاتقان ەلدەردىڭ ۇيلەسىمدى ۇقىق - مۇددەسىن قورعاۋى كەرەك.
شي جينپيڭ مىنالاردى اتاپ كورسەتتى: جۇڭگو جاق لاتىن امەريكاسى ەلدەرىمەن سەلبەستىكتى قاشاندا تەڭ تۇرعىدا، ءوزارا پايدا جەتكىزۋ، بىرگە دامۋ پرينسيبى نەگىزىندە ىلگەرىلەتىپ كەلەدى، جۇڭگو - لاتىن امەريكاسى تالقى مىنبەرىنىڭ قۇرىلىسىن جەبەپ، جۇڭگو مەن لاتىن امەريكاسى ەلدەرىنىڭ جاپپاي سەلبەستىك سەرىكتەستىك قارىم - قاتىناسىنىڭ ۇزدىكسىز تۇردە ورنىقتى دامۋىن ىلگەرىلەتۋدى قالايدى.
مادۋرو مىنالاردى ءبىلدىردى: ۆەنەسۋەلا - جۇڭگو حالىقتارى ۇزاقتان بەرى دوس. ەكى جاقتىڭ تەڭ قۇلشىنۋى ارقاسىندا ۆەنەسۋەلا - جۇڭگو قاتىناسى ءتۇرلى - ءتۇستى سىناقتان ءوتىپ، كۇن سايىن نىعايىپ، سۇبەلى ناتيجە بەردى. وسى جولعى ساپارىمدا، ەكى جاقتىڭ سان سالالى سەلبەستىكتى كەڭەيتۋ تۋراسىندا ورتاق تانىمعا كەلۋى ەكى مەملەكەت سەلبەستىگىنىڭ جان - جاقتىلى ەكەنىن، ۆەنەسۋەلا ىلگەرىلەتىپ وتىرعان «مەملەكەت ەكونوميكاسىن قالپىنا كەلتىرۋ، ورنىقتىرۋ جانە گۇلدەندىرۋ جوسپارىمەن» بۇكىلدەي ۇيلەسەتىنىن تولىق ايگىلەدى. ۆەنەسۋەلا جاق جۇڭگو جاقتىڭ ۇزاق مەزگىلدەن بەرى تۇسىنىستىك ءبىلدىرىپ، قولداۋ كورسەتىپ كەلگەنىنە العىس ايتادى، جۇڭگونىڭ رەفورما جاساۋ، ەسىك اشۋ جانە ەل باسقارۋ جونىندەگى تابىستى تاجىريبەلەرىنەن كوبىرەك ۇلگى الۋدى ءۇمىت ەتەدى، «ءبىر بەلدەۋ، ءبىر جول» قۇرىلىسىنا بەلسەندىلىكپەن ات سالىسىپ، ءونىمدى قارجى قۇراۋ تاسىلدەرىن قاراستىرىپ، ەنەرگيا، وندىرىستىك قۋات سياقتى سالالارداعى سەلبەستىكتى كۇشەيتىپ، گۋمانيتارلىق اۋىس - كۇيىستى كەڭەيتىپ، ەكى ەل قارىم - قاتىناسىنىڭ ءتىپتى تاماشا بولاشاعىن قول ۇستاسا بىرگە اشۋدى قالايدى. مەن ءتوراعا شي جينپيڭ دارىپتەگەن ادامزاتتىڭ تاعدىرلاس ورتاق تۇلعاسىن قۇرۋ ۇستانىمىن بارىنشا قۇپتايمىن، جۇڭگو جاقپەن بىرگە كوپ جاقتىلىقتى قورعاۋدى قالايمىن. ۆەنەسۋەلا جۇڭگو - لاتىن امەريكاسى تالقى مىنبەرىنىڭ دامۋىنا پارمەندى قولداۋ كورسەتەدى، جۇڭگو مەن لاتىن امەريكاسى ەلدەرىنىڭ سەلبەستىگىن كۇشەيتۋ ءۇشىن بەلسەندى قۇلشىنىس جاساۋدى قالايدى.
كەڭەستەن كەيىن ەكى مەملەكەت باسشىسى ەكى ەل ۇكىمەتىنىڭ «ءبىر بەلدەۋ، ءبىر جول» قۇرىلىسىن بىرگە ىلگەرىلەتۋ جونىندەگى ەسكەرتپە حاتى سياقتى ەكى جاقتى سەلبەستىك حۇجاتتارىنىڭ قول قويىلۋىنا بىرگە كۋا بولدى.
كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا مادۋرونى قارسى الۋ سالتىن وتكىزدى. پىڭ لييۋان، ياڭ جيەچى، چىن جۋ، ۋاڭ ي، حى ليفىڭ، جىڭ جيانباڭ قاتارلىلار قاتىناستى.
