ارمانعا قۇلاش سەرمەۋدىڭ، ارماندى ورىنداۋدىڭ داۋىرلىك ءۇنىن بىرگە اسقاقتاتتى

　　− اۆتونوميالى رايوننىڭ «ءبىزدىڭ جۇڭگو ارمانىمىز» اتتى مادەنيەتتى سان مىڭداعان وتباسىلارىنا جەتكىزۋ قيمىلى جونىندە جالپى شولۋ

ءتىلشىمىز گاۋ فاڭ

　　كوكتەم بوساعالىعى، تەرەزە ويۋى، جۇڭگو تۇيىنشەگى، ءان - ءبي، كومەديا، ءۇزىندى تەاتر، كىتاپ، كينو، مۋزيكا كەشى... جاڭا جىل، كوكتەم مەرەكەسى كەزىندە، «ءبىزدىڭ جۇڭگو ارمانىمىز» اتتى مادەنيەتتى سان مىڭداعان وتباسىلارىنا جەتكىزۋ قيمىلى تيانشاننىڭ تۇستىگى مەن تەرىستىگىندە دابىرالى ورىستەتىلىپ، رايونىمىزداعى ادەبيەت - كوركەمونەر قىزمەتكەرلەرى ءوز ارتىقشىلىقتارىن ساۋلەلەندىردى، تارتىمدى مادەنيەت قيمىلدارى بۇكىل شينجياڭنىڭ جەر - جەرىندە وتكىزىلىپ، ءار ۇلت جۇرتشىلىعى وعان قىزعىندىلىقپەن قاتىناسىپ، مادەنيەت اكەلگەن مەيىر مەن كۇشتىڭ اسەرىندە، ارمانعا قۇلاش سەرمەۋدىڭ، ارماندى ورىنداۋدىڭ داۋىرلىك ءۇنىن بىرگە اسقاقتاتتى.

　　ءداستۇرلى جاڭا جىل سالت - سانا قيمىلدارى جۇڭگو جىلىن قۇلپىرتتى

　　كوكتەم مەرەكەسى كەزىندە، كوپتەگەن ادام مۇراجايعا، كىتاپحاناعا بارىپ، تاريحقا ءۇڭىلىپ، ءداستۇردى ەسكە الىپ، قويۋ «مادەنيەت رايىن» سەزىندى. اقسۋ ايماقتىق مۇراجاي قيما سۋرەت، مەرەكەلىك سۋرەت، بالشىق ءمۇسىن جانە كەستە سياقتى جاڭا جىل سالت - سانا مادەنيەت كورمەسىن وتكىزىپ، ءار ۇلت جۇرتشىلىعىنىڭ القاۋىنا يە بولدى، كوكتەم مەرەكەسى كەزىندە كۇنىنە ورتا ەسەپپەن 1500 ادام - رەت قابىلدادى. ەگىنشىلىك كالەندارى بويىنشا جاڭا جىلعا قاراعان كۇنى تۇننەن باستاپ، جاڭا جىلدىڭ 6 - كۇنىنە دەيىن، تاماشالاعانداردىڭ سانى 11 مىڭ ادام - رەتكە جەتىپ، سايكەس مەزگىلدەگىدەن ٪60 ارتتى.

　　1 - ايدىڭ 28 - كۇنى «شينجياڭ جاقسى جەر − 6 - كەزەكتى تيانشاننىڭ تۇستىگى مەن تەرىستىگىنىڭ كوكتەم مەرەكەسىن قۇتتىقتاۋ بەيزاتتىق مادەني مۇرا جاڭا جىل سالت - ساناسى كورمەسى» ءۇرىمجى قالاسىنداعى حۇڭشان باقشاسىندا باستالدى، التاي، قاشقار، قۇمىل سياقتى ايماق، وبلىس، قالالار دا «جۇڭحۋا مادەنيەتىنە مۇراگەرلىك ەتىپ، دۋماندى كوكتەم مەرەكەسىن بىرگە تويلايىق» تاقىرىبىندا بەيزاتتىق مادەني مۇرا جاڭا جىل سالت - ساناسى كورمەسىنىڭ جەلىلەس قيمىلدارىن وتكىزدى. باستالۋ سالتىنان باستاپ، تيانشاننىڭ تۇستىگى مەن تەرىستىگىندەگى 115 تارماق اترەت ءداستۇرلى مادەنيەتتى ايگىلەيتىن جانە باستان كەشىرەتىن 281 قيمىل ورىستەتتى، بۇل قيما سۋرەت، كەستە، ءجىپ ءتۇيۋ، مەرەكەلىك سۋرەت، جيڭجۇي، چينچياڭ تەاترى، مەرەكە ساۋىعى، ءدامدى تاعام، اتەش تالاستىرۋ، كوكبار تارتۋ سياقتىلاردى قامتىدى.

