ءتىلشىمىز لي ياڭ
10- ايدىڭ 31 - كۇنى − ءۇرىمجى قالاسى تيانشان رايونى سانشان الەۋمەتتىك اۋماعى كوركەمونەر شاعىن اترەتىنىڭ جاتتىعاتىن كۇنى. كوپشىلىك ءبىر اراعا باس قوسىپ، وزدەرى قۇراستىرعان كومەديالارىمەن تۇرمىستاعى قۋانارلىق وزگەرىستەردى ايگىلەدى. «قالا تازا ءارى كورىكتى، الەۋمەتتىك اۋماقتىڭ ورتاسى بارعان سايىن جاقساردى»، «نەمەرەم تەگىن قورەكتىك ءسۇت ىشەتىن بولدى، دەمالىسقا شىققان جۇمىسشى - قىزمەتشىلەردىڭ قارتتاردى كۇتىمدەۋ قاراجاتى بارعان سايىن جوعارىلادى»... وسى ءبىر قاراپايىم سوزدەرمەن بۇقارانىڭ كوزبەن كورىپ، قولمەن ۇستاۋعا بولاتىن ناقتى يگىلىكتەرگە كەنەلگەندىگى ايتىلىپ، شينجياڭدىقتاردىڭ شىن جۇرەكتەن باقىت جانە قاناعات سەزىنگەندىكتەرى جەتكىزىلدى.
بۇقارا شاتتانىپ، ات ايگىلەنىپ، سەنىم نىعايدى. ورنىقتىلىقتىڭ پايداسى شينجياڭداعى ءار ۇلت بۇقاراسىنا «تياناقتى باقىت» الا كەلدى.
تىنىش شينجياڭ ساياحاتشىلاردىڭ القاۋىنا يە بولدى
«سالەمەتسىز بە، فوتو اپپاراتتى تاپسىرىپ الدىڭىز با؟». «تاپسىرىپ الدىم، كوپ راقىمەت سىزگە، لي ساقشى!». «فوتو اپپاراتتىڭ بۇلىنگەن جەرى بار ما ەكەن، ساقتاۋ كارتچكاسىنان ماسەلە شىقپاعان شىعار؟ فوتو سۋرەتتەرىڭىز تولىق بولسا كەرەك». «فوتو اپپاراتىم بۇزىلماپتى، توتەنشە راقىمەت! كاسىپتى قادىرلەيتىن شينجياڭدىق ساقشىلارعا بارەكەلدى ايتامىن، تىنىش شينجياڭعا بارەكەلدى ايتامىن!».
بۇل 10 - ايدىڭ 29 - كۇنى تۇستەن بۇرىن ءۇرىمجى قالاسى سايباق رايونى پويەز وڭتۇستىك ۆوكزالى حالىققا قولايلى ساقشى پۋنكتىندەگى ءبىر كورىنىس ەدى، حۋناننىڭ چىنجوۋ قالاسىنا قايتىپ بارىپ العان ساياحاتشى فان ليچيۇڭ حالىققا قولايلى ساقشى پۋنكتىندەگى حالىق ساقشىسى لي دايمەن بەينە كەسكىنمەن سويلەسىپ جاتتى. فان ليچيۇڭ جونىنەن العاندا، جوعالىپ تابىلعان بۇل فوتو اپپاراتىندا شينجياڭنىڭ كوركەم كورىنىستەرى عانا ەمەس، ەڭ ماڭىزدىسى، شينجياڭدىقتاردىڭ اق پەيىل، اشىق - جارقىندىعى ساقتالعان ەدى.
