تيانشان تورابى   ›   جاڭالىقتار   ›   ماڭىزدى حابارلار

شي جينپيڭ مەن پىڭ لييۋان ازيا وركەنيەتتەر تىلدەسۋ جينالىسىنا قاتىناساتىن سىرت جاقتىڭ باسشىلارىن جانە ولاردىڭ جۇبايلارىن، سونداي - اق قۇرمەتتى قوناقتاردى قارسى الدى

 وركەنيەت بەينە سۋ سەكىلدى تىرشىلىكتى رياسىز نارلەندىرەدى. تاريحتىڭ دامۋى، قوعامنىڭ گۇلدەنىپ - كوركەيۋى، ادامزاتتىڭ العا باسۋى تۇگەلدەي وركەنيەتتىڭ نارلەندىرۋى مەن جەتەكتەۋىنەن ايرىلا المايدى

  5 - ايدىڭ 14 - كۇنى مەملەكەت ءتوراعاسى شي جينپيڭ مەن حانىمى پىڭ لييۋان بەيجيڭدەگى حالىق سارايىندا قوناعاسى وتكىزىپ، ازيا وركەنيەتتەر تىلدەسۋ جينالىسىنا قاتىناساتىن سىرت جاقتىڭ باسشىلارىن جانە ولاردىڭ جۇبايلارىن، سونداي - اق قۇرمەتتى قوناقتاردى قارسى الدى. سۋرەتتە: شي جينپيڭ مەن پىڭ لييۋان سىرت جاقتىڭ باسشىلارىمەن جانە ولاردىڭ جۇبايلارىمەن، سونداي - اق قۇرمەتتى قوناقتارمەن توپتىق سۋرەتكە تۇسۋدە. سۋرەتتى شينحۋا اگەنتتىگىنىڭ ءتىلشىسى راۋ ايمين تۇسىرگەن

  شينحۋا اگەنتتىگىنىڭ 5 - ايدىڭ 14 - كۇنى بەيجيڭنەن بەرگەن حابارى (تىلشىلەر ۋاڭ جولۇن، گاي بوميڭ). مەملەكەت ءتوراعاسى شي جينپيڭ مەن حانىمى پىڭ لييۋان 5 - ايدىڭ 14 - كۇنى كەشتە حالىق سارايىندا قوناعاسى وتكىزىپ، ازيا وركەنيەتتەر تىلدەسۋ جينالىسىنا قاتىناساتىن سىرت جاقتىڭ باسشىلارىن جانە ولاردىڭ جۇبايلارىن، سونداي - اق قۇرمەتتى قوناقتاردى قارسى الدى.

  ۋاڭ حۋنيڭ قاتىناستى.

  جاز باسىنداعى بەيجيڭ، تىرشىلىك تىنىسى جالىن اتادى. كەشتەگى حالىق سارايىندا شىراق نۇرى كوز جاۋىن الادى. قوناقتاردى قارسى الۋ دۋماندى مۋزيكاسى اۋەنى ىشىندە شي جينپيڭ مەن پىڭ لييۋان سيلى قوناقتارمەن بىرگە جينسى ۇلكەن زالىنا كىردى.

  شي جينپيڭ ارناۋ ءسوز سويلەپ، جۇڭگو ۇكىمەتى مەن جۇڭگو حالقى اتىنان جۇڭگوعا ازيا وركەنيەتتەر تىلدەسۋ جينالىسىنا قاتىناسۋ ءۇشىن كەلگەن قۇرمەتتى قوناقتاردى قىزۋ قارسى الدى. شي جينپيڭ بىلاي دەپ باسا دارىپتەدى: ازيا وركەنيەتتەر تىلدەسۋ جينالىسىن وتكىزۋ − ازيانىڭ سەلبەسە دامۋ ۇلكەن اۋقىمىنا جانە ءار ەل حالقىنىڭ وركەنيەتتەردىڭ اۋىس - تۇيىسىنە، ءوزارا ۇلگى الۋىنا دەگەن تىلەگىنە ۇيلەسىپ، تۇرلىشە وركەنيەتتەردىڭ بىرگە دامۋىنا اۋىس - ءتۇيىس، ءوزارا ۇلگى الۋ تۇعىرىن ازىرلەپ بەرۋ.

