ءتىلشىمىز حي حۇڭۋي 9 - ايدىڭ 19 - كۇنى ۇرىمجىدەن حابارلايدى. اۆتونوميالى رايوندىق قازىنا مەڭگەرمەسىنەن ۇعىسۋعا قاراعاندا، جۋىقتا اۆتونوميالى رايوندىق قازىنا ەگىن شارۋاشىلىعى ءوندىرىسىن دامىتۋعا 724 ميلليون يۋان قارجى ءبولىپ، ەگىن شارۋاشىلىعىنىڭ جاسىل، جوعارى ءونىمدى تەحنيكالارىن جالپىلاستىرۋدان قىزمەت كورسەتۋ، لايىقتى كولەمدەگى تيجارات، اۋىل - قىستاقتارداعى 1 - ، 2 - ، 3 - كاسىپتەردى توعىستىرا دامىتۋ، جاڭاشا ەگىن شارۋاشىلىعى تيجارات تۇلعالارىن جەتىلدىرۋ، ەگىستىك جەردى تىنىقتىرۋ سىناق ءتۇيىنى سياقتى ەگىن شارۋاشىلىعى نىساندارىن قولداۋعا جۇمسايدى ەكەن.
ۇعىسۋعا قاراعاندا، بۇل ەگىن شارۋاشىلىعى نىساندارى مىنالاردى قامتيدى: جاراقسىز سۋلياۋ جارعاقتاردى جيناپ الىپ قايتادان كادەگە جاراتۋ بويىنشا 40 اۋداندا ۇلگى كورسەتۋ تۇيىندەرىن قۇرىپ، تۇتاس اۋداندا جاراقسىز سۋلياۋ جارعاقتاردى جيناپ الىپ قايتادان كادەگە جاراتۋ سىناق تۇيىندەرىن ىلگەرىلەتىپ، سول ماۋسىمداعى ەگىستىك جەرلەردەگى جاراقسىز سۋلياۋ جارعاقتاردى جيناپ الۋ مولشەرىن %80تەن اسىرۋ؛ 88 اۋداندا (قالا، رايون) نەگىزگى ساتى ەگىن شارۋاشىلىعى تەحنيكاسىن جالپىلاستىرۋ جۇيەسى رەفورماسىن ورىستەتۋگە قولداۋ كورسەتىپ، ەگىن شارۋاشىلىعى عىلىم - تەحنيكاسى تاجىريبەسىنەن ۇلگى كورسەتۋدىڭ ۇزاق ۋاقىتتىق، ورنىقتى 112 بازاسىن قۇرۋ؛ ەگىن شارۋاشىلىعى ءوندىرىسىن قوعامداندىرۋعا قىزمەت كورسەتۋ اۋماعىن 450 مىڭ مۋعا جەتكىزۋ، ت.ب.
2018 - جىلى اۆتونوميالى رايون تۇڭعىش رەت ەگىستىك جەردى تىنىقتىرۋ مەملەكەتتىك سىناق ءتۇيىنى كولەمىنە ەنىپ، 100 مىڭ مۋ جەردە سىناق ءتۇيىنىن ورىستەتتى. ەگىن شارۋاشىلىعى ءوندىرىسىن دامىتۋ بويىنشا 50 ميلليون يۋان قارجى تارىم وزەنى الابىنداعى جەر استى سۋى اۋىر دارەجەدە شەكتەن تىس الىنعان حوتان ايماعى مەن قاشقار ايماعىنداعى دۇمبە ءبيداي اتىزىن تىنىقتىرۋ سىناق ءتۇيىنىن ورىستەتۋگە جۇمسالىپ، ءار مۋ جەرگە 500 يۋاندىق ولشەم بويىنشا ديقان وتباسىلارىنا اسىلىندەگى داقىل ەگىنشىلىگىنەن الاتىن پايدا جانە جەردى باسقارۋعا، قورعاۋعا ۇسىنىلىم رەتىندە قوسىمشا قاراجاتقا بەرىلەدى.
وسى رەت بولىنگەن قارجىنىڭ ىشىندە 32 سىناق تۇيىنىندەگى كەدەي اۋداندارعا بەرىلەتىن ەگىن شارۋاشىلىعىنا قاتىستى ءبىر تۇتاس ورنالاستىرۋ، بىرىكتىرۋ قارجىسىنان 153 ميلليون 770 مىڭ يۋان بار، مۇنى كەدەي اۋداندار كەدەيلىكتەن قۇتىلدىرۋدان قامال الۋ مىندەتىنە شوعىرلى جۇمسايدى.
