«دەنساۋلىعىڭدى تەكسەرتىپ ال»دان «دەنساۋلىعىمدى تەكسەرتەمىن»گە دەيىن

　جالپى حالىقتىڭ دەنساۋلىعىن تەكسەرۋ بۇقارانىڭ سالاماتتىق ارمانىنا قانات ءبىتىردى

　　ءتىلشىمىز سۋ لۋپيڭ

　　«جالپى حالىقتىڭ دەنساۋلىعىن تەكسەرۋ بولماسا، وكپە تۋبەركۋلەزىنە شالدىققانىمدى بىلمەۋشى ەدىم». 1 - ايدىڭ 28 - كۇنى قورعاس اۋداندىق حالىق شيپاحاناسىندا ەمدەلىپ جاتقان ما مەيحۋانىڭ ايتۋىنشا، ول 2018 - جىلى قورعاس اۋدانى داشيگوۋ اۋىلدىق ەمحانادا دەنساۋلىق تەكسەرتكەندە، وكپە تۋبەركۋلەزىنە شالدىققانى انىقتالىپتى. ول: شيپاگەر مەنىڭ قورعاس اۋداندىق حالىق شيپاحاناسىنا بارىپ دەنساۋلىق تەكسەرتۋىمە كومەكتەستى ءارى قاتىستى بولىممەن سويلەسىپ، مەنى سالماقتى ناۋقاستى شوعىرلى ەمدەۋگە كىرگىزدى. ەمدەلۋ ارقىلى تاۋىرلەنىپ، ناۋقاستان ايىقتىم، - دەدى.

　　2016 - جىلى 10 - ايدا رايونىمىز جالپى حالىقتىڭ دەنساۋلىعىن تەكسەرۋ ينجەنەرياسىن باستادى، شينجياڭعا قاراستى قالا، اۋىل تۇرعىندارى جىل سايىن ءبىر رەت دەنساۋلىقتارىن اقىسىز تەكسەرتەتىن بولدى. 3 جىلدان بەرى، ءار ۇلت بۇقاراسى دەنساۋلىقتارىن اقىسىز تەكسەرتۋ ارقىلى اۋرۋدى «ەرتە بايقاپ، ەرتە دياگنوز قويىپ، ەرتە ەمدەتتى»، سالاماتتى تۇرمىس ۇستانىمى بىرتىندەپ جۇرت جۇرەگىنە تەرەڭ ۇيالادى. «دەنساۋلىعىڭدى تەكسەرتىپ ال»دان «دەنساۋلىعىمدى تەكسەرتەمىن»گە دەيىن ەمدەۋ ارقىلى حالىققا تيىمدىلىك جاساۋ ينجەنەرياسى ءار ۇلت بۇقاراسىنىڭ تابىس سەزىمىن ۇزدىكسىز كۇشەيتتى.

　　جالپى حالىقتىڭ دەنساۋلىعىن تەكسەرۋ ورىستەتىلگەن ءبىرىنشى جىلدى تىلگە العاندا، قاراقاش اۋدانى زاۋا قالاشىعى ەمحاناسىنداعى بەساسپاپ شيپاگەر سۋدام احمەت: ەگىنشى - مالشىلاردىڭ كوبى بۇرىن دەنساۋلىق تەكسەرتىپ كورمەگەن، قان الىپ، ءار ءتۇرلى تەكسەرۋلەردى ىستەيتىندىگىن ەستىپ، اۋىل - قالاشىق ەمحاناسىنا بارۋدى اۋرە كورىپ، كەلگىسى كەلمەدى، - دەدى.

　　بۇكىل رايون كولەمىندە جوعارىدان تومەنگە دەيىنگى كۇش سالا ۇگىتتەۋدىڭ ناتيجەسىندە، ءبىرىنشى جىلعى جالپى حالىقتىڭ دەنساۋلىعىن تەكسەرۋ دەر كەزىندە ورىستەتىلدى.