  شي جينپيڭ بىلاي دەپ اتاپ كورسەتتى: وركەنيەت بەينە سۋ سەكىلدى تىرشىلىكتى رياسىز نارلەندىرەدى. تاريحتىڭ دامۋى، قوعامنىڭ گۇلدەنىپ - كوركەيۋى، ادامزاتتىڭ العا باسۋى تۇگەلدەي وركەنيەتتىڭ نارلەندىرۋى مەن جەتەكتەۋىنەن ايرىلا المايدى. ازيا − ادامزات وركەنيەتىنىڭ ماڭىزدى وشاعى، ۇزاق تاريحي قوردالانۋ بارىسىندا، ازيانىڭ الۋان ءتۇرلى، باي مازمۇندى وركەنيەتى ءبىر - بىرىنە نۇر - شۇعىلاسىن توگىپ، ادامزات ءۇشىن ەڭ بايىرعى وركەنيەت ەستەمەسى مەن ايبىندى وركەنيەت سۋرەتتەر شەجىرەسىن ساقتاپ كەلدى. بۇگىنگى تاڭدا، ازياداعى تۇرلىشە وركەنيەتتەر ەسىك اشۋ بارىسىندا اۋىس - ءتۇيىس جاساۋدا، سيىسىمدىلىق بارىسىندا بىتە قايناسۋدا، جاڭالىق اشۋ بارىسىندا دامۋدا، ازيانىڭ وركەنيەت گۇلى قازىر دۇنيە ءجۇزى ساحناسىندا كوز تارتا قۇلپىرۋدا.

  شي جينپيڭ بىلاي دەپ باسا دارىپتەدى: جۇڭحۋا وركەنيەتى 5000 جىلدان استام ۋاقىت ءۇزىلىسسىز تاريحي جالعاستىق بارىسىندا بارلىعىن قامتىپ، تاتۋ - ءتاتتى بولىپ، جاڭالىق اشىپ، ارلەندى. جۇڭحۋا حالىق رەسپۋبليكاسى قۇرىلعان 70 جىلدان بەرى، جۇڭگو جۇڭحۋانىڭ تاڭداۋلى ءداستۇرلى مادەنيەتىن قورعاۋعا جانە ونى جالعاستىرۋعا تاباندى بولىپ، جۇڭگو - شەتەل وركەنيەتتەرىنىڭ اۋىس - ءتۇيىسىن، ءوزارا ۇلگى الۋىن جەبەپ، ادامزات وركەنيەتىنىڭ العا باسۋى ءۇشىن بەلسەندى ۇلەستەر قوستى.

  شي جينپيڭ بىلاي دەدى: ەرتەڭ ءبىز ازيا وركەنيەتتەر تىلدەسۋ جينالىسىن وتكىزىپ، كوپ نەگىزدى مادەنيەتتەردىڭ كوركىن بىرگە تاماشالاپ، وركەنيەتتەردىڭ اۋىس - ءتۇيىس جاساۋ، ءوزارا ۇلگى الۋ جولىن بىرگە جوسپارلايمىز. وسى رەتكى جينالىستى باستاما ەتىپ، ءبىر نيەت، ءبىر تىلەكتە بولىپ، قول ۇستاسا بىرگە ىلگەرىلەپ، ءار ەل وركەنيەتىنىڭ اۋىس - ءتۇيىس، ءوزارا ۇلگى الۋ بارىسىندا جارقىراپ ساۋلە شاشۋىنا مۇمكىندىك جاسايىق.

  قوناعاسى كوڭىلدى دە مەرەيلى بەينەدە ءوتتى. قوناقتار مەن قوناق يەلەرى ىقىلاسپەن اڭگىمەلەسىپ، وركەنيەتتەر اۋىس - ءتۇيىسى تۋرالى تاماشا لەبىزدەر ايتىپ، دۇنيە ءجۇزىنىڭ بەيبىتشىلىگى مەن گۇلدەنىپ - كوركەيۋىن بىرگە تىلەدى.

  ديڭ شۋەشياڭ، سۇن چۇنلان، ياڭ جيەچى، حۋاڭ كۇنميڭ، ساي چي، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.

جاۋاپتى رەداكتور : سايراش تۇرارجان

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «تيانشان تورابى » الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.