13 - كەزەكتى مەملەكەتتىك حالىق قۇرىلتايىنىڭ 2 - ءماجىلىسى بەيجيڭدە اشىلدى"> تيانشان تورابى
تيانشان تورابى   ›   جاڭالىقتار   ›   ماڭىزدى حابارلار

13 - كەزەكتى مەملەكەتتىك حالىق قۇرىلتايىنىڭ 2 - ءماجىلىسى بەيجيڭدە اشىلدى

شي جينپيڭ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار ءتوراعالار مىنبەسىنەن ورىن الدى

لي كىچياڭ ۇكىمەت قىزمەتىنەن بايانداما جاسادى، لي جانشۋ ءماجىلىستى باسقاردى

  3 - ايدىڭ 5 - كۇنى 13 - كەزەكتى مەملەكەتتىك حالىق قۇرىلتايىنىڭ 2 - ءماجىلىسى بەيجيڭدەگى حالىق سارايىندا اشىلدى. پارتيا مەن مەملەكەت باسشىلارىنان شي جينپيڭ، لي كىچياڭ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار ماجىلىسكە قاتىناستى.  سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

  3 - ايدىڭ 5 - كۇنى 13 - كەزەكتى مەملەكەتتىك حالىق قۇرىلتايىنىڭ 2 - ءماجىلىسى بەيجيڭدەگى حالىق سارايىندا اشىلدى. مەملەكەتتىك كەڭەستىڭ زۇڭليى لي كىچياڭ ۇكىمەت قىزمەتىنەن بايانداما جاسادى. سۋرەتتى شينحۋا اگەنتتىگىنىڭ ءتىلشىسى پاڭ شيڭلەي تۇسىرگەن

  3 - ايدىڭ 5 - كۇنى 13 - كەزەكتى مەملەكەتتىك حالىق قۇرىلتايىنىڭ 2 - ءماجىلىسى بەيجيڭدەگى حالىق سارايىندا اشىلدى. لي جانشۋ ءماجىلىستى باسقاردى.  سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

  شينحۋا اگەنتتىگىنىڭ 3 - ايدىڭ 5 - كۇنى بەيجيڭنەن بەرگەن حابارى. 13 - كەزەكتى مەملەكەتتىك حالىق قۇرىلتايىنىڭ 2 - ءماجىلىسى 3 - ايدىڭ 5 - كۇنى تۇستەن بۇرىن حالىق سارايىندا اشىلدى. 3000عا جۋىق مەملەكەتتىك حالىق قۇرىلتايىنىڭ ۋاكىلى حالىقتىڭ ماڭىزدى تاپسىرماسىن ارقالاپ، سالتاناتتى جينالىسقا قاتىناسىپ، نەگىزگى زاڭ مەن زاڭداردا بەرىلگەن قاسيەتتى قىزمەت جاۋاپكەرلىكتەرىن مۇقيات وتەدى.

  كوكتەم بايتاق جەردى شۋاققا بولەپ، بارشا تىرشىلىك جاندانا باستادى. حالىق سارايىنىڭ 10 مىڭ ادامدىق ۇلكەن زالى ايبىندى دا سالتاناتتى بەينەگە شومدى، ءتوراعالار مىنبەسى شىمىلدىعىنىڭ ءدال ورتاسىنداعى مەملەكەت گەربى نارتتاي قىزىل تۋدىڭ ايشىقتاۋىمەن نۇر - شۇعىلا شاشىپ تۇر.

  ءماجىلىس ءتوراعالار القاسىنىڭ تۇراقتى ءتوراعاسى، اتقارۋشى ءتوراعاسى لي جانشۋ ءماجىلىستى باسقاردى. ءماجىلىس ءتوراعالار القاسىنىڭ تۇراقتى ءتوراعالارى، اتقارۋشى ءتوراعالارى ۋاڭ چىن، ساۋ جيانميڭ، جاڭ چۇنشيان، شىن يۋەيۋە، جي بيڭشۋان، ەركىن يمىرباقى، ۋان ى - شياڭ، چىن جۋ، ۋاڭ دۇڭميڭ، بايما چىلين، ديڭ جۇڭلي، حاۋ ميڭجين، ساي دافىڭ، ۋ ۋيحۋا، ياڭ جىن - ۋ ءتوراعالار مىنبەسىندەگى اتقارۋشى ءتوراعالار ورنىنا جايعاستى.

