ءتىلشى لي چۇنشيا 5 - ايدىڭ 18 - كۇنى ۇرىمجىدەن حابارلايدى. ءتىلشىنىڭ اۆتونوميالى رايوندىق ادام كۇشى بايلىعى جانە قوعامدىق قامتاماسىزداندىرۋ مەڭگەرمەسىنەن ۇعىسۋىنا قاراعاندا، اناعۇرلىم كوپ ءبىلىمدى، ونەرلى جاڭاشىل ەڭبەكشىلەردى باۋلۋ ءۇشىن، تاياۋدا «شينجياڭ ۇيعۇر اۆتونوميالى رايونىنىڭ كاسىپورىنداردىڭ جاڭاشا شاكىرت ءتۇزىمىن اتقارۋ ۋاقىتشا ءادىسى» (تومەندە قىسقارتىلىپ «ۋاقىتشا ءادىس» دەلىنەدى) العا قويىلعان. 5 - ايدىڭ 1 - كۇنىنەن باستاپ، رايونىمىز كاسىپورىنداردىڭ جاڭاشا شاكىرت ءتۇزىمىن جاپپاي اتقارعان.
كاسىپورىنداردىڭ جاڭاشا شاكىرت ءتۇزىمى ۇكىمەت جەتەكتەۋ، كاسىپورىن جاۋاپتى بولۋ، مەكتەپ قاتىسۋ پرينسيبى بويىنشا، كاسىپورىنداردىڭ تەحنيكالىق ورىندارىنا جاڭادان قابىلدانعان جانە قىزمەت اۋىستىرعان ادامداردى باۋلۋ وبيەكتىسى، ”جۇمىسشى قابىلداۋ وقۋشى قابىلداۋ، كاسىپورىنعا كىرۋ مەكتەپكە كىرۋ، كاسىپورىن مەن مەكتەپ ەكى ۇستاز بىرگە باۋلۋ“دى باستى ۇلگى ەتىپ، كاسىپورىندار مەن مەكتەپتەردىڭ سەلبەستىگى، جۇمىس ىستەۋ مەن ۇيرەنۋدى كەزەك الىپ ءجۇرۋ تاسىلىمەن كاسىپورىنداردىڭ تەحنيكالىق دارىندىلارىن باۋلۋ ءتۇزىمىن مەڭزەيدى.
«ۋاقىتشا ادىستە» مىنالار ايقىن بەلگىلەنگەن: كاسىپورىنداردىڭ جاڭاشا شاكىرت ءتۇزىمى جاسى 45كە تولماعان، كاسىپورىنمەن ءبىر جىلدان ارتىق ۋاقىت ەڭبەك توقتامىن جاساسقان تەحنيكالىق جۇمىس ورنىنا جاڭادان قابىلدانعان ادامداردى جانە قىزمەت اۋىستىرعان ادامداردى باۋلۋ وبيەكتىسى ەتەدى، باۋلۋ نىساناسى كاسىپورىننىڭ جۇمىس ورنىنىڭ تالابىنا ۇيلەسەتىن ورتا، جوعارى دارەجەلى تەحنيكالىق جۇمىسشىلاردى نەگىز ەتەدى، باۋلۋ ۋاقىتى ءبىر دە 2 جىل، ەرەكشە جاعدايدا 3 جىلعا دەيىن ۇزارتۋعا بولادى.
كاسىپورىنداردىڭ جاڭاشا شاكىرت ءتۇزىمى كاسىپورىندى نەگىزگى تۇلعا ەتىپ، ۇيىمداستىرىلىپ ورىستەتىلەدى. كاسىپورىن باۋلۋ وبيەكتىسىن دەربەس تۇراقتاندىرادى، جۇمىس ورنىنىڭ تالابىنا ساي، باۋلۋ مىندەتىن بەلگىلەيدى، باۋلۋ قۇرىلىمدارىمەن سەلبەستىك كەلىسىمىن جاساسادى، كاسىپورىندار ۇزدىك جوعارى تەحنيكا دارىندارىلارىن تاڭداپ، شاكىرت باۋليدى، باۋلۋ قۇرىلىمدارى باعىتتامالى تۇردە وقىتۋ جۇرگىزەدى، وسىلايشا سەلبەسىپ، باۋلۋ مىندەتىن ورىندايدى.
اۆتونوميالى رايون جاڭاشا شاكىرت ءتۇزىمى بويىنشا باۋليتىن كاسىپورىندارعا باۋلۋ قوسىمشا قاراجاتىن بەرەدى، قوسىمشا قاراجات ولشەمى ءار ادامعا ءار جىلى 4000 يۋان. كاسىپورىنداردىڭ جاڭاشا شاكىرت ءتۇزىمى بويىنشا باۋلۋى تەكسەرىپ، ەستەلىككە الىنعاننان كەيىن، قازىنا تاراۋلارى قوسىمشا قاراجات سوماسىنىڭ %50ىن كاسىپورىندارعا الدىن الا بەرەدى؛ باۋلۋ مىندەتى ورىندالعاننان كەيىن، كاسىپورىن باۋلۋ قوسىمشا قاراجاتىنىڭ قالعان بولىگىن ءوتىنىش ەتسە بولادى. قوسىمشا قاراجات ولشەمى ەكونوميكانىڭ دامۋى، باۋلۋ وزىندىك قۇنى، زات باعاسىنىڭ كورسەتكىشى سياقتى جاعدايلارعا ساي بىرتىندەپ وسىرىلەدى. جاڭاشا شاكىرت ءتۇزىمى بويىنشا باۋلۋ مەزگىلىندە، كاسىپورىن سەلبەستىك كەلىسىمىندەگى ۋادە بويىنشا باۋلۋ قۇرىلىمىنا شاكىرت باۋلۋ اقىسىن تاپسىرادى؛ شاكىرت باۋلۋ مىندەتىن ۇستىنە العان كاسىپورىنداعى ۇستازدار شاكىرت باۋلۋ ۇستەمە قاراجاتىنان يگىلىكتەنەدى؛ شاكىرتتىڭ ەڭبەكاقىسى ەڭبەك توقتامىنداعى ۋادە بويىنشا بەرىلەدى، جەرگىلىكتى ورىننىڭ ەڭ تومەن ەڭبەكاقى ولشەمىنەن تومەن بولمايدى.
