جۇڭچيۋ تارتۋىن شالعايدان جىبەرىپ، ساعىنىش سەزىمىن جەتكىزدى
ءتىلشى ما ينيڭ، ميھىرگۇل عوپۇر
ايكۇلشە − جۇڭگولىقتاردىڭ ساعىنىش سەزىمىن جەتكىزىپ، باس قوسۋ ءۇمىتىن بەينەلەيتىن ءداستۇرلى تاعامدارىنىڭ ءبىرى، ول جۇڭچيۋ مەرەكەسىندە كەم بولسا بولمايدى، ال قازىر ءدال قىسقىشتىڭ دا ەڭ ءدامدى كەزى. مىنەكي، شينجياڭنىڭ قىسقىشى اي كۇلشەمەن بىرگە شينجياڭداعىلاردىڭ سۇيىسپەنشىلىگى مەن اۋىل ساعىنىشىن الىپ، سوناۋ شالعايداعى تۋىس - تۋعان، دوس - جاراندارمەن بىرگە اي تاماشالاپ، ساعىنىش سازىن شەرتتى.
9 - ايدىڭ 18 - كۇنى وڭتۇستىك اۆياتسيا سەرىكتەستىگىنىڭ شينجياڭ بولىمشە سەرىكتەستىگى زات تاسىمالىنىڭ جاڭا ءبىر كەزەكتى قاۋىرت مەزگىلىنە ءوتتى، شينجياڭنىڭ قىسقىشى، اي كۇلشەسى وڭتۇستىك اۆياتسيا سەرىكتەستىگى تاسىمالدايتىن نەگىزگى زات بولدى.
وڭتۇستىك اۆياتسيا سەرىكتەستىگى شينجياڭ بولىمشە سەرىكتەستىگى زات تاسىمال ءبولىمى ەل ءىشى لەنياسى ساتۋ ءبولىمىنىڭ باستىعى چۇي ي بىلاي دەپ تانىستىردى: «بۇرىندارى شينجياڭنىڭ قىسقىشى ۇرىمجىدەن اۋە تاسىمالى ارقىلى ىشكى ولكەلەرگە تاسىمالداناتىن، تاسىمالداۋ ۋاقىتى مەرەكەدەن بۇرىنعى بىرنەشە كۇنگە شوعىرلاناتىن. بيىل ءارقايسى ايماقتان، وبلىستان ىشكى ولكەگە تاسىمالداناتىن شينجياڭنىڭ قىسقىشى بارعان سايىن كوبەيدى، اقسۋ، التاي قاتارلى جەرلەردەن اۋە تاسىمالى ارقىلى ۇرىمجىگە جەتكىزىلىپ، ونان كەيىن ىشكى ولكەلەرگە قاراي تاسىمالداناتىن بۇل قىسقىشتار سۋدان شىققاننان داستارقانعا دايىن بولعانىنا دەيىن 24 ساعاتتان اسپايدى، ال وڭتۇستىك اۆياتسيانىڭ بەكەت اۋىستىرىپ جەتۋدە ۇشاق الماستىرماۋ ءتاسىلى قولدانىلعان كەيبىر اۋە لەنيالارىندا بۇل ۋاقىت 8 ساعاتقا دەيىن قىسقاردى. شينجياڭدا باعىلعان قىسقىشتاردىڭ شاباعى دا ىشكەرىدەن اۋە تاسىمالى ارقىلى جەتكىزىلگەن، مۇزتاۋدىڭ قارلى سۋىندا باعىلعان قىسقىشتاردىڭ ءدامى وزگەشە بولعاندىقتان، قاريدارلار توتەنشە ۇناتىپ الادى. بيىل قىسقىشتان قازىرگە دەيىن 50 تونناعا جۋىق تاسىمالداندى، ەڭ قاۋىرت كەزىندە كۇنىنە 3 تونناعا جەتەدى».
ۇعىسۋعا قاراعاندا، شينجياڭنىڭ قىسقىشى، باستىسى، بەيجيڭ، گۋاڭجوۋ، چىڭدۋ، چۇڭچيڭ، كۇنميڭ، ۋحان قاتارلى جەرلەرگە جەتكىزىلەدى ەكەن. جۇڭچيۋ مەرەكەسى كەلۋدەن بۇرىنعى تاسىمالداۋدى اناعۇرلىم ويداعىداي قامتاماسىزداندىرۋ ءۇشىن، وڭتۇستىك اۆياتسيا تاسىمالداۋ قامتاماسىزداندىرۋىن كۇشەيتۋمەن بىرگە، پوچتا مەكەمەسىمەن جانە شۇنفىڭ، دىباڭ سياقتى جەدەل زات تاسىمالداۋ ورىندارىمەن سەلبەستىكتى كۇشەيتىپ، تاسىمالداۋ ونىمدىلىگىن جوعارىلاتىپ، قىزمەت كورسەتۋ ساپاسىن جاقسارتىپ، زاتتىڭ جاڭا بولۋىنا كەپىلدىك ەتكەن.
قىسقىشتان سىرت، شينجياڭنىڭ جەرگىلىكتى اي كۇلشەلەرىن اۋە جولىمەن تاسىمالداعاندار دا ءبىرشاما كوپ بولدى، ايتالىق، مايچۇي - ىر اي كۇلشەسى سياقتىلار اۋە جولىمەن تاسىمالدانىپ، اي كۇلشەلەردىڭ جاڭالىعىنا مۇمكىندىكتىڭ بارىنشا كەپىلدىك ەتىلدى. قازىر ءار كۇنى شينجياڭنان اۋە جولى ارقىلى تاسىمالداناتىن اي كۇلشە مولشەرمەن 2.3 تونناعا جەتەدى، نەگىزىنەن نيڭبو، باۋتوۋ سياقتى جەرلەرگە تاسىمالدانادى. اۋە جولىمەن تاسىمالداۋدان تىس، پوچتا ارقىلى جەتكىزۋدى جانە جەدەل زات جەتكىزۋدى تاڭداعاندار دا بار. 9 - ايدىڭ 18 - كۇنى تۇستەن كەيىن جۇڭگو پوچتا توبى سەرىكتەستىگىنىڭ ءۇرىمجى قالاسى ياڭزىجياڭ جولى بولىمشە مەكەمەسىنىڭ جۇمىس زالىندا كوپتەگەن قالا تۇرعىندارى اي كۇلشە ساتىپ الىپ پوچتادان جولداپ جاتىر. جۇمىس زالىنىڭ ءبىر شەتىنە ارناۋلى سورە قويىلعان، قالا تۇرعىندارىنىڭ ادەمى قوراپتالعان اي كۇلشەلەردەن قالاعانىن تاڭداپ ساتىپ الۋىنا بولادى. سورەنىڭ قاسىندا بۋىلىپ، ءتۇيىلىپ دايىن تۇرعان اي كۇلشەلەر ەلىمىزدىڭ جەر - جەرىنە جونەلتىلۋدى كۇتىپ تۇر. اقىل - كەڭەس سۇراي كەلگەن قالا تۇرعىنى ۋ جىگاڭ اكە - شەشەسىنىڭ الىستاعى چىڭدۋدا ەكەندىگىن، جۇڭچيۋ مەرەكەسى كەزىندە ولارمەن كەزدەسە المايتىن بولعاندىقتان، پوچتادان شينجياڭنىڭ اي كۇلشەسىن جىبەرىپ، الىستاعى تۋىس - تۋعاندارىنا بولعان ساعىنىشىن بىلدىرگىسى كەلگەندىگىن ايتتى.