  شي جينپيڭ، لي كىچياڭ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان جانە ءماجىلىس ءتوراعالار القاسىنىڭ قۇرامىنداعىلار ءتوراعالار مىنبەسىنەن ورىن الدى.

  13 - كەزەكتى مەملەكەتتىك حالىق قۇرىلتايىنىڭ 2 - ماجىلىسىنە قاتىناسۋعا ءتيىستى ۋاكىل 2975 ادام. 3 - ايدىڭ 5 - كۇنى تۇستەن بۇرىنعى ماجىلىسكە 2948 ۋاكىل قاتىناستى، 27 ۋاكىل قاتىناسا المادى، قاتىناسقان ۋاكىل سانى زاڭدا بەلگىلەنگەن ادام سانىنا ۇيلەسەدى.

  تۇستەن بۇرىن ساعات 9دا، لي جانشۋ جۇڭحۋا حالىق رەسپۋبليكاسى مەملەكەتتىك 13 - كەزەكتى حالىق قۇرىلتايى 2 - ءماجىلىسىنىڭ اشىلعاندىعىن جاريالادى. زالداعى بارلىق ادام ورىندارىنان تۇرىپ، مەملەكەت ءانىن اسقاقتاتا شىرقادى.

  ءماجىلىستىڭ كەڭەستىك ءتارتىبى بويىنشا، لي كىچياڭ مەملەكەتتىك كەڭەس اتىنان ماجىلىسكە ۇكىمەت قىزمەتىنەن بايانداما جاسادى. بايانداما 3 بولىكتەن قۇرالعان: 1. 2018 - جىلداعى قىزمەتتەرگە شولۋ؛ 2. 2019 - جىلعى ەكونوميكالىق، قوعامدىق دامۋدىڭ جالپى تۇلعالىق تالاپتارى جانە ساياساتتىق باعدارى؛ 3. 2019 - جىلعى ۇكىمەت قىزمەتىنىڭ مىندەتتەرى.

  لي كىچياڭ بىلاي دەدى: وتكەن ءبىر جىلدا، ەلىمىزدىڭ دامۋى كوپ جىلدان بەرى بولماعان كۇردەلى دە اۋىر ىشكى - سىرتقى جاعدايلارعا ءدوپ كەلدى، ەكونوميكادا جاڭا قۇلدىراۋ قىسىمى جارىققا شىقتى. شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، بۇكىل ەلدەگى ءار ۇلت حالقى شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، ۇدەرە العا تارتىپ، قيىن قامالداردى الىپ، ەكونوميكالىق، قوعامدىق دامۋدىڭ تۇتاس جىلداعى باستى نىسانا - مىندەتتەرىن ورىنداپ، جاپپاي دوڭگەلەك داۋلەتتى قوعام ورناتۋدىڭ شەشۋشى جەڭىسىنە جەتۋدە تىڭ دا كەلەلى ىلگەرىلەۋشىلىككە قول جەتكىزدى.

  لي كىچياڭ وتكەن ءبىر جىلداعى قىزمەتتەرگە مىناداي 8 جاقتان شولۋ جاسادى: ماكرولىق تىزگىندەۋ جاڭالانىپ جانە كەمەلدەنىپ، ەكونوميكا ورنىقتى اينالىمىن ساقتادى؛ ءۇش ءىرى قامال الۋ شايقاسى تىڭعىلىقتى جۇرگىزىلىپ، ءتۇيىندى مىندەتتەردە بەلسەندى ىلگەرىلەۋشىلىككە قول جەتتى؛ قامداۋ جاعىنداعى قۇرىلىمدىق رەفورما تەرەڭدەپ، تۇلعالىق ەكونوميكانىڭ ومىرشەڭدىگى ۇزدىكسىز ايگىلەندى؛ دامۋعا جاڭالىق اشۋ ارقىلى دەم بەرۋ ستراتەگياسى ىشكەرىلەي اتقارىلىپ، جاڭالىق اشۋ قابىلەتى جانە ونىمدىلىك اناعۇرلىم جوعارىلادى؛ رەفورمالاۋ، ەسىك اشۋ تەبىنى ارتىپ، دامۋدىڭ قوزعاۋشى كۇشى ءۇرتىس ارتتى؛ قالا مەن اۋىلدىڭ وڭىرلىك دامۋى ءبىر تۇتاس جوسپارلانىپ، ءتيىمدى ىقپالداستىق جۇيەسىنىڭ قالىپتاسۋى تەزدەدى؛ حالىق تۇرمىسىن دامۋ بارىسىندا قامتاماسىزداندىرۋدان جانە جاقسارتۋدان جازباي، حالىق بۇقاراسى رەفورما، دامۋ جەتىستىكتەرىنەن ءتىپتى دە كوپ، ءتىپتى دە ادىلدىكپەن يگىلىكتەندى؛ زاڭمەن باسقارىلاتىن ۇكىمەت قۇرىلىسى مەن باسقارۋدا جاڭالىق اشۋ ىلگەرىلەتىلدى، قوعامنىڭ جاراسىمدىلىعى، ورنىقتىلىعى ساقتالدى.