 «قىزىل ادەبيەت - كوركەمونەرشىلەر اتتى اترەتى» ارالاپ ويىن قويدى　

　　2 - ايدىڭ 4 - كۇنى تاڭەرتەڭ قوبىقسارى موڭعۇل اۆتونوميالى اۋدانى «قىزىل ادەبيەت - كوركەمونەرشىلەر اتتى اترەتى» − ۇلانمۇچىر جۇڭگو - قازاقستان شەكاراسىنا ورنالاسقان تەبىكىنۇسان اۋىلى حارحامار 3 - ءنومىرلى شەكارا ساقشى ىستەرى پۋنكتىنە كەلىپ، «مەنىڭ جۇڭگو ارمانىم − مادەنيەتتى وتباسىلارىنا جەتكىزۋ» اتىنداعى كوكتەم مەرەكەسىن قارسى الۋعا ارنالعان حال سۇراۋ ويىن نومىرلەرىن شەكارا قورعاۋشىلارعا قويدى. قازاق ۇلتىنان شىققان شەكارا قورعاۋشى ادىلەت تۇڭعىش رەت ءوز ءۇيىنىڭ ەسىگى الدىنان تارتىمدى ويىن نومىرلەرىن كورىپ، «پارتيا مەن ۇكىمەت بىزگە ەرەكشە كوڭىل ءبولىپ وتىر، شەكارا لەنياسىن ويداعىداي قورعاۋ − ءبىزدىڭ وتانعا العىس ايتۋىمىزدىڭ ەڭ جاقسى فورماسى»، - دەدى.

　　اۆتونوميالى رايوننان ءارقايسى ايماق، وبلىس، اۋدان، قالالارعا دەيىن ادەبيەت - كوركەمونەر ۇيىرمەلەرى مەن ادەبيەت - كوركەمونەرشىلەر قوعامى جىبەرگەن ادەبيەت - كوركەمونەر شاعىن گرۋپپالارى، مادەنيەت قىزمەت اترەتتەرى، ادەبيەت - كوركەمونەر ەرىكتىلەرى، جاڭا ادەبيەت - كوركەمونەر توبى قىزمەتكەرلەرى، ت. ب لار اۋىل - قالاشىق الەۋمەتتىك اۋماقتارىنا، مەكتەپتەرگە، اسكەري كازارمالارعا، اسىرەسە، اۋىر كەدەي وڭىرلەرگە بارىپ، كوكتەم بوساعالىعى، قيما سۋرەت، حاتكەرلىك جانە سۋرەت تۋىندىلارىن جەتكىزۋمەن بىرگە، كينو قويۋ، ويىن نومىرلەرىن قويۋ، لەكسيا سويلەۋ، كوركەمونەرگە جاتتىقتىرۋ سياقتى باي مازمۇندى، تارتىمدى «مادەنيەت تارتۋى» تۇتاس شينجياڭداعى ءار ۇلت بۇقاراسىنىڭ وتباسىنا، قولىنا جانە جۇرەگىنە جەتكىزىلدى، ءار ۇلت بۇقاراسى قويۋ ءتۇس العان جاڭا جىل رايى جانە تەرەڭ مەملەكەت سۇيىسپەنشىلىگى ىشىندە جاڭا جىلدى بىرگە تويلادى.

　　ءار ۇلت بۇقاراسى «كوكتەم مەرەكەسى ساۋىق كەشىندە» ونەر كورسەتتى　

　　2 - ايدىڭ 8 - كۇنى «كوكتەمگە ماداق. باقىتتى ساۋان» تاقىرىبىنداعى ساۋان اۋدانىنىڭ كوكتەم مەرەكەسى بىرلەسكەن ساۋىق كەشى اۋداندىق تەاترحانادا قويىلدى. ءان - ءبي، كومەديا، تەاتر، مۋزيكا سياقتى ويىن نومىرلەرى كەزەگىمەن ساحناعا كوتەرىلدى، مەرەكە شات - شادىمان، بەرەكەلى، كوڭىلدى دە دۋماندى تۇسكە بولەندى. ساۋىق كەشتە اۋداندىق ويىن - ساۋىق ۇيىرمەسى، حالىق اراسىنداعى كوركەمونەر ۇيىرمەسى سياقتى ويىن - ساۋىق ۇيىرمەلەرى ويىن قويدى، نەگىزگى ساتىداعى بۇقارا دا تۋىندى جاراتۋ، ويىن قويۋ سىندى تارتىمدى نومىرلەرگە قاتىناسىپ، «حالىق اراسىنداعى كوكتەم مەرەكەسى ساۋىق كەشىنىڭ» شىت جاڭا بەينەسىن ايگىلەپ، مەرەكەنىڭ سالتاناتىن اسىرىپ، حالىقتىڭ كوڭىلىنەن شىقتى. بۇل ساۋان اۋدانىنىڭ 3 - جىلى وتكىزگەن ءار ۇلت بۇقاراسىنىڭ وزدەرى ورىنداپ، وزدەرى قاتىناسقان كوكتەم مەرەكەسى ساۋىق كەشى.