ءبىر اپتانىڭ الدىندا، فان ليچيۇڭ وتباسىنداعىلارمەن بىرگە شينجياڭعا ساياحاتتاي كەلەدى، سولتۇستىك شينجياڭنىڭ كوركەم كورىنىستەرىن تاماشالاپ بولعان ءبىر ءۇيلى جان پويەزبەن قاشقارعا ساياحاتتاۋعا جالعاستى جول الادى، ءبىراق پويەزگە شىعۋدان ىلگەرى فوتو اپپاراتىنىڭ جوعالعانىن بايقايدى. ۆوكزال الدى الاڭىنداعى حالىققا قولايلى ساقشى پۋنكتىن كورگەن فان ليچيۇڭ سىناپ كورەيىن دەگەن ويمەن وسى اراعا دەلو مالىمدەيدى. «پويەز جۇرۋگە تاياپ قالعاندىقتان، وتباسىمداعىلارمەن بىرگە اسىعىس - ۇسىگىس پويەزگە شىقتىم، فوتو اپپارات نەگىزى تابىلمايدى دەپ ويلادىم». الايدا پويەز تۇرپانعا جەتەر - جەتپەستەن لي داي فان ليچيۇڭعا تەلەفون جالعاپ، فوتو اپپاراتتىڭ تابىلعاندىعىن ايتادى. اسىلىندە، دەلونى قابىلداعاننان كەيىن، لي داي فان ليچيۇڭنىڭ ايتقانى بويىنشا سول كۇنى ارالاعان جەرلەرى بويىنشا ىزدەپ، پويەز ۆوكزالىنىڭ ماڭىنداعى ءبىر اسحانادان جوعالعان فوتو اپپاراتتى تاۋىپ العان ەكەن. يەسىنە تەز ارادا جەتكىزىپ بەرۋ ءۇشىن، لي داي فوتو اپپاراتتى كەلەسى كۇنى پوچتا ارقىلى فان ليچيۇڭ قالدىرعان حۋنانداعى ادرەسىنە جولداپ بەرەدى.
لي داي تىلشىگە وسى سياقتى كىشى - گىرىم ىستەردىڭ ۇنەمى تۋىلىپ تۇراتىندىعىن، قازىر شينجياڭنىڭ جالپى جاعدايى ورنىقتى بولعاندىقتان، حالىققا قولايلى ساقشى پۋنكتىنە قىلمىستىق ىستەر دەلوسى نەمەسە اماندىقتى ساقتاۋعا قاتىستى دەلولاردى مالىمدەۋ تەلەفونى نەگىزىنەن كەلمەيدى، كوبىندە ساياحاتشىلارعا قىزمەت ەتۋ، قالا تۇرعىندارىنا قىزمەت ەتۋ سياقتى جۇمىستاردى عانا ىستەيتىندىگىن ايتادى.
اتاقتىڭ ايگىلەنۋى شەكسىز ساۋدا ورايىن جاراتتى
«سىزگە قاجەتتى لاۆاندا جاستىقتى جىبەرىپ بەردىم، 2 كۇننەن كەيىن تاپسىرىپ الاسىز، الاڭسىز بولىڭىز!». 10 - ايدىڭ 30 - كۇنى تۇستەن بۇرىن ءۇرىمجىنىڭ كوشە - كوشەسى كۇزگى كۇننىڭ شۇلەن شۋاعىنا بولەندى، ءۇرىمجى شينجياڭ حالىقارالىق ۇلكەن بازارىنىڭ جاياۋلار كوشەسىندەگى شينجياڭ ەستەلىك بۇيىمدارىن ساتاتىن ءبىر دۇكەندە 23 جاستاعى مايرا سۇلتان ءبىر جاعىنان، ىشكى جەردەگى قاريدارىمەن تەلەفوندا سويلەسىپ، ەندى ءبىر جاعىنان، دۇكەندەگى الارماندارعا روزا گۇلى شايىن تاڭداپ بەرىپ جاتىر. «قازىر زات جەتكىزۋ توتەنشە دامىدى، ساياحاتشىلاردىڭ تاڭداعان تاۋارلارىن تىكە ۇيىنە سالىپ جىبەرەمىن، ساياحاتشىلار وزدەرىمەن بىرگە الىپ ءجۇرىپ اۋرە بولمايدى، ەرەكشە قولايلى».
