شينحۋا اگەنتتىگىنىڭ 5 - ايدىڭ 16 - كۇنى بەيجيڭنەن بەرگەن حابارى. تاياۋدا جۇڭگو كوممۋنيستىك پارتياسى ورتالىق كوميتەتى كەڭسەسى، مەملەكەتتىك كەڭەس كەڭسەسى «سيفرلى اۋىل - قىستاق دامۋ ستراتەگياسى باعدارناماسى»ن (تومەندە قىسقاشا «باعدارناما» دەلىنەدى) باسىپ تاراتتى ءارى ۇقتىرۋ شىعارىپ، جەر - جەردەن، تاراۋلاردان ءىس جۇزىندىكپەن ۇشتاستىرىپ، مۇقيات دايەكتىلەندىرۋدى، تياناقتاندىرۋدى تالاپ ەتتى.
«باعدارناما» مىنالاردى اتاپ كورسەتتى: پارتيا 18 - قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى ينتەرنەت حاۋىپسىزدىگى جانە ينفورماتسيالاندىرۋ قىزمەتىنە وسكەلەڭ ءمان بەرىپ، ءبىر قىدىرۋ ستراتەگيالىق شەشىم جاساپ، ينتەرنەت - ينفورماتسيا ىستەرىنىڭ جەدەل دامۋىن ءبىر تۇتاس جوسپارلاپ ىلگەرىلەتتى. اۋىل - قىستاقتىڭ ينفورماتسيا نەگىزدىك قۇرىلعىلارى جەدەل قۇرىلىپ، جەلىدە، جەلىدەن تىسقارى توعىسقان وسى زامانعى اۋىل شارۋاشىلىعى جەدەل ىلگەرىلەدى، اۋىل قىستاق ينفورماتسيالىق قىزمەت وتەۋ جۇيەسى جەدەل كەمەلدەندى، سونىمەن بىرگە، جوعارى دەڭگەيدە جوبالاۋ كەمشىل بولۋ، بايلىقتىڭ ءبىر تۇتاس جوسپارلانۋى جەتەرسىز بولۋ، نەگىزدىك قۇرىلعى ءالسىز بولۋ، وڭىرلىك پارىق كورنەكتى بولۋ سياقتى ماسەلەلەرى دە ورىن تەپتى، بۇل ءۇشىن ينفورماتسيالاندىرۋدىڭ اۋىل - قىستاقتى گۇلدەندىرۋدەگى زور كومەسكى كۇشىن اناعۇرلىم اشىپ، اۋىل شارۋاشىلىعىنىڭ دارەجەسىن جاپپاي كوتەرۋدى، اۋىل - قىستاقتىڭ جاپپاي العاباسۋىن، شارۋالاردىڭ جاپپاي دامۋىن جەبەۋ قاجەت.
«باعدارناما» مىنالاردى تالاپ ەتتى: 2020 - جىلعا دەيىن سيفرلى اۋىل - قىستاق قۇرىلىسىندا العاشقى ىلگەرىلەۋشىلىككە قول جەتكىزۋ كەرەك. بۇكىل ەلدەگى اكىمشىلىك قىستاقتاردىڭ 4G قامتۋ مولشەرىن ٪98تەن اسىرىپ، اۋىل - قىستاقتاردا ينتەرنەتتىڭ جالپىلاسۋ مولشەرىن كورنەكتى جوعارىلاتۋ كەرەك.
2025 - جىلعا جەتكەندە سيفرلى اۋىل - قىستاق قۇرىلىسىندا ماڭىزدى ىلگەرىلەۋشىلىككە قول جەتكىزۋ كەرەك. قالا، اۋىلداردا 4Gدى ىشكەرىلەي جالپىلاستىرىپ، 5Gدى جاڭالىق اشا پايدالانىپ، قالا، اۋىلداردىڭ ”ينفورماتسيالانۋ كەمىستىگىن“ بارىنشا ازايتۋ كەرەك.
2035 - جىلعا بارعاندا، سيفرلى اۋىل - قىستاق قۇرىلىسىندا باياندى دامۋشىلىققا قول جەتكىزىلەدى. قالا، اۋىل «سيفرلى ينفورماتسيا كەمىستىگىن» بارىنشا ازايتادى، شارۋالاردىڭ ينفورماتسيادان پايدالانۋ دەڭگەيى كورنەكتى جوعارىلايدى.
وسى عاسىردىڭ ورتا شەنىنە جەتكەندە سيفرلى اۋىل - قىستاقتى جاپپاي قۇرىپ شىعىپ، اۋىل - قىستاقتىڭ جالپى بەتتىك گۇلدەنۋىنە كۇش ۇستەپ، اۋىل شارۋاشىلىعىنىڭ قۋاتتى، اۋىل - قىستاقتىڭ كورىكتى، شارۋالاردىڭ باي بولۋىن جاپپاي جۇزەگە اسىرۋ كەرەك.
