شينحۋا اگەنتتىگىنىڭ 4 - ايدىڭ 1 - كۇنى بەيجيڭنەن بەرگەن حابارى (ءتىلشى باي جيە). مەملەكەت ءتوراعاسى شي جينپيڭ 4 - ايدىڭ 1 - كۇنى حالىق سارايىندا ”ارداگەرلەر كەڭەسى“ ۋاكىلدەر ۇيىرمەسىندەگىلەرمەن كەزدەستى.
شي جينپيڭ بىلاي دەپ اتاپ كورسەتتى: دۇنيە ءجۇزى ءجۇز جىلدا بولا بەرمەيتىن زور وزگەرىس جاعدايىندا تۇر. حالىقارالىق سەلبەستىكتىڭ كەلەشەگى، الەمدىك سىن - سايىستاردىڭ شىعار جولى، ادامزات قوعامىنىڭ بولاشاعى ءتىپتى دە كوپ اڭعارلى قايراتكەرلەرگە وي سالۋدا. ءبىز ادامزاتتىڭ تاعدىرلاس ورتاق تۇلعاسى تانىمىن ورناتىپ، ادامزاتقا ورتاق جەر شارى مەكەنىمىزدى جاقسى گۇلدەندىرۋدى، ويداعىداي قورعاۋدى دارىپتەيمىز. ادامزاتتىڭ ۇزاق كەلەشەگى جونىنەن ءار ەل تۇگەلدەي جاۋاپكەرشىلىك ارقالاپ وتىر. جۇڭگو − دامۋ ۇستىندەگى ءىرى ەل، دەسەدە ءبىز وتەۋگە ءتيىستى حالىقارالىق جاۋاپكەرشىلىكتەن تايساقتامايمىز. جۇڭگو سەلبەسىپ تەڭ يگىلىككە كەنەلۋگە ۇمتىلىپ، ءوزىنىڭ دامۋىن جۇزەگە اسىرۋمەن بىرگە، قالىڭ دامۋ ۇستىندەگى ەلدەردىڭ دە بىرگە العا باسۋىنا كومەكتەسەدى. جۇڭگو باستان - اياق دۇرىس بورىش - مۇددە كوزقاراسىن ۇستانادى، ءوزى وتە كەدەي كەزدىڭ وزىندە دە افريكاداعى ەلدەرگە قالتقىسىز كومەك كورسەتتى. ءبىزدىڭ ”ءبىر بەلدەۋ، ءبىر جول“ سەلبەستىك باستاماسىن العا قويۋداعى ماقساتىمىز ءار ەلمەن ءوزارا تيىمدىلىك جەتكىزىپ، تەڭ يگىلىككە كەنەلۋدى جۇزەگە اسىرۋ.
شي جينپيڭ بىلاي دەپ اتاپ كورسەتتى: قازىر سىڭار جاقتىلىقتىڭ سوققىسى كوپتەگەن ەلدەرگە قىسىم جانە الاڭداۋشىلىق الا كەلدى. دەگەنمەن، حالىقارالىق قوعامدا كوپ جاقتىلىقتى قولداۋ ءۇنى ءالى دە جەتەكشى كۇش بولىپ وتىر. بۇرىننان بار كوپ جاقتىلىق ءۇردىسىن توقىراتپاي، قول جەتكىزگەن جەتىستىكتەردىڭ كەرى كەتپەۋىنە كەپىلدىك ەتۋ كەرەك. جۇڭگو حالىقارالىق يادرولىق قارۋ - جاراقتى كەڭەيتپەۋ جۇيەسى، كليمات وزگەرىسىنە توتەپ بەرۋدىڭ حالىقارالىق سەلبەستىگى سياقتى كوپ جاقتى كەڭەستىك تارتىپتەردى قورعاۋعا ۇزدىكسىز كۇش سالادى. جۇڭگو كوپ جاقتى قۇرىلىمدار رەفورماسىنا بۇرىننان اشىق پوزيتسيا ۇستانىپ كەلەدى، ءار ەلدىڭ بىرگە اقىلداسىپ، ورتاق مويىندالعان ولشەمدەر بويىنشا، ءار جاقتىڭ ۇيلەسىمدى ءجىتى قاداعالاپ وتىرعان ىستەرىمەن ساناسۋدى ءارى باسىم كوپ ساندى مەملەكەتتىڭ ورتاق مۇددەسىنە ۇيلەسۋدى قۋاتتايدى.