　　سۋدام بىلاي دەدى: «ءبىز دەنساۋلىق تەكسەرۋ مالىمەتىن ءاربىر ادامعا بەرىپ، ەگجەي - تەگجەيلى تۇسىندىردىك. دەنساۋلىعىندا ماسەلە جوقتارىنا دەنساۋلىق جونىندە ۇگىت جۇرگىزدىك؛ سوزىلمالى اۋرۋى بار ەكەنى انىقتالعانداردى سالاماتتىلىق بويىنشا باسقارۋعا الدىق؛ ىشكەرىلەي تەكسەرۋگە تيىستىلەرىن جوعارى دارەجەلى شيپاحاناعا جىبەردىك. ۇزدىكسىز ءتۇسىندىرۋ ارقىلى ەگىنشى - مالشىلار دەنساۋلىق تەكسەرۋ جونىندە العاشقى تانىمعا يە بولىپ، وزدەرىنىڭ دەنساۋلىق جاعدايىنا كوڭىل بولە باستادى».

　　ءبىر جىلدا باۋىر قىزمەتى، بۇيرەك قىزمەتى، قان اناليزى، كەۋدە ءبولىمىن رەنتكەنمەن تەكسەرۋ؛ جوعارى قان قىسىمى، قانتتى نەسەپ، وكپە تۋبەركۋلەزى؛ ەرتە بايقاۋ، ەرتە دياگنوز قويۋ، ەرتە ەمدەۋ... سياقتى بەيتانىستاۋ سوزدەر رايونىمىزدىڭ ەگىن، مال شارۋاشىلىق وڭىرلەرىنە بىرتىندەپ جەتكىزىلدى. بىلتىر جالپى حالىقتىڭ دەنساۋلىعىن تەكسەرۋ باستالماي جاتىپ، كەي ەگىنشى - مالشىلار ايتقىزباستان اۋىل - قالاشىق ەمحانالارىنا بارىپ دەنساۋلىق تەكسەرتۋگە تىزىمدەلدى.

　　نەگىزگى دەنساۋلىق تەكسەرۋ جالپى حالىقتىڭ دەنساۋلىعىن تەكسەرۋدىڭ تەك ءبىرىنشى قادامى عانا، كەيىنگى قىزمەت وتەۋدى قالاي جاقسى ىستەۋ ماڭىزدى ەكىنشى قادام.

　　«ءبىز كەۋدە ءبولىمىن رەنتكەنمەن تەكسەرۋ كولەمىن 65 جاستان جوعارىلاردان 15 جاستان جوعارىلارعا كەڭەيتىپ، باۋىر قىزمەتىن، بۇيرەك قىزمەتىن، قانداعى مايدى تەكسەرۋدىڭ كەيبىر شاعىن تۇرلەرىن تاڭداپ تەكسەرەتىن تۇرگە وزگەرتتىك». اۆتونوميالى رايوندىق دەنساۋلىق ساقتاۋ، سالاماتتىق كوميتەتى نەگىزگى ساتى دەنساۋلىق ساقتاۋ باسقارماسىنىڭ باستىعى گو ۋيجياڭنىڭ تىلشىگە ايتۋىنشا، 2018 - جىلى جالپى حالىقتىڭ دەنساۋلىعىن تەكسەرۋ قىزمەتىن اتقارۋ جوباسىنا دەنساۋلىق تەكسەرۋدىڭ دارا تۇرلەرى قوسىلىپ، جەر - جەردەن تۇرلىشە ادامدار شوعىرىنا جانە دەنساۋلىق جاعدايىنا قاراي دەنساۋلىق تەكسەرۋدىڭ دارا قىزمەت وتەۋ مازمۇندارىن بەلگىلەۋ تالاپ ەتىلگەن. سونىمەن بىرگە، سۇراپ تەكسەرۋدەن، شيپاحانا اۋىستىرىپ تەكسەرۋدەن قىزمەت وتەۋدى ويداعىداي ىستەگەن؛ سوزىلمالى ناۋقاستاردىڭ حال - جايىن ءبىلۋدى، دەنساۋلىق بويىنشا باسقارۋدى كۇشەيتكەن؛ كوزىن شەل باسقان، تۋما جۇرەك اۋرۋىنا شالدىققان ناۋقاستار سياقتىلار ءۇشىن تەگىن ەمدەۋ تۇرلەرىن بەلسەنە قولعا كەلتىرگەن؛ قاتىستى تاراۋلارمەن سايكەسىپ، ارحيۆ تۇرعىزىلىپ، كارتچكا بەرىلگەن كەدەيلەردىڭ سالماقتى ناۋقاسىن شوعىرلى ەمدەۋ سياقتىلاردى ورىستەتكەن.

