ۇلتتاردىڭ ۇلى ىنتىماعىنىڭ سالتاناتتى جينالىسى

　　− اۆتونوميالى رايوندىق 9 - كەزەكتى ۇلتتار سپورت جينالىسىنىڭ باستالۋ سالتىنا نازار

　　تىلشىلەرىمىز جاڭ تيڭ، دۇڭ لياڭ

　　كۇزدىڭ قوڭىر سامالى ەسىپ، بارشا تىرشىلىك قۇت قۇشاعىنا شومىلدى. 9 - ايدا الۋان تۇسكە بويالعان، مول ونىمگە كەنەلگەن مەزگىلدە، شينجياڭداعى ءار ۇلت پەرزەنتتەرى شاتتىققا شومىپ، ۇلتتار ىنتىماعىنىڭ قۇلپىرعان گۇلى جارىس الاڭىندا شەشەك اتتى.

　　9 - ايدىڭ 15 - كۇنى تۇستەن بۇرىن اۆتونوميالى رايوندىق 9 - كەزەكتى از ۇلتتاردىڭ ءداستۇرلى دەنە تاربيە - سپورت جينالىسى ىلە قازاق اۆتونوميالى وبلىستىق بايگە الاڭىندا باستالدى.

　　ويناقى دابىل ءۇنى مەن ۇلتتىق مۋزيكانىڭ سۇيەمەلدەۋىندە، ءارقايسى ايماق، وبلىس، قالالاردان جانە شينجياڭ ءوندىرىس - قۇرىلىس بيڭتۋانىنان كەلگەن 16 ۋاكىلدەر ۇيىرمەسىندەگى ءار ۇلت سپورتشىلارى مەرەكەلىك سالتاناتتى كيىمدەرىن كيىپ، جۇزدەرىنەن قۋانىش لەبى ەسىپ، بۇرالا بيگە باسىپ، ءتوراعالار مىنبەسىنىڭ الدىنان كوتەرىڭگى رۋحپەن ءوتتى.

　　ىلە وبلىستىق ۋاكىلدەر ۇيىرمەسىندەگى جورعا جارىستىرۋشى سپورتشى تىلەك سايبولات ۇلى تەبىرەنە بىلاي دەدى: بۇل سالتاناتتى مەرەكە، كەرەمەت باس قوسۋ. قوناق يەسى سالاۋاتىممەن، بۇكىل شينجياڭنىڭ جەر - جەرىنەن كەلگەن ءار ۇلت دوستاردىڭ كورىكتى ىلەدە باس قوسقانىن قارسى العانىما ەرەكشە قۋانامىن.

　　«ىلە ءسىزدى قارسى الادى» دەگەن ءان باستالۋ سالتىنىڭ ويىن - ساۋىق جانە دەنە تاربيە كونسەرتىنىڭ شىمىلدىعىن اشتى. «تيانشاننىڭ تۇستىگى مەن تەرىستىگىندە انار پىستى، انار پىسىپ، تۇرمىسىمىز باقىتتى بولدى...» باستالۋ سالتىنداعى كونسەرت 48 مينۋتقا جالعاسىپ، «پارتياعا العىس ايتۋ، پارتيانىڭ سوزىنە قۇلاق اسۋ، پارتياعا ىلەسۋ» دەگەندى نەگىزگى تاقىرىپ ەتىپ، «انار پىستى»، «ساحارا جىرى»، «ءار ۇلت پەرزەنتتەرىنىڭ جۇرەگى پارتيا دەپ سوعادى» سىندى 3 تاراۋعا ءبولىندى. 3 تاراۋ بۇكىل شينجياڭداعى ءار ۇلت جۇرتشىلىعىنىڭ اناردىڭ دانىندەي تىعىز ۇيىسىپ، قوعام ورنىقتىلىعى مەن باياندى تىنىشتىق باس نىساناسىن جۇزەگە اسىرۋ ءۇشىن ىنتىماقتاسا قۇلشىنعان رۋحاني بەينەسىن ايگىلەدى، - دەپ تانىستىردى باستالۋ سالتىنىڭ باس رەجيسسەرى زىڭ جيان.

　　بۇدان سىرت، باستالۋ سالتىنداعى كونسەرت «مادەنيەت جانە دەنە تاربيە ＋ ناقتى كورىنىس كونسەرتى» ارقىلى، ءداستۇرلى ءان - ءبي كونسەرتىنىڭ ورنىن باسىپ، ءبىر ۇلكەن جارقىن تۇيىنگە اينالدى. كوركەم دە تارتىمدى قاراجورعا، ەرشىمدى دە اسەم ساۋردىن، ريتىمى ويناقى قومۇز ءنومىرى قويىلعاندا، بايگە، قىزقۋار، كوكپار، ساعاردى، باسكەتبول، ۇلتتىق گيمناستيكا سياقتى اۆتونوميالى رايونىمىزداعى ءار ۇلت جۇرتشىلىعى قىزۋ ۇناتاتىن ءارى كەڭ كولەمدى قاتىناساتىن سپورت تۇرلەرى ءبىر - بىردەن كورسەتىلىپ، اۆتونوميالى رايوندىق پارتكوم مەن ۇكىمەتتىڭ ايرىقشا ءمان بەرۋىندە رايونىمىزداعى ۇلتتاردىڭ ءداستۇرلى مادەنيەتى مەن دەنە تاربيە سپورتىنىڭ گۇلدەنگەن، دامىعان جاعدايىن ايگىلەدى.

　　ءانشى ليۋ يۋانيۋان شىرقاعان «تيانشان پەرزەنتتەرىنىڭ جۇرەگى پارتيا دەپ سوعادى» دەگەن ءان باستالۋ سالتىنداعى كونسەرتتى شىرقاۋ شىڭىنا شىعاردى. ءار ۇلت پەرزەنتتەرىنىڭ اراسىندا ۇلكەن دە ايبىندى بەس جۇلدىزدى قىزىل تۋ جەلبىرەدى.

　　باستالۋ سالتىنداعى 3 نومىرگە قاتىناسقان يۇي ۋيۋي ىلە پەداگوگيكا شۋەيۋانىنان كەلگەن. يۇي ۋيۋي تىلشىگە بىلاي دەدى: جازعى دەمالىستا جاپالى جاتتىعۋ جاسادىق، ەڭ سوڭىندا ويىن مۇلتىكسىز ورىندالعاندا، تارتقان جاپامىزدىڭ ەرەكشە ماعىنالى بولعاندىعىن سەزدىك. ۇلتتار سپورت جينالىسىنىڭ اۋىلىمىزدا وتكىزىلگەندىگىنە ەرەكشە قۋاندىم، بۇعان ات سالىسقانىمدى ەرەكشە ماقتانىش ەتەمىن.

 　باستالۋ سالتىن ۇستىندە تاماشالاعان 74 جاستاعى بەيسەن اقساقال تەبىرەنە بىلاي دەدى: بۇل ۇلتتاردىڭ ۇلى ىنتىماعىنىڭ سالتاناتتى جينالىسى، وسى ارقىلى ادامدار ءار ۇلتتىڭ شۇعىلالى مادەنيەتىنەن ءلاززاتتاندى. وسى تەرەزە ارقىلى ءبىز پارتيانىڭ باسشىلىعىندا شينجياڭداعى ءار ۇلت پەرزەنتتەرىنىڭ ءبىر نيەتپەن ىنتىماقتاسىپ، قاجىرلىلىقپەن العا ىلگەرىلەگەن رۋحاني بەت - بەينەسىن كوردىك. پارتياعا العىس ايتىپ، پارتياعا ماڭگى ىلەسەمىز.