شينحۋا اگەنتتىگىنىڭ تىلشىلەرى ليۋ بيڭ، چي يچۋ
10 مىڭ توننالىق ءبيداي قامبالارى قاتار - قاتار تۇر، جوعارى دەڭگەيلى ءجىپ ءيىرۋ سەحتارىندا ماشينالاردىڭ گۇرىلدەگەن داۋىسى جەر جارادى، يمپورت ەتىلگەن مالداردى بولەكتەۋ، سويۋ ءىرى نىساندارى جەدەل اتقارىلدى... جىبەك جولى ەكونوميكالىق بەلدەۋى قۇرىلىسىنىڭ ىشكەرىلەي ىلگەرىلەۋىمەن جۋىرداعى جىلداردان بەرى شينجياڭنىڭ شەكارا وتكەل قالاسى − الاتاۋ ۋنيۆەرسال قورعامالى باجى رايونى ساياساتىنىڭ ابزالدىلىقتارىنا سۇيەنىپ، ەلىمىز بەن ورتا ازياداعى ەلدەردىڭ قامداۋ - قاجەتسىنۋىن ءوزارا تولىقتايتىن بايلىق كاسىپتەرى مەن سايكەستى دامۋدىڭ كومەسكى كۇشىن تەرەڭدەي ارشىپ، ۇن، ماي، ءجىپ، ەت سياقتى اۋىل شارۋاشىلىق ونىمدەرىن جىنتىكتەي مانەرلەۋ كاسىپورىندارىن ىرگە تەبەۋگە بەلسەنە تارتىپ، ”جىبەك جولى ەكونوميكالىق بەلدەۋى“ندەگى اۋىل شارۋاشىلىق ونىمدەرىن جىنتىكتەي مانەرلەۋدەگى ماڭىزدى بازاعا اينالدى.
الاتاۋ قالالىق پارتكومنىڭ ورىنباسار شۋجيى، ۋنيۆەرسال قورعامالى باجى رايونىن باسقارۋ كوميتەتىنىڭ مەڭگەرۋشىسى پي لۇيپيڭنىڭ تانىستىرۋىنشا، ”ءبىر بەلدەۋ، ءبىر جول“ باستاماسى العا قويىلعاننان كەيىن، الاتاۋ بۇرىن بولىپ كورمەگەن دامۋ ورايىنا ءدوپ كەلگەن. 2014 - جىلى 6 - ايدا الاتاۋ ۋنيۆەرسال قورعامالى باجى رايونى رەسمي وتكەلدى بەكىتىپ جۇمىس جۇرگىزگەن، قازىر يمپورت ەتىلگەن مۇناي - گاز، استىق، ماي، اۋىل شارۋاشىلىق قوسىمشا ونىمدەرى، مەتال، كەن ونىمدەرى، اعاش ماتەريالدارى، تۇتىنۋ بۇيىمدارى، ەلەكتروندىق ساۋدا تۇعىرى، تۇتاستاي يمپورت ەتىلگەن اۆتوكولىك كورمەسى سياقتى 6 ءىرى قامبالاۋ - ساتۋ تۇعىرى قالىپتاسقان، مۇنىڭ ىشىندە اۋىل شارۋاشىلىق قوسىمشا ونىمدەرىن جىنتىكتەي مانەرلەۋدىڭ دامۋى اناعۇرلىم كورنەكتىلەنە تۇسكەن.
2018 - جىلدىڭ سوڭىنا دەيىن الاتاۋ ۋنيۆەرسال قورعامالى باجى رايونى شانشي ايجۇي، حىبەي جينشاحى، جۇڭشين قۇرىلىسشىلىعى، جينمۋ عىلىم - تەحنيكا سياقتى جاسىل، ورگانيكالى اۋىل شارۋاشىلىق ونىمدەرىن يمپورت ەتۋمەن، وندىرۋمەن، ساتۋمەن شۇعىلداناتىن كوپتەگەن ءىرى كاسىپورىنداردى ءساتتى ەنگىزىپ، تۇتاس جىلدا مانەرلەگەن اۋىل شارۋاشىلىق قوسىمشا ونىمدەرىنىڭ جالپى ءونىم قۇنىن 165 ميلليون يۋانعا، ونەركاسىپتىڭ ارتقان قۇنىن 59 ميلليون 500 مىڭ يۋانعا جەتكىزدى.
