تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ تۇڭعىش كەزەكتى جۇڭگو حالىقارالىق يمپورت كورمەسىنە قاتىناسۋعا كەلگەن شەتەل باسشىلارىمەن بىرگە كورمە سارايىن ارالادى

  شينحۋا اگەنتتىگىنىڭ 11 - ايدىڭ 5 - كۇنى شاڭحايدان بەرگەن حابارى (تىلشىلەر لي جۇڭفا، جوۋ رۇي). مەملەكەت ءتوراعاسى شي جينپيڭ 11 - ايدىڭ 5 - كۇنى شاڭحايدا تۇڭعىش كەزەكتى جۇڭگو حالىقارالىق يمپورت كورمەسىنە قاتىناسۋعا كەلگەن شەتەل باسشىلارىمەن بىرگە كورمە سارايىن ارالادى.

  تۇستە، شي جينپيڭ شەتەل باسشىلارىمەن بىرگە مەملەكەتتىك ساۋدا، قارجى قوسۋ جالپىلىق كورمە زالىنا كەلدى. ولار ارالاي ءجۇرىپ اڭگىمەلەسىپ، ۆەنگريا، ەگيپەت، ۇلى بريتانيا، چەحيا، كەنيا، سالۆادور، دومينيكا، لاوس، گرۋزيا، ۆيەتنام، پاكيستان، رەسەي قاتارلى ەلدەردىڭ كورمە ورىندارىن تاماشالاپ، ءار ەلدىڭ ەكونوميكا - ساۋداسىنىڭ دامۋ تابىستارى مەن ەرەكشە ابزالدىلىققا يە ونىمدەرىن ۇعىستى. شي جينپيڭ مەن ءار ەل باسشىلارى بەينە كەسكىن ارقىلى ۆەنگريانىڭ كوركەم تابيعاتىنان ءلاززات الىپ، ەگيپەتتىڭ ۇزاق تاريحقا يە وركەنيەتى مەن وسى زامانعى دامۋ جوباسىنا زەر سالدى، ۇلى بريتانيا سارايىندا وسى زامان ەرەكشەلىگىنە يە 3D بەينە كەسكىنىن كوردى. چەحيا سارايىندا، زەمان زۇڭتۇڭ چەحيادا وندىرىلگەن پيانينومەن قولما - قول ءبىر كۇي ورىندادى، سونداي - اق شي جينپيڭدى چەحيانىڭ سىراسىنان ءدام تاتۋعا ۇسىنىس ەتتى. جۇڭگولىق، شەتەلدىك باسشىلار كەنيانىڭ گۇلدەرى، سالۆادوردىڭ كوفەسى، دومينيكانىڭ جەمىس - جيدەكتەرى سياقتى ءار ەلدىڭ كوز سۇرىندىرەتىن ەرەكشە ونىمدەرىنە قىزىعىپ، قايتا - قايتا ايالدادى.

  گرۋزيانىڭ زۇڭليى مەن ۆيەتنام زۇڭليى شي جينپيڭگە ءوز ەلدەرىنىڭ اۋىل شارۋاشىلىق ونىمدەرى مەن ساياحات نىساندارىن تانىستىردى. لاوس سارايىنداعى جۇڭگو - لاوس تەمىر جول نىسانىنىڭ قۇم نۇسقاسى مەن پاكيستان سارايىنداعى جۇڭگو - پاكيستان ەكونوميكا ءدالىزىنىڭ كورمە تاقتاسى جۇڭگو مەن لاوستىڭ جانە جۇڭگو مەن پاكيستاننىڭ «ءبىر بەلدەۋ، ءبىر جولدى» بىرگە قۇرىپ، بىرگە دامۋدى ىسكە اسىرۋداعى كوركەم بولاشاعىن ايگىلەدى. رەسەي سارايىندا، شي جينپيڭ مەدۆەدەۆ زۇڭليدىڭ سەرىك بولۋىندا جۇڭگو مەن رەسەيدىڭ يادرو ەلەكتر، تابيعي گاز، ۇشاق جاساۋ، جەرگىلىكتى ورىنداردىڭ قارىم - قاتىناسى سياقتى سالالارداعى سەلبەستىك تابىستارى جونىندەگى تانىستىرۋىن تىڭداپ، جۇڭگو - رەسەي سەلبەستىگىنىڭ نۇرلى بولاشاعىنا بىرگە نازار سالدى.