　　وتكەن ءبىر جىل تۋرالى ءسوز قوزعاعاندا، سالماقتى ناۋقاستان ەندى ايىققان رابيحان ءومار ايتارلىقتاي تەبىرەندى. جالپى حالىقتىڭ دەنساۋلىعىن تەكسەرۋ بارىسىندا ونىڭ جاتىر موينى راگىنىڭ العاشقى مەزگىلىندە ەكەندىگى بايقالىپ، حوتان ايماقتىق حالىق شيپاحاناسىنا ەمدەلۋگە اۋىستىرىلىپتى. «مەن ارحيۆ تۇرعىزىلىپ، كارتچكا بەرىلگەن كەدەيمىن، سالماقتى ناۋقاستى شوعىرلى ەمدەۋدەن يگىلىكتەنىپ، نەگىزىنەن اقشا جۇمساعام جوق، قازىر دەنساۋلىعىمنىڭ قالپىنا كەلۋى وتە جاقسى. مەنىڭ دەر كەزىندە ەمدەلۋىمە مۇمكىندىك جاساعان پارتيانىڭ جاقسى ساياساتىنا راقىمەت».

　　جالپى حالىقتىڭ دەنساۋلىعىن تەكسەرۋ قاجەتىنە ۇيلەسۋ ءۇشىن، جەر - جەردەگى اۋىل - قالاشىق ەمحانالارى ولشەمدەندىرۋ قۇرىلىسىنىڭ اياق الىسىن تەزدەتىپ، ورتانى جاقسارتۋمەن، اسپاپتاردى تولىقتاۋمەن بىرگە، ەمدەۋ قىزمەتكەرلەرىنىڭ قىزمەت وتەۋ قابىلەتى مەن دەڭگەيىن دە ۇزدىكسىز جوعارىلاتتى.

　　جالپى حالىقتىڭ دەنساۋلىعىن تەكسەرۋ اۋىل - قالاشىق ەمحانالارىنىڭ ولشەمدەندىرۋ قۇرىلىسىنىڭ اياق الىسىن تەزدەتىپ قانا قويماي، بەلگىلى دەڭگەيدە دەنساۋلىق ساقتاۋ بويىنشا كەدەيلەردى سۇيەمەلدەۋدى ىلگەرىلەتىپ، نەگىزگى الەۋمەتتىك دەنساۋلىق ساقتاۋعا قىزمەت وتەۋ دەڭگەيىنىڭ جوعارىلاۋىن بارىنشا جەبەدى.

　　ءتىلشىنىڭ اۆتونوميالى رايوندىق دەنساۋلىق ساقتاۋ، سالاماتتىق كوميتەتىنەن ۇعىسۋىنشا، قازىر اۆتونوميالى رايونىمىز جالپى حالىقتىڭ دەنساۋلىعىن تەكسەرۋمەن جاپپاي قامتۋدى جۇزەگە اسىرعان. 2019 - جىلى رايونىمىز جالپى حالىقتىڭ دەنساۋلىعىن تەكسەرۋدەگى شەشۋشى ءۇشىنشى قادامدى باسىپ، جالپى حالىقتىڭ دەنساۋلىعىن تەكسەرۋدى ۇدايىلانعان قىزمەت رەتىندە ءارقاشان جۇرگىزىپ وتىرادى. سونىمەن بىرگە، ەرەكشەلەنگەن قىزمەت كورسەتۋدى ۇزدىكسىز ىلگەرىلەتىپ، ءار ۇلت بۇقاراسىنىڭ دەنساۋلىق تەكسەرۋگە دەگەن رازىلىق سەزىمىن، تابىس سەزىمىن ۇزدىكسىز كۇشەيتەدى ەكەن.