  لي كىچياڭ بىلاي دەپ اتاپ كورسەتتى: بەينەتتى ەسكەرگەندە عانا زەينەت بولادى. تابىستاردى تولىق تۇراقتاندىرۋمەن بىرگە، ەلىمىزدىڭ دامۋىندا ءدوپ كەلگەن ماسەلەلەر مەن سىنداردى دا سەرگەكتىكپەن كورە ءبىلۋىمىز قاجەت. ءبىز، ءسوز جوق، ماسەلە مەن سايىستان تايساقتاماي، بورىشتى باتىلدىقپەن وتەپ، مىندەتتى بۇلجىتپاي اتقارىپ، قىزمەتتى بارىنشا جاقسى ىستەپ، حالىقتىڭ كۇتكەن ءۇمىتىن اقتاۋىمىز كەرەك.

  لي كىچياڭ بىلاي دەدى: 2019 - جىلعى ەكونوميكانى، قوعامدى دامىتۋدىڭ باستى مەجەلى نىساناسى مىنالار: ىشكى ءوندىرىستىڭ جالپى قۇنى %6.5 − %6 ارتادى؛ قالا - قالاشىقتاعى تىڭنان جۇمستاناتىنداردىڭ سانى 11 ميلليوننان اسادى، قالا - قالاشىقتا انىقتالاتىن جۇمىسسىزدىق مولشەرى ٪ 5.5 اينالاسىندا بولادى، قالا - قالاشىقتا تىزىمدەلگەن جۇمىسسىزدىق مولشەرى ٪4.5 كولەمىندە بولادى؛ تۇرعىنداردىڭ تۇتىنۋ باعاسىنىڭ قىمباتتاۋ شاماسى ٪ 3 اينالاسىندا بولادى؛ حالىقارالىق كىرىس - شىعىستا نەگىزىنەن تەپە - تەڭدىك ساقتالىپ، يمپورت - ەكسپورت ساپاسى ورنىقتىلىق بارىسىندا جوعارىلايدى؛ ماكرولىق سۇيمەن شاماسى نەگىزىنەن ورنىقتىلىقتى ساقتاپ، فينانستىق، قازىنالىق حاۋىپ - قاتەردەن ۇتىمدى ساقتانادى؛ اۋىل - قىستاقتا 10 ميلليوننان استام ادام كەدەيلىكتەن قۇتىلادى، تۇرعىندار كىرىسىنىڭ ارتۋى مەن ەكونوميكانىڭ ارتۋى نەگىزىنەن تەڭ بولادى؛ ەكولوگيالىق ورتا اناعۇرلىم جاقسارادى، ىشكى ءوندىرىستىڭ جالپى قۇنىنداعى ەنەرگيانىڭ بىرلىكتىك سارىبى ٪ 3 اينالاسىندا تومەندەيدى، باستى لاس زاتتاردىڭ شىعارىلۋ مولشەرى ۇزدىكسىز تومەندەيدى.