مايرا بيىل داشۋەدەن وقۋ تاۋىسقاننان كەيىن قىزمەت ىزدەمەي، جاياۋلار كوشەسىنەن ءبىر ورىندى مايعا الىپ، ءوزىنىڭ شارۋاشىلىق قۇرۋ جولىن باستادى. ول تاعى تەلەفونىمەن بەينە ەكران جولداپ، جاياۋلار كوشەسىندەگى جانە وزىندەگى ەرەكشە ونىمدەردى تانىستىرىپ تۇردى. «ۇلكەن بازاردىڭ اتى قازىر ينتەرنەت ارقىلى بۇكىل ەلىمىزگە ايگىلى بولدى، سونىمەن بىرگە، شينجياڭعا كەلگەن جاستاردىڭ سوقپاي كەتپەيتىن جەرىنە اينالدى. اتاعى ايگىلەنگەننەن كەيىن، ساۋدا دا تابيعي تۇردە جاقسارادى ەكەن، بولاشاققا دەگەن سەنىمىم ارتا ءتۇستى».
ۇلكەن بازارداعى جاياۋلار كوشەسىنىڭ اتى جالپاق جۇرتقا تانىلعاننان كەيىن، بۇل اراداعى جايما ورىندارى دا ساۋداگەرلەردى قىزىقتىرا ءتۇستى. ءۇرىمجى شينجياڭ حالىقارالىق ۇلكەن بازارىنىڭ جاياۋلار كوشەسىنە ساۋداگەر شاقىرۋ ءبولىمىنىڭ ديرەكتورى دىلشاتجان مامەت بىلاي دەدى: مادەنيەت جاڭالىعى، مادەنيەت ساياحاتى جانە بەيزاتتىق مادەنيەت مۇرالارى نىساندارى كوشەشىندە جالپى 40 ورىن بار، الايدا وعان 3000نان استام ساۋداگەر تىزىمدەلدى، ءبىر ورىنعا يە بولۋدىڭ ءوزى وڭايعا تۇسپەيدى. «جۇمىس باستاعالى 2 ايدان استام ۋاقىت بولدى، ءار كۇنى كەلىپ جاعداي ۇعىساتىن ساۋداگەرلەر ءالى كوپ».
تاماشا قوعامدىق ورتا ورنىقتى ادام اينالىمىن، زات اينالىمىن جانە ينفورماتسيا اينالىمىن الا كەلدى، قاعىلەز ساۋداگەرلەر دە قاراپ وتىرماي جۇمىسقا كىرىستى. بيىل 9 - ايدا جىجياڭنىڭ نيڭبوسىنان كەلگەن حۋاڭ حۋا ءۇرىمجى قالاسىنداعى شينچي ساۋدا سارايىنان 40 شارشى مەتر كەلەتىن كوزىلدىرىك دۇكەنىن اشتى، «بۇل ارانىڭ ورتاسى مەنىڭ ويلاعانىمنان الدەقايدا جاقسى ەكەن، ءار كۇنگى تيجارات سومام 3000 يۋاننان اسادى، شينجياڭعا كەلۋ مەن ءۇشىن وتە دۇرىس تالعام».
شينجياڭ حالىقارالىق شاڭماۋچىڭ شەكتى جاۋاپكەرشىلىك سەرىكتەستىگى شينچى ساۋدا سارايىنىڭ ديرەكتورى لياڭ مەي بىلاي دەپ تانىستىردى: قازىر دۇكەندەردىڭ مايعا بەرىلۋ سالىستىرماسى%100كە جەتىپ، جاقىنعى جىلداردان بەرى ەڭ كۇسەت ءبىر جىل بولدى. شينجياڭ جىبەك جولى ەكونوميكالىق بەلدەۋىنىڭ وزەكتى رايونى، قازىر قوعام بارعان سايىن ورنىقتى، جۇرت تىلەگى دە بارعان سايىن توعىستى، بولاشاقتا بازار ءورىسىنىڭ ءتىپتى دە كەڭەيە تۇسەتىندىگىنە سەنىمىم كامىل.
