تيانشان تورى
تيانشان تورى   ›   جاڭالىقتار   ›   ماڭىزدى حابارلار

شي جينپيڭ فينلانديانىڭ زۇڭتۇڭى نينيستومەن كەڭەس وتكىزدى

  شينحۋا اگەنتتىگىنىڭ 1 - ايدىڭ 14 - كۇنى بەيجيڭنەن بەرگەن حابارى (تىلشىلەر باي جيە، جىڭ ميڭدا). مەملەكەت ءتوراعاسى شي جينپيڭ 1 - ايدىڭ 14 - كۇنى حالىق سارايىندا فينلانديانىڭ زۇڭتۇڭى نينيستومەن كەڭەس وتكىزدى. ەكى ەلدىڭ مەملەكەت باسشىلارى جۇڭگو - فينلانديا قارىم - قاتىناسى دامۋىنىڭ جاڭا تاراۋىن بىرگە جازۋعا ءبىر اۋىزدان قوسىلدى.

  جۇڭگودا ەگىنشىلىك كۇنتىزبەسى بويىنشا جاڭا جىلدى قارسى الۋ قارساڭىندا، شي جينپيڭ نينيستوعا جانە فينلانديا حالقىنا جاڭا جىلدىق تىلەك ءبىلدىردى. شي جينپيڭ مىنانى اتاپ كورسەتتى: تاياۋ جىلداردان بەرى، بولاشاققا بەت العان جاڭاشا سەلبەستىك سەرىكتەستىك قاتىناس ورناتۋ جانە ىلگەرىلەتۋ جۇڭگو - فينلانديا قاتىناسىنىڭ نەگىزگى ريتىمى بولىپ كەلدى. جۇڭگو مەن فينلانديانىڭ كەڭەسۋ مەن سەلبەستىكتى كۇشەيتۋى ەكى ەلدىڭ جانە ەكى ەل حالقىنىڭ ورتاق مۇددەسىنە ۇيلەسىپ عانا قالماستان، دۇنيە ءجۇزىنىڭ بەيبىتشىلىگىن، ورنىقتىلىعىن، گۇلدەنۋىن قورعاۋعادا اناعۇرلىم كوپ وڭ ەنەرگيا بەرەدى.

  شي جينپيڭ مىنانى اتاپ كورسەتتى: جۇڭگو مەن فينلانديا ەكى جاق ءوزارا قۇرمەت ەتۋگە، ءوزارا سەنىم ورناتۋعا تاباندى بولىپ، اشىق، سيىسىمدى كوڭىل كۇيدى ساقتاپ، ءبىر - ءبىرىنىڭ دامۋ جولىنا قۇرمەت ەتىپ، ءبىر - ءبىرىنىڭ وزەكتى مۇددەسىمەن ساناسىپ، جۇڭگو - فينلانديا قاتىناسىنىڭ ساياسي نەگىزىن ويداعىداي قورعاپ، جۇڭگو - فينلانديا قاتىناسىنىڭ قادامىنىڭ ورنىقتى، باياندى بولۋىن ىلگەرىلەتۋ كەرەك. جاڭالىق اشۋدى قوزعاۋشى ەتىپ، ناقتى ىستەر سەلبەستىگىنىڭ جاڭا سالالارىن كەڭەيتىپ، ەكى ەل حالقىنىڭ تاماشا تۇرمىسقا تالپىنىسىنا اناعۇرلىم جاقسى قىزمەت وتەۋ كەرەك. جۇڭگو جاق فينلانديا جاقتىڭ «ءبىر بەلدەۋ، ءبىر جول» باستاماسىن قولداعاندىعىن القايدى، فينلانديا جاقپەن بىرگە «ءبىر بەلدەۋ، ءبىر جولدى» بىرگە قۇرۋ سەلبەستىگىن تەرەڭدەتۋدى قالايدى. جۇڭگو - ەۆروپا كەزەكشى پويەزى، ت. ب الا كەلگەن ءتيىمدى شارت - جاعدايدان تولىق پايدالانىپ، قوس باعىتتاعى ساۋدانى جەبەپ، ءۇش جاق سەلبەستىگىن ورىستەتىپ، سولتۇستىك ۇيەك كەمە جولىن اشۋ سياقتى نىساندارداعى سەلبەسۋ ورايىن اقىلداسىپ، «مۇز ءۇستى جىبەك جولىن» بىرگە قۇرىپ، ازيا - ەۆروپا قۇرلىعىنىڭ بايلانىسىن، تۇتاسۋىن جەبەۋ كەرەك. گۋمانيتارلىق اۋىس - ءتۇيىستى كۇشەيتۋ كەرەك، مەن زۇڭتۇڭ مىرزامەن «2019 جۇڭگو - فينلانديا قىسقى سپورت جىلىن» بىرگە باستاماقشىمىن، ەكى جاقتىڭ قىسقى سپورت سەلبەستىگىنىڭ ۇلگىسىن تىزە قوسا جاراتۋىن ءۇمىت ەتەمىن. الەمدىك جونگە سالۋ رەفورماسىن بىرگە ىلگەرىلەتىپ، حالىقارالىق ىستەردەگى سەلبەستىكتى كۇشەيتىپ، اشىق الەمدىك ەكونوميكا قۇرۋدى بىرگە ىلگەرىلەتىپ، كوپ جاقتى ەركىن ساۋدا ءتۇزىلىسىن قورعاپ، كليمات وزگەرىسىنىڭ «پاريج كەلىسىمىن» تياناقتاندىرىپ، دۇنيە ءجۇزى ەكونوميكاسىنىڭ پارمەندى، باياندى، بىركەلكى جانە سيىسىمدى ارتۋىن ىلگەرىلەتۋ كەرەك. جۇڭگو جاق فينلانديا جاقپەن سولتۇستىك ۇيەك القالار كەڭەسى جۇلگەسىندە سەلبەستىكتى كۇشەيتىپ، سولتۇستىك ۇيەك ءوڭىرىنىڭ باياندى دامۋىن بىرگە جەبەۋدى قالايدى.

