شينحۋا اگەنتتىگىنىڭ 12 - ايدىڭ 27 - كۇنى بەيجيڭنەن بەرگەن حابارى (تىلشىلەر لي گولي، جاڭ چۋان). جۇڭگو جاساندى سەرىك باعدار نۇسقاۋ جۇيەسىن باسقارۋ كەڭسەسىنىڭ مەڭگەرۋشىسى، بەيدوۋ جاساندى سەرىك باعدار نۇسقاۋ جۇيەسىنىڭ اقپارات مالىمدەمەشىسى ران چىڭچي 12 - ايدىڭ 27 - كۇنى بەيجيڭدە بەيدوۋ 3 - ءنومىرلى نەگىزگى جۇيەسىنىڭ قۇرىلىسى اياقتالىپ، سول كۇنى بۇكىل جەر شارىنا قىزمەت كورسەتە باستاعاندىعىن جاريالادى.
«بۇل − بەيدوۋ جۇيەسىنىڭ قىزمەت ەتۋ كولەمى وڭىردەن تۇتاس جەر شارىنا كەڭەيگەندىگىن، بەيدوۋ جۇيەسى جەر شارىنا قىزمەت كورسەتۋ داۋىرىنە قادام باسقاندىعىن بىلدىرەدى»، - دەدى ران چىڭچي مەملەكەتتىك كەڭەستىڭ اقپارات كەڭسەسى وتكىزگەن اقپار جاريالاۋ ماجىلىسىندە.
بەيدوۋ جۇيەسى جۇڭگو ءوز كۇشىنە سۇيەنىپ قۇرعان، دەربەس اينالىم جاسايتىن، دۇنيە جۇزىندەگى باسقا جاساندى سەرىك باعدار نۇسقاۋ جۇيەلەرىمەن قاتار قولدانىلىپ، ورتاق پايدالانىلاتىن بۇكىل جەر شارىندىق جاساندى سەرىك باعدار نۇسقاۋ جۇيەسى، تۇتاس جەر شارى كولەمىندە، تاۋلىك بويى، كەز كەلگەن ۋاقىتتا ءار ءتۇرلى قولدانۋشىلاردى جوعارى دالدىكتە، سەنىمدى ورىن تۇراقتاندىرۋ، باعدار نۇسقاۋ، ۋاقىت كورسەتۋ قىزمەتىمەن قامتاماسىز ەتەدى.
«2012 - جىلدىڭ ءدال وسى كۇنىندە، بەيدوۋ جۇيەسى ازيا - تىنىق مۇحيت وڭىرىنە قىزمەت كورسەتكەن؛ 6 جىلدان كەيىنگى بۇگىن، بەيدوۋ جۇيەسى تۇتاس جەر شارىنا قىزمەت كورسەتە باستادى. قازىر بەيدوۋ جۇيەسىنىڭ وربيتاداعى جاساندى سەرىگى مەن جەر بەتىندەگى جۇيەسى ورنىقتى قىزمەت ىستەۋدە، تۇتاس جەر شارى كولەمىندە سىناق ەتىپ ساراپتاۋدان ءوتتى، جۇيەنىڭ قابىلەتى مەجەدەگى تالاپقا جەتتى، ول تۇتاس جەر شارى كولەمىندە قىزمەت كورسەتۋ قابىلەتىن ازىرلەدى»، - دەدى ران چىڭچي.
وسىمەن ءبىر ۋاقىتتا جاريالانعان بەيدوۋ جۇيەسىنىڭ اشىق قىزمەت كورسەتۋ قابىلەت ولشەمىندە (2.0 نۇسقا) كورسەتىلۋىنشە، بەيدوۋ جۇيەسىنىڭ قىزمەت كورسەتۋ قابىلەتى تومەندەگىدەي: جۇيەنىڭ قىزمەت كورسەتۋ اۋماعى: تۇتاس جەر شارى؛ ورىن تۇراقتاندىرۋ دالدىگى: گوريزونتال بويىنشا 10 مەتر، بيىكتىك بويىنشا 10 مەتر (%95تىك سەنىمدىلىك دارەجەسىندە)؛ جىلدامدىق ولشەۋ دالدىگى: سەكۋندىنا 0.2 مەتر (%95تىك سەنىمدىلىك دارەجەسىندە)؛ ۋاقىت كورسەتۋ دالدىگى: 20 نانوسەكۋند (%95تىك سەنىمدىلىك دارەجەسىندە)؛ جۇيەنىڭ قىزمەت كورسەتۋ جارامدىلىعى: %95تەن استام.
ران چىڭچي بىلاي دەدى: مۇنىڭ ىشىندە، بەيدوۋ جۇيەسىنىڭ ازيا - تىنىق مۇحيت وڭىرىندەگى ورىن تۇراقتاندىرۋ دالدىگى گوريزونتال بويىنشا 5 مەتر، بيىكتىك بويىنشا 5 مەتر (%95تىك سەنىمدىلىك دارەجەسىندە). «<ءبىر بەلدەۋ، ءبىر جول> بويىنداعى مەملەكەتتەر مەن رايونداردى قامتىعان دۇنيە جۇزىندەگى ءار جەر بەيدوۋ جۇيەسىنىڭ قىزمەت كورسەتۋىنەن يگىلىكتەنە الادى».
2018 - جىلى 12 - ايعا دەيىن، بەيدوۋ جۇيەسىنىڭ وربيتادا قىزمەت ىستەيتىن جاساندى سەرىكتەرى جيىنى 33كە جەتتى، مۇندا 25 بەيدوۋ 2 - ءنومىرلى جاساندى سەرىگى مەن 18 بەيدوۋ 3 - ءنومىرلى جاساندى سەرىگى بار. ران چىڭچي تانىستىرىپ بىلاي دەدى: 2019 - جىلدان 2020 - جىلعا دەيىن، ەلىمىز تاعى دا 11 بەيدوۋ 3 - ءنومىرلى جاساندى سەرىگىن جانە ءبىر بەيدوۋ 2 - ءنومىرلى جاساندى سەرىگىن ۇشىرىپ، ازيا - تىنىق مۇحيت وڭىرىنە قىزمەت كورسەتۋدى بەكەمدەۋمەن بىرگە، تۇتاس جەر شارىنا قىزمەت كورسەتۋ قابىلەتىن ونان ارى جوعارىلاتادى.
جوسپارعا نەگىزدەلگەندە، ەلىمىز 2020 - جىلى بەيدوۋ 3 - ءنومىرلى جۇيەسىنىڭ جەر شارىندىق تورىن قالىپتاستىرۋ قۇرىلىسىن جاپپاي اياقتاتىپ، 2035 - جىلى بەيدوۋ جۇيەسىن وزەك ەتكەن اناعۇرلىم كەڭ، اناعۇرلىم توعىسقان، اناعۇرلىم زەردەلى مەملەكەتتىك كەشەندى ورىن تۇراقتاندىرۋ، باعدار نۇسقاۋ، ۋاقىت كورسەتۋ (PNT) جۇيەسىن ورناتادى ەكەن.
«جۇڭگو بەيدوۋ جۇيەسى قۇرىلىسىنىڭ تابىستارىنان دۇنيە جۇزىندەگى ءار ەلمەن ورتاقتاسۋدى قالايدى، بەيدوۋ اناعۇرلىم قۋاتتى يقۋاتپەن، اناعۇرلىم ساپالى قابىلەتپەن تۇتاس جەر شارىنا قىزمەت كورسەتىپ، ادامزاتقا باقىت اكەلەدى»، - دەدى ران چىڭچي.
