شينحۋا اگەنتتىگىنىڭ 9 - ايدىڭ 18 - كۇنى بەيجيڭنەن بەرگەن حابارى (ءتىلشى لي جۇڭفا). مەملەكەت ءتوراعاسى شي جينپيڭ 9 - ايدىڭ 18 - كۇنى حالىق سارايىندا جازعى داۆوس تالقى مىنبەرىنە قاتىناسۋ ءۇشىن جۇڭگوعا كەلگەن لاتۆيانىڭ زۇڭتۇڭى ۆەيونيسپەن كەزدەستى.
شي جينپيڭ مىنانى اتاپ كورسەتتى: كەزەكتە جۇڭگو مەن لاتۆيا قارىم - قاتىناسىنىڭ دامۋ بەتالىسى ايتارلىقتاي جاقسى. لاتۆيا بالتىق تەڭىزى ەلدەرى ىشىندە جۇڭگومەن «ءبىر بەلدەۋ، ءبىر جولدى» بىرگە قۇرۋ سەلبەستىك حۇجاتىنا ءبىرىنشى بولىپ قول قويىسقان ەل. جۇڭگو لاتۆيامەن بىرگە ءوزارا قۇرمەتتەۋ، تەڭ مامىلە جاساۋ نەگىزىندە، ساياسي سەنىمدىلىكتى ۇزبەي تەرەڭدەتىپ، ەكونوميكا - ساۋدا سەلبەستىگىن كەڭەيتىپ، گۋمانيتارلىق اۋىس - كۇيىستى جيىلەتىپ، ەكى ەل حالقىنا اناعۇرلىم تاماشا باقىت جاراتۋدى قالايدى. تاراپتار ەكى ەلدىڭ دامۋ ستراتەگياسىن ۇشتاستىرۋدى ىلگەرىلەتىپ، قاتىناس، زات اينالىمى، نەگىزدىك قۇرىلعى قۇرىلىسى سياقتى جاقتارداعى سەلبەستىكتى كۇشەيتىپ، ازيا مەن ەۆروپانىڭ ۇلاسۋىن - تۇتاسۋىن ىشكەرىلەي دامىتۋدى جەبەۋ كەرەك.
شي جينپيڭ مىنانى اتاپ كورسەتتى: جۇڭگو مەن ەۆروپا دۇنيە جۇزىندەگى ەكى ۇلكەن ورنىقتى كۇش جانە ەكى ۇلكەن نەگىزگى ەكونوميكالىق تۇلعا ساناتىندا، ستراتەگيالىق بايلانىستى كۇشەيتىپ، ەسىكتى ءوزارا اشىق ۇستاۋدان جازباي، جۇڭگو - ەۆروپا سەلبەستىگى ارقىلى كوپ جاقتىلىقتى قورعاپ، اشىق الەمدىك ەكونوميكانى بىرگە قۇرىپ، دۇنيە ءجۇزىنىڭ بەيبىتشىلىگىن، ورنىقتىلىعىن، دامۋىن جەبەۋ كەرەك. بۇل جۇڭگو - ەۆروپا قارىم - قاتىناسىنىڭ جالپى جاعدايى ءارى جۇڭگو مەن ەۆروپانىڭ ورتاق جاۋاپكەرلىگى. جۇڭگو مەن ورتا، شىعىس ەۆروپا سەلبەستىگى جۇڭگو - ەۆروپا قارىم - قاتىناسىنىڭ ماڭىزدى قۇرامداس بولىگى جانە پايدالى تولىقتاۋشىسى ءارى «ءبىر بەلدەۋ، ءبىر جول» باستاماسىنىڭ ەۆروپا ەكونوميكا شەڭبەرىمەن توعىسۋىىنىڭ ماڭىزدى دانەكەرى. جۇڭگو لاتۆيامەن جۇڭگو - ەۆروپا وداعى جانە ورتا، شىعىس ەۆروپامەن جۇڭگونىڭ سەلبەستىگى اياسىنداعى سەلبەستىكتى كۇشەيتۋدى قالايدى.
ۆەيونيس مىنانى ءبىلدىردى: لاتۆيا مەن جۇڭگو تاماشا ساياسي سەنىمدىلىكتى جانە ءجيى بارىس - كەلسىتى ساقتاپ كەلەدى، سەلبەستىكتىڭ كومەسكى كۇشى زور. لاتۆيا «ءبىر بەلدەۋ، ءبىر جول» ماڭىزدى باستاماسىن جوعارى باعالايدى، ورتا، شىعىس ەۆروپا مەن جۇڭگونىڭ سەلبەستىك مەحانيزمى لاتۆيا جونىنەن توتەنشە ماڭىزدى دەپ قارايدى، ەكەۋىن ءوزارا ۇشتاستىرىپ، ەكونوميكا - ساۋدا، قارجى قوسۋ، قاتىناس، زات اينالىمى، ساياحات سياقتى سالالاردا سەلبەستىكتى كۇشەيتىپ، گۋمانيتارلىق اۋىس - كۇيىستى جيىلەتۋ كەرەكتىگىن دارىپتەيدى. لاتۆيا ەۆروپا - جۇڭگو قاتىناسىنىڭ دامۋىن ىلگەرىلەتۋگە كۇش سالۋدى قالايدى.
كەزدەسۋدەن كەيىن ەكى ەلدىڭ مەملەكەت باسشىلارى ەكى جاقتى سەلبەستىك حۇجاتتارىنا قول قويۋعا بىرگە كۋا بولدى.
ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.
