كەزەكشى پويەزداردىڭ بەلەتى ساتىلا باستادى
ءتىلشى لۋ فىڭباۋ 5 - ايدىڭ 23 - كۇنى ۇرىمجىدەن حابارلايدى. ءتىلشىنىڭ 5 - ايدىڭ 22 - كۇنى اشىلعان قارامايلى - شاۋەشەك تەمىر جولىنىڭ ىسكە قوسىلۋى جونىندەگى اقپارات جاريالاۋ ماجىلىسىنەن ۇعىسۋىنشا، جۇرت نازارىن اۋدارعان قارامايلىدان شاۋەشەككە باراتىن تەمىر جول 5 - ايدىڭ 30 - كۇنى ىسكە قوسىلىپ، پويەز قاتىنايدى ەكەن، بۇل شينجياڭداعى ەڭ سوڭعى ءبىر ايماق - وبلىس ورتالىق قالاسى − شاۋەشەك قالاسىنا پويەز قاتىناماعان تاريحتى اياقتاتادى.
قارامايلى - شاۋەشەك تەمىر جولى − شينجياڭ تەمىر جول تورى كۇيتۇن - بەيتۇن تەمىر جولىنىڭ تارماق تەمىر جولى، جالپى ۇزىندىعى 271 كيلومەتر، كۇيتۇن - بەيتۇن تەمىر جولى اقبۇلاق ۆوكزالىمەن تۇتاسىپ، قارامايلى قالاسىن بويلاپ، اقبۇلاق مۇناي الابىنان سولتۇستىككە بەتتەپ، تولى اۋدانىنىڭ تەمىرتام قالاشىعىن، ءدوربىلجىن اۋدانىن باسىپ ءوتىپ، شاۋەشەك قالاسىنا بارادى. جوباعا نەگىزدەلگەندە، قارامايلى - شاۋەشەك تەمىر جولىنىڭ بويىنداعى پويەز ۆوكزالدارىنداعى تەمىرتام ۆوكزالى، ءدوربىلجىن ۆوكزالى جانە شاۋەشەك ۆوكزالى جولاۋشىلار ۆوكزالى بولادى، شاۋەشەك ۆوكزالى 5 - ايدىڭ 30 - كۇنى قۇرىلىسىن تامامداپ، جولاۋشى تاسىمالداۋ كاسىبىن باستايدى، تەمىرتام ۆوكزالى، ءدوربىلجىن ۆوكزالى قازىر سالىنۋ ۇستىندە، قۇرىلىس سالىنىپ بولعاننان كەيىن ىركەس - تىركەس ىسكە قوسىلادى.
شينجياڭ تەمىر جول تاراۋلارى كۇنىنە 3 جۇپ جولاۋشىلار پويەزىن جۇرگىزىپ، بۇقارانىڭ ساپارعا شىعۋ قاجەتىن قاناعاتتاندىرادى، 3 جۇپ كەزەكشى پويەزدىڭ بەلەتى 5 - ايدىڭ 23 - كۇنى ساعات 10نان باستاپ ساتىلادى. پويەزدىڭ بەلەت باعاسى: ۇرىمجىدەن شاۋەشەككە دەيىنگى تۇتاس بارىستىڭ قاتتى ورىندىعىنىڭ باعاسى 93 يۋان، قاتتى توسەكتىڭ ۇستىڭگى قاباتى، ورتاڭعى قاباتى، استىڭعى قاباتى جەكە - جەكە 163يۋان، 168 يۋان، 174 يۋان، جۇمساق توسەكتىڭ ۇستىڭگى قاباتى، استىڭعى قاباتى جەكە - جەكە 251 يۋان، 263 يۋان؛ شاۋەشەكتەن كۇيتۇنگە دەيىنگى ارالىقتا قاتتى ورىندىقتىڭ بەلەت باعاسى 64.5 يۋان، قاتتى توسەكتىڭ ۇستىڭگى قاباتى، ورتاڭعى قاباتى، استىڭعى قاباتى جەكە - جەكە 115.5 يۋان، 119.5 يۋان، 122.5يۋان، جۇمساق توسەكتىڭ ۇستىڭگى قاباتى، استىڭعى قاباتى جەكە - جەكە 175.5 يۋان، 182.5يۋان.
تارباعاتاي ايماقتىق دامۋ جانە رەفورما كوميتەتى پارتيا باسشىلىق گرۋپپاسىنىڭ مۇشەسى، ورىنباسار مەڭگەرۋشىسى، قوسىمشا تەمىر جول كەڭسەسىنىڭ ورىنباسار مەڭگەرۋشىسى ما لين بىلاي دەدى: شاۋەشەك قالاسى قازىر شينجياڭداعى تەمىر جول قاتىناماعان بىردەن - ءبىر ايماق - وبلىس ورتالىعى، قارامايلى - شاۋەشەك تەمىر جولىنىڭ ىسكە قوسىلىپ، پويەز قاتىناۋى تارباعاتاي ايماعىنىڭ تاس جول، تەمىر جول، حالىقتىق اۆياتسيا ستەرەولدى جالپىلىق قاتىناس تورىن قالىپتاستىرىپ، تارباعاتاي ايماعىنداعى ءار ۇلت بۇقاراسى ءۇشىن حاۋىپسىز، جايلى، ارزان تەمىر جول قاتىناس ءتاسىلىن ازىرلەۋمەن، سونداي - اق شينجياڭنىڭ ءىشى - سىرتىنداعى جولاۋشىلاردىڭ تارباعاتاي ايماعىنا كەلىپ تاماشالاۋى، ساياحاتتاۋى، ساۋدامەن شۇعىلدانۋى سياقتىلارعا قولايلىلىق جاساۋمەن قاتار، تارباعاتاي ايماعىنىڭ مول كەن ونىمدەرىنىڭ سىرتقا تاسىلۋى ءۇشىن دە ”سىرتقا شىعاتىن“ ”التىن لەنيا“ اشادى.