  شي جينپيڭ مىنانى باسا دارىپتەدى: جۇڭگو ەۆروپانىڭ ءبىر تۇلعالانۋ قۇرىلىسىن باستان - اياق قولداپ كەلەدى، ەۆروپانىڭ ىنتىماقتى، ورنىقتى، اشىق، گۇلدەنۋ جاعدايىن ساقتاپ، حالىقارالىق ساحنادا بەلسەنە سىندارلى رول اتقارۋىن ءۇمىت ەتەمىن. فينلانديا جاقتىڭ جۇڭگو - ەۆروپا قاتىناسىنىڭ اقاۋسىز، ورنىقتى دامۋىن ىلگەرىلەتۋدە ۇزدىكسىز بەلسەندى رول اتقارۋىن ءۇمىت ەتەمىن. ءبىز سولتۇستىك ەۆروپاداعى ەلدەرمەن جانە سولتۇستىك ەۆروپا مينيسترلەر القالار كەڭەسىمەن ءجيى كەڭەسىپ، جۇڭگو - سولتۇستىك ەۆروپا سەلبەستىگىن ويداعىداي جوسپارلاۋدى قالايمىز.

  نينيستو الدىمەن شي جينپيڭگە جانە جۇڭگو حالقىنا جاڭا جىلدىق ىزگى تىلەك ءبىلدىردى. نينيستو مىنانى ءبىلدىردى: فينلانديا - جۇڭگو قاتىناسى جەدەل دامىدى. فينلانديا جۇڭگونىڭ دامۋ ناتيجەسىن جوعارى باعالايدى، جۇڭگونىڭ حالىقارالىق ىستەردەگى رولىنا ءمان بەرەدى، جۇڭگومەن دوستىعىن قاستەرلەيدى. ءتوراعا شي جينپيڭ ورتاعا قويعان «ءبىر بەلدەۋ، ءبىر جولدى» بىرگە قۇرۋ باستاماسى ەرەكشە ماڭىزدى، فينلانديا بەلسەندى رول اتقارىپ، وسى باستامانىڭ ەۆروپا وداعىمەن اناعۇرلىم جاقسى ۇشتاسۋىنا مۇمكىندىك جاساپ، ەۆروپا - ازيا قۇرلىعىنىڭ بايلانىسىن، تۇتاسۋىن جەبەۋدى قالايدى. مەنىڭ بۇل رەتكى جۇڭگوداعى ساپارىمدا ەكى جاق «فينلانديا مەن جۇڭگونىڭ بولاشاققا بەت العان جاڭاشا سەلبەستىك سەرىكتەستىك قاتىناسىن ىلگەرىلەتۋ جونىندەگى بىرلەسكەن قىزمەت جوسپارىن (2023 −2019)» جاريالايدى، مۇنىڭ فينلانديا - جۇڭگو دوستىق قاتىناسىن اناعۇرلىم جەبەيتىندىگىنە سەنەمىن. فينلانديا جاق جۇڭگو جاقپەن بىرگە ارەكەت جوسپارىن ويداعىداي تياناقتاندىرىپ، ساۋدا، جاڭالىق اشۋ، قورشاعان ورتا، ساياحات، سولتۇستىك ۇيەك ىستەرى سياقتى سالالارداعى ناقتى ىستەر سەلبەستىگىن تەرەڭدەتىپ، گۋمانيتارلىق اۋىس - ءتۇيىستى نىعايتىپ، دەنە تاربيە، اسىرەسە، قىسقى سپورت سەلبەستىگىن كۇشەيتۋدى قالايدى. فينلانديا جۇڭگونىڭ كليمات وزگەرىسىنە توتەپ بەرۋدىڭ حالىقارالىق سەلبەستىگى، كوپ جاقتى ساۋدا ءتۇزىلىسىن قورعاۋ جاقتارىندا اتقارعان بەلسەندى رولىن القايدى. كەزەكتەگى جاعدايدا فينلانديا مەن جۇڭگونىڭ حالىقارالىق ىستەردە ءجيى كەڭەسۋدى، سايكەسۋدى ساقتاۋى ەرەكشە ماڭىزدى. فينلانديا جاق سوڭعى جارتى جىلدا ەۆروپا وداعىنا كەزەكتى ءتوراعا ەل بولۋ مىندەتىن وتەۋدى وراي ەتىپ، ەۆروپا وداعىنىڭ جۇڭگومەن اناعۇرلىم تىعىز قارىم - قاتىناستى دامىتۋىن ىلگەرىلەتەدى.

