تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ پورتۋگاليانىڭ زۇڭليى كوستامەن كەزدەستى

  شينحۋا اگەنتتىگىنىڭ 12 - ايدىڭ 5 - كۇنى ليسابوننان بەرگەن حابارى (تىلشىلەر لي جيانمين، شاڭ ياڭ). جەرگىلىكتى ۋاقىت 12 - ايدىڭ 5 - كۇنى مەملەكەت ءتوراعاسى شي جينپيڭ ليسابوندا پورتۋگاليانىڭ زۇڭليى كوستامەن كەزدەستى.

  شي جينپيڭ مىنانى اتاپ كورسەتتى: زۇڭلي مىرزا 2 جىلدىڭ الدىندا جۇڭگودا رەسمي ساپاردا بولعاننان بەرى، ءبىز كەلىسكەن ماڭىزدى ورتاق تانىمدار ناقتى سەلبەستىك تابىسىنا ۇزدىكسىز اينالىپ، جۇڭگو مەن پورتۋگاليانىڭ ەكى جاقتى ساۋداسىندا تاماشا ارتۋ جاعدايى جارىققا شىعىپ، ءتۇيىندى سالالارعا قارجى قوسۋ سەلبەستىگى ءساتتى ىلگەرىلەدى. جۇڭگو - پورتۋگاليا قارىم - قاتىناسى تاريحتاعى ەڭ تاماشا مەزگىلگە اياق باسىپ، جاڭا دامۋ ورايىنا ءدوپ كەلۋدە. جۇڭگو جاق پورتۋگاليا جاقپەن بىرگە قۇلشىنىپ، ەكى ەلدىڭ جان - جاقتى ستراتەگيالىق سەرىكتەستىك قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتۋدى قالايدى.

  شي جينپيڭ مىنانى باسا دارىپتەدى: كەلەر ساتىدا ەكى جاق جوعارى جىكتەگىلەردىڭ بارىس - كەلىسى مەن ءار جىكتىڭ، ءار سالانىڭ اۋىس - ءتۇيىسىن كۇشەيتىپ، تىزە قوسا قۇلشىنىپ، جۇڭگو مەن پورتۋگاليانىڭ «ءبىر بەلدەۋ، ءبىر جولدى» بىرگە قۇرۋدا ءتىپتى دە ناقتى تابىستارعا قول جەتكىزۋىن ىلگەرىلەتىپ، ازيا - ەۆروپا قۇرلىعىن ءوزارا بايلانىستىرۋدا، توعىستىرۋدا بەلسەندى رول اتقارۋ كەرەك. ەكى جاق فينانس، قارجى قوسۋ، اۆياتسيا، اۆتوكولىك، جاڭا ەنەرگيا سياقتى سالالارداعى سەلبەستىكتى كەڭەيتىپ، اناعۇرلىم كوپ سەلبەستىك نىساندارىنىڭ تەرەڭ تامىر تارتۋىن ىلگەرىلەتۋ ءارى 3 - جاق بازارىنا ءورىس اشىپ، ءوزارا تيىمدىلىك جاساپ، كوپ يگىلىككە كەنەلۋدى جۇزەگە اسىرۋ كەرەك. مادەنيەت، وقۋ - اعارتۋ، ساياحات، عىلىم - تەحنيكا، ءدارى - دارمەك سياقتى سالالارداعى سەلبەستىكتى كەڭەيتۋ كەرەك. حالىقارالىق ىستەردە سايكەسۋ مەن سەلبەسۋدى جيىلەتىپ، ساۋدا مەن قارجى قوسۋدىڭ ەركىندەنۋىن، قولايلىلانۋىن جەبەپ، قورعامپازدىققا، ءبىر جاقتىلىققا بىرگە قارسى تۇرۋ كەرەك. پورتۋگاليا جاقتىڭ بەلسەندى رولىن ۇزدىكسىز ساۋلەلەندىرىپ، جۇڭگو - ەۆروپا قارىم - قاتىناسىنىڭ دۇرىس بەتالىسقا قاراي العا دامۋىن ىلگەرىلەتۋىن ءۇمىت ەتەمىن.

