تيانشان تورابى   ›   جاڭالىقتار   ›   ۇعىسۋ، تيىمدىلىك جاساۋ، توعىستىرۋ

ايشامنىڭ كوكتەمدەگى باقىتتى كۇندەرى

  شينجياڭ گازەتىنىڭ جالپىلىق اقپارات قۇرالى تىلشىلەرى ليۋ شياڭ، چين مەيحۋا، لۇي يحان، سۋ شۋانميڭ

  4 - ايدىڭ 10 - كۇنى اۆتونوميالى رايوندىق ساناق مەكەمەسىىنەن ”ۇعىسۋ، تيىمدىلىك جاساۋ، توعىستىرۋ“ بويىنشا چىنلاۋچي قىستاعىنا تۇسكەن قىزمەت اترەتىنىڭ مۇشەلەرى ايشام ابدۇليميتكە كوكتەمگى ەگىسكە پايدالاناتىن اۋىل شارۋاشىلىق ءوندىرىسىنىڭ قۇرال - جابدىقتارىن اپارىپ بەردى.  سۋرەتتى گازەتىمىزدىڭ جالپىلىق اقپارات قۇرالىنىڭ ءتىلشىسى چين مەيحۋا تۇسىرگەن

  4 - ايدا بايتاق دالاعا كوكتەم كەلدى. 4 - ايدىڭ 10 - كۇنى تاڭەرتەڭ، شۋاقتى كۇن نۇرى بوزامىق تۇماندى جارىپ، مارالباسى اۋدانى اقساقمارال اۋىلى چىنلاۋچي قىستاعىن ۇيقىدان وياتتى. اۋىل اراسىنداعى جولدىڭ ەكى جاعىنداعى اعاشتار كوگەرە باستاعان، قاز - قاتار بەيقۇت ۇيلەر العاشقى كوكتەمنىڭ جاسىلىمەن كومكەرىلىپ، بۇكىل قىستاق سالعان سۋرەتتەي كوركىمەن كوز تارتىپ تۇر.

  اشىق الاڭقىداعى اتىز باسىندا قىستاق تۇرعىنى ايشام ابدۇليميت كەتپەنىن قۇلاشتاي سەرمەپ، ەندى تۇقىم سەبىلەتىن ماقتا اتىزىن تەگىستەۋدە.

  بۇل كۇندى ايشام كوكىرەك كەرنەگەن قۋانىشپەن اسىعا كۇتكەن ەدى. ويتكەنى بۇل رەتكى ماقتانىڭ تۇقىمى اۆتونوميالى رايوندىق ساناق مەكەمەسىنىڭ چىنلاۋچي قىستاعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ قىستاق تۇرعىندارى ءۇشىن ارنايى دايىنداعان ساپالى سورتتى تۇقىمى بولاتىن.

  بىرنەشە جىلدىڭ الدىندا، ايشام ماقتا ەگۋگە تىم پەيىلدى ەمەس بولاتىن. ”ماقتانى باياعىدان ەگىپ كەلەمىن عوي، بۇرىن ءار جىلعى ءتۇسىمى دەگەندەي ەمەس ەدى، ءبىر مۋدان تاباتىنىم 300 يۋانعا دا جەتپەيتىن“. ءبىراز ىڭعايسىزدانعان ول ءوز - ءوزىن اجۋالاي كۇلىپ: ”قىزمەت اترەتى كەلگەن سوڭ اۋىل شارۋاشىلىعىنىڭ بىرنەشە مامانىن شاقىرىپ، بىزگە ساباق سويلەگەندە بارىپ ءبىلدىم عوي، ماقتانىڭ تۇقىمىن سەپكەن سوڭ بىرنەشە رەت سۋارىپ، قاراماي تاستاپ قوياتىن ەگۋ تاسىلىنەن قايتىپ جىرعاعان ءونىم الۋعا بولسىن!“

  ءىسىن ىعىنا كەلتىرە الماعان سوڭ، ايشام ءبىر مەزەت قىستاقتاعى ەڭ تومەنگى تۇرمىسى قامتاماسىز ەتىلەتىندەردىڭ بىرىنە اينالدى.

