ءتىلشى گى يوۋجۇن
«ۋي اعا، جاڭا جىلىڭىزعا قۇتتى بولسىن ايتا كەلدىك! مىناۋ سىزگە الا كەلگەن قازى، جىلقى ەتى، سارى ماي، قۇرت...»، «عالام باۋىرىم، نەگە اۋرە بولدىڭ، وتباسىڭنىڭ دا كوكتەم مەرەكەسى قۇتتى بولسىن! كەلىڭدەر، كەلىڭدەر، ۇيگە كىرىڭدەر...». 2 - ايدىڭ 5 - كۇنى تۇستەن كەيىن ماناس اۋدانى لانجوۋۋان قالاشىعى ۋاڭجياجۋاڭ قىستاعىنىڭ قازاق تۇرعىنى عالام ءيۇسۇپ ۇلى ۇيىندەگىلەرمەن بىرگە حانزۋ اعاسى، قىستاق تۇرعىنى ۋي حۇڭگۋاڭنىڭ ۇيىنە جاڭا جىلىن قۇتتىقتاي باردى، ەكى ءۇي جاڭا جىلدى وسىلايشا 25 جىل بىرگە باس قوسىپ وتكىزىپ كەلدى.
ۋي حۇڭگۋاڭنىڭ ۇيىندە تەرەزە ورنەگى، بوساعالىق، «باقىت» ءارىبى جازىلعان جاپسىرما قاعاز ەسىك - تەرەزەلەرگە تۇگەل جاپسىرىلىپ، قىزىل قوراپتى شام بيىك ىلىنگەن، ەكى وتباسىنداعىلار ازىلدەسە اڭگىمەلەسىپ، ءوزارا ىزگى تىلەك تىلەدى. وسىدان سوڭ ەكى ءۇيلى جان اس ازىرلەۋگە كىرىستى، كوپ ۇزاماي قۋىرىلعان بالىق، تورە تاباق تاۋىق ەتى، اسقان ەت سياقتى ءدامدى تاعامدار اس ۇستەلىنە تولتىرا قويىلدى، ەكى ءۇيلى جان ءبىر داستارقاندا باس قوسۋدىڭ باقىتتى ساتىنەن بىرگە ءلاززاتتاندى.
ۋاڭجياجۋاڭ قىستاعىندا حانزۋ، قازاق، ۇيعۇر سياقتى كوپ ۇلت قونىستانعان، ۇزاق ۋاقىتتان بەرى ۇلتتار ىنتىماقتى، تاتۋ - ءتاتتى ءوتىپ، ءبىر - بىرىنە قارايلاسىپ كەلدى. ۋي حۇڭگۋاڭ مەن عالام كىشكەنتايىنان بىرگە وقىپ، بىرگە ويناپ، بىرگە ەسەيگەن. عالامنىڭ سوزىمەن ايتقاندا، ۋي حۇڭگۋاڭ ەكەۋى بىرگە ەرجەتكەن تاتۋ اعالى - ىنىلەر. 1993 - جىلى عالام كىشى ۇلى حاميت عالام ۇلى 8 جاسقا تولعاندا ۋي حۇڭگۋاڭدى وعان وكىل اكە بولۋ ويىن ايتادى، ۋي حۇڭگۋاڭ بۇعان قۋانا ماقۇل بولادى. سودان باستان ەكى وتباسى ارالارىنان قىل وتپەيتىن ءبىر ءۇيلى جانعا اينالادى.
ۇزاق ۋاقىتتان بەرى عالام مەن ۋي حۇڭگۋاڭ وتباسى ءوزارا كومەكتەسىپ كەلەدى، كىم قيىنشىلىققا جولىقسا، قارسى جاعى ەشقاشان كومەگىن اياپ كورگەن ەمەس. 1997 - جىلدىڭ سوڭىنداعى ءبىر كۇنى عالامنىڭ ۇلكەن ۇلى قامزا كەنەت ناۋقاستانىپ، شيپاحاناعا جاتىپ ەمدەلۋىنە تۋرا كەلەدى. ءبىراق 40 مىڭ يۋاننان استام ەمدەۋ اقىسى عالامدى قينايدى، ول انادان - مىنادان سۇراپ، 20 مىڭ يۋاننان استام قارىز جينايدى. قالعان اقشانى قايدان تابامىز دەپ قىسىلعان كەزىندە، ۋي حۇڭگۋاڭ 20 مىڭ يۋان اقشا بەرىپ، عالامعا ۇلكەن كومەك كورسەتەدى.
بىرنەشە جىل بۇرىن، عالام وتباسىنىڭ ەكونوميكالىق جاعدايى تومەن ەدى، ۋي حۇڭگۋاڭ ءارى - ءسارى بولماستان عالامعا كەپىل بولىپ قارىز اقشا الىپ بەرىپ، ونىڭ باعىمشىلىق كاسىبىن دامىتۋىنا كومەكتەسەدى ءارى وعان ماقتا ەگۋدى ۇيرەتەدى. حاميت كىشكەنە كەزىنەن اۋىل شارۋاشىلىق ماشينالارىن زەرتتەۋگە قۇمار ەدى، ۋي حۇڭگۋاڭ ونىڭ قارىز الۋىنا كومەكتەسىپ، ۇلكەن ات كۇشىندىك تراكتور جانە سايكەستى اۋىل شارۋاشىلىق جابدىقتارىن ساتىپ الۋىنا قول ۇشىن بەرەدى. قازىر عالام وتباسىندا 100دەن ارتىق سيىر جانە قوي بار، جىلىنا 50 مۋدان استام جەرگە اۋىل شارۋاشىلىق داقىلدارىن ەگەدى، وتباسىنىڭ جىلدىق كىرىسى 100 مىڭ يۋاننان اسادى. حاميت بىلاي دەدى: «وتباسىمىزدىڭ قىسقا ۋاقىت ىشىندە بايۋىن وكىل اكەمنىڭ قولداپ - قۋاتتاۋىنان بولە قاراۋعا بولمايدى، ءبىز ماڭگى ءبىر وتباسىنىڭ ادامدارىمىز».
2010 - جىلدان بەرى ۋي حۇڭگۋاڭ شارۋاشىلىق تيبىن وزگەرتىپ، قالامشا ەگۋمەن شۇعىلدانادى، بىرتە - بىرتە ەگىمشىلىك كولەمى 150 مۋدان اسىپ، وتباسىنداعىلار قاربالاستىققا تۇسەدى، مۇنى كورگەن حاميت ايتقىزباي - اق ءوزى كەلىپ سۋارۋ، قالامشا قازۋ، اۆتوكولىككە تيەۋ سياقتى جۇمىستاردى ۇستىنە الادى.
داستارقان باسىندا ەكى ءۇيلى جان رۋمكا سوعىستىرىپ شاراپ ءىشىپ، جاڭا جىلداعى دامۋ جوسپارلارىن اقىلداستى. ۋي حۇڭگۋاڭ قالامشا ەگۋ كولەمىن تاعى دا ارتتىرۋ ويىن ايتتى، ۋي حۇڭگۋاڭنىڭ اسەرىندە، عالام دا قالامشا ەگۋمەن شۇعىلدانىپ كورۋگە بەكىدى. سونىمەن بىرگە، ول تاعى اسىل تۇقىمدى سويىس قويىن ەنگىزىپ، قولىنداعى مالىنىڭ ءناسىلىن جاقسارتۋدى جوسپارلادى... شاتتىققا تولى كۇلكى ۇندەرى ۋي حۇڭگۋاڭنىڭ ۇيىنەن ۇزاققا دەيىن ۇزىلمەدى.