شي جينپيڭ بىلاي دەپ باسا دارىپتەدى: جۇڭگو العا قويعان ”ءبىر بەلدەۋ، ءبىر جول“ باستاماسى كوپ جاقتىلىققا جانە حالىقارالىق سەلبەستىككە قوسقان ماڭىزدى ۇلەس. 5 جىلدان استام ۋاقىتتان بەرى، جۇڭگو ءار ەلمەن بىرگە اقىلداسۋ، بىرگە قۇرۋ، بىرگە يگىلىكتەنۋ ۇستانىمىنان جازباي، سەلبەستىك وي جەلىسىندە ىزدەنىس جاساپ، سەلبەستىك ۇلگىسىندە جاڭالىق اشىپ، جاڭا جاعدايداعى كوپ جاقتىلىقتىڭ امالياتىن بايىتتى.
شي جينپيڭ بىلاي دەپ باسا دارىپتەدى: ءىرى ەلدەر قارىم - قاتىناسى الەمدىك ستراتەگيانىڭ ورنىقتىلىعىنا سايادى، ءىرى ەلدەر ەرەكشە جاۋاپكەرشىلىك ارقالاۋدا. جۇڭگو ءىرى ەلدەردىڭ سايكەسۋىن، سەلبەسۋىن ىلگەرىلەتۋگە كۇش سالادى، ءىرى ەلدەردىڭ تاتۋ - ءتاتتى بىرگە تۇرۋىن، قاقتىعىسپاۋىن، قارسىلاسپاۋىن، ءوزارا قۇرمەتتەۋىن، سەلبەسىپ تەڭ يگىلىككە كەنەلۋىن ءۇمىت ەتەدى. جۇڭگو - امەريكا قۇراما شتاتتارى قارىم - قاتىناسى بۇكىل دۇنيە جۇزىندەگى ەڭ ماڭىزدى ەكى جاقتى قارىم - قاتىناستاردىڭ ءبىرى. امەريكا قۇراما شتاتتارى جاقتىڭ جۇڭگو جاقپەن ءبىر باعىتتا ىلگەرىلەپ، الاۋىزدىقتى مەڭگەرىپ جانە تىزگىندەپ، سەلبەستىك ءورىسىن كەڭەيتىپ، اقىلداسۋدى، سەلبەسۋدى، ورنىقتىلىقتى نەگىزگى ارنا ەتكەن جۇڭگو - امەريكا قۇراما شتاتتارى قارىم - قاتىناسىن دامىتىپ، دۇنيە جۇزىنە اناعۇرلىم كوپ ورنىقتىلىق جانە بولجامدىلىق ۇسىنۋىن ءۇمىت ەتەمىز.
شي جينپيڭ بىلاي دەپ باسا دارىپتەدى: بيىل جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعى. جۇڭگو كوممۋنيستىك پارتياسىنىڭ باسشىلىعىنا تاباندى بولۋ جۇڭگو حالقىنىڭ تاريحي تاڭداۋى. 70 جىلدان بەرى، جۇڭگو كوممۋنيستىك پارتياسى جۇڭگو حالقىنا باسشىلىق ەتىپ ۇزدىكسىز كۇرەس جاساپ، ءار جاقتا تۇگەلدەي وراسان زور جەتىستىكتەرگە قول جەتكىزدى. وسىمەن بىرگە، ءبىز ءوزىمىزدىڭ دامۋ جولىمىزدى ۇزدىكسىز كەمەلدەندىرۋدەن جازبايمىز ءارى ”قوس 100 جىلدىق“ كۇرەس نىساناسىن جۇزەگە اسىرۋ ءۇشىن قاجىماي قۇلشىنىس جاسايمىز. جۇڭگونىڭ ءوزىنىڭ ءىسىن جاقسى ىستەگەندىگى، دۇنيە ءجۇزى جونىنەن ۇلەس قوسقاندىق ەسەپتەلەدى.
