ۇلى تۋدى بيىك ۇستاپ، حالىقتىڭ سەنىمىن اقتادى

　　− پارتيا 19 - قۇرىلتايى اشىلعاندىعىنىڭ ءبىر جىلدىعىنا وراي

　　شينحۋا اگەنتتىگىنىڭ شولۋشىسى

　　جاڭا داۋىردە جاڭا ارىن بولۋ، ونان دا ماڭىزدىسى، جاڭا ءىس تىندىرۋ كەرەك. پارتيا 19 - قۇرىلتايى اشىلعاندىعىنا ءبىر جىل تولعان ۋاقىت ساتىندە ارتقا قايىرىلا قاراساق، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، بۇكىل پارتيا، بۇكىل ارميا، بۇكىل ەلدەگى ءار ۇلت حالقى شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، قامال الىپ، قيىندىقتاردى جەڭىپ، ۇدەرە العا ۇمتىلىپ، پارتيا 19 - قۇرىلتايىندا بەلگىلەنگەن ايبىندى نىساناعا قاراي نىق قاداممەن ىلگەرىلەپ، رەفورمادا، دامۋدا تىڭ پاراق اشىپ، جۇڭگونىڭ ۇلان - بايتاق دالاسىندا جاڭا بەينە جارىققا شىقتى.

　　ءداۋىر − ەمتيحان الۋشى، ءبىز − ەمتيحان تاپسىرۋشى، حالىق − باعا قويۋشى. ءبىر جىلدان بەرى، ەكونوميكالىق دامۋدا ورنىقتىلىق بارىسىندا ىلگەرىلەۋ، ورنىقتىلىق بارىسىندا دامۋ جاعدايى ساقتالدى، رەفورمانى جاپپاي تەرەڭدەتۋ ىشكەرىلەي ىلگەرىلەتىلىپ، دابىرالى جۇرگىزىلدى، كەدەيلىكتەن ارىلتۋدان قامال الۋدىڭ سەرپىنى ۇزدىكسىز ارتتى، حالىقتىڭ تابىس سەزىمى، باقىت سەزىمى، حاۋىپسىزدىك سەزىمى اناعۇرلىم تولىقتانا ءتۇستى، پارتيانى جاپپاي قاتاڭ جونگە سالۋ ىشكەرىلەي دامىتىلدى، ءوز الاڭىنداعى ديپلوماتيادا جارقىن تۇيىندەر جارىققا شىعىپ، جۇڭگوشا ءىرى ەل ديپلوماتياسىندا جاڭالىق اشىلدى... وسى تارتىمدى جاۋاپتارعا ەل ءىشى - سىرتى جاعدايىندا تەرەڭ كۇردەلى وزگەرىستەر تۋىلىپ، ءار ءتۇرلى حاۋىپ - قاتەر، سىن - سايىستار توقتاۋسىز جارىققا شىققان جاعدايدا قول جەتكەن، وڭاي - وسپاق قولعا كەلمەگەن. بۇل − شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ جالپى جاعدايدى ءبىر تۇتاس مەڭگەرىپ، عىلمي شەشىم جاساۋىنىڭ ناتيجەسى، ءبىر ميلليارد 300 ميلليوننان استام جۇڭگو حالقىنىڭ جۇدىرىقتاي جۇمىلا سەلبەسۋىنىڭ، قايسارلىقپەن كۇرەس جاساۋىنىڭ ناتيجەسى. وسى وزگەشە ءبىر جىلعا قايىرىلا قاراپ، جاڭا كۇرەس جورىعىنا نازار اۋدارار بولساق، پارتيا 19 - قۇرىلتايىندا بەلگىلەنگەن ايبىندى نىسانانى جۇزەگە اسىرىپ، جۇڭگوشا سوتسياليزم ىستەرىنىڭ جاڭا جاعدايىن اشۋعا دەگەن سەنىمىمىز بەن كۇش - قۋاتىمىز نىعايا ءتۇستى.