  اۋىل شارۋاشىلىعى ماماندارىنىڭ جەتەكشىلىگىندە، ايشام ماقتانى عىلمي جولمەن باپتاپ، مۋلىق ءتۇسىمى ايتارلىقتاي جوعارىلادى. ول قول تەلەفونىنان ەسەپتەۋىشتى اشىپ، جاتىق قيمىلىمەن باسىپ - باسىپ جىبەرگەندە، ەكراننان ”21320“ دەگەن سان شىعا كەلدى. ”بىلتىر مۋلىق ءتۇسىمى ەڭ از كەزدەگىدەن 80 − 100 كيلوگرام ارتىق بولدى، تازا تابىس جيىنى 20 مىڭ يۋاننان استى“، - دەدى ول.

  بيىل عىلمي جولمەن ەگىن ەگۋ تەحنيكاسىن يگەرگەن ايشامنىڭ قولىنا ماقتانىڭ ساپالى سورتتى تۇقىمى تۇسكەن سوڭ، جۇمىسقا ىنتاسى تىپتەن كۇشەيە ءتۇستى.

  جۇمىس ارەدىگىندە، ول تۇرعان ورنىندا دەم الىپ، بىردەڭە كۇتكەندەي جانارىن الىسقا قادادى.

  ”شەشە، ءسىز ناعىپ وسىنشاما ەرتە كەلىپ العانسىز؟“ دەگەن داۋىستان ايشام شاشىراعان ويىن جيناپ، الدىنا قارادى. تاقتانىڭ قىرىندا ەڭسەگەي بويلى سوم دەنەلى جاس جىگىت وعان قاراي شاپشاڭ ءجۇرىپ كەلەدى ەكەن.

  ”ماعان بەر، ماعان بەر!“ جاس جىگىت ايشامنىڭ قولىنان كەتپەندى الا سالىپ، اپىل - عۇپىل سەرمەي جونەلدى: ”قىزمەت اترەتى ماقتا تۇقىمىن الىپ قازىر جەتەدى، ءسىز ءتىپتى اسىعىپ كەتىپسىز عوي“. ايشام ۇلىنىڭ كەيىگەنىن ەلەمەي، كۇلىپ جىبەردى.

  ايشامنىڭ ۇلى نۇراحىمەت ابىلەت بۇرىن قىستاقتا اتى شىققان جالقاۋ بولاتىن، ۇزاقتى كۇن ساندالىپ بوس جۇرەتىن. ايەلى ونىڭ مۇنىسىنا شىداماي، اجىراسىپ تىنىم تاپقان.

  ”وسىنشا جاسقا كەلگەن ازامات بولدى، وعان مەنىڭ ءسوزىم وتپەدى، قاراداي جىنىككەننەن باسقا مەندە باسقا لاج قالمادى“، - دەيدى ۇلىنىڭ وتكەنىن اۋىزعا العان ايشامنىڭ قاباعى ءتۇيىلىپ.

  بۇرىلىس 2017 - جىلى بولدى. سول جىلى اۆتونوميالى رايوندىق ساناق مەكەمەسىنىڭ ”ۇعىسۋ، تيىمدىلىك جاساۋ، توعىستىرۋ“ قىزمەت اترەتى چىنلاۋچي قىستاعىنا كەلىپ تۇردى، قىزمەت اترەتىنىڭ ورىنباسار باستىعى دىڭ جىحۋا ايشام وتباسىن كوتەرمەگە العان كادر بولدى.

