شينحۋا اگەنتتىگىنىڭ 11 - ايدىڭ 8 - كۇنى بەيجيڭنەن بەرگەن حابارى (ءتىلشى لي جۇڭفا). مەملەكەت ءتوراعاسى شي جينپيڭ 11 - ايدىڭ 8 - كۇنى حالىق سارايىندا ا ق ش - تىڭ بۇرىنعى مەملەكەت ىستەرى حاتشىسى كەسەنگرمەن كەزدەستى.
شي جينپيڭ مىنالاردى اتاپ كورسەتتى: كەسەنگر دوكتور جۇڭگو حالقىنىڭ كونە دوسى، جۇڭگو - ا ق ش قاتىناسىنىڭ دامۋىنا تاريحي ۇلەس قوسقان، ءبىز مۇنى ەستەن شىعارمايمىز. 40 نەشە جىلدان بەرى، جۇڭگو - ا ق ش قاتىناسى قيىن - قىستاۋ كۇندەر مەن بۇراڭدىقتاردى باستان كەشىرسە دە، جالپى جاقتان ورنىقتى ىلگەرىلەدى. بۇگىنگى دۇنيە 100 جىلدان بەرى بولماعان زور وزگەرىستەرگە ءدوپ كەلۋدە، حالىقارالىق قوعام جۇڭگو - ا ق ش قاتىناسىنىڭ ۇزدىكسىز دۇرىس باعدارمەن العا قاراي دامۋىن جاپپاي كۇتۋدە. ترامپ زۇڭتۇڭ ەكەۋىمىز ارگەنتيناداعى 20 ەل توبىنىڭ باسشىلار باس قوسۋى كەزىندە سۇحبات وتكىزۋگە كەلىستىك، ەكى جاق ورتاق كوڭىل ءبولىپ وتىرعان ماسەلەلەر جونىندە ىشكەرىلەي پىكىرلەسۋىنە بولادى.
شي جينپيڭ مىنالاردى باسا دارىپتەدى: جۇڭگو مەن ا ق ش ءبىر - ءبىرىنىڭ ستراتەگيالىق ويى جونىندە دۇرىس تۇجىرىم جاساۋى كەرەك. ءبىر مەزەت ۋاقىتتان بەرى ا ق ش - تىڭ ەل ىشىندە جۇڭگوعا ساياتىن كەرەناۋ ۇندەر كوبەيدى، بۇل نازار اۋدارۋعا تاتيدى. جۇڭگو بەيبىت دامۋ جولىمەن جۇرۋدەن جازبايدى، قاقتىعىس تۋدىرمايتىن، قارسىلاسپايتىن، ءوزارا قۇرمەت ەتەتىن، سەلبەستىك جاساسىپ، تەڭ يگىلىككە كەنەلەتىن جۇڭگو - ا ق ش قاتىناسىن دامىتۋعا ءالى دە كۇش سالۋدا، ا ق ش جاقپەن تەڭدىك، ءوزارا تيىمدىلىك جاساۋ نەگىزىندە، ءوزارا ءتۇسىنىسۋ، ءوزارا سيلاسۋ رۋحىمەن ەكى ەل قاتىناسىنىڭ دامۋىندا جارىققا شىققان ماسەلەلەردى دوستىق تۇرعىدا كەڭەسىپ، لايىقتى شەشۋدى قالايدى. سونىمەن بىرگە، ا ق ش جاق تا جۇڭگو جاقتىڭ ءوزى تاڭداعان جولىمەن دامۋ ۇقىعىنا جانە ۇيلەسىمدى ۇقىق - مۇددەسىنە قۇرمەت ەتىپ، جۇڭگو جاقپەن ءبىر بەتالىستا ىلگەرىلەپ، جۇڭگو - ا ق ش قاتىناسىنىڭ اقاۋسىز، ورنىقتى دامۋىن بىرگە قورعاۋى كەرەك.
كەسەنگر مىنانى ءبىلدىردى: ا ق ش - جۇڭگو قاتىناسى جاڭا كەزەڭگە قادام تاستاعان ماڭىزدى ساتتە جۇڭگوعا تاعى دا ساپارلاي كەلگەندىگىمە ءارى ءتوراعا شي جينپيڭمەن كەزدەسكەنىمە توتەنشە قۋانىشتامىن. وتكەن ونداعان جىلداردا جۇڭگوعا كوپ رەت ساپارلاي كەلىپ، جۇڭگونىڭ دامۋىنا ءوز كوزىممەن كۋا بولدىم. قازىرگى جاعدايدا ا ق ش - جۇڭگو سەلبەستىگى دۇنيە ءجۇزىنىڭ بەيبىتشىلىگى مەن گۇلدەنۋى جونىنەن توتەنشە ماڭىزدى. جۇڭگو جاقتىڭ بۇل جاعىندا جاساعان قۇلشىنىستارىنا جوعارى باعا بەرەمىن. ا ق ش - جۇڭگو قاتىناسىن دامىتۋدا ستراتەگيالىق وي - تولعام جانە كورەگەندىك بولۋ قاجەت، ا ق ش پەن جۇڭگو ءبىرىن - ءبىرى اناعۇرلىم جاقسى ءتۇسىنىسىپ، ستراتەگيالىق كەڭەستى كۇشەيتىپ، ورتاق مۇددەنى ۇزدىكسىز كەڭەيتىپ، الاۋىزدىقتاردى لايىقتى مەڭگەرىپ، جۇرتقا ا ق ش پەن جۇڭگونىڭ ورتاق مۇددەسىنىڭ الاۋىزدىقتان الدەقايدا اسىپ تۇسەتىندىگىن اڭعارتۋى كەرەك. ترامپ زۇڭتۇڭ مەن ءتوراعا شي جينپيڭنىڭ ارگەنتيناداعى 20 ەل توبىنىڭ باسشىلار باس قوسۋى كەزىندە وتكىزەتىن سۇحباتىنىڭ ءساتتى بولۋىن ءۇمىت ەتەمىن.
ۋاڭ ي كەزدەسۋگە قاتىناستى.
