شينحۋا اگەنتتىگىنىڭ 2 - ايدىڭ 15 - كۇنى بەيجيڭنەن بەرگەن حابارى (ءتىلشى لي جۇڭفا). مەملەكەت ءتوراعاسى شي جينپيڭ 2 - ايدىڭ 15 - كۇنى حالىق سارايىندا جۇڭگو مەن ا ق ش - تىڭ ەكونوميكا - ساۋدا جونىندەگى جوعارى دارەجەلىلەردىڭ جاڭا كەزەكتى سۇحپاتىن جۇرگىزۋ ءۇشىن جۇڭگوعا كەلگەن ا ق ش - تىڭ ساۋدا ۋاكىلى لايتحيزەرمەن جانە قازىنا مينيسترى منۋچينمەن كەزدەستى.
شي جينپيڭ مىنالاردى اتاپ كورسەتتى: جۇڭگو - ا ق ش قارىم - قاتىناسى قازىرگى دۇنيە جۇزىندەگى ەڭ ماڭىزدى ەكى جاقتى قاتىناستىڭ ءبىرى. ەكى ەل الەمنىڭ بەيبىتشىلىگىن، ورنىقتىلىعىن قورعاۋ، دۇنيە ءجۇزىنىڭ دامۋىن، گۇلدەنۋىن جەبەۋ جاعىندا كەڭ كولەمدى ورتاق مۇددەگە يە، توتەنشە ماڭىزدى جاۋاپكەرلىك ارقالاپ وتىر. جۇڭگو - ا ق ش قارىم - قاتىناسىنىڭ اقاۋسىز، ورنىقتى دامۋىن ساقتاۋ ەكى ەل حالقىنىڭ ءتۇبىرلى مۇددەسىنە ۇيلەسەدى ءارى حالىقارالىق قوعامنىڭ جالپى بەتتىك ءۇمىتى. بىلتىر 12 - ايدا مەن ترامپ زۇڭتۇڭمەن ارگەنتينادا كەڭەس وتكىزىپ، ماڭىزدى ورتاق تانىمعا كەلدىك، ەكى ەل سايكەستىكتى، سەلبەستىكتى، ورنىقتىلىقتى نەگىزگى ارقاۋ ەتكەن جۇڭگو - ا ق ش قارىم - قاتىناسىن بىرگە ىلگەرىلەتۋى كەرەك. ەكى جاق ۇيىرمەلەرىنىڭ ترامپ زۇڭتۇڭ ەكەۋىمىز تۇراقتاندىرعان پرينسيپ جانە باعدار بويىنشا بايلانىستى كۇشەيتىپ، نازاردى سەلبەستىككە شوعىرلاندىرىپ، الاۋىزدىقتاردى مەڭگەرىپ، جۇڭگو مەن ا ق ش-تىڭ ەكونوميكا - ساۋدا سەلبەستىگىنىڭ جانە ەكى ەل قارىم-قاتىناسىنىڭ اقاۋسىز، ورنىقتى، العا قاراي دامۋىن ىلگەرىلەتۋىن ءۇمىت ەتەمىن.
