ءتىلشىمىز ليۋ دۇڭلاي 12 - ايدىڭ 6 - كۇنى ۇرىمجىدەن حابارلايدى. «تابيعي ورمان بايلىعىن قورعاۋ ينجەنەرياسى اتقارىلعان 20 جىلدان بەرى، شينجياڭنىڭ تابيعي ورمانى جان - جاقتى قورعالىپ، مۇزدى القاپتى ورنىقتىرۋ، سۋ قاينارىن ساقتاۋ، كومىرتەگىن جيناۋ، وتتەگىن شىعارۋ سياقتى جاقتاردان ورنىن باسۋعا بولمايتىن رول اتقاردى. 2017 - جىلى شينجياڭ تابيعي ورمان بايلىعىن قورعاۋ ينجەنەرياسىنىڭ ورمان ەكولوگيالىق جۇيەسىنە قىزمەت وتەۋ يقۋاتىنىڭ جالپى قۇنى 122 ميلليارد يۋانعا جەتتى»، - دەدى اۆتونوميالى رايوندىق ورمان شارۋاشىلىعى جانە جايلىم مەكەمەسى تابيعي ورمان بايلىعىن قورعاۋ كەڭسەسىنىڭ اعا ينجەنەرى شياۋ جۇڭچي.
شينجياڭ 1998 - جىلدان باستاپ، بۇكىل مەملەكەتپەن بىرگە تابيعي ورمان بايلىعىن قورعاۋ ينجەنەرياسىن اتقارىپ، التاي تاۋى، تيانشان تاۋى، كۇنلۇن تاۋى، ىلە اڭعارى سياقتى جەرلەردەگى 49 ميلليون 180 مىڭ مۋ تابيعي ورماندى قورعادى. «1998 - جىلدان 2004 - جىلعا دەيىن، شينجياڭ ىرىقتى تۇردە تابيعي ورمان بايلىعىن قورعاۋ ينجەنەرياسى وڭىرىندەگى اعاش ماتەريالدارىن ءوندىرۋ مولشەرىن 280 مىڭ شارشى مەتردەن 80 مىڭ شارشى مەترگە ازايتتى، 2005 - جىلى 1 - ايدا تاعى تابيعي ورماندى تاۋار رەتىندە كەسۋدى جاپپاي توقتاتۋدى جاريالاعاننان كەيىن، ورمان الاڭىنداعى بارلىق جۇمىسشى - قىزمەتكەر اعاش كەسۋشىدەن ورمان قورعاۋشىعا اينالدى»، - دەدى شياۋ جۇڭچي تانىستىرا.
20 جىلدان بەرى، تابيعي ورمان بايلىعىن قورعاۋ ينجەنەرياسى قۇرۋ جانە قارجى قوسۋ سەرپىنىن ۇزبەي ارتتىردى، تەك ورتالىق قازىنانىڭ وزىنەن جيىنى 4 ميلليارد 280 ميلليون يۋان قارجى قوسىلدى. ينجەنەريا وڭىرىندەگى ورماننىڭ جالپى اۋماعى 2 ميلليون 94 مىڭ 700 گەكتاردان 2 ميلليون 288 مىڭ 700 گەكتارعا ارتىپ، ورمانمەن كومكەرىلۋ مولشەرى %25.66تەن %28.94كە جوعارىلاپ، 22 ميلليون 480 مىڭ شارشى مەتر اعاش كوبەيىپ، ورمان اۋماعى، ورمان قورى جانە ورمانمەن كومكەرىلۋ مولشەرى تەڭ ارتتى.
تابيعي ورماندى كەسۋدى توقتاتۋ ورمان الاڭىن ەكونوميكا قاينارىنان ءبىر مەزەت ايىرىپ، ءوندىرىس تيجاراتىندا قادام سايىن قيىندىق تۋدى. اۆتونوميالى رايوننىڭ كۇش سالا قولداۋىندا، ورمان الاڭى بەلسەنە ىزدەنىس جاساپ، جاسىل تاۋ، تۇنىق سۋ اراسىنان بايلىق ىزدەۋ جولىن اشتى. شيحۋ فوشان مەملەكەتتىك ورمان باقشاسىندا دايفۋسىڭ ەكولوگيالىق باۋ - باقشاسىنداعى قارلى تاۋ شىرشاسى، قاراعاي سياقتى الۋان ءتۇرلى اعاشتار جىل بويى جاپ - جاسىل بولىپ تۇرادى، جانىنداعى بۇعى قورىعىنان بۇعىنىڭ موڭىرەگەن دىبىسى ەستىلەدى، جازدا كوپتەگەن ساياحاتشى وسىندا كەلىپ تاماشالايدى. سوڭعى 5 جىلدان بەرى، بۇل جەر جىل سايىن ورتا ەسەپپەن 120 مىڭ ادام (رەت) ساياحاتشى قابىلداپ، ساياحات كىرىسى 10 ميلليون يۋاننان استى.
شينجياڭ تيانشان تاۋىنىڭ شىعىس بولىگى مەملەكەت مەنشىگىندەگى ورماندى باسقارۋ مەكەمەسى شيحۋ بولىمشەسى كەڭسەسىنىڭ مەڭگەرۋشىسى تۇڭ جاۋشۋ بىلاي دەدى: ساياحات كاسىبى تەبىندەپ كەلە جاتقان شارۋاشىلىق، قازىر ورمان الاڭىنداعى كوپتەگەن قىزمەتكەردىڭ بالالارى ورمان باقشاسىندا جۇمىس ىستەيدى. 95 - جىلدان كەيىن تۋعان ساۋ لىمىڭ «ورمان شارۋاشىلىعىمەن شۇعىلدانعان 3 - ۇرپاق»، اتاسى اعاش كەسۋشى، اكەسى ورمان قورعاۋشى، ال ول ورمان باقشاسىنا كەلەتىن ساياحاتشىلارعا جول باستايدى.
شيحۋ ورماندى وڭىرىندە عانا ەمەس، ءىس جۇزىندە، قازىر شينجياڭنىڭ قاناس، نارات، تيانشان بوعدا كولى، كوكتوعاي سياقتىلاردى قامتىعان ەڭ ىقپالدى ساياحات تۇيىندەرى تۇگەلدەي تابيعي ورمان بايلىعىن قورعاۋ وڭىرىندە. 20 جىلدا شينجياڭ تابيعي قالپىنا كەلتىرۋ مەن جاساندى جولمەن قالپىنا كەلتىرۋدى ۇشتاستىرىپ، ورمان ەكولوگيا جۇيەسىن وڭاۋدى جەدەلدەتتى، لىقسىعان ورمان بايلىعى شينجياڭنىڭ ساياحات شارۋاشىلىعىن دامىتۋدىڭ پارمەندى نەگىزىنە اينالدى.
