شينحۋا اگەنتتىگىنىڭ 10 - ايدىڭ 17 - كۇنى بەيجيڭنەن بەرگەن حابارى (ءتىلشى سۇن ي). مەملەكەت ءتوراعاسى شي جينپيڭ 10 - ايدىڭ 17 - كۇنى حالىق سارايىندا رەسەي زۇڭتۇڭ كەڭسەسىنىڭ مەڭگەرۋشىسى ۆاينوۆپەن كەزدەستى.
شي جينپيڭ ۆاينوۆقا پۋتين زۇڭتۇڭعا دەگەن ىقىلاستى سالەمى مەن تاماشا تىلەگىن جەتكىزۋدى تاپسىردى. شي جينپيڭ مىنانى اتاپ كورسەتتى: وتكەن ايدا 4 - كەزەكتى شىعىس ەكونوميكا تالقى مىنبەرىنە قاتىناسقان كەزىمدە، پۋتين زۇڭتۇڭمەن تاماشا كەڭەس وتكىزدىم. مەنىڭ پۋتين زۇڭتۇڭمەن ءجيى بارىس - كەلىستى ساقتاۋىم جۇڭگو مەن رەسەيدىڭ جالپى بەتتىك ستراتەگيالىق سەلبەستىك سەرىكتەستىك قاتىناسىنىڭ ىشكەرىلەي دامۋىندا وتە جاقسى جەتەكشىلىك رول اتقاردى. جۇڭگو مەن رەسەيدىڭ قاتىناسى تاريحتاعى ەڭ جاقسى كەزەڭدە تۇر. كەزەكتەگى دۇنيە ءجۇزى اۋقىمىندا جۇڭگو مەن رەسەي ەكى ەلدىڭ تولىسقان، بەرىك سەرىكتەستىك قاتىناسىن ايرىقشا قاستەرلەپ، ءار سالاداعى سەلبەستىكتى بۇلجىماستان تەرەڭدەتۋ كەرەك. ەكى جاق مەنىڭ پۋتين زۇڭتۇڭمەن كەلىسكەن ورتاق تانىمدارىمىزدى جەدەل تياناقتاندىرىپ، ەكى ەلدىڭ ەنەرگيا، جاڭالىق اشۋ سياقتى سالالارداعى سەلبەستىگىن تەرەڭدەتىپ، «ءبىر بەلدەۋ، ءبىر جول» قۇرىلىسىن ەۆروپا - ازيا ەكونوميكالىق وداعىمەن ۇشتاستىرۋ سەلبەستىگىن جەدەلدەتۋ كەرەك. حالىقارالىق ىستەردەگى اۋىس - كۇيىستى، سايكەستىكتى بارعان سايىن جيىلەتۋ كەرەك. ەكى جاق ەكى ەلدىڭ جوعارى جىكتەگىلەرىنىڭ كەلەسى كەزەڭدەگى بارىس - كەلىسىن ويداعىداي جوبالاپ، جوسپارلاپ، جاڭا داۋىردەگى جۇڭگو مەن رەسەي قاتىناسىنىڭ تىڭ ساتىعا كوتەرىلۋىن ىلگەرىلەتۋ كەرەك.
شي جينپيڭ مىنانى اتاپ كورسەتتى: ج ك پ ورتالىق كوميتەتىنىڭ كەڭسەسى مەن رەسەي زۇڭتۇڭ كەڭسەسىنىڭ سەلبەستىك مەحانيزمى ەكى جاق بارىس - كەلىسىنىڭ وزگەشە ارناسى، توتەنشە ماڭىزدى، بۇل جۇڭگو مەن رەسەي قاتىناسىنىڭ وزگەشەلىگىن جانە ماڭىزدىلىعىن ايگىلەدى. مەن ەكى جاقتىڭ وسى مەحانيزمدى ويداعىداي جۇرگىزۋىن قولدايمىن. ەكى كەڭسە بىرگە قۇلشىنىپ، ەكى ەل باسشىلارىنىڭ قول جەتكىزگەن سەلبەستىك ورتاق تانىمدارىن ويداعىداي تياناقتاندىرىپ، ەكى ەل قاتىناسىنىڭ دامۋى سىندى جالپى جاعدايعا ويداعىداي قىزمەت وتەۋ كەرەك.
ۆاينوۆ، اۋەلى، پۋتين زۇڭتۇڭنىڭ ءتوراعا شي جينپيڭگە جولداعان دوستىق سالەمىن جانە ەڭ تاماشا تىلەگىن جەتكىزدى. ۆاينوۆ مىنانى ءبىلدىردى: پۋتين زۇڭتۇڭ 4 - كەزەكتى شىعىس ەكونوميكا تالقى مىنبەرى كەزىندە ءتوراعا شي جينپيڭمەن وتكىزگەن ىشكەرىلەي كەڭەسىنە جوعارى باعا بەردى، سونداي - اق ءتوراعا شي جينپيڭمەن تاعى دا كەزدەسۋدى كۇتىپ وتىر. جۇڭگومەن ستراتەگيالىق سەلبەستىك جاساۋ رەسەيدىڭ سىرتقى قاتىناسىندا مىزعىماستان الدىمەن ويلاستىراتىن بەتالىسى. رەسەي مەن جۇڭگو قاتىناسى تاريحتاعى ەڭ جاقسى دەڭگەيدە تۇر، ەكى ەلدىڭ سەلبەستىگى بۇگىنگى دۇنيە جۇزىندەگى حالىقارالىق قارىم - قاتىناستىڭ ۇلگىسى دەۋگە بولادى. رەسەي ەكى ەل باسشىلارىنىڭ ءجيى بارىس - كەلىستى ساقتاعاندىعىن، ەكى ەل ۇكىمەت تاراۋلارىنىڭ بەلسەنە سەلبەستىك ورىستەتكەندىگىن، ەكى ەل حالقىنىڭ ءداستۇرلى دوستىعى دا ەكى جاق قاتىناسىنىڭ ءۇرتىس العا دامۋىنا ءتۇبىرلى كەپىل ازىرلەگەندىگىن قۋانا كورىپ وتىر. رەسەي زۇڭتۇڭ كەڭسەسى مەن ج ك پ ورتالىق كوميتەتى كەڭسەسىنىڭ سەلبەستىك مەحانيزمى سىندى وزگەشە سەلبەستىك فورماسى رەسەي مەن جۇڭگو سەلبەستىگىنىڭ كەم بولسا بولمايتىن ماڭىزدى قۇرامداس بولىگى. رەسەي ەكى كەڭسەنىڭ سەلبەستىگىن ىشكەرىلەي كۇشەيتىپ، ەكى ەل باسشىلارىنىڭ ورتاق تانىمدارىن شىنايى ويداعىداي تياناقتاندىرىپ، رەسەي مەن جۇڭگونىڭ جالپى بەتتىك ستراتەگيالىق سەلبەستىك سەرىكتەستىك قاتىناسىنىڭ دامۋىنا تىڭ ۇلەس قوسۋدى قالايدى.
ديڭ شۋەشياڭ كەزدەسۋگە قاتىناستى.
