وسى اپتادا ۇرىمجىدە كۇن اشىق بولىپ، ەڭ جوعارى اۋا تەمپەراتۋرا 20 سەلتسي گرادۋستان جوعارى بولادى
سوڭعى مەزگىلدە شىعىس وڭتۇستىك جەلى ءجيى سوقتى، ءۇرىمجىنىڭ اۋا تەمپەراتۋراسى بىرتىندەپ جوعارىلادى، دۇيسەنبى كۇنى باستى قالا رايونىندا كۇن اشىق بولدى. مەجەمەن سارسەنبى كۇنى ورتالىق قالادا وتكىنشى جاڭبىر جاۋىپ، اۋا تەمپەراتۋرا تومەندەيدى. بەيسەنبىدەن باستاپ، كۇن قايتا اشىلىپ، اۋا تەمپەراتۋرا دا بىرتىندەپ جوعارىلايدى.
الدىڭعى اپتادا جەل ەندى باسىلا بەرگەندە، وسى اپتادا شىعىس وڭتۇستىك جەلى «امانداسا كەلەدى». قالالىق اۋا رايى ستانسياسى دۇيسەنبى كۇنى تۇستەن بۇرىن بوراننىڭ سارى ءتۇستى ساقتىق سيگنالىن جاريالادى، سول كۇنى كۇندىز، باستى قالا رايونىندا جەل كۇشى 6 دا 7 بال بولدى.
شىعىس وڭتۇستىك جەلى ىستىق قۇرعاق اۋا الا كەلەتىندىكتەن، اۋا تەمپەراتۋرا كۇرت جوعارىلادى. قالالىق اۋا رايى ستانسياسىنىڭ سىناعىنا نەگىزدەلگەندە، سول كۇنى باستى قالا رايونىندا ەڭ جوعارى تەمپەراتۋرا 25.7 سەلتسي گرادۋس بولىپ، بيىل كوكتەمنەن بەرگى ەڭ ىستىق كۇن بولدى.
قالانىڭ سولتۇستىگىندە، شىعىس وڭتۇستىك جەلىنىڭ جاردەمى بولماسا دا، جەر ءتۇزىلىسى ءبىرشاما الاسا، ءشول جازيراعا جاقىن بولعاندىقتان، اۋا تەمپەراتۋرا كۇرت جوعارىلادى. ميدۇڭ رايونىنىڭ ەڭ جوعارى اۋا تەمپەراتۋراسى 28.9 سەلتسي گرادۋس بولدى، چيڭگىداحۋ اۋىلىندا اۋا تەمپەراتۋرا 30.6 سەلتسي گرادۋستى كورسەتىپ، ورتالىق قالاداعى ەڭ ىستىق جەر بولدى.
قالالىق اۋا رايى ستانسياسىنىڭ باس مالىمدەمەشىسى ۋاڭ جيان بىلاي دەپ تانىستىردى: «سوڭعى مەزگىلدە ورتالىق قالانىڭ تۇستىگى مەن تەرىستىگىنىڭ اۋا تەمپەراتۋرا پارقى كورنەكتى بولدى، ونىڭ ۇستىنە وڭتۇستىگى بيىك، سولتۇستىگى الاسا جەر بەدەر ەرەكشەلىگى، شىعىس وڭتۇستىك جەلىنە تاماشا وراي جاراتتى. 4-ايدىڭ 9-كۇنى، 4-ايدىڭ 13-كۇنى جانە 4-ايدىڭ 15-كۇنى، ورتالىق قالادا ارت-ارتىنان ءۇش رەت شىعىس وڭتۇستىك جەلى سوقتى، تەمپەراتۋرا دا كۇرت جوعارىلادى، ورتاشا اۋا تەمپەراتۋرا جىلداعىدان كورنەكتى جوعارى بولدى».
اۋا تەمپەراتۋرانىڭ جوعارىلاۋىنا ىلەسىپ، كوپتەگەن قالا تۇرعىندارى قىسقا جەڭ كيىمدەرىن كيدى. دەسەدە، سارسەنبي كۇنى، سۋىق اعىس اۋا تەمپەراتۋرانىڭ جوعارىلاۋ اياق الىسىن باياۋلاتادى. قالالىق اۋا رايى ستانسياسىنىڭ الدىن الا مالىمەتىنە نەگىزدەلگەندە، سارسەنبي كۇنى قالا رايونىندا وتكىنشى جاڭبىر جاۋادى، كۇندىز ەڭ جوعارى اۋا تەمپەراتۋرا 15 سەلتسي گرادۋس شاماسىندا بولادى، تۇندە 8 سەلتسي گرادۋس بولادى، اۋا تەمپەراتۋرا كورنەكتى تومەندەيدى، قالا تۇرعىندارى قالىڭ كيىنۋگە كوڭىل ءبولۋ كەرەك.
مەجەمەن بەيسەنبىدەن باستاپ اپتانىڭ سوڭىنا دەيىن، ورتالىق قالادا كۇن اشىق بولادى، اۋا تەمپەراتۋرا بىرتىندەپ جوعارىلايدى، باستى قالا رايونىندا ەڭ جوعارى اۋا تەمپەراتۋرا 20 سەلتسي گرادۋستان جوعارى بولادى.
