تيانشان تورابى   ›   جاڭالىقتار   ›   سپورت الەمى

جۇڭگو ساداق مەكەنىندەگى التىن مەدال ارمانىنا تالپىنعان ادام

شينحۋا اگەنتتىگىنىڭ تىلشىلەرى دۋان مينفۋ، گۋ يۇي

  4 - ايداعى كوكتەم اسەم تۇسكە ەنگەن، تيانشاننىڭ تۇستىگى مەن تەرىستىگىندە ورىك گۇلىنىڭ ءيىسى اڭقيدى. ىلە وزەنى بويىنداعى شاپشال سىبە اۆتونوميالى اۋدانىندا كوكتەم جەلىنەن ءسال شىتقىلدىق ءبىلىنىپ تۇر، اشىق اسپان، اقشا بۇلت استىندا، دوڭگەلەكتى ورىندىققا وتىرعان ءبىر ادام ساداق ۇستاۋ، ادىرنا تارتۋ، نىساناعا الۋ، جەبە اتۋ سياقتى بارلىق قيمىلدى قالت جىبەرمەي ورىنداۋدا.

  ونىڭ اتى ي شۋەكۇي، بيىل 47 جاستا، شينجياڭ مۇگەدەك ساداقشىلار قۇراماسىنىڭ مۇشەسى. بالا كەزىندە توسىننان جابىسقان سىرقاتتان ي شۋەكۇي دوڭگەلەكتى ورىندىقتا وتىراتىن بولىپ قالادى، الايدا ول قولىنا ساداق ۇستاپ، الىستى نىساناعا الۋدى تاڭدايدى. 2001 - جىلى قۇراماعا قوسىلعان ول سول كەزدە قۇراماداعى ەڭ جاس مۇشە بولاتىن، قازىرگى تاڭدا قۇراماداعى ۇلكەن اعايعا اينالدى؛ 47 جاس باسەكە سپورتىندا ”جاسامىس“ كەزەڭ ەسەپتەلەدى، الايدا ي شۋەكۇي ارمان قۋۋ اياق الىسىن توقتاتپايدى.

  2007 - جىلى يۇنناننىڭ كۇنميڭ قالاسىندا وتكىزىلگەن مەملەكەتتىك مۇگەدەكتەر سپورت جارىسىندا ي شۋەكۇي 288 شەڭبەرلىك ءنومىر ناتيجەسىمەن باسقا دا 2 سپورتشىمەن قاتار ءبىرىنشى ورىنعا كوتەرىلسەدە، ەڭ سوڭىندا 10 شەڭبەرلىك ءنومىر پارقىمەن التىن مەدالدان قۇر قالادى. وسىدان كەيىن، التىن مەدال الۋ ارمانى ي شۋەكۇيدىڭ كوڭىلىنە ءتىپتى دە تەرەڭ ورنايدى.

  ”شاپشال اۋدانى’جۇڭگونىڭ ساداق مەكەنى‘ دەپ اتالادى، مەن كىشكەنە كەزىمنەن ساداق تارتۋعا قىزىعاتىنمىن، ساداق تارتۋدا سارى سەنترگە دارىتا الساڭ، جارىستا التىن مەدال الا الاسىڭ!“ ي شۋەكۇي 2007 - جىلى العان ءبىر قولا مەدالمەن تالپىنىسىن دوعارىپ قويعان جوق، قايتا بۇل قولا مەدال ونىڭ التىن مەدال ارمانىنىڭ تاعى ءبىر باستاماسىنا اينالادى.

  ي شۋەكۇي ءار كۇنى جاتتىعۋ الاڭىنا تاڭ سارىدە كەلىپ، ءبىر كۇنگى تەحنيكالىق جانە دەنە قۋاتى جاتتىعۋىن باستايدى، ادىرنا تارتۋ، جەبە اتۋ... ەڭ نەگىزدىك وسى داعدىلى جاتتىعۋلاردى 20 جىلعا تاياۋ ”ساداق تارتۋ ستاجى“ بار ي شۋەكۇي بار زەيىنىن سالىپ، تيتتەي دە بوساڭسىماي ىستەيدى.

