لي كىچياڭ ءتوراعا دياس - كانەلگە قۇتتىقتاۋ تەلەگرامماسىن جولدادى
شينحۋا اگەنتتىگىنىڭ 1 - ايدىڭ 1 - كۇنى بەيجيڭنەن بەرگەن حابارى. 1 - ايدىڭ 1 - كۇنى ج ك پ ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ كۋبا توڭكەرىسى جەڭىسكە جەتكەندىگىنىڭ 60 جىلدىعى بايلانىسىمەن كۋبا كوممۋنيستىك پارتياسى ورتالىق كوميتەتىنىڭ ءبىرىنشى شۋجيى راۋل كاستروعا، كۋبا مەملەكەت ىستەرى كوميتەتىنىڭ ءتوراعاسى، قوسىمشا مينيسترلەر كەڭەسىنىڭ ءتوراعاسى دياس - كانەلگە قۇتتىقتاۋ تەلەگرامماسىن جولداپ، جۇڭگو كوممۋنيستىك پارتياسى، جۇڭگو ۇكىمەتى جانە جۇڭگو حالقى اتىنان قىزۋ قۇتتىقتادى.
شي جينپيڭ ءبىرىنشى شۋجي راۋلعا جولداعان قۇتتىقتاۋ تەلەگرامماسىندا مىنالاردى اتاپ كورسەتتى: 60 جىلدان بەرى كۋبا كوممۋنيستىك پارتياسىنىڭ پارمەندى باسشىلىعىندا كۋبا ۇكىمەتى مەن حالقى قاجىرلىلىقپەن كۇرەس جۇرگىزىپ، سوتسياليستىك قۇرىلىس ىستەرىندە ۇلى ناتيجەلەرگە قول جەتكىزدى، جۇڭگو پارتياسى، جۇڭگو ۇكىمەتى جانە جۇڭگو حالقى مۇنى بارىنشا القايدى جانە قۇتتىقتايدى. جۇڭگو مەن كۋبا پارتيالارىنىڭ جانە ەكى ەلدىڭ قارىم - قاتىناسى حالىقارالىق الماعايىپ وزگەرىستەردىڭ سىناعىنان ءوتىپ، سۇبەلى ناتيجەلەرگە قول جەتكىزىپ، ءبىز جاقسى دوسقا، جاقسى جولداسقا، جاقسى اعايىنعا اينالدىق. مەن جۇڭگو مەن كۋبانىڭ دوستىق قارىم - قاتىناسىنىڭ دامۋىنا باسا ءمان بەرەمىن، سىزبەن بىرگە قۇلشىنىپ، ەكى ەل قارىم - قاتىناسىنىڭ ۇزدىكسىز ارشىندى قاداممەن العا ىلگەرىلەۋىنە جەتەكشىلىك ەتۋدى قالايمىن.
شي جينپيڭ دياس - كانەل ءتوراعاعا جولداعان قۇتتىقتاۋ تەلەگرامماسىندا مىنانى ءبىلدىردى: كۋبا پارتياسى مەن حالقى سوتسياليستىك ءتۇزىمدى اناعۇرلىم جاڭالاۋعا جانە كەمەلدەندىرۋگە كۇش سالۋدا، كۋبانىڭ سوتسياليزم ىستەرىنىڭ جاڭا دامۋدى ىسكە اسىراتىنى داۋسىز. ءبىر ايدان استام ۋاقىتتىڭ الدىندا ءسىز جۇڭگوعا تاريحي سيپاتتى مەملەكەتتىك ساپاردا بولدىڭىز. ءبىز ەكى ەل قارىم - قاتىناسىنىڭ جاڭا مەزگىلدەگى دامۋ جوباسىن بىرگە جوبالادىق. سىزبەن بىرگە قۇلشىنىپ، جۇڭگو - كۋبا قارىم - قاتىناسىن ۇزدىكسىز العا ىلگەرىلەتۋدى قالايمىن.
سول كۇنى مەملەكەتتىك كەڭەستىڭ زۇڭليى لي كىچياڭ دا ءتوراعا دياس - كانەلگە تەلەگرامما جولدادى. لي كىچياڭ مىنانى ءبىلدىردى: بۇگىنگى تاڭدا كۋبا مەملەكەتىنىڭ دامۋ ىستەرى كۇن سايىن كوركەيىپ، اناعۇرلىم كوركەم بولاشاقتى قارسى الۋدا. جۇڭگو مەن كۋبا ءوزارا ءتۇسىنىپ، ءبىرىن - ءبىرى قولداپ، جۇڭگو - كۋبا قارىم - قاتىناسى جاپپاي، ىشكەرىلەي دامىدى. جۇڭگو مەن كۋبا ەكى جاقتىڭ بىرگە قۇلشىنۋىندا ەكى ەلدىڭ ءداستۇرلى دوستىعىنىڭ ۇزدىكسىز جاڭا كەسەك تابىستارعا قول جەتكىزۋىن تىلەيمىن.
