شينحۋا اگەنتتىگىنىڭ 4 - ايدىڭ 1 - كۇنى ۇرىمجىدەن بەرگەن حابارى (ءتىلشى گۋ يۇي). ءتىلشىنىڭ 4 - ايدىڭ 1 - كۇنى جۇڭگو مۇناي تارىم مۇنايلىعىنان ۇعىسۋىنا قاراعاندا، 1989 - جىلى تارىمدا مۇناي اشۋ باستالعاننان بەرگى 30 جىلدا تارىم مۇنايلىعىندا جيىنى ۇلكەن، ورتا كولەمدەگى 31 مۇناي - تابيعي گاز الابى بايقالىپ جانە انىقتالىپ، 27 ميلليون توننالىق ۇلكەن مۇناي - تابيعي گاز الابى قۇرىلعان، جالپى وندىرگەن مۇناي - تابيعي گاز ءونىم مولشەرىنىڭ بالاماسى 350 ميلليون توننادان اسىپ، ەلىمىزدىڭ ەنەرگيا حاۋىپسىزدىگىن قامتاماسىز ەتۋ، شينجياڭنىڭ قوعامدىق، ەكونوميكالىق دامۋىن جانە قوعام ورنىقتىلىعىن جەبەۋگە ماڭىزدى ۇلەس قوسقان.
ەلىمىزدىڭ باتىس بولىك وڭىرىندە تابيعي گاز بايلىعى مول، مولشەرمەن بۇكىل ەلىمىز تابيعي گاز جالپى بايلىعىنىڭ %60ىن يەلەيدى، اسىرەسە، شينجياڭنىڭ تارىم ويپاتىنداعى تابيعي گاز بايلىعىنىڭ مولشەرى بۇكىل ەلىمىزدەگى تابيعي گاز جالپى بايلىعىنىڭ %22ىن يەلەيدى، ەلىمىزدەگى ەڭ ۇلكەن مۇناي - تابيعي گاز بار ويپات. ايتسەدە، تارىم ويپاتىنىڭ جەر بەتى ورتاسى ناشار، جەر استى شارت - جاعدايى كۇردەلى، دۇنيە جۇزىندەگى مۇناي - تابيعي گاز بارلاۋ ەڭ قيىن وڭىرلەردىڭ ءبىرى دەپ قارالعان.
30 جىلدىڭ الدىندا، تارىمدا مۇناي اشۋ باستالدى. 30 جىلدان بەرى، تارىم مۇنايلىعىنىڭ مۇناي - تابيعي گاز ءونىم مولشەرىنىڭ بالاماسى ەڭ العاشىنداعى 34 مىڭ توننادان 2018 - جىلى 26 ميلليون 730 مىڭ تونناعا جەتتى. 2018 - جىلدىڭ سوڭىنا دەيىن، تارىم مۇنايلىعىنىڭ باتىستان شىعىسقا جەتكىزگەن گازىنىڭ جالپى مولشەرى 220 ميلليارد تەكشەمەتردەن استى، وڭتۇستىك شينجياڭداعى 5 ايماق - وبلىستى 30 نەشە ميلليارد تەكشە مەتر گازبەن قامدادى، وتانىمىزدىڭ باتىس بولىك شەكاراسىنان ەلىمىزدىڭ قۇرلىقتاعى ءۇشىنشى ۇلكەن مۇناي - تابيعي گاز الابىن جانە باتىستىڭ گازىن شىعىسقا جەتكىزۋدەگى نەگىزگى گاز كوزىن قۇرىپ، ەلىمىزدىڭ ەنەرگيا قۇرىلىمىن ساپالىلاندىرۋعا، تومەن كومىرتەكتى جاسىل دامۋعا ماڭىزدى ۇلەس قوستى.