　　ۇلى ءىس عىلمي نازاريانىڭ جەتەكشىلىگىن قاجەت ەتەدى. شي جينپيڭنىڭ جاڭا ءداۋىر جۇڭگوشا سوتسياليزم يدەياسى − پارتيا 19 - قۇرىلتايى بايانداماسىنىڭ جانى، ماركسيزمنىڭ جۇڭگوشالانۋىنىڭ ەڭ جاڭا جەتىستىگى. ءبىر جىلدان بەرى، زاۆود، كاسىپورىنداردان ورگان، الەۋمەتتىك اۋماقتارعا، دىر - دۋماندى قالالاردان شەت - شالعاي اۋىل - قىستاقتارعا دەيىن، پارتيانىڭ نازاريادا جاڭالىق اشىپ رەفورما، دامۋعا جەتەكشىلىك ەتۋدىڭ جالىندى امالياتى ءتۇرلى ىستەردىڭ دامۋىنا قۇدىرەتتى يدەيالىق كۇش ۇستەدى. پارتيا 19 - قۇرىلتايىندا بەلگىلەنگەن ايبىندى نىسانانى جۇزەگە اسىرۋدا، تۇپتەپ كەلگەندە، شي جينپيڭنىڭ جاڭا ءداۋىر جۇڭگوشا سوتسياليزم يدەياسىن ارەكەت باعدارلاماسى ەتۋگە تاباندى بولىپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ بەدەلى مەن ورتالىقتانعان ءبىر تۇتاس باسشىلىعىن باتىل قورعاپ، يدەيا مەن ارەكەتتى پارتيا ورتالىق كوميتەتىنىڭ شەشىمدەرىمەن، ورنالاستىرۋلارىمەن بىرلىككە كەلتىرىپ، وي - سانانى قارۋلاندىرۋعا، امالياتقا جەتەكشىلىك ەتۋگە، قىزمەتتى ىلگەرىلەتۋگە كۇش سالىپ، ورنالاستىرۋلاردى تياناقتاندىرۋ، ارەكەتتە ايگىلەۋ جاقتارىندا ناقتى ونىمدىلىككە قول جەتكىزۋ كەرەك.

　　ىستەردىڭ دامۋى تاقىرىپ قويسا، رەفورمانى تەرەڭدەتۋ ءىس تىندىرادى. پارتيا 19 - قۇرىلتايىنان بەرى، رەفورما تاعى دا جەلكەن جايىپ ساپارعا اتتاندى. پارتيا مەن مەملەكەت قۇرىلىمدارى رەفورماسىن تەرەڭدەتۋ، شيۇڭ - ان جاڭا رايونى قۇرىلىسىن ىلگەرىلەتۋ، اۋىل - قىستاقتى گۇلدەندىرۋ ستراتەگياسىن اتقارۋ، ەركىن ساۋدا سىناق رايونى رەفورماسىن تەرەڭدەتۋ، كەڭەيتۋ، جۇڭگوشا ەركىن ساۋدا پورتىن قۇرۋ ۇستىندە ىزدەنىس جاساۋ سياقتى ءبىر قىدىرۋ كەلەلى شارالار ىركەس - تىركەس شىعارىلىپ، رەفورما جاساۋ، ەسىك اشۋدىڭ 40 جىلدىعى سىندى تاريحي تۇيىلىستە جاڭا داۋىردەگى جۇڭگونىڭ رەفورمانى تەرەڭدەتۋ، ەسىكتى ايقارا اشۋداعى مىزعىماس بەكىمىن ءىس جۇزىندىك ارەكەتپەن ايگىلەدى. ىستەردىڭ دامۋى توقتامايدى، رەفورمانى تەرەڭدەتۋدىڭ شەگى جوق. پارتيا 19 - قۇرىلتايىنىڭ رۋحىن دايەكتىلەندىرىپ، ايبىندى نىسانانى جۇزەگە اسىرۋ ءۇشىن رەفورما جاساۋ، ەسىك اشۋ سىندى شەشۋشى شارادان ۇزدىكسىز پايدالانۋ قاجەت. قيىندىقتاردى جەڭىپ جول اشاتىن جالپى جوبا دا، ىجداعاتپەن اتقاراتىن نازىك جوبا دا جاساعاندا عانا، يدەيالىق كوزقاراستاعى جانە ءتۇزىلىس - مەحانيزمدەگى ولقىلىقتاردى باتىل الاستاعاندا عانا، ەكونوميكالىق، قوعامدىق دامۋدىڭ ومىرشەڭدىك كۇشىن قاۋلاتىپ، جاپپاي دوڭگەلەك داۋلەتتى قوعام ورناتۋدىڭ شەشۋشى جەڭىسىنە قول جەتكىزۋگە، جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىن باستاۋعا قۇدىرەتتى قوزعاۋشى كۇش ازىرلەۋگە بولادى.

