بىرلەسپە جارىس باستالعالى ءۇرتىس 3 كەزەك جەڭىسكە جەتتى
ءتىلشى دۇڭ لياڭ 10 - ايدىڭ 26 - كۇنى ۇرىمجىدەن حابارلايدى. 10 - ايدىڭ 26 - كۇنى كەشتە شينجياڭ گۋاڭحۇي اۆتوموبيلى ەرلەر باسكەتبول كومانداسى ءوز الاڭىندا جىجياڭنىڭ چوۋجوۋ بانكەسى ەرلەر باسكەتبول كومانداسىمەن كەزدەستى. ءبىرىنشى كەزەڭدە 14 ۇپايمەن ارتتا قالعان شينجياڭ ەرلەر باسكەتبول كومانداسى جارىستىڭ ەكىنشى جارتىسىندا باسىم ءتۇسىپ، اقىرىندا ىرىقسىز كۇيدەن ىرىقتى كۇيگە ءوتىپ، 97 ۇپايعا قارسى 101 ۇپايمەن قارسىلاسىن ۇتىپ، بىرلەسپە جارىس باستالعالى ءۇرتىس 3 كەزەك جەڭىسكە جەتتى.
جارىس باستالعاندا، ەكى كوماندا ايىپ الاڭىنىڭ سىرتىنان شابۋىل ۇيىمداستىردى. شينجياڭ كومانداسىنىڭ دىتتەگەن شابۋىلدارى نىساناعا دارىماي، داريۇس ادامس پەن زىڭ ليڭشۇيدىڭ 3 ۇپايلىق دوبىنىڭ ءبارى دالاعا كەتتى. كەرىسىنشە، قوناق كومانداداعى شەتەلدىك دوپشى ماركۇس دەنمون مەن جۋ شۇيحاڭ ءۇرتىس 3 رەت 3 ۇپايلىق دوپ تاستاپ، قوناق كوماندا 2 ۇپايعا قارسى 11 ۇپايمەن العا شىقتى. ابدىسالام ابدىرەشيت پەن جوۋ يشياڭنىڭ بابى كەلمەگەن جاعدايدا، كوماندانىڭ شابۋىلىنا جالعىز ادامس تىرەك بولدى، سوندا دا شينجياڭ كومانداسى ءبىرىنشى كەزەڭدە 31 ۇپايعا قارسى 17 ۇپايمەن ارتتا قالدى. جارىستىڭ ەكىنشى كەزەڭىندە، اير جەففەرسوننىڭ الاڭعا شىعۋى شينجياڭ كومانداسىنىڭ شابۋىل ءتۇيىنىن كوبەيتىپ، ادامس ەكەۋى ءبىر - ءبىرىن قورعاشتاي سەلبەسىپ، قارسىلاسىن قورعانۋعا ۇلگىرتپەي الەككە سالدى. سونىمەن قاتار، بۇكىل الاڭدىق قورعانىس جانە قاپتال شەپتىڭ دوپ العان دوپشىنى قاۋمالاۋ تاكتيكاسى ايتارلىقتاي ناتيجە بەرىپ، جارىستىڭ الدىڭعى جارتىسى اياقتاعان كەزدە، شينجياڭ كومانداسى 49 ۇپايعا قارسى 44 ۇپايمەن قارسىلاسىن تىقسىرا ءتۇستى.
جارىستىڭ ەكىنشى جارتىسىندا، ابدىسالامنىڭ بابىنا كەلۋىنە بايلانىستى، شينجياڭ كومانداسىنىڭ شابۋىلى ۇدەي ءتۇستى. كوماندا 3 - كەزەڭ اياقتاۋعا تاياعاندا، 2 ۇپايعا قارسى 8 ۇپايمەن ۇدەمە شابۋىل ۇيىمداستىرىپ، 69 ۇپايعا قارسى 69 ۇپايمەن تارازى باسىن تەڭەستىردى ءارى 3 - كەزەڭ اياقتاعان كەزدە، 71 ۇپايعا قارسى 75 ۇپايمەن قارسىلاسىن باسىپ وزىپ، سوڭعى كەزەڭگە ءوتتى. سوڭعى كەزەڭدە، ابدىسالام سەبەتتەن قايتقان دوپتى قاعىپ الىپ، زىڭ ليڭشۇيدىڭ 3 ۇپايلىق دوپ تاستاۋىنا كومەك بەرسە، ادامس قورعانىستى جارىپ ءوتىپ، قىرانبەك ماكەننىڭ تاعى ءبىر 3 ۇپايلىق دوپ تاستاۋىنا جاردەم جاسادى. شينجياڭ كومانداسى 2 ۇپايعا قارسى 8 ۇپايمەن تاعى ءبىر مارتە شابۋىل تولقىنىن ۇيىمداستىرىپ، ەسەپ ايىرماسىن ۇلعايتا ءتۇستى. اقىرىندا، شينجياڭ كومانداسى ىرىقسىز كۇيدەن ىرىقتى كۇيگە ءوتىپ، تاماشا ويىن كورسەتتى.
«بىرلەسپە جارىس باستالعان سوڭ، ءبىزدىڭ ماقساتىمىز كوماندانى جەدەل شيراتا ءتۇسۋ بولدى. 3 كەزەك جارىستا بىردەي جەڭىسكە جەتتىك، بۇل جاقسى ناتيجە. بۇگىنگى ارتتا قالعان جاعدايدا قارسىلاستى باسىپ وزۋىمىز مەنىڭ كوماندانىڭ قورعانىسى جونىندەگى تالابىمدى ايگىلەدى»، - دەيدى شينجياڭ ەرلەر باسكەتبول كومانداسىنىڭ جاتتىقتىرۋشىسى بريان گوورجيان.
جارىستان سوڭ، شينجياڭ كومانداسىنىڭ دوپشىسى ابدىسالام كوماندا ەسكەرۋگە ءتيىس ءبىر ماسەلەنى ورتاعا سالدى، شينجياڭ كومانداسىنىڭ جارىستا سەبەتتەن قايتقان دوپتى يەلەنۋى 56عا قارسى 31 رەتپەن قارسىلاسىنان وسال تۇسكەن. «بۇل ءبىزدىڭ الداعى <قاتارىنان 4 قوناق الاڭداعى> ساپارىمىزعا ساقتىق دابىلىن قاقتى. ەگەر سەبەتتەن قايتقان دوپتى يەلەنۋ ماسەلەسىن جاقسى شەشە الماساق، قوناق الاڭدا جەڭىپ شىعۋىمىز قيىن»، - دەيدى ابدىسالام.