شي جينپيڭ مىنالاردى اتاپ كورسەتتى: بىلتىر 12-ايدان بەرى ەكى ەلدىڭ ەكونوميكا - ساۋدا ۇيىرمەلەرى ءجيى جانە پايدالى سۇحباتتار وتكىزدى. مەن جۇڭگو مەن ا ق ش ەكى ەلدىڭ ەشقايسىسى ءبىر - بىرىنەن ايرىلا المايدى، سەلبەستىك ەكى جاققا دا پايدالى، تىرەسۋ ەكى جاققا دا ءتيىمسىز، تەك سەلبەستىك عانا ەڭ جاقسى تالعام دەگەندى تالاي رەت ايتقان بولاتىنمىن. ءبىز ەكى جاقتىڭ ەكونوميكا - ساۋداداعى الاۋىزدىعى جانە قاجالىسى ماسەلەلەرىن سەلبەستىك جاساسۋ ءتاسىلى ارقىلى شەشىپ، ەكى جاق تا قابىلداي الاتىن كەلىسىمگە كەلۋدى ىلگەرىلەتۋدى قالايمىز. ارينە، سەلبەستىك جاساسۋدىڭ دا پرينسيبى بار. وسى 2 كۇندە الەمنىڭ نازارى بەيجيڭگە شوعىرلاندى. ەكى جاق ۇيىرمەلەرىنىڭ سۇحباتى تاعى دا ماڭىزدى كەزەڭدىك ىلگەرىلەۋشىلىككە قول جەتكىزدى. كەلەر اپتادا ەكى جاق ۆاشينگتوندا كەزدەسپەكشى، سىزدەردىڭ تاعى دا قايراتتانا ءتۇسىپ، ءوزارا تيىمدىلىك جەتكىزەتىن، تەڭ يگىلىككە كەنەلەتىن كەلىسىمگە كەلۋدى ىلگەرىلەتۋلەرىڭىزدى ءۇمىت ەتەمىن.
لايتحيزەر مەن منۋچين ترامپ زۇڭتۇڭنىڭ ءتوراعا شي جينپيڭگە جولداعان ىقىلاستى سالەمىن جانە ىزگى تىلەگىن جەتكىزدى. ولار مىنانى ءبىلدىردى: ا ق ش پەن جۇڭگونىڭ ساۋدا قارىم - قاتىناسى توتەنشە ماڭىزدى. ترامپ زۇڭتۇڭ مەن ءتوراعا شي جينپيڭ ارگەنتينادا ماڭىزدى كەڭەس وتكىزگەننەن كەيىن، ەكى ەلدىڭ ەكونوميكا - ساۋدا ۇيىرمەلەرى ەكى ەل باسشىلارىنىڭ ورتاق تانىمىن ۋاقىت ۇتا تياناقتاندىرىپ، وسىدان بۇرىنعى سۇحبات نەگىزىندە وتكەن 2 كۇندە ەكى جاق ورتاق كوڭىل ءبولىپ وتىرعان ەكونوميكا - ساۋدا ماسەلەلەرى جونىندە ىشكەرىلەي تالقى جۇرگىزىپ، ماڭىزدى جانە قيىن ماسەلەلەردە تىڭ ىلگەرىلەۋشىلىكتەرگە قول جەتكىزدى. ىستەۋگە ءتيىستى ىستەر ءالى دە كوپ بولعانىمەن، ءبىز ءالى دە ءۇمىتتىمىز. كەلەسى ساتىدا ا ق ش جاق ۇيىرمەسى جۇڭگو جاق ۇيىرمەسىمەن بىرگە بايلانىستى جيىلەتىپ، قىزمەتتى تىڭعىلىقتى ىستەپ، ەكى جاقتىڭ مۇددەسىنە ۇيلەسەتىن كەلىسىمگە كەلۋگە كۇش سالۋدى قالايدى. ترامپ زۇڭتۇڭ ءتوراعا شي جينپيڭدى توتەنشە قۇرمەتتەيدى، ءتوراعا شي جينپيڭمەن تىعىز بايلانىستى ساقتاۋدى ءۇمىت ەتەدى.
شي جينپيڭ لايتحيزەر مەن منۋچينگە ترامپ زۇڭتۇڭعا ىقىلاستى جەتكىزىپ قويۋدى تاپسىردى. شي جينپيڭ ترامپ زۇڭتۇڭمەن بولعان تاماشا قىزمەت بايلانىسىن ەرەكشە قاستەرلەيتىندىگىن، ونىمەن ءتۇرلى تاسىلدەر ارقىلى بايلانىستى ساقتاۋدى قالايتىندىعىن ءبىلدىردى.
ليۋ حى، ۋاڭ ي قاتارلىلار كەزدەسۋگە قاتىناستى.