  ”مەنىڭ قولتىعىمنان دەمەگەن دىڭ اعام“، - دەدى نۇراحىمەت تەبىرەنە، - ”باسقالاردىڭ ءبارى مەنى جالقاۋ، ايەلىنەن دە اجىراسقان، ءومىرى ەندى وسىمەن كەتتى دەستى. ال، ول ۇنەمى مەنىمەن سىرلاسىپ، مەنى ىنتالاندىرىپ وتىردى، اۋەلى، مەنى شارۋالاردىڭ كەشكى مەكتەبىنە مەملەكەتتە ءبىر تۇتاس قولدانىلاتىن ءتىل - جازۋ ۇيرەنۋگە جىبەردى“.

  ەڭبەگى باردىڭ ونبەگى بار دەمەكشى، دىڭ جىحۋانىڭ ىقپالىندا نۇراحىمەت ءوزىنىڭ وتكەندەگى كەيپىنە قوش ايتۋدى ۇيعاردى. 2018 - جىلى نۇراحىمەت داڭقپەن جۇڭگو كوممۋنيستىك پارتياسىنا مۇشە بولىپ، قىستاقتىڭ اماندىق قورعاۋعا جاۋاپتى مەڭگەرۋشىسى بولىپ تاعايىندالدى.

  ۇلىنىڭ تۇرمىسى دۇرىس ارناعا ءتۇسىپ، رۋحاني بەت - بەينەسىندە وراسان زور وزگەرىس بولعانىن كورگەن ايشام ىشتەي قاتتى قۋاندى، ول ۇلىنا ”الگى ءىستى“ ايتاتىن ۋاقىتىم جەتتى دەپ ويلادى.

  ”ونىمەن ەندى حابارلاسپايسىڭ با؟“ بيىل جىل باسىنداعى شەشەسىنىڭ سىر تارتقان ءسوزى نۇراحىمەتكە باتىلدىق بەرىپ، ول ايەلىمەن قايتا وتاسۋدى ۇيعاردى. تەلەفون جالعانعاندا، ءبىراز قوبالجىعان نۇراحىمەت: ”مەن قازىر پارتيا مۇشەسى بولدىم، اماندىق قورعاۋعا جاۋاپتى مەڭگەرۋشى دە بولدىم، بۇرىنعىداي كۇندە ويناپ ءجۇرۋدى قويدىم، سەنبەسەڭ قىستاققا كەلىپ ءوز كوزىڭىمەن كور، ەلدەن سۇرا...“، - دەدى جىتىرمەلەتە.

  3 - ايدىڭ سوڭىندا، نۇراحىمەت بۇرىنعى ايەلىمەن قايتا ۇيلەندى.

  اتىزعا جاقىن جەرگە ماقتا تۇقىمى تولتىرا تيەلگەن جۇك اۆتوموبيلى تاياپ كەلەدى، ونىڭ ارتىنان تۇقىم سەۋىپ، جارعاق جاباتىن ماشينا ىلەسىپتى. موتوردىڭ داۋىسىن ەستىگەن قىستاق تۇرعىندارى قۇرال - جابدىقتارىن سايلاپ، ۇيلەرىنەن شىعىپ، اتىز باسىنا جينالدى.

  ”شەشە، مەن بارىپ تۇقىم تۇسىرۋگە كومەكتەسەيىن“.

  ”بارا عوي، كوبىرەك ىستە!“

  ”جارايدى، الاڭسىز بولىڭىز!“

      ماقتانىڭ ءتۇيىر - ءتۇيىر ساپالى سورتتى تۇقىمدارى، ءساتتى وزگەرگەن ۇلى، باقىتتى، ىرگەسى ءبۇتىن شاڭىراعى... التىن كۇز 9 - ايدى كۇتپەي - اق وسىناۋ جايناعان كوكتەمنىڭ وزىندە ايشام تولىق باقىتقا كەنەلدى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورابى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

بىزبەن بايلانىس جارناما قىزمەتى لەبىز قالدىرۋ ءبىز تۋرالى