ءتىلشى لۋ فىڭباۋ، پراكتيكانت لياڭ يانني 3 - ايدىڭ 23 - كۇنى ۇرىمجىدەن حابارلايدى. ”بيىل G0711 جەلىسى ءۇرىمجى - كورلا (لوپنۇر) جوعارى قارقىندى تاس جولى (تومەندە قىسقارتىلىپ ءۇرىمجى - لوپنۇر جوعارى قارقىندى تاس جولى دەلىنەدى) سياقتى جاڭادان سالىناتىن ءبىرسىپىرا نىسانداردىڭ الدىڭعى كەزەڭدەگى تەكسەرىپ - بەكىتۋ قىزمەتىن بارىنشا ىلگەرىلەتىپ، قۇرىلىستى الدىڭعى جارتى جىلدا باستاۋعا كۇش سالامىز“. تاياۋدا اۆتونوميالى رايوندىق قاتىناس - تاسىمال مەڭگەرمەسىنىڭ ورىنباسار باستىعى لي جىنۇڭ تىلشىگە بيىل سالىنىپ جاتقان نەمەسە جوباعا الىنعان جوعارى قارقىندى تاس جول نىساندارىنىڭ ءبىرسىپىراسىن جەدەل ىلگەرىلەتىپ، وڭتۇستىك جانە سولتۇستىك شينجياڭداعى تيانشاندى ەندەي وتەتىن قاتىناس - تاسىمال ارنالارىنىڭ قۋاتىن ارتتىرۋعا كۇش سالاتىندىقتارىن ايتتى.
”وڭتۇستىك جانە سولتۇستىك شينجياڭدى تۇتاستىراتىن تاس جولدان قازىر بەسەۋى بار، الايدا باسىم كوبىنىڭ دارەجەسى جوعارى ەمەس، جول جاعدايى ءبىرشاما ناشار، اينالىپ جۇرەتىن جول ءبىرشاما ۇزاق“، - دەدى اۆتونوميالى رايوندىق قاتىناس - تاسىمال مەڭگەرمەسى قۇرىلىس ىستەرىن باسقارۋ باسقارماسىنىڭ جاۋاپتىسى. وسى 5 تاس جولدىڭ ىشىندەگى بىردەن - ءبىر جوعارى دارەجەلى تاس جول G3012 جەلىسى، الايدا ۇرىمجىدەن وڭتۇستىك شينجياڭعا بارۋ ءۇشىن توقسۇندى اينالىپ ءوتۋ كەرەك، بۇعان كەتەتىن ۋاقىت ءبىرشاما ۇزاق؛ بىرەۋى، قۇمىل ارقىلى لوپنۇر كولىنە بارىپ، ودان شىعىپ چاقىلىققا جەتەدى، بۇل جەلىنىڭ دارەجەسى تومەن، جول جاعدايى ناشار؛ ەندى ءبىرى، مەملەكەت تاس جولى 216 جەلىسى حوۋشيا ارقىلى 1 - ءنومىرلى مۇزدىقتى (شىڭلي دابان)، بالعىنتايدى باسىپ كورلاعا جەتەدى، جول جاعدايى ءبىرشاما ناشار، تەك ماۋسىمعا قاراي اۆتوكولىك قاتىنايدى؛ ەندى بىرەۋى، ولكە تاس جولى 103 جەلىسى ارقىلى ولكە تاس جولى 301 جەلىسىن اينالىپ، ودان ۇلاستاي، بالعىنتايلاردى باسىپ ءوتىپ وڭتۇستىك شينجياڭعا جەتەدى، جالپى بارىسىندا اينالىپ باساتىن جول ءبىرشاما ۇزاق، جول جاعدايى دا دەرلىكتەي ەمەس؛ تاعى بىرەۋى، كوپشىلىككە تانىس مايتاۋ - كورلا تاس جولى، الايدا جاراتىلىستىق ورتانىڭ ىقپالىنان، تۇتاس جەلى بويىنشا ءار جىلى 6 - ايدان 11 - ايعا دەيىن عانا اۆتوكولىك قاتىناي الادى، قالعان ۋاقىتتا نەگىزىنەن بەكىتۋلى كۇيدە تۇرادى، اۆتوكولىك قاتىناعان كۇننىڭ وزىندە ىركىلىسسىز ەمەس.
