تىلشىلەر لۋ فىڭباۋ، پراكتيكانت لياڭ يانني
2 - ايدىڭ 26 - كۇنى تۇستەن بۇرىن شينجياڭ جينفىڭ عىلىم - تەحنيكا شەكتى جارنا سەرىكتەستىگىنىڭ (قىسقاشا جينفىڭ عىلىم - تەحنيكاسى دەلىنەدى) باس جوراسى ۋ گاڭ ءوزىنىڭ ۇسىنىس جوبالارىن رەتتەپ جاتتى، ”مەن مەملەكەتتىك ساياسي كەڭەستىڭ مۇشەسىمىن، قوعامنىڭ ءار سالاسى كوڭىل ءبولىپ وتىرعان ماسەلەلەردى اڭىس ەتۋ مەنىڭ جاۋاپكەرشىلىگىم، بيىل مەن 10 جاقتان ۇسىنىس جوبا جانە پىكىر - ۇسىنىس دايىندادىم، مەملەكەتتىك ەكى ماجىلىسكە اپارماقشىمىن“.
ۋ گاڭ ساياسي كەڭەس مۇشەسى رەتىندە، نەگىزگى ساتىعا ىشكەرىلەي ارالاسىپ، بۇقارانىڭ، كاسىپورىنداردىڭ جۇرەك ءۇنىن ۇعىسىپ، حالىق تىلەگىن بەينەلەۋ جاۋاپكەرشىلىك ءارى بورىش ەكەندىگىن انىق بىلەدى. سوندىقتان ول ءاربىر ۇسىنىس جوبا مەن ۇسىنىستىڭ بارىنە دەن قويدى، ءاربىر ۇسىنىس جوبا مەن ۇسىنىس تۇگەلدەي ەگجەي - تەگجەيلى، ناقتى تەكسەرىپ - زەرتتەۋدەن ءوتتى. ”قىزمەتتى ناقتىلى، ەگجەي - تەگجەيلى، ىشكەرىلەي، قۇنتتاپ ىستەگەندە عانا، يىعىمىزداعى جاۋاپكەرشىلىكتىڭ ۇددەسىنەن شىعا الامىز“، - دەدى ۋ گاڭ.
جينفىڭ عىلىم - تەحنيكاسى بۇرىن كەريا اۋدانى كوكجار اۋىلى قولتىق قىستاعىنىڭ جىلىجايلىق كوكونىس قالتقىسىن قۇرۋىنا جىلۋ اتاپ كومەكتەسكەن بولاتىن، ۋ گاڭ وسى قىستاقتىڭ قالتقى قۇرىلىسىنا، كوكونىس ەگىنشىلىگىنە، سونداي - اق ساتۋعا قاتىناستى. ول جىلىجاي قالتقىسىنا ءبىر جىلدا ەكى ماۋسىمنىڭ كوكونىسىن ەگىپ، وڭتۇستىك شينجياڭداعى شارۋالاردىڭ كىرىسىن ارتتىرۋدى، كەدەي وتباسىلاردىڭ كەدەيلىكتەن ارىلۋىن تىكەلەي جەبەۋگە ءۇمىت ۇستەۋگە بولاتىندىعىن بايقادى.
بۇل بارىستا، ۋ گاڭ تاعى وڭتۇستىك شينجياڭداعى اۋىل - قىستاقتاردا جەر بىتىراندى، شارۋالاردىڭ ەگىنشىلىك، باعىمىشىلىق تەحنيكالارى كەمشىل ەكەندىگىنە نازار اۋداردى، قايتكەندە شارۋالار اناعۇرلىم كوپ اۋىل شارۋاشىلىعى تەحنيكالارىن يگەرىپ، اۋىل شارۋاشىلىعىن ماشينالاندىرۋ ورەسىن جوعارىلاتىپ، سول ارقىلى اۋىل شارۋاشىلىعىن كولەمدەندىرە دامىتۋدى جەبەۋ ونىڭ باس قاتىراتىن ماسەلەسىنە اينالدى.