  كەڭەستەن كەيىن، ەكى ەلدىڭ مەملەكەت باسشىلارى تاعى قاتىستى ەكى جاقتى سەلبەستىك حۇجاتتارىنا قول قويۋعا كۋا بولدى.

  قول قويۋ سالتىنان كەيىن، شي جينپيڭ نينيستومەن بىرگە «2019 جۇڭگو - فينلانديا قىسقى سپورت جىلىن» باستاۋ سالتىنا قاتىناستى. شي جينپيڭ سوزىندە مىنانى اتاپ كورسەتتى: جاڭا جۇڭگونىڭ وليمپيادا سپورت جارىسىنا العاش رەت قاتىناسۋى 1952 - جىلعى فينلاندياداعى حەلسينكي وليمپيادا سپورت جارىسىنا قاتىناسۋىنان باستالىپ، بەس جۇلدىزدى قىزىل تۋ العاش رەت وليمپيادا سپورت الاڭىندا جەلبىرەدى. جۇڭگو مەن فينلانديانىڭ قىسقى سپورتتىڭ دامۋىنداعى سايكەسۋ دەڭگەيى جوعارى، ءبىرىن - ءبىرى تولىقتاۋ سيپاتى كۇشتى، سەلبەسۋ كومەسكى كۇشى زور. «2019 جۇڭگو - فينلانديا قىسقى سپورت جىلىنىڭ» ەكى ەلدىڭ سپورت سەلبەستىگىنىڭ جاڭا دەڭگەيگە كوتەرىلۋىن ىلگەرىلەتىپ، جۇڭگو مەن فينلانديانىڭ گۋمانيتارلىق اۋىس - تۇيىسىنە جاڭا ومىرشەڭدىك كۇش قوسىپ، جۇڭگو مەن فينلانديانىڭ بولاشاققا بەت العان جاڭاشا سەلبەستىك سەرىكتەستىك قاتىناسىنىڭ تىڭ ساتىعا كوتەرىلۋىن ۇزدىكسىز ىلگەرىلەتەتىندىگىنە سەنەمىن. نينيستو مىنانى ءبىلدىردى: جۇڭگو دۇنيە جۇزىندە دەنە تاربيەدەگى ءىرى ەلگە اينالدى. فينلانديا مەن جۇڭگونىڭ دەنە تاربيە سالاسىنداعى بايلانىسى ارىدان باستاۋ الادى. فينلانديا جۇڭگونىڭ 2022 - جىلعى قىسقى وليمپيادا سپورت جارىسىن تابىستى وتكىزۋىن قولدايدى، جۇڭگومەن قىسقى سپورت جىلىن باستاعان العاشقى ەلگە اينالعاندىعىمىزعا قاباعات قۋانىشتامىز، مۇنىڭ ەكى ەل حالقىنىڭ دوستىعىن اناعۇرلىم جەبەيتىندىگىنە سەنەمىز. جۇڭگو قىسقى سپورتتاعى قۋاتتى ەل بولۋعا قاراي قادام تاستاۋدا فينلانديا وزىندىك ۇلەسىن قوسۋدى قالايدى.

  جۇڭگو مەن فينلانديا ەلدەرىنىڭ وسپىرىمدەرى، بالالارى جەكە - جەكە ەكى ەلدىڭ مەملەكەت باسشىلارىنا جۇڭگو - فينلانديا قىسقى سپورت جىلىنىڭ بەلگىسى مەن ەستەلىك بۇيىمدارىن ۇسىندى. ەكى ەلدىڭ مەملەكەت باسشىلارى جۇڭگو مەن فينلانديانىڭ قار - مۇز سپورتشىلارىنىڭ ۋاكىلدەرىمەن بىرگە «2019 جۇڭگو - فينلانديا قىسقى سپورت جىلىن» باستادى.

  كەڭەستىڭ الدىندا شي جينپيڭ حالىق سارايىنىڭ سولتۇستىك زالىندا نينيستونى قارسى الۋ سالتىن وتكىزدى.

  پىڭ لييۋان، سۇن چۇنلان، حاۋ ميڭجين، ۋاڭ ي، حى ليفىڭ، گاۋ يۇنلۇڭ قاتارلىلار جوعارىدا اتالعان قاتىستى قيمىلدارعا قاتىناستى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.