  شي جينپيڭ قىزىعا تاماشالاپ، ءالسىن - ءالى سۇراۋ سۇراپ وتىردى. شي جينپيڭ مىنانى ءبىلدىردى: ءار ەلدىڭ ونىمدەرىنىڭ ءتۇرى مول، ءارقايسىسىنىڭ وزىندىك ەرەكشەلىگى بار. مەن ءار جاقتىڭ جۇڭگو حالىقارالىق يمپورت كورمەسى ورايىندا، ساۋدا ورايىن بايقاپ، سەلبەستىكتى كۇشەيتىپ، وزىندىك باسەكەلىك قابىلەتتەرىن جوعارىلاتىپ، جۇڭگوعا ساپالى ونىمدەردى ەكسپورت ەتۋ ارقىلى جۇڭگو بازارىن بايىتىپ، جۇڭگو تۇتىنۋشىلارىنىڭ كۇننەن - كۇنگە ارتىپ كەلە جاتقان كوپ نەگىزدى قاجەتىن قاناعاتتاندىرىپ، ءوزارا تيىمدىلىك جاساپ، تەڭ يگىلىككە كەنەلۋدى ىسكە اسىرۋىن ءۇمىت ەتەمىن.

  ىلە - شالا، شي جينپيڭ ءار ەل باسشىلارىمەن بىرگە جۇڭگو سارايىنا كەلدى. جۇڭگو سارايى جاڭالىق اشا دامۋ، سايكەستى دامۋ، جاسىل دامۋ، اشىق دامۋ، بىرگە يگىلىكتەنەتىن دامۋ ۇستانىمىن نەگىزگى ارقاۋ ەتىپ، جۇڭگونىڭ رەفورما جاساپ، ەسىك اشۋدا قول جەتكىزگەن زور تابىستارىن ايگىلەپ، «ءبىر بەلدەۋ، ءبىر جولدى» بىرگە قۇرۋدىڭ دۇنيە جۇزىندەگى ءار ەلدىڭ دامۋىنا تۋدىرعان تىڭ ورايدى بەينەلەدى. جۇڭگولىق، شەتەلدىك باسشىلار جۇڭگونىڭ دامۋداعى تىڭ تىنىسىن ايگىلەيتىن بەينە كەسكىندى تاماشالادى. جاڭالىق اشا دامۋ تاراۋىندا، لاوستىڭ زۇڭليى مەن ۆيەتنامنىڭ زۇڭليى فۋشيڭ اتتى جوعارى جىلدامدىقتى پويەزدى سەزىنۋ ۇيىندە ەلىكتەمەلى جۇرگىزۋ تۇعىرىن مەڭگەرىپ، ساعاتىنا 350 كيلومەترلىك جىلدامدىقپەن زىمىرايتىن جوعارى جىلدامدىقتى پويەزدىڭ كورۋ جانە ەستۋ تۇيسىگى اسەرىن سەزىندى. رەسەي زۇڭليى مەدۆەدەۆ ءتانتى بولىپ «وتە تەز ەكەن» دەپ اۋىز جاپپاي ماقتادى. جۇڭگونىڭ دەربەس زەرتتەپ جاساعان C919 تۇرپاتتى ۇشاعى ءار ەل باسشىلارىن وزىنە ەرەكشە باۋرادى. سايكەستى دامۋ تاراۋىندا، جاقىندا عانا سالىنىپ بولعان شياڭگاڭ - جۋحاي - اۋمىن ۇلكەن كوپىرىنىڭ مودەلى كوپشىلىكتىڭ نازارىن وزىنە اۋداردى. شي جينپيڭ بۇل جونىندە: كوپىر سالىنىپ بولا سالىپ، كۇشتى تايفىڭ داۋىلىنىڭ سىنىنان ءوتتى، - دەپ تانىستىردى. تۇنىق سۋ، جاسىل تاۋدىڭ قوزعالىستى سۋرەتى جىجياڭ ولكەسى انجي اۋدانىنىڭ وركەندەگەن كاسىپ سالاسىن، جانعا جايلى ەكولوگياسىن، وركەنيەتتى اۋىل سالتىن، جونگە سالۋى ءونىمدى دامۋ جاعدايىن ايگىلەدى. شي جينپيڭ «تۇنىق سۋ، جاسىل تاۋدىڭ ءوزى باعا جەتپەس بايلىق» دەگەن عىلمي ۇستانىمدى 2005 - جىلى انجي اۋدانىندا تۇڭعىش رەت العا قويعان بولاتىن. اشىق دامۋ تاراۋىندا، ءار ەل باسشىلارى جۇڭگو - ەۆروپا كەزەكشى پويەزىنىڭ ەلىكتەمەلى قوزعالىستى بەينەسىنىڭ ەلەكتروندىق قۇم نۇسقاسىن تاماشالادى. شي جينپيڭ تاعى ءار ەل باسشىلارىمەن بىرگە جۇڭگو سارايىنىڭ ىشىندەگى تايۋان، اۋمىن جانە شياڭگاڭ كورمە اۋماعىن ارالادى.