اتى - زاتىنا ساي «شينجياڭ جاقسى جەر»
تىنىشتىققا شومعان ءتۇن اسپانىندا جۇلدىزدار جامىراپ، كۇڭحوۋ مۋزيكاسى ءشول دالادا اسقاقتاپ، اسەم ءۇن الىسقا تارالدى... 10 - ايدىڭ 20 - كۇنى چەرشەن اۋدانى ءشول دالا كۇڭحوۋ جۇلدىزدى مۋزيكا ساۋىق كەشىن وتكىزدى. «تاكلاماكان ءشولى، شەكسىز قۇم، سامسىعان جۇلدىز، اسقاقتاعان بايىرعى اۋەن، ۇزاققا سوزىلعان رويال ءۇنى، بۇل ماعان شىنىمەن كەرەمەت سەزىم سيلادى»، - دەگەن جياڭسۋلىق ساياحاتشى جاۋ مىڭفان ءسوزىن جالعاپ: بۇل مەنىڭ ءشول دالادا العاش رەت كۇڭحوۋ مۋزيكا كەشىنەن ءلاززات الۋىم، مىڭ جىل ارىداعى اۋەن قۇلاعىما جەتكەندە، نوتاسى بەينە سىلدىراعان قيىرشىق قۇمداي جۇرەگىمە توگىلىپ جاتتى، مۇنداي سەزىم مەنى توتەنشە تاڭ قالدىردى!، - دەدى.
تۋنيۋ ساياحات سەرىكتەستىگىنىڭ تاياۋدا جاريالاعان «2018 - جىلدىڭ 4 - توقسانىنداعى الەمدىك ساياحاتتاعى نىسانالى جەرلەردىڭ قارسى الىنۋ كورسەتكىشىنە» نەگىزدەلگەندە، شينجياڭ كۇزگى ساياحاتتاعى قىزۋ قارسى الىناتىن نىسانالى جەرگە اينالعان. جاۋ مىڭفان سياقتى ءتىپتى دە كوپ ساياحاتشى شينجياڭنىڭ بايتاق دالاسىن ارالاپ، شينجياڭنىڭ كوركەمدىگىن جۇرەكتەرىمەن سەزىنۋدە. بيىل 1 - ايدان 9 - ايعا دەيىن تۇتاس شينجياڭنىڭ ەل ءىشى - سىرتىنان قابىلداعان ساياحاتشى سانى 132 ميلليون ادام - رەتكە جەتكەن، بۇل ساناق ەل ءىشى - سىرتىنداعى ساياحاتشىلاردىڭ شىن نيەتتەرىمەن داۋىس بەرۋىنىڭ ناتيجەسى، اتى - زاتىنا ساي «شينجياڭ جاقسى جەر».
ۇلكەن بازاردىڭ جاياۋلار كوشەسى جۇمىس باستاعان كۇنى جەڭىل تاعام جايما ورنىنىڭ ادامدارعا لىق تولعان كورىنىسى ءۇرىمجى قالاسى تيانشان رايونى شينجياڭ حالىقارالىق ۇلكەن بازارى حالىققا قولايلى ساقشى پۋنكتىنىڭ ورىنباسار باستىعى ۋاڭ رۇيدىڭ ءالى ەسىندە. «سول كەزدەگى كورىنىستى <500 ادام وتىرىپ تاماق جەسە، 1000 ادام تۇرەگەلىپ قاراپ تۇردى، 2000 ادام ىشكە كىرگىسى كەلىپ ەنتەلەپ تۇردى> دەسەك تيتتەي دە اسىرەلەگەندىك بولماس، قاتارعا تىزىلۋ ءۇشىن دە باق سىناپ كورۋگە تۋرا كەلدى»، - دەيدى ۋاڭ رۇي، ول ءسوزىن ساباقتاپ: «ادام كوبەيگەندىكتەن، مەن جانە قىزمەتتەستەرىم قاربالاستىققا تۇستىك، جاۋاپكەرشىلىگىمىز دە اناعۇرلىم اۋىرلادى، الايدا ىشتەي قاتتى قۋاندىق. شينجياڭدىق رەتىندە مەكەنىمنىڭ بارعان سايىن تىنىش، بارعان سايىن كورىكتى بولا تۇسكەنىن كورىپ، شىن جۇرەگىمنەن ماقتانىش جانە قۋانىش سەزىندىم»، - دەدى.