  كوستا مىنانى ءبىلدىردى: ءتوراعا شي جينپيڭنىڭ وسى رەتكى پورتۋگالياعا ساپارى ماڭىزدى تاريحي ءمان الادى. پورتۋگاليا مەن جۇڭگو ءداستۇرلى دوس ەلدەر، دوستىعى ارىدان جالعاسقان، ۇزاق ۋاقىتتان بەرى ءوزارا تاماشا سەنىمدىلىك ورناتتى. پورتۋگاليا جاق جۇڭگو جاقتىڭ پورتۋگاليانىڭ فينانس ورنىقتىلىعىن قورعاۋدا كورسەتكەن قولداۋىنا العىس ايتادى. پورتۋگاليا جاق وسى رەتكى ساپار ورايىندا، جۇڭگو جاقپەن بىرگە ەكى ەل قارىم - قاتىناسىنىڭ دەڭگەيىن اناعۇرلىم جوعارىلاتۋدى قالايدى. پورتۋگاليا جاق اشىق سەلبەستىكتى جانە ەركىن ساۋدانى دارىپتەيدى، «ءبىر بەلدەۋ، ءبىر جولدى» بىرگە قۇرۋعا بەلسەنە ات سالىسۋدى قالايدى، بۇل باستاما پورتۋگاليا مەن جۇڭگو ەلدەرى حالىقتارىنىڭ دوستىعى مەن سەلبەستىگىن كۇشەيتىپ، ەكى جاقتى ساۋدا مەن قارجى قوسۋدى جەبەۋگە پايدالى ءارى ازيا مەن ەۆروپانىڭ ءوزارا بايلانىس جاساۋىن، توعىسۋىن جانە ازيا مەن ەۆروپانىڭ سەرىكتەستىك سەنىمدىلىگىن كۇشەيتىپ، الەمدىك ساۋدانى جەبەۋگە توتەنشە پايدالى، ول دۇنيە ءجۇزى حالقىن باقىتقا كەنەلتەدى. پورتۋگاليا جاق جۇڭگو جاقپەن نەگىزدىك قۇرىلعى قۇرىلىسى، فينانس، اۆتوكولىك، عىلىم - تەحنيكا سياقتى سالالارداعى سەلبەستىكتى تەرەڭدەتۋدى قالايدى. جۇڭگو كاسىپورىندارى پورتۋگاليادا زاڭعا بويسۇنىپ، جۇيەلى تيجارات جۇرگىزدى. پورتۋگاليا جاق جۇڭگونىڭ قارجى قوسىپ، پورتۋگاليادا ءوندىرۋدى، جاساۋدى ارتتىرۋىن ءارى جۇڭگو - پورتۋگاليا تالقى مىنبەرى ارقىلى افريكا سياقتى جەرلەرمەن 3 - جاق سەلبەستىگىن كەڭەيتۋىن قارسى الادى. پورتۋگاليا جاق جۇڭگو جاقپەن كليمات وزگەرىسىنە توتەپ بەرۋ سياقتى الەمدىك ىستەردە كەڭەسۋدى، سايكەسۋدى جيىلەتىپ، كوپ جاقتىلىقتى بىرگە قورعاۋدى قالايدى.

  پورتۋگاليا جاق ەۆروپا مەن جۇڭگونىڭ ءوزارا سەنىمدىلىگىن جانە سەلبەستىگىن كۇشەيتۋدە اناعۇرلىم زور رول اتقارۋدى قالايدى.

  كەزدەسۋدەن كەيىن ەكى ەلدىڭ باسشىلارى «جۇڭحۋا حالىق رەسپۋبليكاسى ۇكىمەتى مەن پورتۋگاليا رەسپۋبليكاسى ۇكىمەتىنىڭ <ءبىر بەلدەۋ، ءبىر جول> قۇرىلىسىن بىرگە ىلگەرىلەتۋ جونىندەگى تۇسىنىستىك ەسكەرتپە» سياقتى كوپ ءتۇرلى ەكى جاقتى سەلبەستىك حۇجاتىنا قول قويۋعا بىرگە كۋا بولدى.

  ەكى ەلدىڭ باسشىلارى تاعى تىلشىلەرمەن كەزدەستى. شي جينپيڭ مىنانى باسا دارىپتەدى: مەنىڭ بۇل رەتكى پورتۋگالياعا ساپارىم مول جەتىستىككە جانە تولىق تابىسقا قول جەتكىزىپ، جۇڭگو مەن پورتۋگاليانىڭ جان - جاقتى ستراتەگيالىق سەرىكتەستىك قاتىناسىنىڭ دامۋىنا جاڭا پارمەندى قوزعاۋشى كۇش ۇستەدى. پورتۋگاليا مەنىڭ بۇل رەت ەۆروپادا، لاتىن امەريكاسىندا ساپاردا بولۋ ءارى 20 ەل توبى باسشىلارىنىڭ بۋەنوس - ايرەستەگى باس قوسۋىنا قاتىناسۋ بارىسىمداعى ەڭ سوڭعى ايالداما. جالپى ساپار بارىسىندا مەن ءار ەل حالقىنىڭ دۇنيە ءجۇزىنىڭ بەيبىتشىلىگى، ورنىقتىلىعى، مەملەكەتتىڭ دامۋى، گۇلدەنۋى، ءوزىنىڭ شات - شادىمان ءومىر كەشىرۋى جونىندەگى تاماشا تىلەگى مەن شىنايى ءۇمىتىن تەرەڭ سەزىندىم. دۇنيە ءجۇزى ءتۇرلى ماسەلەلەر مەن سىن - سايىستارعا ءدوپ كەلسە دە، جۇڭگو جاق قاشاندا ءوزارا قۇرمەت ەتۋدى، تەڭ تۇرعىدا كەڭەسۋدى نەگىز ەتىپ، بەيبىت دامۋعا، سەلبەسىپ تەڭ يگىلىككە كەنەلۋگە تاباندى بولىپ، ءار ەلمەن بىرگە ادامزاتتىڭ تاعدىرلاس ورتاق تۇلعاسىن بىرگە قۇرادى.

  ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.