شينحۋا اگەنتتىگىنىڭ 3 - ايدىڭ 24 - كۇنى موناكودان بەرگەن حابارى (تىلشىلەر چىن جى، شۇي لينگۇي). مەملەكەت ءتوراعاسى شي جينپيڭ 3 - ايدىڭ 24 - كۇنى موناكونىڭ حانزاداسى البەرەⅡمەن كەڭەس وتكىزدى.
شي جينپيڭ بىلاي دەپ اتاپ كورسەتتى: مارتەبەلى حانزادانىڭ ۇسىنىسىمەن موناكو كىنازدىعىنا مەملەكەتتىك ساپارمەن كەلگەندىگىمە ەرەكشە قۋانىشتىمىن. بۇل − جۇڭگونىڭ مەملەكەت ءتوراعاسىنىڭ تۇڭعىش رەت موناكودا ساپاردا بولۋى. ءبىزدىڭ ەلدەرىمىزدىڭ ۇقساستاۋ كەلەتىن ۇلتتىق مىنەز - قۇلقى مەن ورتاق رۋحاني تالپىنىسى ءبىزدى ءوزارا ءتۇسىنىستىرىپ، جاقىنداستىردى. جۇڭگو مەن موناكو ديپلوماتيالىق قارىم - قاتىناس ورناتقان 20 نەشە جىلدان بەرى، ەكى جاق قاشاندا ىزگى نيەتتى دوستىقپەن ءبىر - بىرىنە تەڭ تۇرعىدا مامىلە جاساپ كەلەدى. قازىر جۇڭگو مەن موناكونىڭ ەكى جاقتى قارىم - قاتىناسى نىق قاداممەن دامىپ، ناقتى سەلبەستىگى داۋىرمەن بىرگە العا باسۋدا، اسىرەسە، قورشاعان ورتانى قورعاۋ، تەلەگراف، جىلجىمالى تولەۋ سياقتى جاڭا سالالاردا جۇڭگو - ەۆروپا سەلبەستىگىنىڭ الدىڭعى لەگىندە كەلەدى. جۇڭگو - موناكو قارىم - قاتىناسى ۇلكەن - كىشىلىگى ۇقسامايتىن، تاريحي مادەنيەتى ۇقسامايتىن، قوعامدىق ءتۇزىمى ۇقسامايتىن مەملەكەتتەردىڭ دوستىق بارىس - كەلىسىنىڭ ۇلگىسىنە اينالدى.
شي جينپيڭ بىلاي دەپ باسا دارىپتەدى: مەنىڭ مارتەبەلى حانزادامەن جارتى جىل ىشىندە ءوزارا ساپاردا بولۋىم جۇڭگو - موناكو قارىم - قاتىناسىنىڭ جوعارى دەڭگەيىن ايگىلەدى. ەكى جاق ەكى جاقتى قارىم - قاتىناستىڭ دۇرىس بەتالىسىن مىقتاپ يگەرىپ، ءداستۇرلى دوستىق پەن ساياسي ءوزارا سەنىمدى ۇزدىكسىز نىعايتىپ، بىرلەسكەن مەملەكەتتەر ۇيىمى اياسىندا جانە حالىقارالىق ىستەردە ءوزارا قارىم - قاتىناس جاساپ سايكەسۋدى جانە ءوزارا قولداۋدى كۇشەيتتى. ەكى جاق ەسىك اشۋعا، سەلبەستىك جاساۋعا تاباندى بولىپ، ءوزارا پايدا جەتكىزىپ تەڭ يگىلىككە كەنەلۋدى تەرەڭدەتۋى كەرەك. جۇڭگو موناكونىڭ ”ءبىر بەلدەۋ، ءبىر جول“دى بىرگە قۇرۋ حالىقارالىق سەلبەستىگىنە بەلسەنە قاتىناسۋىن قارسى الادى. ەكى جاق ەكى ەلدىڭ قورشاعان ورتا جاعىنداعى سەلبەستىگىنىڭ دەڭگەيىن كوتەرۋى كەرەك. جۇڭگو حانزادا قور قوعامىنىڭ جۇڭگودا قورشاعان ورتانى قورعاۋ بويىنشا الەۋمەتتىك يگىلىك ارەكەتىن ورىستەتىپ، گۋمانيتارلىق اۋىس - ءتۇيىستىڭ مازمۇنىن ۇزدىكسىز بايىتۋىن قارسى الادى.
البەرەⅡحانزادا موناكونىڭ پاتشا اۋلەتى، ۇكىمەتى جانە حالقى اتىنان، ءتوراعا شي جينپيڭنىڭ موناكودا تاريحي سيپاتتى ساپاردا بولعاندىعىن قىزۋ قارسى الدى. البەرەⅡحانزادا مىنالاردى ءبىلدىردى: جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قارسى الۋ ورايىندا، مەن جۇڭگونىڭ دامۋدا قول جەتكىزگەن وراسان زور تابىستارىن قۇتتىقتايمىن. موناكو - جۇڭگو قارىم - قاتىناسى جاقسى دامۋدا. موناكو جۇڭگومەن عىلىم - تەحنيكا، جاڭالىق اشۋ، ەكولوگيالىق ورتانى قورعاۋ، جابايى حايۋاناتتاردى قورعاۋ، قايتا تۋىندايتىن ەنەرگيا سياقتى سالالارداعى سەلبەستىكتەردى كەڭەيتۋدى قالايدى، موناكو جۇڭگونىڭ كليمات وزگەرىسى سياقتى حالىقارالىق ىستەردە ساۋلەلەندىرگەن ماڭىزدى رولىن ايرىقشا القايدى، جۇڭگونىڭ كەلەر جىلى «ورگانيزمدەردىڭ الۋان تۇرلىلىگى شارتى»ن جاساسۋشى جاقتاردىڭ 15 - رەتكى ءماجىلىسىن ويداعىداي وتكىزۋىن قولداۋدى قالايدى، 2022 - جىلعى بەيجيڭ قىسقى وليمپياداسىن ءساتتى وتكىزۋىن قولدايدى ءارى وعان تىلەكتەستىك بىلدىرەدى، موناكو مەن جۇڭگونىڭ گۋمانيتارلىق اۋىس - ءتۇيىسىن ىلگەرىلەتىپ، ەكى ەل حالىقتارىنىڭ دوستىعىن ىلگەرىلەتۋدى قالايدى.
كەڭەستىڭ الدىندا، البەرەⅡحانزادا شي جينپيڭگە ارناپ سالتاناتتى قارسى سالۋ سالتىن وتكىزدى.
شي جينپيڭ مەن حانىمى پىڭ لييۋان اۆتوموبيلمەن پاتشا ورداسىنا بارعان كەزدە، البەرەⅡحانزادا مەن حانىمى الدىلارىنان شىعىپ قىزۋ قارسى الدى. اسكەري وركەستر جۇڭگو مەن موناكونىڭ مەملەكەت اندەرىن ورىندادى. ەكى ەلدىڭ مەملەكەت باسشىلارى قۇرمەت قاراۋىلىن بىرگە كوزدەن كەشىردى. قۇرمەت قاراۋىلىن كوزدەن كەشىرگەن سوڭ، ەكى ەلدىڭ مەملەكەت باسشىلارى جانە ولاردىڭ حانىمدارى سالتاناتتىق ساپتى تاماشالادى. شي جينپيڭ موناكونىڭ نەگىزگى مانساپتىلارىمەن قول الىستى، البەرەⅡحانزادا جۇڭگو جاقتان سەرىك بولىپ كەلگەن كىسىلەرمەن قول الىستى.
ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