　　2 - ايدىڭ 8 - كۇنى سانجى حۇيزۋ اۆتونوميالى وبلىسىنىڭ كوكتەم مەرەكەسى ساۋىق كەشىنىڭ نەگىزگى ساتىدا ارالاپ ويىن قويۋى شونجى اۋدانىندا وتكىزىلدى. كورىنىستىك ءان «سۇيىسپەنشىلىك وتباسىما ۇيالاسىن»، جەكە ءان «سۇلۋ كوكتەم»، زاماناۋي توپتىڭ ورىنداۋىندا «2035پەن ۋادەم»، ءبي «سول جىلى گۇل اشىلعاندا»، تەاتر «تولىقسىعان كوكتەم» جانە ءان - بي «سانجىنىڭ جاڭا داۋىرىنە ماداق» سياقتى نومىرلەر قويىلىپ، ءار ۇلت بۇقاراسىنىڭ تاماشا تۇرمىسقا بولعان تالپىنىسىن بەينەلەدى.

　　«تۋىستاسۋ» اتتى كومەديادا سانجى وبلىسىنىڭ «ۇلتتار ىنتىماعىنىڭ بەرەكەلى شاڭىراعى» قيمىلى بارىسىنداعى اسەرلى حيكايالار باياندالعان، شونجى اۋدانى شونجى قالاشىعى ليحۋاجيان الەۋمەتتىك اۋماعىنىڭ تۇرعىنى ءلاتيپا ماقات قىزى بىلاي دەدى: «جاڭا جىلدا تۋىسىممەن بولعان سۇيىسپەنشىلىگىم اناعۇرلىم تەرەڭدەپ، تۇرمىسىمىز ءتىپتى دە جاقسارادى».

　　كوكتەم مەرەكەسى كەزىندە، باركول قازاق اۆتونوميالى اۋدانى نەگىزگى ساتىداعى بۇقارا نەگىزگى رولداردى ويناعان كوكتەم مەرەكەسىن قارسى الۋ ادەبيەت - كوركەمونەر ساۋىق كەشىن وتكىزدى. ءان - ءبي «كوكتەم سامالى»، مۋزيكالى تەاتر «مەيىر كوپىرى»، ۇلاسپالى ءان «جاڭا جىلدى قۇتتىقتاۋ»، بالالار ۇلاسپالى تەاترى «المۇرت باعىندا باس قوسۋ»، مۋزيكالى تەاتر «جاڭ لياڭنىڭ كەزدەمە ساتۋى» سياقتى تارتىمدى نومىرلەر ارت - ارتىنان قويىلدى. اۋداندىق ادەبيەت - كوركەمونەرشىلەر بىرلەستىگىنىڭ ءتوراعاسى ۋاڭ يۋە بىلاي دەپ تانىستىردى: ءارقايسى اۋىل، قىستاق، الەۋمەتتىك اۋماقتار تۇگەلدەي وزدەرىنىڭ «كوكتەم مەرەكەسى ساۋىق كەشىن» وتكىزدى، ءار ۇلت بۇقاراسى ونەر كورسەتىپ، پارتيانى جانە وتاندى جىرلاپ، ۇلتتار ىنتىماعىنىڭ بەرەكەلى شاڭىراعىن انگە قوسىپ، اۋىلى مەن تۇرمىستارىنداعى وزگەرىستەردى القادى.

  　يانجي حۇيزۋ اۆتونوميالى اۋدانى «مەن كوكتەم مەرەكەسى ساۋىق كەشىنە شىعامىن» اتتى قيمىلدى ءۇرتىس 7 كەزەك وتكىزدى، ءار كەزەكتە تۇگەلدەي ءار ۇلت بۇقاراسى ويىن نومىرلەرىن وزدەرى دايىنداپ، وزدەرى ورىنداپ، ءار ۇلت بۇقاراسىنا تارتىمدى ادەبيەت - كوركەمونەر تۋىندىلارىن تارتۋ ەتتى. «يانجيىمىزدىڭ بۇقاراسىنىڭ دايىنداعان كوكتەم مەرەكەسى ساۋىق كەشى بارعان سايىن تارتىمدى بولىپ كەلەدى، ءتۇرلى قىزىقتى نومىرلەرى ءداۋىردىڭ قادامىنا ءجىتى ىلەسىپ، ءار ۇلت بۇقاراسىنىڭ تاماشا تۇرمىسقا دەگەن تالپىنىسىن ايگىلەدى»، -دەدى كورەرمەن تۇڭ گى قۋانىشپەن.