  لي كىچياڭ باياندامادا مىنالاردى العا قويدى: 2019 - جىلعى ۇكىمەت قىزمەتىن ويداعىداي ىستەۋ ءۇشىن، مىناداي قاتىناستى ويداعىداي يگەرۋگە نازار اۋدارۋ كەرەك. ءبىرىنشى، ەل ءىشى مەن حالىقارانىڭ قاتىناسىن ءبىر تۇتاس ويداعىداي جوسپارلاپ، جۇرت تىلەگىن توعىستىرا وتىرىپ ءوز جۇمىستارىمىزدى ويداعىداي تىندىرۋىمىز كەرەك؛ ەكىنشى، ارتۋدى ورنىقتىرۋ مەن حاۋىپ - قاتەردەن ساقتانۋدىڭ قاتىناسىن ويداعىداي تەڭگەرىپ، ەكونوميكانىڭ ءۇرتىس، اقاۋسىز دامۋىنا شىنايى كەپىلدىك ەتۋ كەرەك؛ ءۇشىنشى، ۇكىمەت پەن بازاردىڭ قاتىناسىن ويداعىداي ءبىر جايلى ەتىپ، رەفورمالاپ، ەسىك اشۋدى ارقا تىرەك ەتىپ، بازار تۇلعالارىنىڭ ومىرشەڭدىگىن تاسقىنداتۋ كەرەك.

  لي كىچياڭ بىلاي دەدى: 2019 - جىلدا ءتۇيىن كورنەكتىلەندىرىلىپ، تەتىك يگەرىلىپ، مىناداي 10 ءتۇرلى قىزمەت تىڭعىلىقتى جاقسى ىستەلەدى: ءبىرىنشى، ماكرولىق تىزگىندەۋدە ۇزدىكسىز جاڭالىق اشىپ جانە ونى كەمەلدەندىرىپ، ەكونوميكالىق اينالىمنىڭ ۇيلەسىمدى ارالىقتا بولۋىنا شىنايى كەپىلدىك ەتىلەدى؛ ەكىنشى، بازار تۇلعالارىنىڭ ومىرشەڭدىگى جانداندىرىلىپ، تيجارات، ساۋدا ورتاسى كۇش سالا ساپالىلاندىرىلادى؛ ءۇشىنشى، جاڭالىق اشۋدىڭ دامۋعا جەتەكشىلىك ەتۋىنەن جازباي، تىڭ قوزعاۋشى قۋات جەتىلدىرىلەدى، زورايتىلادى؛ ءتورتىنشى، قۋاتتى ەل ءىشى بازارىنىڭ قالىپتاسۋى جەبەلىپ، ىشكى سۇرانىمنىڭ كومەسكى كۇشى تىنباي جانداندىرىلادى؛ بەسىنشى، جاپپاي دوڭگەلەك داۋلەتتى قوعام ورناتۋداي مىندەتتى ولشەم ەتىپ، كەدەيلىكتەن قۇتىلدىرۋدان قامال الۋ جانە اۋىل - قىستاقتاردى گۇلدەندىرۋ تياناقتى ىلگەرىلەتىلەدى؛ التىنشى، وڭىرلىك سايكەسە دامۋ جەبەلىپ، جاڭاشا قالا - قالاشىقتانۋ ساپاسى جوعارىلاتىلادى؛ جەتىنشى، لاستانۋدان ساقتانۋ جانە ەكولوگيا قۇرىلىسى كۇشەيتىلىپ، جاسىل دامۋ بارىنشا ىلگەرىلەتىلەدى؛ سەگىزىنشى، ءتۇيىندى سالالار رەفورماسى تەرەڭدەتىلىپ، بازار مەحانيزمىن كەمەلدەندىرۋ جەدەلدەيدى؛ توعىزىنشى، سىرتقا ەسىكتى جان - جاقتى اشۋ ىلگەرىلەتىلىپ، حالىقارالىق ەكونوميكالىق سەلبەستىك پەن باسەكەدەگى تىڭ باسىمدىقتار جەتىلدىرىلەدى؛ ونىنشى، قوعامدىق ىستەردىڭ دامۋى جەدەلدەتىلىپ، حالىق تۇرمىسى اناعۇرلىم ويداعىداي قامتاماسىز ەتىلەدى جانە جاقسارتىلادى.

