شينحۋا اگەنتتىگىنىڭ 5 - ايدىڭ 16 - كۇنى بەيجيڭنەن بەرگەن حابارى. حالىقارالىق جاساندى زەردە جانە وقۋ - اعارتۋ جينالىسى 5 - ايدىڭ 16 - كۇنى بەيجيڭدە اشىلدى. مەملەكەت ءتوراعاسى شي جينپيڭ جينالىسقا قۇتتىقتاۋ حات جولدادى.
شي جينپيڭ بىلاي دەپ اتاپ كورسەتتى: جاساندى زەردە − جاڭا كەزەكتى عىلىم - تەحنيكا توڭكەرىسىنىڭ جانە كاسىپ بۇرىلىسىنىڭ ماڭىزدى قوزعاۋشى كۇشى، ول ادامداردىڭ ءوندىرىس، تۇرمىس، ۇيرەنۋ ءادىسىن تەرەڭدەي وزگەرتىپ، ادامزات قوعامىنىڭ ادام مەن كومپيۋتەر سەلبەسەتىن، سالا اتتاپ توعىساتىن، بىرگە جاراتىپ، ورتاق يگىلىكتەنەتىن زەردەلى ءداۋىردى قارسى الۋىن ىلگەرىلەتتى. بۇكىل دۇنيە ءجۇزىنىڭ جاساندى زەردە دامۋ جاعدايىن يگەرىپ، قامال الۋ ءتۇيىنىن جانە نەگىزگى كۇش سالۋ بەتالىسىن ءدال تاۋىپ، جاسامپازدىق قابىلەتىنە جانە سەلبەستىك رۋحىنا يە جاساندى زەردەنىڭ جوعارى ساپالى دارىندىلارىن كوپتەپ تاربيەلەۋ − وقۋ - اعارتۋدىڭ ماڭىزدى بورىشى.
شي جينپيڭ بىلاي دەپ باسا دارىپتەدى: جۇڭگو جاساندى زەردەنىڭ وقۋ - اعارتۋعا جاسايتىن تەرەڭ ىقپالىنا وسكەلەڭ ءمان بەرىپ، جاساندى زەردە مەن وقۋ - اعارتۋدىڭ تەرەڭدەي توعىسۋىن بەلسەنە ىلگەرىلەتىپ، وقۋ - اعارتۋدىڭ وزگەرىس جاساۋىن، جاڭالىق اشۋىن جەبەپ، جاساندى زەردەنىڭ باسىمدىعىن تولىق ساۋلەلەندىرىپ، ءاربىر ادامنىڭ ومىرىنە قاتىستى وقۋ - اعارتۋدى، ءاربىر ادامعا تەڭ تۇرعىدا بەت العان وقۋ - اعارتۋدى، ءاربىر ادامعا ۇيلەسەتىن وقۋ - اعارتۋدى، اناعۇرلىم اشىق، يكەمدى وقۋ - اعارتۋدى جەدەل دامىتتى. جۇڭگو دۇنيە جۇزىندەگى ءار ەلمەن بىرگە نازاردى جاساندى زەردەنى دامىتۋدىڭ الدىڭعى لەگىندەگى ماسەلەلەرگە شوعىرلاندىرىپ، جاساندى زەردەنىڭ جىلدام دامۋ شارت - جاعدايىندا وقۋ - اعارتۋدى دامىتۋدىڭ، وندا جاڭالىق اشۋدىڭ وي جەلىسى مەن شاراسىن ىشكەرىلەي تالقىلاپ، ورتاق تانىم ۇيىستىرىپ، سەلبەستىكتى تەرەڭدەتىپ، بىرگە يگىلىكتەنۋدى كەڭەيتىپ، ادامزاتتىڭ تاعدىرلاس ورتاق تۇلعاسىن ورناتۋدى قول ۇستاسا ىلگەرىلەتۋدى قالايدى.
