ءتىلشىمىز چىن چياڭۋي 9 - ايدىڭ 19 - كۇنى ۇرىمجىدەن حابارلايدى. 9 - ايدىڭ 19 - كۇنى، شينجياڭ يوۋگو بايۋي ساۋدا شەكتى سەرىكتەستىگىمەن سەلبەسكەن لوپنۇر اۋدانىنداعى 3 نان كووپەراتيۆىنىڭ 100گە جۋىق مۇشەسى كۇننەن - كۇنگە مولايعان تاپسىرىستى قاناعاتتاندىرۋ ءۇشىن، وسى بىرنەشە كۇندە اي كۇلشە وندىرۋمەن قاربالاس. جۇڭچيۋ مەرەكەسىنىڭ تاياۋىنا بايلانىستى، اي كۇلشە، سوقماق اي كۇلشە سياقتىلاردى وكىلدىك ەتكەن شينجياڭ ەرەكشەلىگىنە يە اي كۇلشەلەر بولەكشە بوگەنايىمەن كوزگە ءتۇسىپ، شينجياڭنىڭ ءىشى - سىرتىندا قىزۋ ساتىلدى.
لوپنۇر نانىنىڭ تاريحى ۇزاق، مايتوقاش، ءسۇت نان، پياز نان، راۋشان نان سياقتى 8 ۇلكەن ءتۇر بويىنشا 28 ەرەكشە نان - توقاش بار، ونىڭ ىشىندە، «لوپنۇر مايتوقاشى» وسى اۋداننىڭ بەتكە ۇستار ەرەكشە اۋىل شارۋاشىلىق قوسىمشا ونىمدەرىنىڭ ءبىرى.
شينجياڭ يوۋگو بايۋي ساۋدا شەكتى سەرىكتەستىگىنىڭ جاۋاپتىسى گو مەيحۋانىڭ باس بولۋىمەن بىلتىر زەرتتەپ جاسالعان اي كۇلشە نان بازارعا سالىنىسىمەن ءوتىمدى ونىمگە اينالدى. «ءبىز جاڭا ءونىمدى زەرتتەپ جاساعاندا جۇڭچيۋعا از قالعان ەدى، سونىمەن، لوپنۇر نانىنىڭ ەرەكشەلىگىن ساۋلەلەندىرىپ، وعان جاقسارتىلعان ۋرىن اي كۇلشەسىنىڭ ماتەريالدارىن قوسۋ ارقىلى اي كۇلشە نانىن جاساۋدى ۇيعاردىق، ونىڭ كەڭ قارسى الۋعا بولەنەتىنىن كىم ويلاعان. بىلتىر ءبىزدىڭ دايىندىعىمىز جەتكىلىكسىز بولعاندىقتان، ءونىم مولشەرى ىلەسە المادى، بيىل ءبىز تۇتىنۋشىلاردىڭ قاجەتىن قاناعاتتاندىرۋ ءۇشىن، ءوندىرىس كولەمىن ۇلعايتىپ، ءونىم مولشەرىن 4 ەسەگە جۋىق كوبەيتتىك». گو مەيحۋا بىلاي دەدى: قازىر اي كۇلشە نانىنىڭ كۇندىك ساتىلىم مولشەرى 800 كيلوگرامعا جەتتى، ونىڭ ءۇش ۇلەسى ينتەرنەت ارقىلى ساتىلدى، ءونىمىمىز الىستاعى بەيجيڭ، تيانجين سياقتى جەرلەرگە ساتىلىپ وتىر.
وسى بىرنەشە كۇندە، لوپنۇر اۋدانىنىڭ اي كۇلشە نانىنىڭ اتاعى اسپانداۋمەن بىرگە، ءادىل مامەتتۇرانىڭ «سوقماق شاحى» ماركالى سوقماق اي كۇلشەلەرى دە قاۋىرت ساتىلۋ كەزەڭىن قارسى الدى.
«ءبىز بيىل تاپسىرىسپەن جاساعان 80 مىڭ قوراپ سوقماق اي كۇلشە تۇگەلدەي ساتىلىپ بولدى، ساتىلىم مولشەرى بىلتىرعىنىڭ 2 ەسەسىنەن كوپ». حۋنان مىڭشياڭ چيحاڭ ەلەكتروندىق ساۋدا سەرىكتەستىگىنىڭ باسالقاسى ءادىل مامەتتۇرا تەلەفوندا تىلشىگە وسىنى ايتتى.
«سوقماق شاحى» ايگىلى ماركاسىنا يە ءادىل مامەتتۇرا بىرنەشە جىلدىڭ الدىندا - اق سوقماق اي كۇلشەنى بازارعا سالعان بولاتىن، ءاۋ باستا سوقماق اي كۇلشە اي كۇلشەنىڭ بەينەسىنە كەلتىرىلگەن سوقماق قانا ەدى، بيىل زەرتتەۋ ارقىلى ولار جاقسارتىلعان جاڭا ءونىمدى العا قويىپ، بازارعا شىعارىسىمەن تۇتىنۋشىلاردىڭ قۇپتاۋىنا يە بولدى.
«ءبىز شينجياڭنىڭ ءداستۇرلى سوقماعى مەن گۋاڭدۇڭ ۇلگىسىندەگى اي كۇلشەنىڭ جاسالۋ تەحنولوگياسىن توعىستىرىپ، اقىرىندا وسى نۇسقاداعى وزەگى جۇمساق جەمىستى اي كۇلشەنى زەرتتەپ جاسادىق. وتكەن جىلى ءبىز 40 مىڭ قوراپقا جۋىق ساتقان بولاتىنبىز، بيىل ساتىلىم مولشەرى ءبىر قاتتالدى، قازىرگە دەيىن ءبىرتالاي تۇتىنۋشىلار تاپسىرىس بەرىپ جاتىر»، - دەدى ءادىل مامەتتۇرا.
سوقماق اي كۇلشەنىڭ وزەگىندەگى جاڭعاق، بادام، بال سياقتى شيكىزاتتار تۇگەل شينجياڭنان تاڭدالعان، بۇل سوقماق اي كۇلشەنىڭ وزەگىنىڭ اۋەلگى دامىنە كەپىلدىك ەتەدى. وسى ءدامدى تاعام تەڭىز جاعالاۋىنداعى قالالاردا ايرىقشا قارسى الىندى، ونىڭ ىشىندە گۋاڭدۇڭ، جىجياڭ الارماندارى ەڭ كوپ ساتىپ الدى.
ءادىل مامەتتۇرا مىنالاردى ءبىلدىردى: سوقماق اي كۇلشەنى زەرتتەپ جاساعانداعى العاشقى ويىم شينجياڭنىڭ جەرگىلىكتى اس - سۋ مادەنيەتى مەن جۇڭحۋانىڭ ءداستۇرلى اس - سۋىن ۇشتاستىرۋ بولاتىن. «گۋاڭدۇڭ ۇلگىسىندەگى اي كۇلشە، سۋجوۋ ۇلگىسىندەگى اي كۇلشەنىڭ بارلىعى جەرگىلىكتى اس - سۋ ەرەكشەلىكتەرىمەن توعىسۋ ارقىلى وندىرىلگەن، ءبىزدىڭ اشقان جاڭالىعىمىز دا وزىنشە ءبىر ورنەك رەتىندە، شينجياڭعا ۋاكىلدىك ەتەتىن جاڭا ۇلگىدەگى اي كۇلشەگە اينالۋىن ءۇمىت ەتەمىز»، - دەدى ءادىل مامەتتۇرا.
