تيانشان تورى   ›   جاڭالىقتار   ›   شينجياڭ حابارلارى

شينجياڭ ۋاكىلدەر ۇيىرمەسى ماجىلىسكە ءبىر كەڭەستىك جوبا، 30 ۇسىنىس تاپسىردى

  تىلشىلەر لي ياڭ، ياۋ تۇڭ، سۇي يۇنيان 3 - ايدىڭ 13 - كۇنى بەيجيڭنەن حابارلايدى. بەيجيڭدە 13 - كەزەكتى مەملەكەتتىك حالىق قۇرىلتايىنىڭ 2 - ماجىلىسىنە قاتىناسىپ جاتقان شينجياڭ ۋاكىلدەر ۇيىرمەسى ماجىلىسكە ءبىر كەڭەستىك جوبا، 30 ۇسىنىس تاپسىردى.

  وسى كەڭەستىك جوبا مەن ۇسىنىستاردى ۋاكىلدەر ىشكەرىلەي ارالاۋ، تەكسەرۋ - زەرتتەۋ ارقىلى شينجياڭنىڭ ورنىقتىلىق، دامۋ جالپى جاعدايى جانە حالىق بۇقاراسى ناقتى ءجىتى قاداعالاپ وتىرعان ماسەلەلەر توڭىرەگىندە العا قويدى. ۋاكىل فاتيما ەلەكتروندىق ارىز - شاعىم زاڭىن تەز ارادا جاساپ شىعۋ جونىندە كەڭەستىك جوبانى العا قويدى، ول بىلاي دەپ قارادى: سوڭعى جىلدارى ەلىمىز ەلەكتروندىق ارىز - شاعىمدى بار كۇشپەن ىلگەرىلەتىپ، دەلونىڭ جاريالىلىعى مەن قارالۋ ونىمدىلىگىن بارىنشا جوعارىلاتىپ، ءادىليالىق وزىندىك قۇندى زور مولشەردە تومەندەتتى، الايدا ەلەكتروندىق ارىز - شاعىمنىڭ زاڭدى بولۋى ماسەلەسى ونىڭ دامۋىنا، كەمەلدەنۋىنە تۇساۋ بولاتىن وسال تۇسقا اينالدى. فاتيما مەملەكەت جاعدايىنا ۇيلەسەتىن ەلەكتروندىق ارىز - شاعىم زاڭىن جاساۋدى ۇسىنىس ەتتى.

  تاپسىرعان 30 ۇسىنىس مىنالاردى قامتىدى: قۇمايتتانۋدىڭ الدىن الۋدى، قۇمدى تىزگىندەۋدى ءتۇيىن ەتىپ، وڭتۇستىك شينجياڭ ءوڭىرىنىڭ ەكولوگيالىق قۇرىلىسىن ىلگەرىلەتۋ جونىندەگى ۇسىنىس؛ شينجياڭنىڭ ەرەكشە جەمىس ورمان شارۋاشىلىعىنىڭ دامۋىن بار كۇشپەن قولداۋ جونىندەگى ۇسىنىس؛ شينجياڭنىڭ تەمىر جولىن ”تەزدەتۋ، اينالدىرا تۇتاستىرۋ “ نىسان قۇرىلىسىن جەدەلدەتۋ جونىندەگى ۇسىنىس؛ ءۇرىمجى جىبەك جولى ەكونوميكالىق بەلدەۋى سىرتقا ەسىك اشۋ سىناق رايونىن قۇرۋدى قولداۋ جونىندەگى ۇسىنىس؛ قوعامدىق الەۋمەتتىك يگىلىك قيمىلدارىن قولداۋ، قامتاماسىز ەتۋ ءتۇزىمىن بەلگىلەۋ جونىندەگى ۇسىنىس؛ ەمدەۋ، وقۋ - اعارتۋ بويىنشا ۇيىرمە فورماسىندا شينجياڭعا كومەكتەسۋ جونىندەگى ۇسىنىس؛ بيڭتۋاننىڭ ەكولوگيالىق ورتانىڭ ساپاسىن باقىلاۋ - ولشەۋ قىزمەتىن قولداۋ سەرپىنىن ارتتىرۋ جونىندەگى ۇسىنىس، ت. ب.

