شي جينپيڭ بۇكىل ارمياداعى ساقا جولداستاردىڭ كوكتەم مەرەكەسىن قۇتتىقتادى
ورتالىق اسكەري ىستەر كوميتەتىنىڭ كوكتەم مەرەكەسىن قارسى الۋ بايلانىسىمەن بەيجيڭدە تۇراتىن اسكەري بولىمدەردىڭ ساقا كادرلارىنان حال سۇراۋ ادەبيەت - كوركەمونەر كونسەرتى 1 - ايدىڭ 22 - كۇنى تۇستەن كەيىن بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ كونسەرتكە كەلگەن ارمياداعى ساقا جولداستارعا، بۇكىل ارمياداعى دەمالىسقا، زەينەتكە شىققان ساقا كادرلارعا مەرەكەلىك سالەم ايتتى جانە كوكتەم مەرەكەسى بايلانىسىمەن ىزگى تىلەك ءبىلدىردى. سۋرەتتى شينحۋا اگەنتتىگىنىڭ ءتىلشىسى لي گاڭ تۇسىرگەن
جاۋىنگەرلىك انىمەن وتانعا ماداق ايتىپ، ارميانى قۇدىرەتتەندىرۋدىڭ كۇشىن ۇيىستىردى. جۇڭحۋا ۇلتىنىڭ ءداستۇرلى دوڭىز جىلعى كوكتەم مەرەكەسى كەلۋ قارساڭىندا، جاڭا جۇڭگو قۇرۋعا، قورعاۋعا، گۇلدەندىرۋگە، مەملەكەت قورعانىسى مەن ارميا قۇرىلىسىنا، رەفورماسىنا، دامۋىنا كورنەكتى ۇلەس قوسقان بەيجيڭدە تۇراتىن اسكەري بولىمدەردىڭ ساقا كادرلارى جۇڭگو تەاترحاناسىندا قۋانىشپەن باس قوسىپ، كوكتەم مەرەكەسىن شات مەرەيمەن قارسى الدى.
تۇستەن كەيىنگى ساعات 3تەن 30 مينۋت مولشەرىندە شي جينپيڭ ساقا جولداستاردىڭ اراسىنا كەلگەندە، تۇتاس زالدان شاتىرلاعان شاپالاق ءۇنى كوتەرىلدى. شي جينپيڭ كوپشىلىكپەن ىقىلاسپەن قول الىسىپ، ولاردىڭ دەنساۋلىق جانە تۇرمىس جاعدايىن قاداعالاي ۇعىسىپ، پارتيا 19 - قۇرىلتايى رۋحىنىڭ جەتەكشىلىگىندە وتكەن ءبىر جىلدا پارتيا، مەملەكەت جانە ارميا ىستەرىندە ايگىلەنگەن جاڭا بەينەنى، اشىلعان جاڭا جاعدايدى، قول جەتكەن تىڭ تابىستاردى بىرگە ەسكە الدى. ساقا جولداستار ءبىر اۋىزدان شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋدەن جازباي، شي جينپيڭنىڭ ارميانى قۇدىرەتتەندىرۋ يدەياسىن ىشكەرىلەي دايەكتىلەندىرىپ، جاڭا داۋىردەگى اسكەري ىستەر ستراتەگيالىق باعىتىن ىشكەرىلەي دايەكتىلەندىرىپ، قايراتتانا العا ىلگەرىلەپ، باس الماي ىستەپ، جاڭا جۇڭگو قۇرىلعاندىعىنىڭ 70 جىلدىعىن ۇزدىك ناتيجەمەن قارسى الاتىندىقتارىن ءبىلدىردى.