  ءار ەل باسشىلارى جۇڭگونىڭ داياشى ەل بولۋ تۇرعىسىندا ءار ەلدىڭ كورمەگە قاتىناسۋىنا زور كۇشپەن قولداۋ كورسەتكەندىگىنە العىس ايتىپ، جۇڭگونىڭ دامۋ تابىستارىن القاپ، جۇڭگو حالىقارالىق يمپورت كورمەسىنىڭ تابىستى بولۋىنا تىلەكتەستىك ءبىلدىردى. ولار مىنانى ءبىلدىردى: جۇڭگونىڭ حالىقارالىق يمپورت كورمەسىن وتكىزۋى جۇڭگونىڭ سىرتقا ەسىك اشۋداعى باۋىرمالدىق بەينەسى مەن جاۋاپكەرلىك ارقالايتىن ءىرى ەلدىك مىندەتىن تولىق ايگىلەدى. ولار شي جينپيڭنىڭ اشىلۋ سالتىندا سويلەگەن ارقاۋ ءسوزىن جوعارى باعالاپ، جەتە مويىنداپ، ءار ەلدىڭ جۇڭگو بازارىنا ايرىقشا ءمان بەرەتىندىگىن، جۇڭگونىڭ دامۋ بولاشاعىنا جاپپاي ءۇمىت ارتاتىندىعىن، جۇڭگومەن سەلبەستىك ورناتۋدىڭ كومەسكى كۇشىن تەرەڭ اشىپ، ەكى جاقتى ساۋدانى ارتتىرۋدى ىلگەرىلەتىپ، دۇنيە ءجۇزى ەركىن ساۋداسىنىڭ دامۋىن جەبەۋدى قالايتىندىقتارىن ءبىلدىردى.

  مەملەكەتتىك ساۋدا، قارجى قوسۋ جالپىلىق كورمەسى − تۇڭعىش كەزەكتى جۇڭگو حالىقارالىق يمپورت كورمەسىنىڭ ماڭىزدى قۇرامداس بولىگى، 82 مەملەكەت پەن 3 حالىقارالىق ۇيىم قۇرعان 71 كورمە ورىننىڭ اۋماعى مولشەرمەن 30 مىڭ شارشى مەترگە جەتەدى. يندونەزيا، ۆيەتنام، پاكيستان، وڭتۇستىك افريكا، ەگيپەت، رەسەي، ۇلى بريتانيا، ۆەنگريا، گەرمانيا، كانادا، برازيليا، مەكسيكا قاتارلى 12 مەملەكەت نەگىزگى قوناق ەل بولدى.

  ديڭ شۋەشياڭ، لي چياڭ، ياڭ جيەچى، حۋ چۇنحۋا، حۋاڭ كۇنميڭ، ۋاڭ ي، جاۋ كىجى، حى ليفىڭ قاتارلىلار جوعارىداعى قيمىلعا قاتىناستى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.