  سوڭعى جىلدارى، ورتالىق پەن مەملەكەتتىڭ قاتىستى مينيسترلىك، كوميتەتتەرىنىڭ قولداۋىندا، رايونىمىز قۇمايتتانۋدىڭ الدىن الۋدى، قۇمدى تىزگىندەۋدى ءتۇيىن ەتىپ، ءبىرسىپىرا ەكولوگيالىق قۇرىلىس ينجەنەرياسىن اتقاردى، الايدا قۇمايىتتانعان جەردىڭ كەڭەيۋ ماسەلەسىنە ءالى دە ەرەكشە ءمان بەرۋ كەرەك. ۋاكىل نايىم ياسىن مىناداي ۇسىنىس بەردى: پارىقتى تولىقتاما قاراجات ساياساتىن بەلگىلەپ، شينجياڭنىڭ قۇمايتتانۋدىڭ الدىن الۋ، قۇمدى تىزگىندەۋ ءتۇيىندى ينجەنەرياسى قۇرىلىسىن قولداۋ تەبىنىن ارتتىرۋ كەرەك. شينجياڭنىڭ جاسىل القاپتى وڭىردە جوعارى ءونىمدى سۋ ۇنەمدەۋ تۇرپاتتى قۇم شارۋاشىلىعىن دامىتۋىنا، جاسىل ەكولوگيالىق كاسىپ جۇيەسىن ورناتۋىنا، سونىمەن بىرگە وڭتۇستىك شينجياڭ ءوڭىرىنىڭ سۋ بايلىعىن دالەلدەۋ قىزمەتىن ويداعىداي ىستەۋىنە قولداۋ كورسەتۋ كەرەك.

  قازىر شينجياڭنىڭ جول تورابىنىڭ قامتۋ كولەمى جەتكىلىكسىز، جول تورابىنىڭ جيىلىگى مەملەكەتتىڭ ورتاشا ورەسىنەن الدەقايدا تومەن. ۋاكىل عانيبات سابىكەي ۇلى مىناداي ۇسىنىس بەردى: مەملەكەتتىك دامۋ - رەفورما كوميتەتى مەن جۇڭگو تەمىر جول باس سەرىكتەستىگى قۇلجادان اقسۋعا تۇتاساتىن تەمىر جول نىسانىنىڭ العاشقى مەرزىمدىك دايىندىق قىزمەتىن ەرتەرەك ورىستەتىپ، قۇرىلىس جۇمىستارىن ەرتەرەك باستاۋعا كۇش سالۋ كەرەك؛ لانجوۋ - شينجياڭ تەمىر جولى ەكىنشى قوس باعىتتى جەلىسىنىڭ ساعاتتىق جىلدامدىعىن 350 كيلومەترگە كوتەرىپ، شينجياڭ مەن ىشكەرىدەگى ولكە، رايونداردىڭ ۋاقىت جانە كەڭىستىك قاشىقتىعىن قىسقارتىپ، ءار ۇلت بۇقاراسىنىڭ جىلدام ساپارلاۋىنا جاعداي جاساۋ كەرەك.

  ءۇرىمجى تۇتاس شينجياڭنىڭ ساياسي، ەكونوميكا، مادەنيەت ورتالىعى رەتىندە، جىبەك جولى ەكونوميكالىق بەلدەۋىندەگى ماڭىزدى ءتۇيىندى قالا. ۋاكىل ياسىن سىدىق مىنانى ۇسىنىس ەتتى: مەملەكەتتىك دامۋ - رەفورما كوميتەتى مەن ساۋدا ىستەرى مينيسترلىگىنىڭ باستاماشىلدىعىندا، ءۇرىمجى جىبەك جولى ەكونوميكالىق بەلدەۋى سىرتقا ەسىك اشۋ سىناق رايونىن قۇرىپ ءارى الدىمەن اتقارۋ، الدىمەن سىناق ەتۋ جاعىندا قاتىستى ساياساتتىق قولداۋ كورسەتىپ، مەملەكەت دارەجەلى سىرتقا ەسىك اشۋدىڭ جاڭا تۇعىرىن قۇرۋ كەرەك.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.