شينحۋا اگەنتتىگىنىڭ 3 - ايدىڭ 23 - كۇنى يتاليا پالەرمودان بەرگەن حابارى (ءتىلشى حۋاڭيىن جيازى). مەملەكەت ءتوراعاسى شي جينپيڭ 3 - ايدىڭ 23 - كۇنى پالەرمودا يتاليا سيسيلي ۇلكەن رايونىنىڭ ءتوراعاسى مۋسۋمەيچيمەن كەزدەستى. سيسيلي ۇلكەن رايونى پارلامەنتىنىڭ ءتوراعاسى، ولكە گۋبەرناتورى، پالەرمو قالاسىنىڭ باستىعى قاتارلىلار كەزدەسۋگە قاتىناستى.
شي جينپيڭ سيسيليدىڭ تاريحى، گۋمانيتارلىق جانە ەكونوميكالىق، قوعامدىق دامۋى جاعدايلارىنا قاتىستى تانىستىرۋدى، سونداي - اق سيسيلي رايونىنىڭ جۇڭگومەن ەكونوميكا - ساۋدا، گۋمانيتارلىق اۋىس - ءتۇيىس احۋالدارىن تىڭدادى. شي جينپيڭ بىلاي دەپ اتاپ كورسەتتى: سيسيليدىڭ تاريحي مادەنيەت قاتپارى تەرەڭ، بايلىعى مول، سيسيليدىڭ وزىندىك بايلىق ارتىقشىلىعىن تولىق ساۋلەلەندىرىپ، جۇڭگومەن سەلبەستىگىن كەڭەيتۋىن ءۇمىت ەتەمىن. وسى رەت يتالياعا ساپارلاي كەلگەنىمدە جۇڭگو - يتاليا ەكى جاق سيسيليدە ونگەن اپەلسيندى جۇڭگوعا شىعارۋ كەلىسىمىنە قول قويىستى، سيسيليدىڭ جۇڭگوعا ساپالى اۋىل شارۋاشىلىق ونىمدەرىن ەكسپورت ەتۋىن قارسى الامىز. جۇڭگو سيسيليمەن قارجى قوسۋ، ساياحات سالاسىنداعى سەلبەستىكتى كۇشەيتۋدى قالايدى.
مۋسۋمەيچي بىلاي دەدى: ءتوراعا شي جينپيڭنىڭ سيسيليگە ساپارلاي كەلگەندىگىن قىزۋ قارسى الامىز. سيسيليدىڭ جۇڭگومەن بارىس - كەلىسىنىڭ تەرەڭ تاريحي قاينارى بار، كەزىندە بايىرعى جىبەك جولىنىڭ ءبىر بولىگى بولعان. سيسيلي حالقى جۇڭگو حالقىنىڭ دوسى. جەر ورتا تەڭىزىندەگى ماڭىزدى ارال رەتىندە سيسيلي ايرىقشا دامۋ ارتىقشىلىعىنا يە، جۇڭگومەن اۋىل شارۋاشىلىعى، ساياحات سياقتى سالالارداعى سەلبەستىكتى جيىلەتىپ، ”ءبىر بەلدەۋ، ءبىر جول“دىڭ ماڭىزدى بەكەتىنە اينالۋدى قالايدى.
پىڭ لييۋان، ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار قيمىلعا قاتىناستى.
شي جينپيڭ ريمدەگى ساپارىن اياقتاتقان سوڭ، پالەرموعا جەتىپ ساپارىن باستاعان. ريمنەن اتتانعاندا، يتاليا ۇكىمەتىنىڭ جوعارى دارەجەلى ءمانساپتىلارى اۋەجايعا بارىپ اتتاندىرىپ سالدى.
