شينحۋا اگەنتتىگىنىڭ 4 - ايدىڭ 21 - كۇنى بەيجيڭنەن بەرگەن حابارى. تاياۋدا مەملەكەت ءتوراعاسى شي جينپيڭ امەريكا قۇراما شتاتتارى يلينوس شتاتى نيلەس - نورس ورتا مەكتەبىنىڭ وقۋشىلارىنا جاۋاپ حات جازىپ، وقۋشىلاردى جۇڭگو - امەريكا قۇراما شتاتتارى حالىقتارى دوستىعىن نىعايتۋعا ۇلەس قوسۋعا جىگەرلەندىردى. وسىنىڭ الدىندا، نيلەس - نورس ورتا مەكتەبىنىڭ جۇڭگو ءتىلى كلاسىنداعى 40تان استام وقۋشى جۇڭگو تىلىندە شي جينپيڭگە حات جازىپ، شي جينپيڭنىڭ قىزمەتىن، تۇرمىسىن جانە جەكە اۋەسىن سۇراستىرىپ، وزدەرىنىڭ جۇڭگو ءتىلىن ۇيرەنىپ جاتقاندىقتارىن، جۇڭگونىڭ ءتىل - جازۋىن، مۋزيكاسىن جانە جۇڭگو تاعامدارىن ۇناتاتىندىقتارىن، وراتى كەلگەندە، جۇڭگونى ەكسكۋرسيالاپ ساپارلاعىسى كەلەتىندىكتەرىن بىلدىرگەن بولاتىن.
شي جينپيڭ نيلەس - نورس ورتا مەكتەبىنىڭ وقۋشىلارىنا جازعان جاۋاپ حاتىندا مىنالاردى ءبىلدىردى: حات جازعاندارىڭا راقىمەت، مەن سەندەردىڭ جازعان حاتتارىڭنان جۇڭگو تىلىنە دەگەن اۋەستەرىڭدى جانە جۇڭحۋا مادەنيەتىنە دەگەن قىزىعۋشىلىقتارىڭدى سەزىندىم. جۇڭگو ءتىلىن ۇيرەنۋ ارقىلى جۇڭگونى اناعۇرلىم تۇسىنۋگە، ءتىپتى دە كوپ جۇڭگولىق دوستارمەن تانىسۋعا بولادى، دۇنيە ءجۇزىنىڭ ءارقايسى ەلدەرىنەن جۇڭگو تىلىندە سويلەيتىن كوپتەگەن دوستارمەن تانىسۋعا دا بولادى. سەندەردىڭ حانزۋشا جازۋلارىڭ وتە رەتتى، قولدانعان سوزدەرىڭ ولشەمدى ەكەن، ”وتە كەرەمەت“! سەندەردىڭ ۇزبەي ”قايراتتانىپ“، جۇڭگو ءتىلىن ۇيرەنۋدە ءتىپتى دە زور ىلگەرىلەۋشىلىككە قول جەتكىزۋلەرىڭدى ءۇمىت ەتەمىن. مەن كوپ رەت امەريكا قۇراما شتاتتارىندا ساپاردا بولدىم، ول جەردىڭ كوركەم كورىنىسى، باۋىرمال حالقى، كوپ نەگىزدى مادەنيەتى ماعان تەرەڭ اسەر قالدىردى، امەريكاقۇراما شتاتتارىنداعى جاس دوستاردى قامتىعان كوپتەگەن امەريكا قۇراما شتاتتارىندىق دوستار دا بار. مەنىڭ قىزمەتىم − حالىق ءۇشىن قىزمەت ىستەۋ، قاتتى شارشاسام دا، وتە كوڭىلدى جۇرەمىن. مەن فيلوسوفيا، تاريح، ادەبيەت، مادەنيەت، مۋزيكا، دەنە تاربيە قاتارلىلاردىڭ بارلىعىنا توتەنشە قىزىعامىن، مەنىڭ كوپتەگەن اۋەستەرىم ورتا مەكتەپتەگى كەزىمدە قالىپتاسقان، قازىرگە دەيىن ساقتاپ كەلەمىن. جاس ۇرپاقتار − جۇڭگو - امەريكا قۇراما شتاتتارى دوستىعىنىڭ بولاشاعى. ساباقتاستاردىڭ جالىندى جاستىقتارىن قاستەرلەپ، قۇلشىنا ۇيرەنىپ، جۇڭگو - امەريكا قۇراما شتاتتارى حالىقتارى دوستىعىن نىعايتۋعا ۇلەس قوسۋلارىن ءۇمىت ەتەمىن. مىڭ ەستىگەننەن ءبىر كورگەن ارتىق. وراي بولعاندا جۇڭگونى كورىپ قايتۋلارىڭدى قارسى الامىن.
شي جينپيڭنىڭ جاۋاپ حاتى نيلەس - نورس ورتا مەكتەبىندە قىزۋ اڭىس قوزعادى. وقىتۋشى - وقۋشىلار مىنالاردى ءبىلدىردى: بۇل جاۋاپ حاتتان ءتوراعا شي جينپيڭنىڭ جۇرتقا جاناسىمدى، مەيرىمدى دە باۋىرمال ەكەنىن سەزىندىك، ءتوراعا شي جينپيڭنىڭ جۇڭگو - امەريكا قۇراما شتاتتارى جاستارى مەن جاسوسپىرىمدەرىنە كوڭىل ءبولىپ، قامقورلىق جاساۋى بارلىق وقىتۋشى - وقۋشىلاردى شىنايى ىقىلاسقا بولەپ، ايرىقشا تەبىرەنتتى؛ ءتوراعا شي جينپيڭنىڭ حاتى كوپتەگەن جەرگىلىكتى وقۋشىلاردى جۇڭگو ءتىلىن ۇيرەنۋگە، جۇڭگو مادەنيەتىن تۇسىنۋگە، سونىمەن قاتار جۇڭگو - امەريكا قۇراما شتاتتارى دوستىق اۋىس - تۇيىسىنە ات سالىسۋعا ىنتالاندىردى.
نيلەس - نورس ورتا مەكتەبى امەريكا قۇراما شتاتتارىنىڭ يلينوس شتاتىنداعى ۇكىمەت اشقان مەكتەپ، 1964 - جىلى قۇرىلعان، قازىر وندا 2000نان استام وقۋشى بار. بۇل مەكتەپ حالىقارالىق اۋىس - تۇيىسكە باسا ءمان بەرىپ، وقۋشىلاردى شەتەل ءتىلىن ۇيرەنۋگە ىنتالاندىرىپ وتىرادى، 2008 - جىلدان باستاپ جۇڭگو ءتىلى ساباعىن اشقان، تاڭداپ وقيتىن ادام سانى 11 كلاسقا كوبەيگەن.