  ”ءبىزدىڭ كومانداداعى بارلىق مۇشەلەر وتە قاجىرلى، ساداق تارتۋدىڭ تۇراقتىلىعىن ساقتاۋ ءۇشىن، ولار وتە كوپ ەڭبەك ەتتى، سان، يىق كۇشىن تولىق ىسكە قوسۋ ارقىلى ساداق تارتقان كەزدەگى جاعدايدىڭ تۇراقتى بولۋىنا كەپىلدىك ەتەمىز“. جاتتىقتىرۋشى ۋاڭ يانحۇڭ ي شۋەكۇيدىڭ جاعاسىن اشقاندا، سول جاق يىعىنداعى كوگەرىپ، ءىسىپ كەتكەن جەرلەر ايقىن كورىندى، ونىڭ تەز ارادا قالپىنا كەلۋىنە كومەكتەسۋ ءۇشىن، ۋاڭ يانحۇڭ ي شۋەكۇيدىڭ بۇلشىق ەتىن ۋقالادى ءارى لوڭقا قويۋ سياقتى جۇڭگوشا ەمدەۋ ءادىسىن قوسىمشا قولداندى.

  جارىسقا دايىندالۋ كەزىندە، ي شۋەكۇيدىڭ ءار كۇنگى جاتتىعۋ مولشەرى 400 جەبەدەن اسادى، ءار رەت ءبىر جولعى ساداق تارتۋ مىندەتىن ورىنداپ بولعاننان كەيىن، ەلەكترلى دوڭگەلەكتى ورىندىعىمەن 70 مەتر الىستاعى جەبە تۇسكەن جەردەن جەبەنى الىپ كەلەدى. ويتكەنى تومەنگى دەنەسىنىڭ كۇشى ءالسىز بولعاندىقتان، جەبە تارتقاندا دەنە قۋاتى جەتپەي، دەنەسى قالتىراپ كەتەتىن، ءبىراق ي شۋەكۇي بۇعان بولا جاسىماي، ۇنەمى كوڭىلدى جۇرەدى: ”قازىرگى جاتتىعۋ شارت - جاعدايى كوپ جاقسى، بۇرىندارى جاتتىعۋ الاڭىن ءشوپ باسىپ جاتاتىن، نىساناعا دارىماي قالسا، جەبەنى ءشوپ اراسىنان ىزدەپ اۋرە - سارساڭعا ءتۇسۋشى ەدىك“.

  قازىرگى تاڭدا، جاتتىعۋ بارىسىنداعى ماڭداي تەرى، شارشاۋدان تۋىنداعان اۋىرسىنۋ ي شۋەكۇيدىڭ كوڭىلىندە ونىڭ ساداق تارتۋ ومىرىندەگى ءبىر ەلەس قانا بولىپ قالعان. ال ول ءار رەتكى ۇلكەن جارىس تاياعاندا، التىن مەدال الۋدى ارماندايدى.

 (شينحۋا اگەنتتىگىنىڭ 4 - ايدىڭ 8 - كۇنى ۇرىمجىدەن بەرگەن حابارى)

رەداكتور باعامى 

  نىساناعا تيگەن ءسات − ءبىر جەبەنىڭ شىرقاۋ شەگىنە جەتكەن ءساتى. وسى ساتتەر تالاي جىلعى ماڭداي تەردىڭ، بەينەتتىڭ، جۇرەك قاننىڭ بوداۋىنا كەلگەن. دوڭگەلەكتى ورىندىققا وتىرعان ي شۋەكۇي وسى ءسات ءۇشىن، قالىپتى ادامداردان دا اناعۇرلىم كوپ جاپالى بارىستى باستان كەشىردى. ايتسە دە ”ساداق تارتۋدا سارى سەنترگە دارىتساڭ، التىن مەدال الا الاسىڭ“ دەگەن جالىندى دا اسقاق ىنتانىڭ دەمەۋىندە ي شۋەكۇي ءوزىن جەبەمەن ساباقتاستىرىپ، الىس نىساناعا قاراي بارىن سالىپ، باتىلدىقپەن العا ىلگەرىلەۋدە. وسىنداي اسىل رۋح باردا ەڭ سوڭىندا التىن مەدال الۋ - الماۋ، ارينە، ماڭىزدى ەمەس، ويتكەنى ءار كۇنگى ارماندى قانات ەتىپ، اسەمدىككە ۇمتىلعان ارمانعا قۇلاش سەرمەۋشىلەردىڭ بارلىعى ومىردەگى مىقتىلار ەسەپتەلمەك.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورابى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.