شينحۋا اگەنتتىگىنىڭ 12 - ايدىڭ 5 - كۇنى ليسابوننان بەرگەن حابارى (تىلشىلەر چيان تۇڭ، سۇن ي). جەرگىلىكتى ۋاقىت 12 - ايدىڭ 5 - كۇنى مەملەكەت ءتوراعاسى شي جينپيڭ ليسابوندا پورتۋگاليا پارلامەنتىنىڭ باستىعى رودريگەسپەن كەزدەستى.
شي جينپيڭ مىنالاردى اتاپ كورسەتتى: پورتۋگاليا جۇڭگونىڭ ەۆروپا وداعىنداعى جاقسى دوسى، ابزال سەرىگى. 1999 - جىلى جۇڭگو مەن پورتۋگاليا اۋمىن ماسەلەسىن ۇيلەسىمدى شەشىپ، حالىقارادا تاريحتان قالعان ماسەلەلەردى دوستىق تۇرعىدا كەڭەسۋ ارقىلى شەشۋدىڭ ۇلگىسىن ورناتتى، سونىمەن بىرگە، جۇڭگو - پورتۋگاليا قارىم - قاتىناسىنىڭ جاڭا عاسىرداعى دامۋى ءۇشىن ءوزارا سەنىمدىلىك پەن سەلبەستىكتىڭ نەگىزىن قالادى. جاقىنعى جىلداردان بەرى، جۇڭگونىڭ مەملەكەتتىك حالىق قۇرىلتايى پورتۋگاليا پارلامەنتىمەن تىعىز اۋىس - ءتۇيىس جاساپ، بەلسەندى تابىسقا قول جەتكىزدى. جۇڭگو جاق ەكى ەل زاڭ شىعارۋ قۇرىلىمدارىنىڭ زاڭ شىعارۋ، باقىلاۋ، ەل باسقارۋ، مەملەكەت جوسپارى جانە حالىق تۇرمىسى سياقتى ماڭىزدى تاقىرىپتار اياسىندا ءوزارا ۇيرەنۋىن، ۇلگى الۋىن قولدايدى. ەكى ەلدىڭ زاڭ شىعارۋ قۇرىلىمدارى سەلبەستىك جاساۋ كومەسكى كۇشىن اشىپ، زاڭ جانە ساياسات ورتاسىن ۇزدىكسىز جاقسارتۋى، قارسى جاقتىڭ قارجى قوسقان كاسىپورىندارى مەن جەكەلەردىڭ زاڭدى ۇقىق - مۇددەسىن قورعاۋى كەرەك. ەكى جاق ءار ەل پارلامەنت بىرلەستىگى سياقتى كوپ جاقتى ۇيىمداردا تىلدەسۋدى، سايكەسۋدى كۇشەيتۋ ارقىلى ورتاق مۇددەلەرىن قامتاماسىز ەتۋى، سونداي - اق دۇنيە ءجۇزىنىڭ بەيبىتشىلىگىن، دامۋىن، گۇلدەنۋىن قورعاۋعا ۇلەس قوسۋى كەرەك.
شي جينپيڭ مىنالاردى اتاپ كورسەتتى: جۇڭگونىڭ دامۋ جولى بۇرىن بولماعان جول، داۋىرمەن بىرگە العا باساتىن جول، ءبىر ميلليارد 400 ميلليونعا جۋىق جۇڭگو حالقىنىڭ ورتاق تاڭداعان جولى. بيىل جۇڭگونىڭ رەفورما جاساپ، ەسىك اشقاندىعىنىڭ 40 جىلدىعى. جۇڭگو رەفورما جاساۋدى ۇزدىكسىز جاپپاي تەرەڭدەتىپ، دامۋ قوزعاۋشى كۇشىن ۇزدىكسىز ايگىلەپ، اناعۇرلىم جوعارى دەڭگەيدەگى سىرتقا ەسىك اشۋ ساياساتىن اتقارىپ، جالپى بەتتىك ەسىك اشۋدىڭ جاڭا جاعدايىنىڭ قالىپتاسۋىن ىلگەرىلەتەدى. بۇل جۇڭگونىڭ سىرتقا ەسىك اشۋىنا جاڭا جاعداي جاراتادى، جۇڭگو - پورتۋگاليا سەلبەستىگى دە جاڭا ورايعا يە بولادى.
رودريگەس مىنالاردى ءبىلدىردى: پورتۋگاليا پارلامەنتى ءتوراعا شي جينپيڭنىڭ ساپارلاي كەلگەنىن قىزۋ قارسى الادى. ءتوراعا شي جينپيڭنىڭ ساپارى پورتۋگاليا - جۇڭگو قارىم - قاتىناسىنىڭ جوعارى دەڭگەيىن ايگىلەدى. جۇڭگو پورتۋگاليانىڭ نەگىزگى ساۋدا سەرىگى. ەكى جاق تا كوپ جاقتىلىقتى دارىپتەيدى. پورتۋگاليا جۇڭگونىڭ دامۋ جەتىستىگىن القايدى، ەكى ەل اراسىنداعى دوستىقتىڭ، ءوزارا سەنىمدىلىكتىڭ ءتىپتى دە كوپ سەلبەستىك ناتيجەلەرىنە اينالۋىن، ەكى جاقتىڭ ەكونوميكا - ساۋدا، گۋمانيتارلىق سياقتى جاقتارداعى بارىس - كەلىسى مەن سەلبەستىگىن كەڭەيتۋدى ءۇمىت ەتەدى. پورتۋگاليا جاق «ءبىر بەلدەۋ، ءبىر جول» باستاماسىن قولداپ، «ءبىر بەلدەۋ، ءبىر جولدىڭ» ەۆروپا قۇرلىعىنداعى تورابىنا اينالۋىنا بولادى. پورتۋگاليا پارلامەنتى پورتۋگاليا - جۇڭگو قارىم - قاتىناسىنىڭ تەرەڭدەۋىنە كۇش سالىپ، كەلەر جىلى وتكىزىلەتىن ەكى ەل ديپلوماتيالىق قارىم - قاتىناس ورناتقاندىعىنىڭ 40 جىلدىعىن قۇتتىقتاۋ قيمىلدارىنا بەلسەنە قاتىناسىپ، پورتۋگاليا - جۇڭگو دوستىعىن بەكەمدەپ، جۇڭگونىڭ مەملەكەتتىك حالىق قۇرىلتايىمەن اناعۇرلىم ءونىمدى كەڭەس پەن اۋىس - ءتۇيىستى ۇزدىكسىز كۇشەيتۋدى قالايدى.
كەزدەسۋدەن بۇرىن رودريگەس پارلامەنت سارايىنىڭ الدىندا سالتاناتتى سالت وتكىزىپ شي جينپيڭدى قارسى الدى. وركەستر جۇڭگو مەن پورتۋگاليانىڭ مەملەكەت ءانىن ورىندادى. شي جينپيڭ رودريگەستىڭ سەرىك بولۋىمەن قۇرمەت قاراۋىلىن كوزدەن كەشىردى.
ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.