كونسەرت «ءداۋىر كوكتەمى» اتتى بەتاشار كۇي مەن «جاتتىعۋ الاڭىنداعى جاۋىنگەر»، «شەكارادان سوققان سامال»، «جاڭا ءداۋىر ءانى» اتتى 3 تاراۋدان قۇرالىپ، وعان وتاندى ءسۇيىپ كۇرەس جاساۋ، ارميانى قۇدىرەتتەندىرىپ جەڭىسكە جەتۋ سىندى ءمان - مازمۇن ءسىڭىرىلىپ، ادەبيەت - كوركەمونەر ساڭلاق قوسىندارىنىڭ كەلبەتى ايگىلەنىپ، حالىق ارمياسىنىڭ ادەبيەت - كوركەمونەر قىزمەتى رەفورماسىندا قايتا سومداعان جەتىستىكتەرى بەينەلەندى. كورىنىستى ءان - ءبي «بۇيرىق ءۇنى»، ۇلاسپالى جاۋىنگەرلىك اندەر «ءبىزدىڭ اسپان»، «جاۋىنگەردىڭ ەرىك - جىگەرى − جەڭىس»، باستاۋ ءانى مەن جالپى حور ۇشتاستىرىلعان «دۇنيە جۇزىندە بىرەگەي ارميا قۇرۋعا ارشىندى قادام تاستايىق» سياقتى نومىرلەر كوركەمدىك تاسىلمەن اسكەري جاتتىعۋدىڭ جالىندى بەينەسىن ءبىر - بىرلەپ بەينەلەپ، بۇكىل ارمياداعى اسكەري بولىمدەردىڭ ءتوراعا شي جينپيڭنىڭ بۇيرىعىنا قۇلاق اسىپ، كۇش ۇيىستىرىپ اسكەري جاتتىعۋ جاساپ، سوعىسقا دايىندالىپ، جاڭا داۋىردە جەڭىسكە جەتۋ قابىلەتىن كۇشەيتۋدىڭ جاندى امالياتىن ايگىلەدى. كلاسسيك كونە اندەر «گۇل نەلىكتەن وسىنشا قىزىل»، «كيىم جۋۋ ءانى − اسپان جولى»، «ماداق جىرى» سياقتى نومىرلەر كوپ ءتۇرلى كوركەمدىك تاسىلدەرمەن شەكارا قورعاۋشى ارميا مەن حالىقتىڭ بالىق پەن سۋداي ەتەنە سۇيىسپەنشىلىگىن كورسەتتى، «ومىرىممەن سەنى قورعايمىن»، «سۇيەمدەي جەردى دە بەرمەيمىز» سياقتى اندەر ارميا مەن حالىقتىڭ ءبىر نيەتپەن مەملەكەتتىڭ يەلىك ۇقىعى مەن تەرريتوريا بۇتىندىگىن قورعاۋداعى بەكىمى مەن ەركىن ايقىن ءبىلدىردى. «جاڭا ءورىس»، «جەلبىرەگەن قىزىل تۋ»، «وتانىم»، «ۇلى وتانىم ءۇشىن قاراۋىلدا تۇرامىن»، «بىرگە اتتانايىق» سياقتى جاڭا - كونە اندەر بۇكىل ارمياداعى كوماندير - جاۋىنگەرلەردىڭ وتاندى قىزۋ ءسۇيىپ، وتاندى قورعاپ، ۇلەس قوسۋ رۋحىمەن جانە كۇرەس ناتيجەسىمەن جاڭا جۇڭگونىڭ 70 جىلدىق تۋعان كۇنىن شات مەرەيمەن قارسى الاتىن تاسقىنداعان سەزىمىن بەينەلەدى. كونسەرت «پارتيا تۋى ماڭگى جەلبىرەيدى» ءانىنىڭ اسقاق اۋەنى ىشىندە اياقتالىپ، حالىق ارمياسىنىڭ پارتيانىڭ سوزىنە قۇلاق اساتىن، پارتياعا ىلەسەتىن، ۇيتقىنى باتىل قورعايتىن، قولباسشىلىققا باتىل بويسۇناتىن بەرىك سەنىمىن بەينەلەدى.
شۇي چيلياڭ، جاڭ يوۋشيا، ۋي فىڭحى، لي زوچىڭ، مياۋ حۋا، جاڭ شىڭمين كونسەرتتى بىرگە كوردى.
اسكەري ىستەر كوميتەتى ورگانىنىڭ ءارقايسى تاراۋلارىنىڭ، بەيجيڭدە تۇراتىن ءىرى ورىنداردىڭ باسشىلارى جانە بەيجيڭدە تۇراتىن اسكەري بولىمدەردىڭ كوماندير - جاۋىنگەرلەرىنىڭ ۋاكىلدەرى دە كونسەرتتى كوردى.