”ارداگەرلەر كەڭەسى“نىڭ ءتوراعاسى، يرلانديانىڭ بۇرىنعى زۇڭتۇڭى روبينسون، ”ارداگەرلەر كەڭەسى“نىڭ ورىنباسار ءتوراعاسى، بىرلەسكەن مەملەكەتتەر ۇيىمىنىڭ بۇرىنعى باس حاتشىسى، بو - اۋ ازيا تالقى مىنبەرىنىڭ القا باستىعى پان كيمۋن، مەكسيكانىڭ بۇرىنعى زۇڭتۇڭى زەديللو ”ارداگەرلەر كەڭەسى“ ۋاكىلدەر ۇيىرمەسى اتىنان ىلگەرىندى - كەيىندى ءسوز سويلەدى. ولار الدىمەن جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن جانە جۇڭگونىڭ ەكونوميكاسىنىڭ، قوعامىنىڭ دامۋى قول جەتكىزگەن وراسان زور جەتىستىكتەردى قۇتتىقتاپ، جۇڭگو جاقتىڭ قورشاعان ورتانى قورعاۋ، كەدەيلىكتەن ارىلتۋ جانە ۇلت قىزمەتتەرىن جوعارى باعالادى. ولار مىنالاردى ءبىلدىردى: كوپ جاقتىلىق سىن - سايىسقا ءدوپ كەلگەن قاتاڭ ساتتە، جۇڭگو جاۋاپكەرشىلىك ارقالايتىن ورەلى رول اتقارۋدا. جۇڭگو باستان - اياق «بىرلەسكەن مەملەكەتتەر ۇيىمى ۋستاۆى»نىڭ نەگىزگى ماقساتى مەن پرينسيبىنە تاباندى بولىپ، افريكانىڭ بەيبىتشىلىك جانە دامۋ ىستەرىنە بەلسەنە كومەكتەستى. ءتوراعا شي جينپيڭنىڭ حالىقارالىق ورتالارداعى ءبىر قىدىرۋ ماڭىزدى سوزدەرى حالىقارالىق قوعامعا بەلسەندى ينفورماتسيا تاراتتى. ءبىز بىرلەسكەن مەملەكەتتەر ۇيىمىن ۇيتقى ەتكەن كوپ جاقتى جۇيەنى باتىل قورعاپ، حالىقارالىق جانە وڭىرلىك حاۋىپسىزدىك، كليمات وزگەرىسىنە توتەپ بەرۋ سياقتى سالالارداعى كوپ جاقتى سەلبەستىكتى كۇشەيتۋىمىز كەرەك، جۇڭگونىڭ باسشىلىق رولدى ۇزدىكسىز ساۋلەلەندىرۋىن كۇتۋدەمىز.
ياڭ جيەچى، ۋاڭ ي قاتارلىلار كەزدەسۋگە قاتىناستى.
”ارداگەرلەر كەڭەسى“ وڭتۇستىك افريكانىڭ بۇرىنعى زۇڭتۇڭى ماندەلانىڭ باستاماسىمەن 2007 - جىلى 7 - ايدا قۇرىلعان، ءار ەلدىڭ بۇرىنعى ساياسي قايراتكەرلەرى مەن ماڭىزدى حالىقارالىق ۇيىمداردىڭ بۇرىنعى جاۋاپتىلارىنان ۇيىمداسقان، ونىڭ نەگىزگى ماقساتى كەڭەسۋدى ىلگەرىلەتىپ، قاقتىعىس، كەدەيلىك، اۋرۋ - سىرقاۋ سياقتى الەمدىك ماسەلەلەردى شەشۋ.