　　جۇڭگونىڭ ىستەرىن جاقسى ىستەۋدىڭ تەتىگى پارتيادا. قۋاتتى تۇلعا ۇلى دا وزىندىك توڭكەرىستەن سومدالادى، پارتيانى اناعۇرلىم قايسار دا پارمەندى ەتىپ قۇرىپ شىعۋ − عاسىرلىق ۇلى پارتيانىڭ جىگەرىنىڭ جالىنداي ءتۇسۋىنىڭ ساياسي قۇپيا سيفرى ءارى ءداۋىر بورىشىن ۇستىنە الۋدىڭ ءتۇبىرلى كەپىلى. «پارتيانى جاپپاي قاتاڭ جونگە سالۋ ماڭگى جۇرگىزىلەدى، <تىنىستاپ، دەمالىپ الايىن> دەيتىن ەشقانداي وي بولماۋى كەرەك». ءبىر جىلدان بەرى، مەملەكەتتىڭ باقىلاۋ - تەكسەرۋ ءتۇزىلىسى رەفورماسىن تەرەڭدەتۋدەن «جۇڭگو كوممۋنيستىك پارتياسىنىڭ ءتارتىپ جازاسى ەرەجەسىنە» وزگەرىس ەنگىزۋگە، ساياسي قۇرىلىستى شىنايى يگەرۋدەن «جولبارىس سوعۋدى»، «شىبىن قاعۋدى» بوساڭسىتپاۋعا دەيىن، پارتيا قۇرىلىسى ۇزدىكسىز كۇشەيىپ، پارتيانى باسقارۋدا، پارتيانى جونگە سالۋدا جاڭا ناتيجەلەرگە قول جەتتى. پارتيانى جاپپاي قاتاڭ جونگە سالۋدى سوڭىنا دەيىن جۇرگىزىپ، پارتيانىڭ اقاۋسىز تۇلعاسىن شىرىتەتىن بارلىق ۆيرۋستى جالعاستى جويىپ، سالتى دۇرىس، ستيلى پاك ساياسي ەكولوگيانى كۇش سالا قالىپتاستىرۋ، ءسوز جوق، بۇكىل پارتيانىڭ قۇدىرەتتى وڭ ەنەرگياسىمەن بۇكىل قوعامدا جۇڭگونىڭ دامۋىن، العا باسۋىن ىلگەرىلەتۋدىڭ جويقىن كۇشىن ۇيىستىرادى.

　　ۇلى تۋدى بيىك ۇستاپ، حالىقتىڭ سەنىمىن اقتادى. «ءبىزدىڭ نىسانامىز وتە ايبىندى، سونداي - اق وتە قاراپايىم، سايىپ كەلگەندە، بۇكىل جۇڭگو حالقىنىڭ ءتىپتى جاقسى تۇرمىس كەشىرۋىنە مۇمكىندىك جاساۋ». جۇڭگو حالقىن باقىتقا كەنەلتۋ، جۇڭحۋا ۇلتىنىڭ گۇلدەنۋىن جۇزەگە اسىرۋ − جۇڭگو كوممۋنيستەرىنىڭ اۋەلگى ماقساتى مەن بورىشى. حالىقتى وزەك ەتۋگە تاباندى بولىپ، حالىقتىڭ تاماشا تۇرمىسقا دەگەن تالپىنىسىن كۇرەس نىساناسى ەتسەك بولعانى، ءسوز جوق، ىنتىماقتاسا كۇرەس جۇرگىزۋدىڭ جويقىن كۇشىن ۇيىستىرىپ، پارتيا 19 - قۇرىلتايىندا جاسالعان ۇلى جوبانى رەالدىققا اينالدىرىپ، جاڭا ءداۋىردىڭ شۇعىلالى ناتيجەلەرىن ۇزدىكسىز جارىققا شىعارا الامىز.

　　(شينحۋا اگەنتتىگىنىڭ 10 - ايدىڭ 17 - كۇنى بەيجيڭنەن بەرگەن حابارى)