ايجۇي چينجياڭ ازىق - تۇلىك شەكتى سەرىكتەستىگىنىڭ زاۆودىنا كىرگەنىمىزدە، ماشينالاردىڭ ۇن مانەرلەگەن داۋىسى ءبىر ءسات تە تولاستاماي، جۇمىسشىلار ءوندىرىس جەلىسىندە قاپ - قاپ ساپالى ۇندى تاسۋمەن قاربالاستاپ جاتىپتى. سەرىكتەستىكتىڭ ورىنباسار باس ديرەكتورى ماۋ يانبين بىلاي دەدى: ەگۋ ءتاسىلى باسقاشا بولعاندىقتان، قازاقستاننىڭ ءبيدايىنا ەگىن شارۋاشىلىق دارىلەرى، حيميالىق تىڭايتقىش ىستەتىلمەيدى دە، ءدامى جاقسى بولادى. 2016 - جىلى سەرىكتەستىگىمىز قازاقستاننىڭ سولتۇستىك قازاقستان وبلىسىندا استىق جيناۋ - قامبالاۋ بازاسىن قۇرىپ، جەرگىلىكتى ورىنداعى 30دان استام ەگىس الاڭى قوجايىندارىمەن، 5000 شارۋامەن تاپسىرىسقا قول قويىسىپ، جىلىنا 50 مىڭ توننا استىق جينادى، قامبالادى. ورتا ازيانىڭ اۋىل شارۋاشىلىق شيكىزاتتارىن وزگەرتىپ جىنتىكتەي مانەرلەۋدە الاتاۋ ۋنيۆەرسال قورعامالى باجى رايونى ساياسات جانە ءوڭىر ورنى ابزالدىلىعىنا يە، 2017 - جىلى سەرىكتەستىگىمىزدىڭ الاتاۋداعى ۇن زاۆودى رەسمي وندىرىسكە قوسىلدى، قازىر ونىمدەرىمىز شانشي مەن ونىڭ توڭىرەگىندەگى بازارلارعا مولىنان ساتىلادى.
الاتاۋ ۋنيۆەرسال قورعامالى باجى رايونىنىڭ اۋىل شارۋاشىلىق ونىمدەرىن جىنتىكتەي مانەرلەۋ كاسىبى توڭىرەكتەگى اۋدان، قالالارعا دا كەڭەيدى. ءتىلشىنىڭ الاتاۋ كەدەنىنەن ۇعىسۋىنشا، بيىل 3 - ايدىڭ 19 - كۇنى الاتاۋ يمپورت ەتىلگەن ەت تۇرلەرىن باقىلاۋ - باسقارۋ الاڭى كەدەن باس مەكەمەسىنىڭ تەكسەرىپ وتكىزىپ الۋىنان وتكەن، مۇنان كەيىن الاتاۋ قوي ەتىن جانە بايگە اتى، ەسەك سياقتى جىلقى تۋىستاس جانۋارلاردى يمپورت ەتىپ قانا قالماستان، سيىر ەتىن جانە سيىردى دا ەنگىزە الادى ەكەن.
بۇراتالا قالاسى تيانلاي مال شارۋاشىلىق سەرىكتەستىگىنىڭ باس ديرەكتورى ياڭ دۇڭلين تىلشىگە بىلاي دەدى: بۇل − مۇنان كەيىن شينجياڭنىڭ ەت تۇرلەرىن مانەرلەۋ كاسىپورىندارى ورتا ازيادان ءتىپتى دە كوپ سيىر ەتىن كىرگىزۋ ارقىلى ەل ءىشىنىڭ سۇرانىسىن قاناعاتتاندىرا الاتىندىعىن بىلدىرەدى، قازىر تيانلاي مال شارۋاشىلىق سەرىكتەستىگى قازاقستاننىڭ سويىس سيىر باعىمشىلىعى قوعامىمەن كەلىسىم جاساستى، ەندى جىلىنا 1000 توننا سيىر ەتىن يمپورت ەتىپ جىنتىكتەي مانەرلەيتىن بولادى.
پي لۇيپيڭ بىلاي دەدى: الاتاۋ ۋنيۆەرسال قورعامالى باجى رايونى مۇنان كەيىن ورگانيكالى اۋىل شارۋاشىلىق قوسىمشا ونىمدەرىن مانەرلەۋ كاسىبىنىڭ نەگىزدىك قۇرىلعى سايكەستى قۇرىلىسىن كەمەلدەندىرىپ، كاسىپتى ۇساق ازىق - تۇلىكتەر، كۇتىمدىك ازىق - تۇلىكتەر، تەز تۇتىنىلاتىن ازىق - تۇلىكتەر، ساپالى ەرمەك حايۋان جەمى سياقتى كاسىپ تىزبەگىنە كەڭەيۋگە جەتەكتەپ، ورگانيكالى ازىق - تۇلىك ونىمدەرىنىڭ ساپاسىن كەلۋ تەگىنەن تەكسەرۋ جۇيەسى قۇرىلىسىن ىلگەرىلەتىپ، ”جىبەك جولى ەكونوميكالىق بەلدەۋى“نىڭ ورگانيكالى ازىق - تۇلىك جاسىل ماركاسىن قالىپتاستىرادى.
(شينحۋا اگەنتتىگىنىڭ 3 - ايدىڭ 29 - كۇنى ۇرىمجىدەن بەرگەن حابارى)
