رايونىمىز رايوننان تىسقارى 7 جەتىلدىرۋ بازاسىن قۇردى
ءتىلشىمىز شيە حۇيبيان 12 - ايدىڭ 7 - كۇنى ۇرىمجىدەن حابارلايدى. «شىنجىن رايوننان تىسقارى ينكۋباتور بازاسىنان پايدالانىپ، سەرىكتەستىك <سىرتقا شىعارۋ> ارقىلى ىشكى ولكەنىڭ وزىق تەحنيكاسى، ساپالى بايلىعى، سونداي - اق قارجى قوسۋ، قارجى قۇراۋ سياقتى جاقتارداعى قولايلىلىقتاردان يگىلىكتەندى، سونىمەن بىرگە شىنجىنداعى جارناسى بازارعا تۇسكەن ەكى سەرىكتەستىكپەن كاسىپتىك جاقتان سەلبەستى، كەلەر جىلدىڭ الدىڭعى جارتى جىلىندا ايلىق تيجارات سوماسى 2 ميلليون يۋاننان اساتىنى مەجەلەنۋدە»، - دەدى 11 - ايدىڭ 28 - كۇنى شينجياڭ لينگو زايشيان توراپ عىلىم - تەحنيكا شەكتى سەرىكتەستىگىنىڭ نەگىزىن قالاۋشى جاۋ كۇي.
«بىلتىر 10 - ايدا رايونىمىز رايوننان تىسقارى جەتىلدىرۋ بازاسىن قۇرۋدى رەسمي باستاعان، بۇل شينجياڭنىڭ جاڭالىق اشۋ سىناق رايونى قۇرىلىسىنىڭ ماڭىزدى مازمۇنى. شينجياڭداعى كاسىپورىندار رايوننان تىسقارى جەتىلدىرۋ بازاسىنان پايدالانىپ، ەكى جەردىڭ ءتيىمدى ساياساتىنان يگىلىكتەنىپ، ەلىمىزدەگى ابزال، جاسامپاز بايلىقتاردى ۇلاستىرىپ، دارىندى، قارجى، تەحنيكا جاقتارىنداعى جاڭالىق اشۋ ولقىلىقتارىن تولىقتادى، ول شينجياڭنىڭ عىلىم - تەحنيكادا جاڭالىق اشۋىن، جەتىستىكتەردى كادەگە جاراتۋىن جانە تىڭ كاسىپ سالالارىن باۋلۋىن جەدەل ىلگەرىلەتۋ، كاسىپ سالالارىنىڭ تيپىن جاڭالاپ، دارەجەسىن جوعارىلاتۋدى جەدەلدەتۋ جونىنەن ماڭىزدى ءمان الادى»، - دەدى اۆتونوميالى رايوندىق عىلىم - تەحنيكا مەڭگەرمەسى جوعارى، جاڭا عىلىم - تەحنيكانى دامىتۋ جانە كاسىپ سالالاندىرۋ باسقارماسىنىڭ باستىعى چىڭ گۇڭ.
قازىرگە دەيىن، رايونىمىز شىنجىن، بەيجيڭ، شاڭحاي سياقتى جەرلەردە رايوننان تىسقارى 7 جەتىلدىرۋ بازاسىن قۇرىپ، جەتىلدىرۋ بازاسىنداعى كاسىپورىندار 122گە، جۇمىسقا ورنالاسقاندار 773 ادامعا جەتتى.
شينجياڭ جاڭالىق اشۋ سىناق رايونى شىنجىن رايوننان تىسقارى جەتىلدىرۋ بازاسى شىنجىنداعى جۇمساق بولشەك باقشاسىنا ورنالاسقان، بىلتىر 11 - ايدا رەسمي قۇرىلعان، ول ءارى شينجياڭ جاڭالىق اشۋ سىناق رايونى قۇرىلىسىنىڭ تۇڭعىش رايوننان تىسقارى جەتىلدىرۋ بازاسى، قازىر جەتىلدىرۋ بازاسىنداعى كاسىپورىندار 24كە جەتتى. بۇل بازا شىنجىن قالاسى نانشان عىلىم - تەحنيكا ىستەرى بولىمشەسى، شىنجىن قالاسى وزىق جاساۋ كاسىبىن جەبەۋ قوعامى سياقتى كوپ ءتۇرلى كاسىپتىك قوعامدارمەن جانە قىزمەت وتەۋ قۇرىلىمدارىمەن بىرلەسىپ، قىزمەت وتەۋ بىرلەستىگىن قۇرىپ، «ەكى جەر سەلبەسۋ، شينجياڭدى بەتكە الۋ، رايوننان تىسقارى جەتىلدىرۋ، جەدەل باۋلۋ» سىندى قۇرىلىس يدەياسىن ىسكە اسىردى.