اۆتونوميالى رايون وڭتۇستىك، سولتۇستىك شينجياڭنىڭ جول قۇرىلىسىنا باستان - اياق باسا ءمان بەردى، بىلتىر اۆتونوميالى رايوندىق قاتىناس - تاسىمال مەڭگەرمەسى قاتىناس - تاسىمال سالاسى بويىنشا ساۋداگەر شاقىرىپ، قارجى ەنگىزۋ نىساندارىنا تانىستىرۋ ءماجىلىسىن اشىپ، مايتاۋ - نارات، نارات - كۇشار سياقتى تاس جول نىساندارىن قوعامدى بەتكە الىپ تانىستىردى. قازىر مايتاۋ - نارات، نارات - كۇشار تاس جول نىسانىنىڭ الدىڭعى كەزەڭدىك قىزمەتى باستالدى، قۇرىلىس سالىنىپ ءبىتىپ اۆتوكولىك قاتىناعاننان كەيىن، التاي ايماعىنان جوعارى قارقىندى تاس جول ارقىلى وڭتۇستىك شينجياڭعا جەتۋگە بولادى.
بيىل ءۇرىمجى - لوپنۇر جوعارى قارقىندى تاس جول قۇرىلىسى باستالدى، بۇل وڭتۇستىك پەن سولتۇستىك شينجياڭ اراسىنداعى جوعارى قارقىندى ارناعا اينالادى. ”ءۇرىمجى - لوپنۇر جوعارى قارقىندى تاس جولىنان اۆتوكولىك قاتىناعاننان كەيىن، ۇرىمجىدەن لوپنۇرعا دەيىنگى ارالىقتاعى قاتىناس ورتاسى ونان ارى جاقسارادى، G3012 جەلىسىمەن سالىستىرعاندا، اينالما جول قىسقاراتىندىقتان، جولعا كەتەتىن ۋاقىت تا 1.5 ساعاتتاي قىسقارادى“، - دەدى اۆتونوميالى رايوندىق قاتىناس - تاسىمال مەڭگەرمەسى قۇرىلىس جۇمىسىن باسقارۋ باسقارماسىنىڭ جاۋاپتىسى.
ءۇرىمجى - لوپنۇر جوعارى قارقىندى تاس جولىن سالۋدان سىرت، بيىل ىلە ءدوڭمازار - نارات جوعارى قارقىندى تاس جولى سالىنىپ ءبىتىپ، اۆتوكولىك قاتىنايدى، ىلە نارات - بالعىنتاي نىسانىنىڭ الدىڭعى كەزەڭدىك قىزمەتى جەدەل ىلگەرىلەتىلەدى. وسى 2 نىسان سالىنىپ بىتكەننەن كەيىن، قۇلجا - بالعىنتاي جەلىسى G0711 جەلىسىمەن ۇلاسادى، بۇل وڭتۇستىك پەن سولتۇستىك شينجياڭدى تۇتاستىراتىن جوعارى قارقىندى تاس جولدى قالىپتاستىرۋعا پايدالى تاعى ءبىر ارنا.
”وسى تاس جول نىساندارى سالىنىپ بىتكەننەن كەيىن، وڭتۇستىك پەن سولتۇستىك شينجياڭنىڭ تيانشاننان ەندەي وتەتىن تاسىمال ارناسى قۋاتىنىڭ بارىنشا ارتاتىندىعى ءسوزسىز، شينجياڭدا وڭىرلىك سايكەسىمدى اينالىم جۇزەگە اسىپ، تيانشاننىڭ تۇستىگى مەن تەرىستىگى اراسىنا قاتىناۋ ءتىپتى دە قولايلى بولادى“، - دەدى اۆتونوميالى رايوندىق قاتىناس - تاسىمال مەڭگەرمەسى قۇرىلىس ىستەرىن باسقارۋ باسقارماسىنىڭ جاۋاپتىسى.
