ءتىلشى لۋ فىڭباۋ 5 - ايدىڭ 21 - كۇنى ۇرىمجىدەن حابارلايدى. جۇڭگو تەمىر جول ءۇرىمجى مەكەمەسى توبى شەكتى سەرىكتەستىگىنەن ۇعىسۋىمىزشا، بيىل شينجياڭنىڭ تەمىر جول تاراۋى شينجياڭ ىشىندە ساياحات ارناۋلى پويەزىنەن 100ىن جۇرگىزۋدى جوسپارلاعان، قازىرگە دەيىن 8 پويەز جۇرگىزىلگەن ەكەن.
شينجياڭ تەمىر جول ساياحات دامۋ توبىنىڭ ورىنباسار باس ديرەكتورى حۋاڭ تيڭفىن بىلاي دەپ تانىستىردى: شينجياڭنىڭ تەمىر جول تاراۋى بيىل تاڭداۋلى ساياحات ارناۋلى پويەز جەلىسىنەن ءبىرقانشاسىن اشادى، جوسپار بويىنشا وڭتۇستىك پەن سولتۇستىك شينجياڭدى تولىق اينالىپ شىعاتىن ساياحات ارناۋلى پويەزىن جۇرگىزىپ، ساياحات ارناۋلى پويەزى ارقىلى وڭتۇستىك، سولتۇستىك شينجياڭداعى كورىنىس وڭىرلەرىن تۇتاستىرادى؛ سولتۇستىك شينجياڭ + تۇرپان جوعارى ولشەمدى ساياحات ارناۋلى پويەزىن جۇرگىزىپ، 4 ادامدىق جۇمساق توسەكتى ارناۋلى بولمە جانە جالعىز ادامدىق ارناۋلى بولمە ورنالاستىرۋ ارقىلى ساياحاتشىلاردىڭ ساپار بارىسىنداعى جايلىلىعىن جوعارىلاتادى؛ تەمىر جول، تاس جول، ازاماتتىق اۆياتسيا ءوزارا ۇشتاستىرىلعان ساياحات جەلىسىن اشىپ، ساياحاتشىلاردىڭ ءجۇرىس - تۇرىسىنا قولايلىلىق جاسايدى؛ شاۋەشەك جاققا قاتىنايتىن ساياحات ارناۋلى پويەزىن جۇرگىزىپ، تۇتاس شينجياڭداعى ءارقايسى ايماق - وبلىستى ساياحات ارناۋلى پويەزىمەن جاپپاي قامتۋدى جۇزەگە اسىرادى.
ۇعىسۋعا قاراعاندا، سوڭعى جىلداردان بەرى، شينجياڭنىڭ تەمىر جول تاراۋى لانجوۋ - شينجياڭ جوعارى قارقىندى تەمىر جولىن تىرەك، وڭتۇستىك پەن سولتۇستىك شينجياڭ تەمىر جولىن ەكى قاناتى ەتكەن جىلدام قاتىناس تورىنا سۇيەنىپ، ”پويەزگە وتىرىپ شينجياڭدى ساياحاتتاۋ“ ساياحات ماركاسىنىڭ جەلىلەس ونىمدەرىن ىشكەرىلەي اشىپ، ”سولتۇستىك شينجياڭدى اينالىپ ساياحاتتاۋ“، ”وڭتۇستىك شينجياڭدى تاماشالاۋ“، ”قۇبىلمالى وتتى القاپ“ سياقتى ساياحات پويەزدەرىن ىركەس - تىركەس جۇرگىزىپ، ”ساياحات كورىنىس وڭىرلەرىنىڭ بارلىعىن تۇتاستىرۋ، ساياحاتشىلاردىڭ ساپارعا شىعۋداعى كولەمدى الەۋمەتتىك قاتىناسى، ساياحات پويەزدەرىنىڭ تولىق اينالۋى“ سىندى ”تەمىر جول + ساياحات“ توعىسا داميتىن جاڭا ۇلگى جاراتقان.
شينجياڭ ىشىندە ساياحات كەزەكشى پويەزىن جۇرگىزۋدەن سىرت، بيىل شينجياڭنىڭ تەمىر جول تاراۋى تاعى ىشكى جەرلەردىڭ تەمىر جول تاراۋلارىمەن سەلبەسۋدى كۇشەيتىپ، ىشكى جەرلەردىڭ ساياحات ارناۋلى پويەزدەرىنىڭ شينجياڭعا قاتىناۋىن ۇزدىكسىز ىلگەرىلەتەدى، قازىرگە دەيىن ىشكى جەردەگى بىرنەشە ولكە ساياحات ارناۋلى پويەزىن شينجياڭعا جۇرگىزۋ جوسپارىن تۇراقتاندىرىپ بولعان.
حۋاڭ تيڭفىن بىلاي دەدى: شينجياڭنىڭ تەمىر جول تاراۋى شينجياڭنان شىعىپ ساياحاتتاۋ جەلىلەرىن ونان ارى كوبەيتەدى، سوڭعى جارتى جىلدا شياڭگاڭ - جۋحاي - اۋمىن، گۇيلين - گۇيياڭ باعىتىنداعى ساياحات ارناۋلى پويەزىن، سونداي - اق جازدىق كانيكۋل كەزىندە بەيجيڭ، داليان، چيڭداۋ باعىتىنا قاتىنايتىن ساياحات ارناۋلى پويەزىن جۇرگىزىپ، شينجياڭداعى ساياحاتشىلاردىڭ شينجياڭنان شىعىپ ساياحاتتاۋ قاجەتىن قاناعاتتاندىرۋدى جوسپارعا الدى.