  لي كىچياڭ ۇكىمەتتىڭ وزىندىك قۇرىلىسى، ۇلت، ءدىن جانە چياۋمين ىستەرى قىزمەتتەرى، مەملەكەت قورعانىسى جانە ارميا قۇرىلىسى، شياڭگاڭنىڭ، اۋمىننىڭ دامۋى جانە ەكى جاعالاۋ قاتىناسى، سونداي - اق ەلىمىزدىڭ ديپلوماتيا ساياساتى جونىندە دە بايىمداۋ جاسادى.

  ءماجىلىستىڭ كەڭەستىك تارتىبىنە ساي، ءماجىلىس 2018 - جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ جاعدايى جانە 2019 - جىلعى حالىق شارۋاشىلىعى مەن قوعامدىق دامۋ جوسپار جوباسى بايانداماسىن، سونداي - اق 2019 - جىلعى جوسپار جوباسىن، 2018 - جىلعى ورتالىق پەن جەرگىلىكتى ورىنداردىڭ مەجە ەسەبىنىڭ اتقارىلۋ جاعدايى جانە 2019 - جىلعى ورتالىق پەن جەرگىلىكتى ورىنداردىڭ مەجە ەسەپ جوباسى بايانداماسىن، سونداي - اق 2019 - جىلعى بۇكىل ەلدىڭ مەجە ەسەپ جوباسىن تەكسەرەدى.

  ديڭ شۋەشياڭ، ليۋ حى، شۇي چيلياڭ، سۇن چۇنلان، لي شي، لي چياڭ، لي حۇڭجۇڭ، ياڭ جيەچى، ياڭ شياۋدۋ، جاڭ يوۋشيا، چىن شي، چىن چۋانگو، چىن مين - ىر، حۋ چۇنحۋا، گو شىڭكۇن، حۋاڭ كۇنميڭ، ساي چي، يوۋ چۋان، ۋي فىڭحى، ۋاڭ يۇڭ، ۋاڭ ي، شياۋ جيە، جاۋ كىجى، جوۋ چياڭ، جاڭ جۇن، جاڭ چيڭلي، ليۋ چيباۋ، پابالا گىلەلاڭجيە، دۇڭ جيانحۋا، ۋان گاڭ، حى حوۋحۋا، لۋ جانگۇڭ، ۋاڭ جىڭۋي، ما بياۋ، چىن شياۋگۋاڭ، لياڭ جىن - يىڭ، شيا باۋلۇڭ، ياڭ چۋانتاڭ، لي بين، باتىر، ۋاڭ يۇڭچيڭ، حى ليفىڭ، سۋ حۇي، جىڭ جيانباڭ، گۋ شىڭزۋ، ليۋ شينچىڭ، حى ۋي، شاۋ حۇڭ، گاۋ يۇنلۇڭ، سونداي - اق ورتالىق اسكەري ىستەر كوميتەتىنىڭ مۇشەلەرى لي زوچىڭ، مياۋ حۋا، جاڭ شىڭمين قاتارلىلار دا ءتوراعالار مىنبەسىنەن ورىن الدى.

  شياڭگاڭ ەرەكشە اكىمشىلىك رايونىنىڭ اكىمى لينجىڭ يۋە - ى، اۋمىن ەرەكشە اكىمشىلىك رايونىنىڭ اكىمى سۇي شى - ان ماجىلىسكە سىرتتاي قاتىناستى ءارى ءتوراعالار مىنبەسىنەن ورىن الدى.

  مەملەكەتتىك ساياسي كەڭەس 13 - كەزەكتى كوميتەتىنىڭ 2 - ماجىلىسىنە قاتىناسىپ جاتقان ساياسي كەڭەس مۇشەلەرى ماجىلىسكە سىرتتاي قاتىناستى.

  ورتالىق پەن مەملەكەت ورگاندارىنىڭ قاتىستى تاراۋلارىنىڭ، ازاتتىق ارميانىڭ قاتىستى ورىندارىنىڭ، حالىقتىق ۇيىمداردىڭ قاتىستى جاۋاپتىلارى ماجىلىسكە سىرتتاي قاتىناستى نەمەسە سىرتتاي تىڭدادى.
 ءار ەلدىڭ جۇڭگوداعى ەلشىلەرى ءماجىلىستى سىرتتاي تىڭدادى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورابى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

بىزبەن بايلانىس جارناما قىزمەتى لەبىز قالدىرۋ ءبىز تۋرالى