شينحۋا اگەنتتىگىنىڭ 9 - ايدىڭ 18 - كۇنى بەيجيڭنەن بەرگەن حابارى (ءتىلشى لي جۇڭفا). مەملەكەت ءتوراعاسى شي جينپيڭ 9 - ايدىڭ 18 - كۇنى حالىق سارايىندا جازعى داۆوس تالقى مىنبەرىنە قاتىناسۋ ءۇشىن جۇڭگوعا كەلگەن ساموانىڭ زۇڭليى تۋيلاەپامەن كەزدەستى.
شي جينپيڭ تۋيلاەپانىڭ جۇڭگو - ساموا قارىم - قاتىناسىنىڭ دامۋىن ىلگەرىلەتۋ ءۇشىن قوسقان ۇلەسىن القادى. شي جينپيڭ مىنانى اتاپ كورسەتتى: ساموا جۇڭگومەن ەڭ ەرتە ديپلوماتيالىق قارىم - قاتىناس ورناتقان تىنىق مۇحيت ارال ەلدەرىنىڭ ءبىرى. جۇڭگو جۇڭگو - ساموانىڭ ءداستۇرلى دوستىعىن قاستەرلەيدى، ساموانىڭ ۇزاق ۋاقىتتان بەرى ءبىر جۇڭگو پرينسيبىن ۇستانۋعا تاباندى بولعاندىعىن القايدى، ساموانىڭ ەكونوميكانى دامىتۋىن، حالىق تۇرمىسىن جاقسارتۋىن ۇزدىكسىز قولدايدى، حالىقارالىق جانە وڭىرلىك ىستەردە ساموانىڭ جانە باسقا دا تىنىق مۇحيت ارال ەلدەرىنىڭ ورىندى مۇددەسىن قورعايدى. جۇڭگو ساموامەن «ءبىر بەلدەۋ، ءبىر جولدى» بىرگە قۇرۋدى وراي ەتىپ، ءتۇرلى سالاداعى ناقتى سەلبەستىكتى كەڭەيتۋدى قالايدى. جۇڭگو ساموا سياقتى تىنىق مۇحيت ارال ەلدەرىنىڭ كليمات وزگەرىسى ماسەلەسىنە قاداعالاي نازار اۋدارىپ وتىرعاندىعىن تۇسىنەدى جانە وعان وسكەلەڭ ءمان بەرەدى، ساموامەن جانە حالىقارالىق قوعاممەن بىرگە، الەمنىڭ كليمات وزگەرىسىنە توتەپ بەرۋ اياق الىسىن بەلسەنە ىلگەرىلەتۋدى قالايدى.
تۋيلاەپا مىنانى ءبىلدىردى: ساموا مەن جۇڭگو ديپلوماتيالىق قارىم - قاتىناس ورناتقان 43 جىلدان بەرى، ەكى ەل ءبىر جۇڭگو پرينسيبى نەگىزىندە ءوزارا سەنىم ارتاتىن تىعىزدوستىق قاتىناستى دامىتتى. ساموا جۇڭگومەن بولعان قاتىناستى قاستەرلەيدى، «ءبىر بەلدەۋ، ءبىر جول» باستاماسىن قولدايدى، وسى ماڭىزدى جۇلگە نەگىزىندە ەكى ەلدىڭ ەكونوميكا - ساۋدا، قارجى قوسۋ، ساياحات سياقتى سالاداعى سەلبەستىگىن كەڭەيتىپ، گۋمانيتارلىق اۋىس - كۇيىستى جيىلەتۋدى قالايدى. ساموا جۇڭگونىڭ كليمات وزگەرىسىنە توتەپ بەرۋ جاعىنداعى جەتەكشىلىك رولىن القايدى، تاراپتاردىڭ كوپ جاقتى ىستەردەگى سەلبەستىگىن كۇشەيتۋدى قالايدى.
ياڭ جيەچى، ۋاڭ ي قاتارلىلار كەزدەسۋگە قاتىناستى.