«ءبىز تاعى ىشكى ولكەنىڭ وزىق تەحنيكاسىن بەلسەنە ەنگىزىپ، جەرگىلىكتى ورىننىڭ دامۋىنا ۇيلەسەتىن ءىشىنارا نىسانداردىڭ رايوننان تىسقارى ينكۋباتور بازاسىنان پايدالانىپ شينجياڭدا جەدەل تامىر تارتۋىنا مۇمكىندىك جاساپ، عىلىم - تەحنيكا جەتىستىكتەرىن شينجياڭعا ويىستىرىپ كادەگە جاراتۋدى ىلگەرىلەتىپ، جىبەك جولى ەكونوميكالىق بەلدەۋى وزەكتى رايون قۇرىلىسىنا دەم بەردىك»، - دەدى چىڭ گۇڭ.
بىلتىر شىنجىن رايوننان تىسقارى جەتىلدىرۋ بازاسىنان پايدالانىپ، شىنجىن جۇڭحاي ەنەرگيا شەكتى سەرىكتەستىگى حۋاديان شينجياڭ ەلەكتر تاراتۋ شەكتى سەرىكتەستىگى سانجى بولىمشە سەرىكتەستىگىمەن سەلبەستىك جاساۋ ورتاق تانىمىنا كەلىسىپ، جۇڭحاي ەنەرگيا شەكتى سەرىكتەستىگى 300 ميلليون يۋان قارجى قوسىپ، حۋاديان سانجى جىلۋ ەلەكتر ستانسياسىن يكەمدىلىكپەن وزگەرتىپ، كەرەكسىز قالعان جارىق، جىلۋ ەنەرگياسىنان تولىق پايدالانىپ، ەلەكتر شىعارۋمەن بىرگە قالا رايونىن جىلۋمەن قامدادى، بۇل نىسان بيىل 9 - ايدا ىسكە قوسىلىپ، جۇمىس باستاعان.
«سەرىكتەستىك بولاشاقتا شينجياڭدا ۇقساس كولەمدەگى نىسانداردان 10عا جۋىعىنا قارجى قوسىپ سالۋدى جوسپارلاپ، شينجياڭنىڭ جارىق، جىلۋ بايلىعىن تولىق كادەگە جاراتۋمەن بىرگە، سەرىكتەستىكتىڭ كاسىبىن دامىتۋعا بازار اشىپ، ءونىم اكەلمەكشى»، - دەدى شىنجىن جۇڭحاي ەنەرگيا شەكتى سەرىكتەستىگى شينجياڭ رايونىنىڭ قاتىستى جاۋاپتىسى گو يىڭجۇن.
«قازىر رايوننان تىسقارى 7 جەتىلدىرۋ بازاسى تۇراقتاندىرىلدى، تاعى بىرەۋى قۇرىلۋ ۇستىندە. كەلەر ساتىدا رايوننان تىسقارى جەتىلدىرۋ ارقىلى جاڭالىق اشۋ بىرلەستىگىمەن سايكەسىپ، رايوننان تىسقارى جەتىلدىرۋ بازالارىنىڭ جۇمىس جۇرگىزۋ ءتاسىلى، كاسىپ سالاسى بايلىعى سياقتى جاقتاردان سەلبەسۋ اياسىن كەڭەيتىپ، شينجياڭنىڭ جاڭالىق اشۋ سىناق رايونى <5 جەر، 7 باقشانىڭ> رايوننان تىسقارى جەتىلدىرۋ بازاسىمەن سەلبەسۋىن ىلگەرىلەتىپ، تەحنيكادا جاڭالىق اشۋ الەۋمەتتىك قىزمەت وتەۋ تۇعىرىن بىرگە قۇرىپ، جاڭالىق اشۋ سيپاتتى شينجياڭ قۇرىلىسىنا قوزعاۋشى كۇش قوسادى»، - دەدى چىڭ گۇڭ.