بىلتىر ۋ گاڭ وڭتۇستىك شينجياڭنىڭ اۋىل - قىستاقتارىنا 6 رەت بارىپ، تەكسەرىپ - زەرتتەۋ جۇرگىزىپ، نەگىزگى ساتىداعى كادرلاردان جاعداي ۇعىسىپ، اۋىل - قىستاقتاردىڭ قازىرگى دامۋ احۋالىن تەكسەرىپ - زەرتتەپ، شارۋالاردىڭ جۇرەك ۇنىنە قۇلاق سالدى... ۋ گاڭ ەگەر اۋىل شارۋاشىلىعى ماشينالارىن جالپىلاستىرۋ پۋنكتىنىڭ جانە اۋىل شارۋاشىلىعى تەحنيكاسىن جالپىلاستىرۋ پۋنكتىنىڭ رولىن جاقسى ساۋلەلەندىرگەندە، شارۋالاردى كەدەيلىكتەن ارىلىپ، بايۋعا اناعۇرلىم جاقسى باستاۋعا بولادى دەپ قارادى. مۇقيات تەكسەرىپ - زەرتتەۋ ارقىلى ۋ گاڭ «مەملەكەتتىڭ شەكارا رايوندارداعى اۋىل شارۋاشىلىعى عىلىم - تەحنيكاسى دارىندىلار قوسىنى قۇرىلىسىن كۇشەيتۋ جونىندەگى ۇسىنىس جوباسى»ن جاساپ شىقتى. ”الدا - جالدا اۋىل شارۋاشىلىعىنداعى تەحنيكا ماسەلەسى شەشىلەدى ەكەن، شارۋالاردى وندىرىسكە اناعۇرلىم جاقسى ۇيىمداستىرىپ، جەردەن ءونىمدى پايدالانىپ، اۋىل شارۋاشىلىعىنىڭ دامۋىن جەبەۋگە بولار ەدى“، - دەدى ۋ گاڭ.
جەل ەلەكتر سالاسىندا 32 جىل شىنىعىپ - شىڭدالعان ۋ گاڭ قايتا تۋىندايتىن بايلىق سالاسىنداعى بەتالىس پەن دامۋعا ۇزدىكسىز ءجىتى كوڭىل ءبولىپ كەلەدى. ول مەملەكەتتىڭ، اۆتونوميالى رايوننىڭ كوپ ورىندارىمەن، كاسىپ سالاسى قوعامدارىمەن، سونداي - اق سەلبەسۋشى سەرىكتەستەرمەن ءجيى پىكىر اۋىستىرىپ، سالانىڭ دامۋىندا ءومىر ءسۇرىپ وتىرعان تەرەڭ قاتپارلى ماسەلەلەردى وي ەلەگىنەن وتكىزىپ، زەرتتەدى. رايونىمىزدىڭ قايتا تۋىندايتىن بايلىق سالاسىنداعى دامۋ احۋالىن ىشكەرىلەي تەكسەرىپ - زەرتتەۋ ارقىلى ۋ گاڭ قايتا تۋىندايتىن بايلىقتىڭ دامۋىنا قاتىستى ساياساتتارعا جانە بازار ورتاسىنا بىردەيلىك پەن ورنىقتىلىق قاجەت دەپ قارادى، ول بايقاعان ماسەلەلەردى، پىكىرلەردى، ۇسىنىستاردى تۇگەلدەي ۇسىنىس جوباعا ەنگىزدى.
”ساياسي كەڭەس مۇشەسى بولۋ داڭقتى، اۋەلى بورىش، مەن مەملەكەتتىك ساياسي كەڭەستىڭ مۇشەسى بولۋ رولىمدى تولىق ساۋلەلەندىرىپ، بۇقارانىڭ ۇنىنە قۇلاق اسىپ، كاسىپورىنداردىڭ تالاپ - تىلەكتەرىن بەينەلەپ، شينجياڭ ەكونوميكاسىنىڭ جوعارى ساپادا دامۋىن ىلگەرىلەتۋگە ۇلەس قوسامىن“، - دەدى ۋ گاڭ بەكەم تۇردە.
